Валентин Белых
Искусство

Валентин Белых

442 {num}

Валентин Белых – Удмуртиысь калык суредась, кун премилэн лауреатэз, Россиысь Суредаськисьёслэн огазеяськонзылэн ёзчиез. Вордскемын Дэбес ёросысь Сенькагуртын. Йылпумъяз Казанысь художественной училищеысь театрально-декорационной ёзэтэз. Художник-постановщик луыса ужаз Сарапулысь, Ижкарысь, Екатеринбургысь театръёсын. Озьы ик со «Алангасарлэн вужерез» фильмлэн суредасез. Валентин Леонидовичлэн ужъёсыз кунгож сьӧрын но тодмо, нимысьтыз возьматонъёсыз ортчизы Будапештын но Лондонын. Туннэ нуналлы Удмурт Элькунысь Кун йӧскалык театрын декорациос малпа, живопись амалэн суредаське, тросаз ужъёсаз удмурт калыклэсь историзэ возьматэ.

– Валентин Леонидович, кызьы суредаськон удысэ вуиды, мар бордысен ваньмыз кутскиз?

– Пичи дыръяз котькыӵе нылпи суредаськыны яратэ.  Нош со яратон котькудӥзлэн аспӧртэмлыко луэ: одӥгез мылысь-кыдысь, сюлэмзэ поныса суредаське, мукетыз – огшоры соин выре. Мон понна суредаськон пичи дыръям тужгес яратоно «шудонэ» вал.  Ачим сярысь тазьы верало: монэ Инмар чупам, дыр. Соин ик быгатонлыке но суредаськыны яратонэ, мукетъёсын ӵошатыса,  золгес висъясько.  Школаын дышетскыкум суредаськон тодмет луылӥз.  Соку дышетӥсе  вераз: «Тынад умой пӧрме. Одно ик суредаськон студие мыноно». Воткаысь «Юбилейной» лулчеберетъя Двореце мыныса, монэн рос-прос ужаны кутскизы. Дышетскыса, ужаса, суредаськыны яратонэ быдӟымгес луиз. Инмар юрттэмен, бадӟым конкурсэз ортчыса, Казане но дышетскыны пыри. Бен, зэмос ӧнерчи кадь суредаськыны туж секыт. Отчыозь будыны кулэ. Тынад «корочкаед»  луиз ке но, со ӝыны сюрес гинэ ай.  Ужаны но астэ возьматыны кулэ. Соин пӧртэм адӟытонъёсты ортчытӥ. Тыршемъёсы огшоры ӧз луэ: быгатонлыкме адӟылӥзы, ужъёсме ушъяллязы, вормонъёсы понна кузьымъёс сётъяллязы. Соку мылкыды ӝутскиз, бурдъяськиз, азьланезлы ужаны оскон сётӥз. 

– Егит дыръяды кыӵе шуг-секытъёсын пумиськиды суредаськон сюресады?

– Егит дыръя улонын аслыд инты утчаськод, адями пӧлы потыны тыршиськод.  Нош со капчиен гинэ уг сётӥськы, кылын но сое уд вормы.  Ужъёстэ возьматоно, тыршемдэ но тунсыкъяськемдэ усьтыны тыршоно. Егитъёслы уж но шедьтыны секыт.  Куке гырпумъёсын донгаськыса но улон сюрестӥ вамышъяны тупа.  Озьы ик аслэсьтыз рользэ шудэ на вылӥ но шор ёзо дышетскон. Училищеын вылӥ дышетскон уд басьтӥськы ук. Соин улонам  монэ ултӥян но палэнтылон дыръёсы луылӥзы. Нош дыр ортчыса, ужъёсме дунъяны кутскизы, быгатонлыкме гажазы. Тужгес но удмурт батыръёсты, калыкмылэсь вашкала улонзэ суреданы кутскеме бере.

– Мар бордысен батыръёсты суреданы кутскиды?

– Со малпанэз мыным Юрий Лобанов ӵектӥз. Батыръёсты, пе, нокин ӧз суреда на. Дышетскем ӧнерея мон художник-декоратор бере, историен герӟаськем суредъёс мыным капчиен сётӥсько. Угось театр котькыӵе вакытъёсы, дауръёсы выйыны быгатонлык сётэ.  Маргарита Гришкина 20 батыръёслэсь лыдъетсэ сётӥз. Бен, удмурт батыръёсмы солэсь но трос – 20 гинэ ӧвӧл, ог 40 пала тодмо.  Нош ваньзэ ӧй суреда ни. Съездлы шуыса суредам батыръёсын буклет радъямы, собере пиналъёслы нимысьтыз альбом дасямы.  Мон шумпотыса уж борды кутскисько, куке сое та дырозь нокин ӧз лэсьты. Котькинлэн Колумб но, Беринг но луыны мылкыдыз вань ук.  Мынам но лулчеберетэн герӟаськем ужын нырысетӥ луэме потэ. 

– Малы Тӥ  живопись амалэн суредаськонэз бырйиды? 

– Вӧй буёлэн суредам уж ачиз сярысь туж трос вераны быгатэ.  Солы оскиськод, со пушкы выйиськод.  Карандашен но акварелен лэсьтэм суредын ваньзэ возьматыны  уг луы. Котькыӵе крезьгурез балалайкаен гинэ но шудыны луэ.  Нош пӧртэм крезьгур инструментъёсты ӵош люкад ке, ваньмыз воштӥське ни.  Озьы ик суредаськонын но. 

– Кыӵе суредъёсты лэсьтыны яратӥськоды?

– Суредаськисьёслэн кыллюкамазы  «рынок» но «вылӥ искусство» веранъёс вань.  Огпаласен, асьмеос  капитализм дырын улӥськомы. Нуналлы быдэ уксё кулэ.  Соин туннэ нуналлы вузан понна, калык понна суредаськисько.  Нош мукет паласен,  нимысьтыз возьматонъёслы шуыса суредам ужъёсы но вань.  Кылсярысь, одӥг суредэ  «Крестоносцы» шуыса нимаське. Со ужез дораз ошыны нокин уг дӥсьты. Нош музейёсын, возьматонъёсын со туж умой адӟиське. 

–  Кыӵе Тӥляд самой яратоно ужды?

– Мынам сыӵе валанлыке  ӧвӧл. Анай но аслэсьтыз нылпиоссэ уг висъя ук, ваньзэ одӥг кадь адӟе. Мон но озьы ик.  Кыӵе ке суред шоры яратыса учкиськод ке, азьланьлыкед пытсаське. Буйгатскиськод, каньыл луиськод. «Та мынам самой чебер уже. Уг ни суредаськы. Аслым кулэзэ басьтӥ ини. Шутэтскыны кулэ», – таӵе веранъёс копак луыны кулэ ӧвӧл. Мышке учкытэк, котьку азьлань  дыртоно. Пыдын но мыноно ӧвӧл, вал вылын ворттоно. Номыр но лэсьтыны быгатӥсьтэм пересь луид ке, соку аслыд йылпумъян лэсьтыны луоз ни: маиз пӧрмиз, маиз – ӧз. Удмурт кылын вераса, али мон «кын корт куртчон вакытам» на. Быгатонлыке но, йырвизе но вань. Соин ужано но ужано…

– Кызьы вордӥсько Тӥляд суредъёсты? Лултылды, ӟуч сямен вераса, вдохновениды, мар бордысен потэ?

– Малпасько, нуналысен нуналэ ужаны кулэ, соку гинэ зэмос художественной уж кылдэ. Нош гур вылын вдохновениез витьыса кыллид ке, номыр уз пӧрмы. Вдохновениез бубылиен ӵошатыны луэ. Ужась, тыршись адями доры гинэ со укнотӥ пыра но ки вылаз пуксьыса суредаськыны юрттэ. 

– Тӥ спектакльёслы (берпуметӥез – «Чупчи крезь»), киноослы (нырысетӥосыз пӧлын – «Алангасарлэн вужерез»)   декорациос суредады. Маин висъясько та ужрадъёс картинаосты суреданлэсь?

– Жанрезъя, искусство амалэзъя. Кино но театр ог-огзылы матынгес луо.  Театрлы декорациосты сценической коробкаын лэсьтӥськод. Кинолы –  зэмос улонлэсь интызэ кадь радъяськод, шудон интыез камераетӥ учкиськод, малпаськиськод, мае воштоно, ватсано, куштоно.  Огъя вераса, декорациосты лэсьтонын образно малпаськыны кулэ. Со сяна, спектакльын яке киноын валтӥсь ужпумзэ возьматыны ярась идеяез – шормалпанэз но – куке шедьтыны секыт луэ, малы ке шуоно декорациос артистлы роляз выйыны юртто: кызьы сцена вылын вераськоно, астэ возёно, мылкыдъёсты возьматоно, кыӵе дӥськут дӥсяно, ваньмыз таос валче думемын, одӥгез мукетыз улсын потэ. Егит дыръя секыт ваньзэ сое лэсьтыны. Ужамъя гинэ быгатон будэ, ваньмыз капчиен сётӥське. 

– Кыӵе Тӥляд яратоно суредаськисьёсты?

– Соос мынам туж трос. Яратӥсько импрессионистъёсты, передвижникъёсты, Совето вакытысь суредаськисьёсты, туалаосыз шоры но учкисько. Суредаськон уж тодос кадь уг азьланьтӥськы ук. Вашкала дыръя лэсьтэм ужъёс али но вылӥ дунъясько. Соин туала суредъёсын соос одӥг интыын мыно. 

– Туала дырын суредъёсты Интернетысь шедьтыса поттыны луэ. Мар вералоды та пумысен?

– Таӵе амал но улонын интызэ шедьтэ. Нош со лулчеберетлы чик матын ӧвӧл. Со огшоры ужбергатон гинэ. Борддоре лякем обой яке Китайын лэсьтэм арбери кадь со. Нош зэмос суредъёс вераны быгатонтэм дуно. Отын люкаськемын суредаськисьлэн улонэз, малпанъёсыз, быгатонлыкъёсыз. Сое немаин ӵошатыны но воштыны уг луы.