Ким Ки Дук
Кино

Ким Ки Дук

516 {num}

Ким Ки Дук – быдэс дуннелы тодмо корейской режиссёр, сценарист, актёр. Солэн ваньмыз сямен ик фильмъёсыз нимысьтыз премиосын пусъемын.

– Малы Тӥляд киноды берло дыре чалмытгес но чалмытгес луэ?

–  Адямиос  та дуннеын дугдытэк верасько, нош киноын мынам возьматэме потэ  геройёслэсь  мар ке но лэсьтэмзэс, асьсэды воземзэс. Нош вераськытӥсько мон соосты  кулэ луыкуз гинэ. Угось сюжетэз усьтон  яке мылкыдэз суредан понна  кинематографлэн туж трос мукет амалъёсыз но вань  – кылсярысь, крезьгур, буёл, тыл-югыт, актёръёслэн шудонзы.

– «Натянутая тетива» фильмын  Тӥляд пересьты адямиослэсь азьпал улонзэс маде, ӟечыранын пукись ныл шоры пукыӵен ыбылыса: солэн пукыӵ ньӧлъёсыз, ӟечырась ныл вӧзтӥ ортчыса, яке  солэн паллян палаз, яке бур палаз мертчисько. Мар со озьы тодэ аслаз клиентъёсыз сярысь?

– Со сярысь со огпол но шара уг вера. Озьыен, учкисьёс асьсэос мед малпалозы, мар сярысь пересь вера шуыса. Зэмзэ ке мынам аслам но та фильм сярысь номыр вераме уг поты – котькудӥз учкись сое аслаз визьмызъя ачиз сямен мед валалоз.

– Та фильмысь нылаштэс Тӥ возьматӥськоды кыӵе ке исамтэ сяськаез кадь,  но со дыре ик та нылаш туж быгатыса кивалтэ аслаз пересеныз...

–  Котькуд нуны, ачиз но валатэк, туж быгатыса кивалтэ аслаз анай-атаеныз, озьы ӧвӧл шат?

– Нош кызьы Тӥ валэктӥськоды пересьтылэсь образзэ?

– Мон сямен, та пересь – эгоист, но со учкись, кин малпа сое «ортчем адями» шуыса, ачиз ик луэ «ортчем адями».  Угось куд-огез егитъёс малпало, егитъёсты яратыны егит арлыдоослы гинэ право сётэмын  шуыса. Но пересьлэн но яратыны правоез вань, солэн яратонэз туж мур но юн луэмын ке.

– Кызьы Тӥ доры лыкто фильмъёстылэн малпанъёссы?

– Мон адӟисько учырез, ужпумез но уг тодӥськы, кызьы сое лэсьтыны, мон со борды пыкиськисько борддор борды сямен. Сое котыртыса ортчон интые, мон со вылэ тэтчисько. Шӧдӥсько кужымлэсь жильыртэмзэ. Вот озьы кылдо малпанъёс, мукет сямен мыным секыт сое валэктыны.

– Тӥляд фильмъёсты ӵемысь дыръя кутско шимес сценаысен. Тӥ юромо учкисез кышкатӥськоды-а?

– Кулэ ук кызьы ке но сое кулон сярысь малпаськытыны. Мон ачим но со сярысь ӵем уг малпаськы, нош куке малпаськисько, валасько, со сокем матын шуыса. Тани тон шокаськод, тани тон шокандэ дугдытӥськод, шокамысь дугдӥд – но со татын ини.

– Тӥляд геройёсты ӵем дыръя лэсьтэм ужзы сярысь уг ик  малпасько. Тӥляд малпамдыя, адямиосын кивалто дартъёс?

– Зэмзэ верано ке, мон туж кышкасько яратонлэсь, нош номыр кареме уг луы, кулэ луэ соин соглаш кариськыны. Нош дартъёс сярысь верано ке, мыным потэ, адямиос кыӵе ке ужпумен пумисько ке, сое быдэстон интые, малы ке но палэнэ тэтчо-пегӟо. Мынам героиняе но, тодыса, солэн кузпалыз сое мукетыныз пӧя шуыса, тюрьмае мынэ. Солэн уг  поты сопал дуннее приговорить карем адямилы 
синмаськемез, солэн потэ яке дырез вормемез, яке кыӵе ке но выль шӧдонъёсты шӧмъямез, валамез.

– Тӥляд геройёсты котькугес ик семья улонын шудтэмесь луо? Малы?

– Жаляса верано, зэмос яратон аръёс ортчемъя пӧрмытске экономической малпанъёсты валтӥсь яратонлы. Мар соин кароно, уг тодӥськы.

– Тӥляд котькуд фильмады эскерисько пиосмуртлэн но кышномуртлэн кусыпъёссы, но ӵемысь Тӥ ноку возьмамтэзэ возьматыны быгатӥськоды, кылсярысь, со пумысен, кытчы со кусыпъёс быгато нуыны…

– Пиосмурт но кышномурт – кык пӧртэм дуннеос, кык инсьӧр дуннеос, кудъёсызлы кулэ луэ ог-огенызы герӟаськыны. Та кык палдуръёслэн ожмаськонзы – со асьме улонмылэн лейтмотивез, котькуд шорысен учкид ке но. Улон люкаське-кылдэ-висъяське пӧртэм кышкатскон  учыръёслэсь,  куд-ог шорын со кошке отчы, кытын нокыӵе оскон ик уг кыльы, со быдэсак ӵушиське-ыше, но со дыре ик отчы люкасько-итӥсько на пӧртэм шумпотонэз но мӧзмонэз шӧдонъёс. Со аспӧртэм йырын валаны луонтэм алхимия, кудӥз вордске кышномурт но пиосмурт дуннеослэн ваче шуккиськылонъёссы но огинэ луонъёссы вылын – ӵапак сое ик мон вераны турттӥсько аслам фильмъёсам. 

– «Остров» сюлэмъёсмес куалектытӥз «насилиеныз», но со ик «Лики любви» фестивальын приз басьтӥз. Кызьы одӥгез тупа мукетыныз?

– Мон верасько чебер насилие сярысь. Яратон – со воксё но шудбур ӧвӧл, со  шудтэм луон. Мон ачим егит дыръям ортчи семья насилие пыртӥ, армиын, полициын ужасьёслэсь. Дыр ортчемъя мон валай, мар со насилие – со одӥгез адямилэн вераськон кылызлэн формаез. Мон уг кутӥськы насилиез сенсация понна, уг данъяськы сое. Мон возьматӥсько сое формаез сямен но адями улонлэн амалэз сямен. Насилие вордэ  мар ке но ӟечлыко выльзэ. Но насилилэн мукет пӧртэмлыкез но вань. Тужгес но бадӟым насилие «Адрес неизвестен» фильмын – со ожмаськон но, со ик Кореяын американ армилэн кузёяськемез. 

– Американецъёслэсь азьвыл насилие ӧй вал-а?

– Куке но Корея вал ӟеч но вылӥлыко сямъёсын шаер. Ваньмыз воштӥськиз японецъёс Кореяе «вамыштэм» бӧрсьы, граждан ож бӧрсьы, американ оккупация бӧрсьы. Корей калык ыштӥз аслэсьтыз лулсэрзэ, но табере кулэ тыршыны сое берыктыны. 

– Тӥляд фильмъёсады котьку но вань «клаустрофобия» мылкыд, но соос пушкын котьку но бадӟым инты басьтэ пейзаж: ву, музъем, нош со дыре ик котьку но уг тырмы кадь омыр…

– Зэм, мынам персонажъёсы уло клеткаын сямен. Нош улон – со клетка ик вань, кудӥз пушкысь кулыса гинэ потыны луэ. Пейзаж мон понна зэмзэ но валтӥсь интыын луэ – персонажъёслэсь но геройёслэсь кулэгес. Кореяын туж чебер пейзаж, но со военной базалэн…  

– Тӥляд фильмъёсты калыккуспо фестивальёсын  тужгес но валтӥсьёсыз луо. Кызьы валэктоно Европаын корей кинолэсь вӧлмись луэмзэ?

– Мон быгатӥсько вераны ачим понна гинэ. Дас ар талэсь азьвыл мон кошки Европае, улӥ Грециын, Италиын, Франциын, но соку вордскизы уно пӧртэм малпанъёс, кудъёссэ мон бӧрысь аслам фильмъёсам кутӥ. Мон кошки кунгож сьӧры, живописьлы дышетскыны шуыса, нош берытски кинорежиссёр луыса. Тросэз мынам корей кино пуктӥсь тодмоосы шаерлэсь палэнэ уг потало, уг тыршо дышетскыны мукет кино лэсьтон амалъёслы. Соослэн фильмъёсазы нырысь интыын сылэ сюжет, нош монэ тунсыкъяськыто образъёс, символъёс. Куд-огез кадръёс мынам фильмъёсам суредэз тодэ вайыто. Живопись доры берытсконо ке, отын мынам кумиръёсы кылё Рубенс но Рембрандт.

– Кызьы шаерады учко Тӥляд быдэс дуннее вӧлмем тодмолыкты шоры? 

– Монэ, конечно, тодо, вань сыӵе режиссёр шуыса, кудӥз корей кинематографиез кунгож сьӧрын возьматэ. Но шаерам мынам фильмъёсы умой чотын уг лыдъясько. Корей калык уг учкы мынэсьтым киноме, нош кин ке но сое учке ке но, со  уггес вала. Тросэз мынам шаерам малпало, Ким Ки-Дуклэн фильмъёсыз дуннелы корей калыклэсь урод палдуръёссэ гинэ возьмато шуыса. Татын кӧня ке зэмлыкез но вань, дыр... 

Нырысетӥ фильмъёсы экранъёсы вуэм бере – «Крокодил», «Остров» но «Адрес неизвестен» – мынэсьтым ялан юало вал, вань-а, пӧй, мынам «моральной убеждениосы».  Мон котьку сямен шуылӥ: «ӧвӧл». Но зэмзэ ке, соос, конечно, мынам вань. Мон уг кышкаськы аслам фильмъёсам возьматыны корей калыклэсь урод, пеймыт палдуръёссэ – мон сямен, со ик луэ, дыр,  моральлэн вордӥськонэз, адӟиськонэз. 

– «Весна, лето, осень, зима... и снова весна» фильмын Тӥ шудӥды героез мӧйымем дыръяз, кудӥз аслыз сьӧлыкъёсыз понна кышкыт кылкутон гожтэ. Мар Тӥ асьтэос шӧдӥды, куке асьтэлэсь кустэс герӟады гозыен, кудӥзлэн мукет пумаз секыт изэз юнматӥды, киосады кутӥды Буддалэсь статуязэ но озьы ӝужыт гурезе ӝутскиды? Тӥ ведь сое лэсьтӥды кадрын зэмзэ но – виресь яраосын.

– Мынам возьматэме потӥз, улонэз улыны туж секыт – кызьы гурезь вылэ кыскыны секыт статуяез,  эшшо ке юнматэм изэн ӵош, кудӥз кыске берлань. Мон лыдъясько, ваньмыз  – пичиысен бадӟымозь – нуо асьсэ улоназы асьсэлэсь иззэс.