Гензель но Гретель. Братья Гримм
Детская литература

Гензель но Гретель. Братья Гримм

361 {num}

Выжыкыл

Улӥзы-вылӥзы вынэн сузэръёс, нимазы соосты Гензель но Гретель. Соос улӥзы атаеныз но сюранаеныз нюлэс пумысь пичи коркан. Соослэн атайзы куанер пукорась вал. Нош сюранайзы соосты ӧз яраты.
Одӥг пол со шуиз пукорасьлы: «Асьмелы но сиёнмы уг тырмы. Ӵуказе нылпиостэ ас сьӧрад басьтод но кельтод соосты нюлэскы». Пукорась бӧрдыны кутскиз: «Мон уг быгатӥськы озьы карыны!» Нош кышноез сое чурыт кырмиз. Гензель но Гретель та вераськонэз кылӥзы. Уйин Гензель шыпытак гинэ потӥз но кисыосаз тӧдьы кӧльыосты бичаз.

Ӵукна сюранайзы сайкатӥз нылпиосыз: «Султы, Гензель, султы, Гретель! Атайды сьӧры мынэлэ, пу люкалэ». Гензель но Гретель мынӥзы атайзы сьӧры нюлэскы. Кӧня ке вамышъёс бӧрсьы Гензель музъем вылэ кӧльыос куштылӥз. Куке соос пыризы мур ӵашае, пукорась шуиз: «Нылпиос, шутэтске татын. Мон ӝоген вуо».

Вуиз уйшор, нош пукорась ӧз вуы. Гретель бӧрдыны кутскиз. «Эн сюлмаськы, асьмеос шедьтом дорамы сюрес!» – буйгатӥз Гензель. Гензельлэн куям тӧдьы кӧльыосыз толэзь улын чильпыразы. Нылпиос кошкизы кӧльыос вылтӥ но доразы вуизы.

Сюранайзы соослы шум ӧз поты. Со сюдӥз соосыз чырс нянен. Та уе сюранайзы ӧсэз ворсаз, Гензельлэн кӧльы бичамез медам луы шуыса. Мукет ӵукнаяз пукорась нош ик нуиз Гензелез но Гретелез нюлэскы. Кӧня ке вамышъёс бӧрсьы Гензель кутскиз музъем вылэ нянь пырыосты куяны.

Пукорась нош ик куштӥз соосыз нюлэскы. Куке пеймытаз, Гензель но Гретель турттӥзы доразы сюрес шедьтыны нянь пырыос кузя. Жаль! Соосыз кокчазы бурдоос. Кышкам нылпиос  кошкизы нюлэскы эшшо кыдёкегес. Соос мынӥзы но мынӥзы. Шӧдтэк шорысь адӟизы паймымон коркаез. Гензель чабкиськиз: «Ой, пряник корка! Со пуктэмын шоколадлэсь, пироглэсь, печеннялэсь но конфетъёслэсь!»

Нылпиослэн туж сиемзы потӥз. Соос соку ик кутскизы сиыны. Шӧдтэк шорысь куараез кылӥзы: «Кин сие мынэсьтым коркаме?» Гензель но Гретель учкизы вылӥе. Отын сылэ вал пересь лек кышномурт вож шляпаен. Кышномурт шумпотыса киоссэ зыраз  но шуиз: «Ням-ням! Мон сиё тӥледыз кыкнадэс ик, но нырысь кулэ, дыр, кӧня ке сюдыны, сотэк укыр пичиесь». Со пытсаз Гензелез клеткае, нош Гретелез дорысьтыз вань ужзэ лэсьтыны косӥз.

Кӧня ке нунал ортчыса кышномурт шуиз Гретельлы: «Туннэ мон сиё тынэсьтыд вындэ! Мын, чакла, араз-а гур! Гретель валэктӥз: «Мон уг быгатӥськы». Кышномурт кеськиз со вылэ: «Валасьтэм нылаш! Мон ачим чаклало!» Куке кышномурт мыкырскиз гурзэ учкыны, Гретель донгиз сое вань кужмысьтыз. «Пыр отчы!» – кеськиз Гретель но ӧссэ ворсаз. Со поттӥз Гензелез. Коркалэн сэргысьтыз шедьтӥзы соос быдэс мешок зарни манетъёс. Гензель басьтӥз сое но соос кошкизы.

Гензель но Гретель доразы сюрес шедьтӥзы. Атаез шудо вал, соосты адӟыса. «О, нылпиосы, мон сокем зол тӥтэк мӧзми! Сюранайды кулӥз», – вераз со синвуосыз пыр. Гензель сётӥз солы зарниез но шуиз: «Атай, тыныд ноку но кулэ уз улы ни нюлэс кораны». Соос улӥзы кема но шудо.

Берыктӥз Лариса Орехова.