Римма Николаева. Ворекъясь тылы
Детская литература

Римма Николаева. Ворекъясь тылы

376 {num}

Выжыкыл

Улэм-вылэм одӥг гуртлэн пумаз, паськыт шур дурын, егит пияш. Анай-атаез улонысь кошкыкузы, пизылы пичигес корка но ӟеч утялтэм бакча гинэ кельтӥллям. Кызьы гурт калык музъем ужез ужаса улэм, озьы ик егит Очан но бакчаяз пӧртэм емыш будэтэм, базаре нуллыса вузаны кутскем. Емышез туж ӟеч удалтэм, малы ке шуоно Очан убооссэ, шур вуэн киськалоз вылэм.

Шур доры котькуд ветлэмаз, шур сьӧрысь кыдёкысь гурт шоры учкылоз вылэм: «Кинъёс меда отын уло? Мар каро? Шур таӵе паськыт ӧй ке луысал, одно ик адӟыны ветлысал».

Одӥг ӵукна вулы васькыкуз, сопал ярдурысь мисьтаськись нылашез синйылтэм. Ӝыт вулы мыныкуз но нылаш озьы ик пуке, пе. Саесъёсыныз синъёссэ ӵушылэмезъя Очан валам, нылаш бӧрдэ шуыса.

– Мар луиз, чебер ныл, оло, мон маин ке юрттыны быгато?! – кеськем солы Очан.

– Мукет пал ярдурын пукыса, маин бен тон юрттыны быгатод? – пумитаз вазем нылаш.

– Мон али ик дорад уяса пото! – шуэм мар вераны паймем пияш.

Секыт ке но, нырысьсэ паськыт шур вамен уяса потэм. Быгатэмезлы ачиз ик шумпотэм: «Малы азьвыл тазьы шур вамен уяса потыны тодам ӧз лыктылы?»

– Очан мон. Тынад нимыд кызьы? – Штани кукъёссэ, дэрем саесъёссэ пызьыръяса юам пияш.

– Огаш. 

– Кыӵе юрттэт кулэ?

– Юнме тон, Очан, шур тапала потӥд. Мон огшоры гинэ верай вал, таӵе паськыт вуэз уяса потэмед уз луы шуыса. Сюратае пӧртэм ужен ӝокатэ, шокчыны дыр ик уг сёты. Быдэсъям уже но солы уг кельшы, янгыш интыоссэ гинэ утчаса улэ. Котькуд шорем нянен туйылэ: «Азьтэм вайыж! Дась тыкос!» – бам кузяз быльырам синвуоссэ ӵушылэ Огаш.

– Нош анаед?

– Нокинлы кыл вераны но уг сёты, анае ачиз солэсь кышка.

Очанлэн сюлмаз, жалян сяна, нырысь адӟемаз ик яратон тылӝу гомӟем. Малпам Огашез аслыз кураны. Нылашлэн сюратаез серем гинэ карем:

– Нош сопал ярдуре выль кен тонэн ӵош шур вамен уяса потоз-а?

Очан кызьы но озьы пыж выллем уясь арбери йӧндырем. Нош ик нылашлэн дораз лыктэм.

– Вузам бакча сиёнъёсыныд гинэ ванё уд луы, мын ай татысь, бакча сульдэр, ми нылмылы мукетсэ, йӧнозэгес эмеспи шедьтом.

Егитъёс медам пумиськылэ ни шуыса, сюратаез нылашез пытсэт сьӧры, кеносэ, ӵогам. Очан яратоно нылызлэсь мӧзмыса куасьмыны ӧдъям. Бакчаяз емышъёссэ утялтыса гинэ сюлэмзэ буйгатъям.

Одӥг пол шурысь ву омыртыкуз, ведраяз ворекъясь тылы шедем. Тылы шоры жальмаса сылонъяз кытысь ке ӧвӧл сьӧд куака, ведра вылаз пуксьыса, ворекъясь тылыез кокчалтыны выре, пе. Очан, карнанзэ кутыса, куакаез уллям. Тылызэ, куасьтыны шуыса, корказ пыртэм. Нош ик син азяз Огашезлэн тусыз:

– Куке но та тылыез одно ик солы кузьмало, нылъёслы кельшо яркыт арбериос, – тылызэ маялтэм.

Маялтэм тылыез улӟем кадь лопырскем, омырын берганы кутскем но вераны луонтэм чебер тылобурдолы пӧрмем. Очанлэн корказ шундыё нуналлэсь но югытгес луэм.

– Тау тыныд, Очан, быронлэсь утид. Мон но пунэме уг кыльы, – куинь пол бурдыныз шонтэм. Котькуд шонтэмаз ӝӧк вылэ из юдэс усем. – Музъем вылын адямилы узырлыктэк улыны шуг. Кулэ дыръяз кыксэ изэз урдэс султыты, куинетӥзэ вылазы пон, капка выллем мед пӧрмоз шуыса. Пушказ пыр но басьты кӧня, мар кулэ. Тодад возь, отысь потытозяд: куарадэ но поттыны эн дӥсьты, – озьы верам но, паймымон тылобурдо чиптэм-чаптэм ышем.

Очанлы тунсыко потэм верам кылъёсыз. Тылобурдо дышетэмъя изъёсты кызьы кулэ, озьы султытэм, куинетӥзэ вылазы пуктэм. Пияш азе туж бадӟым пырон ӧс кылдэм. Очан ӧс сьӧры потэм но, ӧжыт гинэ шултыса лэзьымтэ! Отын сомында узырлык: марӟан, азвесь, зарни арбериос, гурезьёсын коньдонъёс! Басьтэм Очан кӧня ке кырым азвесь коньдон но ӧсэтӥ берлань потэм. Бадӟым ӧс син азьысьтыз ышем, пыд азяз, музъем вылэ, бурдолэн сётэм из юдэсъёсыз гинэ кылиллям на.

Изъёссэ кисыяз понэм, коньдонзэ пуйые интыям но пыженыз шур сопала, нош ик Огашез доры, дыртэм. Коньдонзэ сётыса, нылашлэсь сюратайзэ но, анайзэ сюлворем:

– Сётэ мыным нылдэс, мон сое аслым кузпал басьто.

– Нылмы милям та пуйыен коньдонлэсь дуногес сылэ, – шораз кескич синъёсын учкыса, йырберзэ кормам воргорон. – Кытысь карид та узырлыктэ верад ке, сётом тыныд Огашмес.

Кызьы вал, номыре ватытэк, Очан соослы ваньзэ радызъя верам. Корка кузёослэн соку ик со ӧсэ пырамзы потэм. Соглаш луэм пияш:

– Мынэ, пырелэ, басьтэ кӧня узырлык кулэ тӥледлы но потэ. Эн гинэ вунэтэ, отын дыръяды кыл-куара поттаны уг яра. Валады-а? – алэм Очан.

– Валам! Мар отын валантэмез? – Огашлэн анай-атаезлэн чиданзы быремын ни.

Пуктэм Очан изъёссэ озьы, кызьы кулэ, кылдэм бадӟым ӧс, Огашлэн анай-атаез пушказ пыриллям. Узырлыкез адӟыса, кылзэс ик ньыло ни вылэм! Мар шедем, кисыосазы тыро, чыртыязы ошыло, йыразы изьыяло. Анаез бадӟым тусьтыез адӟыса, бордаз ӟыгыртэм.

– Огпалмем! Мае капыръяськод?! Кушты, зарнилэсь ӧвӧл со, шузи, ыргонлэсь! – кеськем сюратаез.

Соку ик пырон ӧсэн валче вань узырлык сук муртъёслэн вылазы куашкам. Огашлэн азбараз ӵошкыт интые юнме шорысь бадӟым из гурезь кылдэм. Огашлэсь анай-атайзэ но, куинь синпӧртман изъёсты но, из гурезь ас улаз ватэм.

Очанэн Огаш туж шудо луиллям. Уно нылпи будэтӥллям. Нош улытозязы котьмалэсь но бадӟым узырлыксы вылэм – ог-огзэс яратон.