Румпельштильцхен
Детская литература

Румпельштильцхен

396 {num}

Выжыкыл

Улӥз-вылӥз куанер вуко изӥсь. Вал солэн чеберай нылыз. Одӥг пол со король азьын ушъяськем: «Мынам нылы куролэсь но зарни черсыны быгатэ».

Кылыса тае,  кӧттырмостэм  аксым король нылашез дораз вайытӥз но сое куроен тырмытэм комнатае пытсаз. Нылашлы кубозэ сётӥз но косӥз: «Ӵуказе ӵукналы вань та куроез зарнилы пӧрмыты, сотэк мон тонэ виё».

Куанер нылаш уг тоды вал, кызьы куролэсь зарни черсыны. Со кышкатскиз но бӧрдыны кутскиз. Шӧдтэк шорысь ӧс усьтӥськиз но пичи мугоро адями пыриз. Со кылзэ сётӥз ныл понна зарни черсыны. Нош уждун интые нылашлэсь дуно чыртывесьсэ куриз. Нылаш соглаш кариськиз. 

Ӵукна король паймемын вал, зарниез адӟыса. Солэн кӧтырмостэм аксым сямыз эшшо но пуромиз, со нылашез эшшо бадӟымгес комнатае пытсаз но  кошкиз. Куанер нылаш,  котырысьтыз куро культоосты учкыса, нош ик бӧрдыны кутскиз. Выльысь потӥз пичи мугоро адями. Со нош ик кылзэ сётӥз зарни черсыны. Таяз учыре со куриз нылашлэсь зундэссэ.

Ӵукнаяз король вуиз но, зарниез адӟыса,  шумпотонзэ кытчы ватыны уг тоды ни вал. Но со туж аксым вал ук, таиз но солы ӧжыт потӥз. Со нылашез эшшо но бадӟымгес куроен тырмытэм комнатае нуиз.
–  Черсы зарни та куролэсь! – шуиз со. – Быгатӥд ке, тон мынам кышное луод.
Таяз уе нылашлы номыр вал сётыны пичи мугоро адямилы ужез понна. Но со зарни черсӥз, солэсь кылзэ басьтыса, со нырысетӥ нылпизэ солы сётоз шуыса. 

Ӵукна король зарниез адӟыса воксё лӧптӥз ни – вуко изӥсьлэсь нылзэ кышно басьтӥз. Озьы нылаш королева луиз.

Ар ортчыса, королева нылпи вордӥз. Пичи мугоро адями лыктӥз но шуиз: «Табере сётэм кылдэ быдэсты, вай мыным нылпидэ». Королева бӧрдыны но сюлворыны кутскиз: «Басьты мынэсьтым вань узырлыкме, нылпиме гинэ эн басьты». Пичи мугоро адями жаляз сое но шуиз: «Ярам, мон уг басьты тынэсьтыд нылпидэ, мынэсьтым нимме тодӥд ке! Тынад куинь нуналыд вань».

Королева нокызьы но нимзэ тодыны ӧз быгаты, но куинетӥ нуналаз солэн ивор нуллӥсез шедьтӥз пичи мугоро адямилэсь корказэ кыдёкысь гурезь бамалысь. Соиз ӵапак кырӟаса пуке вал: «Королева та шудонын вормоз шуыса, мон чик уг курдаськы, угось монэ Румпельштильцхен нимало!» Ивор нуллӥсь, тае кылыса, ӝоггес дыртӥз  королеваез доры.

Уйин пичи адями нош ик лыктӥз королевалэн комнатаяз. Нырысь  нылмурт вераз: «Тонэ Джордж нимало?» Пичи адями валэктӥз: «Ӧвӧл, со мынам нимы ӧвӧл». Королева юаз: «Тынад нимыд Гарри? Яке Том?» Пичи адями йырзэ  мыдлань шоназ. Соку королева шуиз: «Иське, тынад нимыд – Румпельштильцхен!» Кылыса тае, пичи адями вожомыса-лекомыса бызьыса кошкиз но сое ноку но нокин ӧз адӟылы ни.

Удмурт кылэ берыктӥз Лариса Орехова.