Буйгасьтэм сюлэм. Алексей Ермолаев
Критика

Буйгасьтэм сюлэм. Алексей Ермолаев

388 {num}

Пётр Константи́нович Черно́в (1936—2000) — публицист но прозаик.

Кемалась ик ӧй вал кадь со. 1959 арын Москваысь университетлэсь журналистика факультетсэ йылпумъяса, «Удмуртиысь комсомолец» газетын ужаны кутскиз егит удмурт пи – Пётр Чернов. Газетын потылыны но егит лыдӟисьёслэн син шоразы йӧтылыны кутскизы яркытэсь очеркъёс, лэчытэсь критической статьяос. Соос умой шараяллязы улонысьтымы адӟем карымонзэ но, пыдэз сьӧлтась гыжкалъёсты но, ӝутылӥзы ӝегатскытэк быдэстоно ужпумъёсты.

Куатьтонэтӥ аръёсы Удмуртиысь егитъёслэн газетсы республикамылэн котькуд сэрегысьтыз котьмае адӟылӥз. Одӥг азинскемен буйгатскыны ӧз сётылы со егитъёслы но, мӧйыослы но. Мукет шаплы журналистъёс пӧлын висъяськылӥз Пётр Черновлэн куараез. 

Улонмылэн ӟырдыт ӧраз вамышъяны, вуберганъёслэсь кӧбератэк улыны но ужаны дышем журналист берлогес трос кужымзэ сётӥз нылпиослы «Дась лу!» газет поттонэз кема вис карем бере выльысь радъяны. Собере ужаз Удмурт радиоын, Удмурт телевидениын, «Молот» журналын. Со СССР-ысь писательёслэн союззылэн членэз, Удмуртиысь комсомоллэн премиезлэн лауреатэз.

Котькытын но Пётр Чернов сюлмысь тырше калыклэсь, котькуд адямилэсь сюлэм висёнъёссэ, шумпотонъёссэ ӟечгес, мургес валаны но, ас сюлэм пыртӥз поттыса, мукетъёслы валэктыны. Соин ик, лэся, статьяос, очеркъёс гожъяса, со басьтӥськиз художественной произведениос кылдытон борды.
Тросгес но ӟечгес произведениос кулэ вал пинал лыдӟисьёслы но. Сое Чернов тужгес но шӧдӥз «Дась лу!» газетын редактор дыръяз. Газетын со пичиослы кельшымон веросъёс, повестьёс номерысь номере печатланы тыршиз.

Адямилэн котьма ӟечез пичи дырысен люкаське, шуо. Тросэз писательёс, художникъёс, композиторъёс но калыке пыӵамонзэ кылдыто, ас пичи дырзэс сюлмазы возьыса. Тӥни со ноку вунӥсьтэм пичи дыр ик, писательлэн Алнаш палась Сизьгурт котырын гольык пыд бызьылэм дырыз, юрттӥз кадь проза борды рос-прос басьтӥськыны. Солэсь кизэ гожъяны валтӥсь кужым но ӵапак сюриз: нылпи газетлы туж кулэ луизы веросъёс, повестьёс. Озьы «Дась лу!» бамъёсын печатласькизы «Кион кар», «Вылга палъёсын сӥзьыл» повестьёс. Берло соос Гондырев Матилэн пинал дырыз сярысь трилогие пыризы.

Капчи ӧй вал Матилэн но солэн эшъёсызлэн пинал дырзы – война но война бере аръёс. Соослы мӧйыос вӧзын трос ужано но няньтэм дыръёсты чидано луиз. Бен, вал со секыт аръёсы но пиналъёслы котьмаин юрттӥсь ӟеч адямиос но, калык шӧлкын майбыр гинэ улыны турттӥсьёс но. Писатель сое ваньзэ туж яркыт, син азе пуктымон суредаз. Пётр Черновлэсь «Кузьыт шеп», «Бектыш нюлэс буйга», «Вылга палъёсын сӥзьыл» повестьёсын трилогизэ нылпи литература пӧлы пыртӥськомы. Со шонер, дыр. 

Дышетскись пиналъёс отысь трос ӟечсэ, асьсэлы пайдаёзэ тодыны-валаны быгатозы. Умойгес малпано ке нош, со книгаослэсь мур визылзэс выжыятон понна, трос дунне адӟем но кулэ. Озьы бере, трилогиысь асьсэлы кулэзэ шедьтыны быгатозы мӧйы лыдӟисьёс но.

Зэмос художественной произведениос ӵем дыръя сыӵеесь луо: ӝогак гинэ уд вала, пиналлы-а, мӧйы адямилы-а со гожтэмын. Соизлы но, таизлы но, дыр. Тани Черновлэн ик «Кыклэн огез» повестез.
Главной героез – дышетскись пи. Солэсь гужем ужамзэ возьматэ писатель. Зэм но, та повесть пиналъёс понна валамон но пайдаё лыдӟон. Нош Гирышлэсь бригадирен, дышетӥсьёсын, анай-атаеныз кусыпъёссэс басьтоно ке? Ӧвӧл шат отын бадӟымъёслы ӟеч-ӟеч малпаськымон югдуръёс?

Пётр Черновлэн прозаез – малпаськытӥсь проза. Писателен ӵош асьмеос мур но куддыръя секыт малпаськонэ усиськом егит дырмы, эшъёсмы, дормы понна кыл кутон сярысь. Та ӟугрес но полэсо-полэсо югдуръёсты Чернов пӧртэм-пӧртэм ласянь возьматӥз «Дор», «Казак воргорон», «Ӧтем куно» повестьёсаз.
Пётр Чернов улон-вылонмес кызьы вань озьы, сое чеберматэк, котерма вылэ ӝутытэк возьматыны тырше. Отысь куддыръя шуккиськыса вӧсь карись сэрегъёссэ, чальтчылонъёссэ-букосъёссэ, усьылонъёссэ но ватытэк. Бен, таӵе сюрес – литератураын вольыт гинэ сюрес ӧвӧл. Озьы ке но, самой кулэез, самой зэмосэз сюрес – реализм сюрес.

Чидасьтэм сюлэм, буйгасьтэм сюлэм – шуысал мон Пётр Чернов сярысь, кык кылын гинэ верано ке луысал. Со уг чида туала улонысьтымы ӟечез сярысь но, уродэз сярысь но меӵак вератэк. Соин ик повестьёсын ӵош ялан гожъя публицистической статьяос, ӟырдытэсь очеркъёс, данъя тыршыса но быгатыса ужасьёсты, куддыръя секыт кылзэ но вера мыдланесъёслы.

Пётр Чернов, мон сямен, туж кышка ялан огдышем сямен гожъянлэсь. Произведениезлы быдэ со утча улонысь выль материал но, малпанзэ выль сямен, тужгес но шонергес, яркытгес, лэчыт веран амалъёс но. Одӥг кылын вераса, со ялан маке но выльзэ утча. Утча удмурт кылмылэсь вань узырлыкъёссэ уже паськытгес кутон амалъёс но. Узырмытыны тырше литературной кылмес. Ӧвӧл, со вольыт гинэ гожъяны уг тыршы. Солэн гожъямъёсаз шедьыло куд-ог лыдӟисьёслы мертчылӥсь шиосыз но. Шедьыло котькуд гуртын ик пумиськылымтэ кылъёсыз но. Ой, кыӵе уг кельшы куд-огезлы огдышем ӧрысь потӥсь мае ке лыдӟон! Писатель нош ялан ас сюрессэ выльдэ.

Писательлы тырме витьтон арес – вуиз кын корт куртчон дырыз. Бен, мылкыд каром: со вакыт кема мед кыстӥськоз. Писатель асьмеды мед шумпоттылоз выль но выль произведениосыныз.

«Дась лу!» 1986. 12 июль.

(Печатлаське тупатъятэк.)