Виктор Шибанов.  Литературая  кружокъёс но гожъяськон удыс
Критика

Виктор Шибанов. Литературая кружокъёс но гожъяськон удыс

356 {num}

Туала дыре тросэз удмурт егитъёс эскеро асьсэды кылбуранын но прозаын, озьы ке но, зэмос кылбурчи-прозаик луон понна егитъёслы ӵемысь уг тырмы кыӵе ке пыкъет, кылсярысь, литературной кружокъёс, «удмурт сэрегъёс». Азьло гожъяськисьёс пӧртэм литературалы сӥзем ӝытъёсы, конференциосы люкаськыло вал. Ас вакытаз сыӵе пумиськылонъёс но авторъёсын кусып возён трос пайда вайылӥз егит гожъяськисьёслы.

Шибанов Виктор Леонидович – тодмо удмурт кылбурчи, литературной критик, тодосчи, Удмурт Элькунысь лулчеберет удысысь сӥё-дано ужась, Россиысь Писательёслэн огазеяськонзылэн ёзчиез.

– Виктор Леонидович, мар Тӥ верасалды «удмурт сэрегъёс» пумысен? Тодӥсько, азьло дыръёсы соос трос вал.

– Тодэ вайисько 1970-тӥ аръёсты, 1979-тӥ аре мон Удмурт кун университетэ дышетскыны пыри, но солэсь азьло но – 1975-тӥ арысен – арлы быдэ тулыс егитъёслэн семинаразы Ижкаре вуылӥ. Огласянь, Ижын соку «удмурт сэрегъёс» туж ӧжыт вал: Пастухов урам, 13 (газет-журнал редакциос), Удмурт драмтеатр, филология факультетлэн удмурт ёзэтэз но Писательёслэн огазеяськонзы (Советской урам, 1). Соин ик кыӵе ке удмурт ужрад луэ ке вал, калык отчы кыстӥськылӥз. Егитъёс понна тужгес но яркыт удмурт сэрегъёс – со «Чипчирган» ансамбль но филфакысь литературая кружок. Ум вунэтэ, соку егитъёсын ужан комсомоллэн кивалтэмез улсын мынӥз. Кружокъёс – со совето идеологилэн оглюкетэз вал, зэм, Флор Васильев со ужрадэз пайдаё ӧре выжытыны быгатӥз, со дыре ик идеология люкетэз но сайямын ӧй вал. Семинаръёс ортчылӥзы Политпросвещенилэн юртаз (али со Филармония). Озьыен, политическое просвещение. Но таин мынам совето даурез сьӧдмаме уг поты, ачим но отысь будэмын-пушъемын уго.

Университетын литературая кружоклэн ужез эрикогес вал (кивалтӥз Д. А. Яшин), но кружоклэн емышъёсыз пумысен кыл кутэ вал солэн кузпалэз доцент Р. И. Яшина, парторганизацилэн секретарез. Куке мон ньылетӥ курсэз йылпумъян дыръям ленинской стипендия сярысь вераськон ӝутскиз, со кружокын староста луэме мыным туж бадӟым юрттэт сётӥз, угось умой оценкаос сяна, одно ик кулэ вал мерлыко улонэ пыриськон. Мынам кружокен валтэме артэ университетысь комсомол огазеяськонын ужанэн пуктэмын вал.

– Малы калык ветлӥз со кружокъёсы? 

– Туннэ нуналэ Ижкарын удмурт егитъёс понна арнялы быдэ сямен кык-куинь ужрад ортче, кудаз мыноно яке ӧвӧл – нимысьтыз бырйыны луэ. 1970-тӥ аръёсы озьы ӧй вал, кык арнялы огпол гинэ кружокъёс радъяськылӥзы. Меӵак верано ке, мукет удмуртлыко интыос ӧй вал но тӥни.

– Мар со Тӥледлы сётӥз? 

– Бадӟыматэм стипендия сярысь верай ни, соин ик тау кружокмылы. Мукетыз пайдаез – со удмуртлыкез утьыны тыршон, угось тросэз кружоке ветлӥсьёс ас улонзэс литератураен ӧз герӟалэ ке но, берло шаермылэн мерлыко но лулчеберето улоназ пыриськизы. Гожъяськон ласянь но пайдаез вал: калык азе ас кылбуръёстэ поттон – со ӧжытак малпаськытэ, курдатэ, вылаз ик тодӥськод на ке, со пумиськонэ В. Романов яке А. Шкляев ӧтемын шуыса.

– Малы сыӵе котыретъёс туала дыре туж ӧжыт?  

– Кинлы ке паймымон кадь потоз, но нырысь ик – уксё югдур. Азьвыл со уж понна пичияк коньдон тыро вал. Али ас котыретъёссэс радъяны быгато вылэм «эрико» Ар-Серги (со прозаын но, поэзиын но, драмаын но кужмо), тросэз пенсие потэм усточиос, но… тодмо валэктонэз выльысь шара ум вералэ ни. Кыкетӥез муг: егит удмурт гожъяськисьёс удысын али «дефицит» ӧвӧл, книгазэс печатлам нылкышно кылбурчиосмес гинэ лыдъяны кутскиськод ке, киысь-пыдысь чиньыос уз тырме. Ужано ке ини, таосыныз нимаз-нимаз ужано, кытын традиционной кружоклэн пайдаез бадӟым ӧвӧл, мон сямен. Озьы ик кружок-котыретлэсь функциоссэ быдэсъясь ужрадъёс кылдэмын: «Шундыкар», Писательёслэн огазеяськоназы вакчи дырлы радъям семинаръёс, егитъёслэн выль книгаоссылы презентациос. Ачим мон, кылсярысь, нырысетӥ курсысь удмурт студентъёсын «филологилэн инъетъёсыз» дисциплинаме кружок-котыретлэн визылаз ӵемысь выжытылӥсько.

– Тӥляд малпамдыя, мар кыске литератураен вырыны? 

– Пинал-егит дыръя – яратон мылкыд, шонергес вераса, тынад яратонлы югыт осконэдлэн но улонлэн секыт борддорезлэн ваче пумит луэмзы. Нош собере… Таиз ини секыт юан. Котькин аслаз ӧретӥз мынэ. Ачим ке… Таиз сярысь но вераны шугъяськисько, угось ачим уг гожъяськиськы кадь, мон пыр кыӵе ке бадӟым кужым ас мылкыд-малпанъёссэ гожъялля.

– Кызьы шорады учкылӥзы лыдӟисьёс? 

– Туж вакчи верано ке – лушкем вожъяськыса. Монэ угось 6-тӥ классын дышетскыкум ик ас бурд улаз Владимир Романов басьтӥз, вамышысь вамыше азьлань нуиз, со муген шорам меӵак «ыбылыны» уг луы вал – лэзем пукыӵ ньӧлъёс азе дышетӥсе потысал. Огпол Иосиф Бобров вераз, данаксэ визьужасьёсты тужгес но шугъяськытэ, пе, вал, та Шибанов шуонзы, кизили висёнэн висьыса уг быры-а шуыса. Нош Романов улонысь кошкем бере ми ньыль кузя – Миша Федотов, Слава Сергеев, Пётр Захаров но мон – ас котыретмес кылдытӥмы, кудзэ тарканы-куашкатыны шуг вал ини.

– Туала дыре ӵемысь кылоно луэ, али егитъёс ӧжытгес лыдӟисько шуыса. Тӥляд малпамдыя, маин со герӟаськемын?  

– Улон ӧрлэн воштӥськеменыз. Брежнев но Горбачёв вакытъёсы ӵапак литература сётэ вал лул-сюлэмлы вӧлмыт шокчон эрик, литература аспӧртэм наркотик кадь вал, шонергес вераса, солэн ватэм подтекстъёсыз. Туалаяз вакытэ лул-сюлэмлы вӧлмыт шокчыны луонлык кылдыто мукет удысъёс, литература отын нырысетӥ интыын ӧвӧл ни. Татын ӧжытак умоез но вань: литература наркотик луэмысь дугдӥз. Нош умойтэм палыз: лыдӟисез али эрекча пиар но куашетон, нош кызьы шуиз философ, кытын куашетон, отын мурдала но выль дунъетъёс ӧвӧл. 

– Мар воштӥськиз адямиослэн улоназы?

– Социализмысь капитализме выжон. Капитализмлэн висёнъёсыз, мон сямен, К. Маркс вакытысен юн ик ӧз воштӥське. Литература но лыдӟисьёс пыртэмын «коньдон – вуз – коньдон» сузьетэ, нош удмурт капиталистъёс ӧвӧлэн сэрен (оло, умой но со), таӵе механизм тыро-пыдо уг ужа. Литературая кружокъёс-котыретъёс сярысь юанъёсы выжыны ке, оглом кружок но егитъёсты гожъяськыны дышетон – со социализмлэн емышъёсыз, кудъёсыз асьме дырозь возисько ай. Мон сямен, соосты утёно. Удмурт мерын, азьло вакытъёсты учконо ке, бадӟым инты басьто вал таӵеосыз котыретъёс: Можга педтехникумысь, Удмурт университетысь, «Советской Удмуртия» газетысь литобъединение (кивалтӥз С. А. Самсонов). Ёросъёсын но трос кружокъёс ужазы но ужало, мон ӧжытак тодӥсько Пургаласьсэ но Шаркан ёросысьсэ.

– Кыӵе муген азьло огазеясько вал пӧртэм котыретъёсы? 

– Таиз трос ласянь адямиос бордысь потэ, мон сямен. «Улонлэн куронъёсыз» яке «шундылэн активностез» шуоно ке, мон отысь нокыӵе но мур радзэ уг адӟиськы ай. Кружокен кивалтӥсьёс бордысь но тросэз уг поты уго (асьсэос соос ваньзы сямен умой писательёс) – отысь ӝужам емышъёс бордысь. Шуом, Алнаш палан выль яркыт ним кылдӥз, соку ик дышем сямъя малпан кылдэ – Алнашын литературая кружоксы умой ужа, нош соиз, оло, тыро-пыдо но уг ужа вал. Мукет сямен но луыны быгатэ: котырет кужмо ужа, отчы трос пиналъёс ветло, нош пӧлысьтызы одӥг кужмо кылбурчи но уг поты. 

– Тӥ сямен, вань-а туала удмурт литературалэн аслаз творческой средаез, сообществоез?

– Шуг вераны, угось туала вакытысь син улысьсэ но ум адӟиське, нош пичи чыры-пырыез дуннелэсь шорзэ кадь дунъяны быгатскомы. Та юанэн валче син азям пуксё ньыль егитъёс – Мария Векшина, Марина Пахомова, Алексей Пикулев но Николай Михайлов. Кытысь но кызьы соос пушйизы? Ас кожазы гинэ яке соос понна кыӵе ке инъет (творческой среда)  вал? Азьвыл аръёсысь йылолъем кружокез соос ӧз но адӟылэ, шуыны луоз. Ог-огзэс но соос туж ик умой уг тодо, дыр.  Озьы ке но, мар ке кужым вань ик, кудӥз соосты огъя ӧре пыртэ. Тӥни озьыгес.

Вераськиз Елизавета Шихова,
УдГУ-ысь студентка.