Осконо пиед со, калыке но шаере. Алексей Ермолаев
Критика

Осконо пиед со, калыке но шаере. Алексей Ермолаев

494 {num}

Куамынэтӥ аръёсы удмурт литературае ас творческой манереныз но юн куараеныз пыре кылбурчи Филипп Кедров. Кутске со, выль улонэз, колхоз ужез но колхоз гуртэз вань сюлмысьтыз данъяса, сое вашкалаеныз ваче пуктыса но улонысь вылезлэн вормонэз сярысь сюлмаськыса.

Ӟеч-а, бур-а, мусо бусы,
Ӟеч-а, бур-а, выль ю-нянь!
Куашетэмед, тынад тусыд 
Мылкыдэз ӝутэ выллань, –

сыӵе лӧптэм мылкыд шӧдӥське, поэт выль улонысь котькыӵе тема борды кутскыку. Филипп Кедровлэсь со вакытэ вань мылкыдзэ огъяса ке верано:

Кинлэн бен уз пот улэмез 
Такем шулдыр шаерын!..

Поэтлэн сыӵе мылкыд вераны аслаз мугез тырмыт вал.

ПИНАЛ ДЫР.

Вордскиз со 1909-тӥ арын Алнаш селоысь куанер удмурт семьяын. Атаез, узыръёслы ужаса, ваньбур вылэ ӧз вуы. Муртъёслы медъяськыса, трос коркаос ке но пуктылӥз, ас семьяез пичи гинэ вуж юртэ кылиз. Пичи Филипп куать аресаз потэм бере Григорий Кедров кулӥз. Атаез сярысь малпаса ик, дыр, берло ини писатель кылдытӥз пересь Сидорлэсь образзэ («Катя» повестьын): «Трос ужаз со, трос тыршиз, трос юртъер лэсьтӥз котыр гуртысь байёслы... Кӧня музъем сайкиз, выль интыос кесяз байёс понна. Вераса быдтод-а ваньзэ, нош аслыз корка гинэ но пуктыны ӧз быгаты».

Филипп аслэсьтыз ӧжытлы гинэ бадӟымгес агаеныз, апаеныз но анаеныз ӵош вазь кутсконо луиз геры борды.

Тани ми лудын ньыльнамы...
Сезьы кизён дыр вуэмын... 
Амезь тышкамтэ, валмы — лы но ку. 
Сӥес тӥрлыкмы ужаку
Чиге, сэрттӥське,
Вал пидса, канжаське,
Геры, ныж маке,
Парсь сямен мудӥське.

Нырысетӥ мировой война, эксэй Россилэн лябӟем кынарыз — со ваньмыз секыт усиз куанер крестьян вылэ. Кедровъёслэн семьязы капчияк шокчыны быгатӥз Быдӟым Октябрь бере гинэ, Советской власть музъем сётэм но сое ужаны юрттэм бере.

Куанер удмурт крестьян пи грамоталы дышетскиз. Алнаш школаын ньыль класс йылпумъяса, Можга педтехникумлэн подготовительной группаяз, собере основной курсъёсаз пыриз. Трос мукет писательёсмы сямен ик, татын со дышиз литератураез но удмурт кылэз гажаны. Педтехникумлэн рукописной журналаз, 1927-тӥ арысен республиканской газетъёсын но «Кенеш» журналын потыны кутско Кедровлэн кылбуръёсыз.


УЖ. АРМИЯ.

Педтехникумез йылпумъяса, Филипп Григорьевич ужа Алнаш палась Кадиково гуртын, собере — Асан сельхозтехникумын. Дышетэ удмурт кыллы но литературалы. Соку ик поттэ нырысетӥ вероссэ. «Дышетӥсь» нимаське со. Егит дышетӥсь тыршиз гуртысь улӥсьёслэсь мылкыдзэс, ужзэс, малпанъёссэс ӟечгес валаны.

Газетъёсы ӵем но умой гожъямзэ шӧдыса, Кедровез 1929-тӥ арын Ижевске «Гудыри» газетлэн редакцияз ӧтё. Кык ар пала ужамез бере, вуэ кема возьмам дырыз — сое армие служить карыны басьто. Со шеде Бакуэ, командиръёсты дасян курсэ, отын юн эшъяське странамылэн пӧртэм палъёсысьтыз лыктэм адямиосын.

Бакуысь Кедров вуиз Украинае. Та нырысь службаез поэтлы трос тодон-валан сётӥз. Армилэсь кулэзэ, данзэ сяна, Кедров ас вылаз адӟиз пӧртэм выжы калыкъёслэсь асьме Родинаямы куспазы туж ӟеч, агай-вынъёс кадь, улэмзэс. Со интернациональной мылкыд ик юрттӥз писательлы Европаысь фашизмез шараясь «Горд Знамя» пьеса но «Фашизм ки улын» поэма гожтыны.

1932-тӥ арын сӥзьыл, армиысь бертыса, Кедров школаын дышетэ, собере издательствоын ужа, «Дась лу!» газетлэн редакторез луэ. 1938-тӥ арын Удмурт пединститутэ дышетскыны пыре. 1940-тӥ арын Кедровез кыкетӥзэ басьто армие. Со отын но уг вунэты литератураез, гожъя бадӟымъёслы но пичиослы кылбуръёс, служить карыкуз ик быдэстэ «Катя» повестьсэ.


ЛИРИКА.

Филипп Кедровлэн быдэс творчествоез юн герӟаськемын биографиеныз, поэтлэн ялан йырысьтыз кошкисьтэм малпанъёсыныз. Со малпанъёс Советской Родинамылэн шудбурез сярысь вал. Син шоры нырысь ик йӧтэ куанер калыклэсь азьвыл но али ужамзэ ӵошатон. Азьвыл:

Эксэй чеплет. Кулак кар.
Куашкам корка, жаг азбар.
Дӥсян кышъямын 
Дас полэс кышъетэн,
«Ческыт» сиёнмы —
Чебкы мыжыкен.
Табере:
Май толэзь кадь кырӟа 
Яратон музъеме.
Тулыс ву кадь шудэ 
Вормонтэм кужымен.
Октябрьлэн знамяез 
Та паськыт дуннеез 
Туж пиштӥсь, серекъясь 
Дуннелы пӧрмытэ.

Та выллем ӵошатонъёс куамынэтӥ аръёсы удмурт поэзиын паськыт вӧлмемын вал. Поэтъёс, коллективизациез данъяса, солэсь вуж, секыт улонлэсь мозмон сюрес луэмзэ крестьян лыдӟисьлы яркыт возьматӥзы. Филипп Кедров та темаез ас сяменыз, ас улон опытэзъя идеяезлы тупась детальёс пыр шарая. «Та улонлы» поэма быдэсак биографичной луэ. Отын поэт атаез, анаез, агаез но апаез сярысь маде. Одӥг семья сярысь вераса, со бадӟым обобщение лэсьтыны быгатэ. «Сюлэм кырӟа» кылбурын — трос адӟем удмурт кышномуртлэн мылкыдыз. «Кырӟа, Туймы шур» — со ик тема инкуазь пыр, бызись шур вулэн образэз пыр возьматэмын.

Та темаен ик герӟаськемын Кедровлэн лирикаяз мукетыз бадӟым тема — Коммунистической партилэсь но Советской властьлэсь, комсомоллэсь ужзэс данъян. «Тыныд, комсомол» кылбураз поэт вера: 

Дышетӥд гажаны тон ужез,
Ужаны кужымез ӟырдытъяд.
Ужанын шедьтӥськиз та шудэз, 
Комсомол, кузьымед со тынад.

Выль строй, социализм лэсьтон луиз нылпиослы сӥзем кылбуръёсызлэн главной темазы. Пионер, «Ленин нылпи» луон понна, шуэ Филипп Кедров, шӧртчи, сюлмо ужам, тазалыкез юнматэм, ӵошатскыса но ог-огедлы юрттыса дышетскем кулэ.
Пиналъёслэсь чебер, жингрес кылэз яратэмзэс тодыса, поэт кылдытӥз гырлы куараё чуръёссэ:

Дышетскытэк умойтэм,
Пеймыт кылёд номыртэм.
Ӟильыр-ӟильыр ӟольгыри,
Берло лулӟод: «Ой, быри!»

Нылпи кылбурын аллитерация но ассонанс котьку но интыязы луо, соос поэтической идеяез нылпилэн йыраз вунэтонтэм кельтыны юртто. Кылбурлэсь жингыртэмзэ эскерыса ик кылдытӥз туж чебер «Яратско сӥзьылэз» кылбурзэ. «Толалтэ» кылбураз нош макем шонер кутэ поэт удмурт глаголлэсь узырлыксэ:

Сапег кутчай,
Шуба дӥсяй,
Изьяй лудкеч изьыме...

Ваньмыз та пӧртэм куараё глаголъёс (кутчай, дӥсяй, изьяй) одӥг действилэсь (надел) пӧртэмлыкъёссэ возьмато но образэз туж точной, лэчыт каро.

Асьме странаын шудо улон юнмамез кырӟаменыз ӵош поэт шӧдӥз ини Европаын кылдэм урод югдурез. Германиын но Италиын, фашизм ас кияз власть басьтӥз но, пумен пуромыны кутскиз Кыкетӥ мировой война. Дальний Востокын япон империалистьёс Хасан но Халхин-Гол тыос дурын ваче вуизы асьме войскоосын. Политикаез но югдурез ӟеч валась писатель трос малпаськылӥз Советской Армиез юнматон сярысь, гожъяз армия сярысь кылбуръёс. Солэн «Горд Армия» кылбурез куамынэтӥ аръёсы кырӟан луыса вӧлмиз.Поэт войналэн нырысетӥ нуналъёсаз ик кошкиз фронтэ. Ӟырдыт ожмаськиз роталэн командирез капитан Кедров. Семьяезлы гожтэтаз со оскытӥз: «Бойысь мон сярысь берпум ивор кылӥды ке, сюлэмдэс эн чиге, мон... Родина понна, яратон калык понна — ваньды тӥ понна быремын луо... Тыршо вормись луыны, вормонэн бертыны, шумпотыса».

Оже кошкем вань солдатъёс нимын со калыклы но Родиналы оскымон кылзэ сётӥз:

Берыктомы ваньмыз понна 
Урмем Гитлер армилы,
Оскы, калык, оскы, страна,
Котьку оскы милемлы.

«Мемиелы», «Ӟеч лу, мусо туганэ», «Фронтысь салам», «Оскы, Родина» — фронтысь ыстэм кылбуръёсыз удмурт гражданской лирикалэн самой умоесь произведениосыз пӧлы пыризы. Лэчыт кыл, ож тылъёсын кыдам мылкыд соосты Родина но советской калык сярысь туж устоесь художественной произведениос радэ поттӥзы.

Фронтын дыръяз ик писатель гожъяз партизанъёс сярысь «Нюлэс куашетэ» повесть. Рукописез ышемен со книга табере асьмелы тодмо ӧвӧл.

Подвигъёсыз понна капитан Кедров Горд Кизили, нырысетӥ но кыкетӥ степенё Отечественной война орденъёсын но кӧня ке медальёсын пусъемын.

1944-тӥ арын 13-тӥ феврале капитан Кедров ротазэ секыт атакае ӝутӥз но ачиз азьпала вамыштӥз. Соку тушмон пуля йӧтӥз ӟырдыт патриотлэн мӧляяз. Со вал Витебск город дорын.
Удмурт калык пӧлын уло Кедровлэн умоесь кылбуръёсыз, «Катя» повестез.

«КАТЯ» ПОВЕСТЬ.

Филипп Кедров гожтэм произведенияз суредаз Бектыш нимо бадӟым удмурт гуртын 1910–1917-тӥ аръёсы ортчем событиосыз. История но география ласянь пырак утчано ке, асьмеос ум шедьтэ чылкак сыӵе ик Бектыш гуртэз но, со выллем ик адямиос сярысь исторической документъёс но. Повестьын верам учыръёс нокыӵе архивысь бумагаосын но гожтыса кылемын ӧвӧл. Озьы ке но трос удмурт гуртъёсысь та вакытэ ортчем событиосты огъя басьтыса, соослы тупась типической характеръёс кылдытыса, Кедров удмурт гуртысь луэм событиосты шонер но оскымон суредъёсын возьматэ. Соин ик «Катя» повесть социалистической реализм амалэн кылдытэм проза луэ.

Та повестяз Филипп Кедров Иван Дядюковлэсь («Пашка Педор») но Кедра Митрейлэсь («Секыт зӥбет» но «Зурка Вужгурт») исторической проза кылдытон амалъёссэс азинтӥз. Нырысь интые пуктэмын революцилэсь азьло удмурт гуртын куспазы тэрытэк улэмзы, нюръяськемзы. Бектышлэн вылтусыз но Вужгуртэз тодэ вайытэ»: «Шундыя пиштӥсь ӝужыт гурезь бам кузя пуксемын вуж гурт Бектыш. Бадӟым со, син сузёнтэм бадӟым, ог куинь сю корка ёрос отын. Шор вадьсаз ик ӝужыт черк сылэ, солэн паллян палаз — вож липето бадӟым юрт — волостной правление, бур палаз — кабак, поп юртъёс, соосын артэ Ӟаналилэн, Ивашкалэн но мукет вузчиослэн лавкаоссы. Самой татчы лыктэ уй но нунал уж дурын курадӟись калыклэн зарни кужымез, та юртъёсысь дась кӧтъёс понна со калыклэн вань улон даурез синву но курадӟон пӧлын ортче». Сюлмыз вӧсь луыса ик, автор отӥяз вазиське: «Учкы ай туннэ Бектыш шоры. Учкы паллян пала, учкы бур пала — котыр куроен липем юртъёс. Кудӥз липет выжытэм куашкамын, куро гинэ но калык уг шедьты липетлы. Кинъёс бен уло со юртьёсын? Куанеръёс». Таӵе лирической публицистика амалэн гожтэмын быдэс повесть. Озьы Кедров лыдӟисез но геройёсызлэсь малпанъёссэс, мылкыдъёссэс сюлмыныз ик кылзыса валаны косэ кадь.

Куанеро-узыро Бектышын улэ повестьысь главной героиня Катя. Вылаз дӥсяны дэремез но, укмысо кутэз но ӧвӧлысь со шудон пӧлы но потыны уг дӥсьты. Узыр Максимлы лушкаса нуэм беразы, картэзлы, анайзылы, атайзылы вазьыны, аран дыръя ӝожон суралтыны но уг дӥсьты. Картэз жугыса воземысь кулак ки улысь мозмыны со одӥг гинэ амал адӟе: ас йырзэ быдтыны. Нош витьымтэ шорысь Койыкен пумиськыса, со яратонэз доры мыныны соглаш луэ.

Катялэсь портретсэ писатель кӧня ке кылын гинэ суреда: «Инмар мыным тусбуй сётэм но шуд сётыны вунэтэм», солэн синъёсыз чагыр, ачиз востэм. Кулак дорын ляльчиын улыса, со чылкак воштӥське: «Ымныры кадь ик, вылтыры копак лыз-вож... быриз мынам чебере…». Нош «Койыкен улыны кутскем бераз зэмзэ но азьло кадь ик чеберскиз. Чебер ымнырыз солэн табере капчи мылкыдын шудэ». Озьы Кедров улон воштӥськемъя героиняезлэсь но воштӥськемзэ возьматэ. Секыт война аръёсы, Койыктэк кыльыса, Катя пичи пизэ будэ, сузэрзэ дораз басьтэ, Койыклэсь анайзэ, пересь но висись мае ке, утялтэ. Вылаз ик, бусы кенерзэ куашкатыса, сое Семонэн Ӟанали калык азьын жуго. Сое ваньзэ чидаса, ӧтчамын Октябрь революция сярысь веракузы, Катя Ӟаналилы чурытак вазе ини: «— Шайтан адями, мар люкетӥськод? — чырты бертӥз кырмыса, ӝӧк дорысь зуркак кыскиз Ӟаналиез. — Кузёяськид, тырмоз, трос юид милесьтым вирмес! Пот татысь!»

Катялэн образэз пыр Филипп Кедров революция азьын удмурт нылкышнолэсь секыт улонзэ но солэсь эрик понна нюръяськонзэ валанзэ шонер, реализм амалэн возьматӥз. Та образ исторической прозамылэн азинскон сюресаз выль вамыш луиз. Катя ини трослы мукетгес Кедра Митрейлэн «Секыт зӥбет» романысьтыз Дыдыклэсь но, Михаил Коноваловлэн «Гаянысьтыз» Чачабейлэсь но. Дыдык но, Чачабей но выжыкылын манергес амалъёсын, ас котырысьтызы нылкышноослэсь висъясагес, вылӥе ӝутысагес суредамын вал, Катялэн образэз нош чик но романтизировать карытэк, чылкак реалистической амалъёсын кылдытэмын. Катя номырин но уг висъяськы огшоры крестьян нылъёслэсь. Романтической амалъёсты уг куты Кедров, героиняезлэсь мылкыдъёссэ, малпанъёссэ возьматыкуз но.

Повестьысь мукет геройёслэн тусбуйёссы ӧжытгес адӟисько. Соос кыӵе ке идеяез веран поннагес пыртэмын.

Главной героинялэсь образзэ мукетгес палтӥ ватса Натӥ. Со Катя кадь ик куанер но чебер. «Кузь сӧзыё, ӝуткам картаё, пужыё горд дэремен со. Юг-юг мертчан айшетэн. Пыдъёсаз укмысо кутъёс, мертчан бинялтонъёсыз вылтӥ горд кутгозыос бинемын. Туслы ныл Натӥ. Синъёсыз сьӧд сутэр кадесь, йырсиез но сьӧд-сьӧд, ымыз пичи гинэ, весь кадесь пиньёсыз». Озьы повестьлэн кутсконаз та образ Катялы контраст карыса кадь сётэмын: дӥськутэз чебер. Со узыр ӧвӧл. Натӥлэн атаез, пересь Сидор, калык вылэ ужаса ӧз узырмы. Нылзэ гинэ калык кадь дӥсяны тырше. Соин ик Натӥ шудон пӧлын но дӥсьтӥсьгес: «Натӥ — етӥз, Катя — востэм. Нырысез калык пӧлын, мукетыз палэнэ кыстӥське». Сыӵе ваче пуктон пумен быре: Натӥен Катя огкадь секыт улэмен, огкадь шудтэм кышномуртъёс луо.

Авторлэсь малпанъёссэ пырак возьматон вылысьгес пыртэмын Койыклэн, Сандырлэн, Иван Сидоровичлэн образъёссы. Соос — зӥбетлы пумит нюръяськисьёс. Иван Сидорович Ленинлэсь идеяоссэ вӧлдэ, Койык солэсь дышетске. Сандыр ас валамезъя бугыръяське, Семон кулакез, соиз Катяез ньӧраку, вие. Та образъёс тырмыт реалистической тип карыса суредамын ӧвӧл.

Азьвыл кылдэм традициосъя (кылсярысь, «Секыт зӥбет», «Гаян» романъёсын, «Кезьыт ошмес» трагедиын сямен) гожтэмын гуртысь узыръёслэн — Ӟаналилэн, Семонлэн, Ивашкалэн, Максимлэн образъёссы. Соос карикатура выллемесь. Семон гинэ пӧлысьтызы пичияк висъяське: со «визьмын» ужа, аслыз пумит султӥсьёсыз зӥбыны пӧртэм амалъёс утча.

«Катя» повесть удмурт литератураын синмаськымон улонэн улэ. Сое яратыса лыдӟо. Игнатий Гаврилов та повестья пьеса (инсценировка) лэсьтӥз. Спектакль пуктэмын вал Удмурт театрын. Сое али но ӵем пуктыло гуртъёсысь самодеятельной коллективъёс. Кедровлэн повестезъя ик Герман Корепанов композитор кылдытӥз «Наталь» операзэ.


6-тӥ оштолэзь, 1974 ар.