Арво Валтон
Поэзия

Арво Валтон

165 {num}

Арво Валтон (Валликиви) – тодмо эстон прозаик, кылбурчи, сценарийёс гожъясь. Вордӥськиз 1935-тӥ арын 14-тӥ толсуре Эстониысь Марьямаа гуртын. Арво Валтон – эстон кылын витьтонлэсь уно книгаослэн авторзы. Соос пӧлын миниатюраосын, кылбуръёсын бичетъёс, новеллаосын книгаос, романъёс, вакчи романъёс (повестьёс), нылпиослы книгаос, афоризмъёсын сборникъёс, нимаз книгае люкамын публицистика ужъёс но статьяос.

Бизнес
Эстон политик уй но нунал малпа
кинлы вузаса ӟечгес луоз 
та пыд йылаз куалекъясь атыкай музъемзэ
сокем сюлмаське
ялан утча дуноенгес вузан амалъёсты
барышез мед луоз тросгес
озьы лы лосыртымон
калыксэ уте
шелепен-юдэсэн лусйыса 
лушкем
ужзэ со тодэ
тодэ бай муртъёсты
чакла уксё воштӥськемез 
трос ужез эстон политиклэн
ужкагазъёсты гожъякуз 
пилиськем тусез шоры долкаса улыкуз но

Тодман 
История сылӥз синучкон азьын
синмаськыса учкиз ӵабъяськем ымнырыз шоры
сэзъяськыса мынӥз баре
быдэс зарезь юон куриз
выльысь ассэ кожаз герой 
куд-огезлэн ныраз мыжгаз
троссэ ортчемзэ ӧз ни тоды
котькуд таӵе юонэз бере мугораз пус кыльылӥз
тросэз со пусъёс дӥсь улаз вал
соин ик нуллӥз но со
ӝужыт сиресо дэрем но син вылаз ик лэзькись шляпа
ватыны быгатӥз ик жугиськись луэмзэ
мар карод сое
оло ымнырзэ буяно-а
озьы но оскалтӥмы ни
кытчы карод сое
котькытчы чуртнаське
ачим но мон солэсь ватӥськысал 
корка борддор пушкы эзылэме ке луысал
озьы тӥни

Литература
Эстониын вань кӧня ке гожъяськисьёс
нош печатлан машиназы одӥг гинэ
черод сылэ
тон эскерид ини та амалэз
вай табере мон оскалто
книгаоссы ке но потылэмын
уг лыдӟыло соос ог-огзэсты
уг поты ыштэмзы калык радэ туем ымныр туссэс
сое соос данъяськыса учко пильылӥськем синучконтӥ
одӥг еврей гожъясь вань Англиын
со но тон кадь ик гожъяське
но ог-огзэс пумитаку соос ӟечбуръясько
ӝажы вылысь адӟи пӧй книгадэ выльзэ
умой пе ужаськод пересь астэ пе чакласькод
вот озьыгес соос лэсьто огъя ужзэс

Кырӟан удысын ӵошатскон  
Лулыд секытатозь ик возьмаса быре ни ке кужым
сыӵе бичатыны кутске азяд пуктэм ужед
нырысетӥ малпанэдлэсь номыр уг кыль ни ӝож мылкыд сяна
оскон кулэсмемъя, будэ удалтонлэн шансэз
быдэс нунал ӵоже возьман трослы капчи луэ
берпуметӥ чассэ возьманэдлэсь
пияла вылэ гожтӥськизы неон тылэн ӝуатӥськем кылъёс
черт стенд вӧзын сылӥз мынекъяса
мынам потэ на вал ӵектылэме зэмлыкъёсты
мае эшшо чектод на возьмаськод ке кулэмдэ
яке яратоно дусымедлэсь чебер кыл гурламзэ
йӧтылӥськод ке тубатысь мукет лёгетъёсты
нунал пӧрат ке возьмаськод
тӧроедлэсь уж дорысь кошкемзэ, империедлэсь куашкамзэ
улон ик со луэ ини – возьман
мар-о мыным тӥляд автобусты яке пумиськонэ бере кылем муртты
куке пияла вылэ ӧз гожтэ зэмлыкме
куке отын но пуктэмын ни вал аслаз чертлэн ляльчиосыз

 

Ужъя 
Кутӥ но жингыртӥ инме номерзэ ӧй тод
но трубкаез чус ӝутӥзы кин луэмзэс ӧз вералэ
кыӵе улэ ни куазь тӥляд отын
зорлэсь уттьылӥськон маке сьӧре уз лу-а кутоно
зоръёс луылыку ватскон интыосмы тырмыт
нош кузёлэн бон кыӵегес ни мылкыдыз 
арлэн кыӵе вакыт шораз ӟечгес луоз дораз йыгаськыны
дыртон сярысь малпаськоно даурысен даур урод луэ
жадиз лэся ни со осконзылэсь палэнтӥськемъёслэсь
кылӥськиз урод серекъям куара
эшшо огзэ мон юасал на ай
мон кытысен отын пумитаны быгатысал азьвыл тодмоосме
выльёссэ шедьтоды соосты но уд тодмалэ
тӥ понэ ини трубкадэс жингыртӥсьёс уно
чузъяськиз йырвиымозь ик вуттӥкись куара
мар со вал 
зэмлык-а мар-аэ

 

Улон 
Чепылля на со интыме
витемелэсь шумпотэмме кемагес кар
мар вань киын со ӝог быроз
нош лыктӥсез ялан лыктэ
зор йыгаське липетэ
бадӟым гур бордысь потэ пӧсь эшъяськон
радэн сыло книгаос
ӧтьыса малпаськон дуннеосазы
шуд та шудондэ эн жадьы
возьмам понна тросгес тыро
зэмос малпанэд инме гожтэмын
ӧжыт гинэ кожон сьӧлык луыны быгатэ
духовкаысь зынъёс лӧсъяськизы
нюръяськисьёслэсь малпан ӧрзэс палэнэ кожытыса
дуннеын ялан мар ке но луэ
нуназе газетъёс лыдӟемын ӧй вал на


Яратыса сюлмаськон 
Басьтӥ костюм
сое дунне вылэ дӥсяны тырши
валась муртъёс шуизы
пельпумъёсаз, пе, ӟоскытгес
вуриськись тупато шуиз
озьыен вордӥськонэ дась луоз 
ӝытпал тупатэм дӥсез басьтыны мынӥ
нош дунне та дыр куспын быдэсак воштӥськем 
мискинь вуриськисен ми мар карыны ӧм тодэ
дӥсез киямы кутыса ик улӥмы
дунзэ тыроно ик
кӧня ужам уж ук со
мар вань на меда та улонын 
нылмуртлэсь куронъёссэ быдэстон сярысь малпанлэсь
визьмоез но бадӟымез

Дуннеез котыръясь 
Дунне иворе ялон лэземын вал
туннэысен кутскыса ад усьтэмын учкисьёс понна
лыктыны быгато ужбергатӥсьёс туристъёс 
оскыса улӥсьёс кулэм муртъёссы доры ветлыны быгатозы
виза басьтонэн секытгес
солэн дуныз куинь шапык вир
валютаез трос уг вошто
уже куто ӵуж кызьпу куаръёсты
та музъем вылысьёсыз уг ярало
котькудаз луыны кулэ сатаналэн тусыз
трос луизы мылкыд карисьёс
адлэн консулатаз черод ӧз бырылы
мон но мынӥ сьӧлыко эшме адӟон понна
сюрес кузь туннелетӥ ортче вал
таможня эскериз лулылэсь берпуметӥ сэрегзэ
кунгож дорын ужась мурт кымесам пус пуктӥз
отысь берытскеме бере пусэн ик ветлӥ
озьы бускельёсылы тунсыкогес луи
соос юазы отчы кылеме ӧз поты-а шуыса

 

Мӧзмон

Кыдёкысь дуннеослэсь мӧзмон котьку ик одӥг кадь, но со дыре ик нимаз учыръёсы туж пӧртэм пумо, шыпыт крезьгур, уно буёло лампаос яке абрикосъёслэн сяськаяськемзы, гурезь выжыосысь шундыен югдытэм лапегесь бабля куакъёс, вож буёл, ӟарыт-лыз яке ӵуж, яке сьӧд бархат кадь уй, ӝог выронъёс, яратон, бен, яратон дыр, но со тынад пушкысьтыд ӧвӧл, со яратон кыдёкын, тон пушкын – сое шӧдон гинэ, яратон доры каллен мынон, шузимыса улонлэсь ӵемысьгес но ӵемысьгес шыпытлыке пегӟон, та кык шудонъёс котьку ӵош уга, собере кыдёкысь дуннелэсь мӧзмон, толэзьлэн югытэз, улӥысь зарезьлэн пальккаськемез, отын, зарезь вылын, азвесь вылын кадь, куаро вайёс кыллё, вылӥысен инбам лэзе шыпыт азвесь эктонэз, ческыт бӧрдӥсь чипчирган, буш инты вадьсын золтэм сиослэн шӧдонзы, кык яке трос пӧртэм дуннеослэн сураськемзы; со тодмотэм выль дуннеос сьӧрысь матэктыны кутске югыт мӧзмон пыртӥ вордӥськем валан: отын но, мукет дуннеосын но ваньмыз со ик, курадӟонъёс но чурыт сюлэмъёс, синлы дышем музъем вылтӥ мае ке утчаса кадь огдышемен вамышъян, ялан мае ке утчаса улон, кытысь мар утчано, кыӵе йылолъёсты быдэстоно, ӧвӧл, одӥг нуналлы гинэ ӧвӧл, ялан выльысь но выльысь, часысь часэ, тулысысь тулысэ сое утчано, таин валче тон доры матэктэ кыдёкысь дуннелэсь мӧзмон, со котьку сямен огкадь, но со дыре ик котьку аспӧртэм, оло со ӵуж кышет улын шыпыт крезьгурзэс шудо уйпал кызъёс, соин соос кот шаугето, оло со ӧвӧлтэмысь малпам дуннелэн радэз, оло сукырмем визьлэн тулкымъёсыз, оло кытчы ке мукет интые кыстӥськон мылкыд – кошкы вал та поръясь пеймыт бусыысь кыдёкысь улонэ, кыкетӥяз, куинетӥяз улонэ, отчы, кытын со пачылмемын шуд сярысь выжыкылэн, мед луоз со тынад сюлэм котыртэмед, но лыктэ ук мӧзмон гур, жонгетэ пельёсад, тубе сюресъёс сярысь малпанъёсад, нуэ тонэ кыдёке, тынад осконэд доры но синкылиосыд пӧлы, сузёнтэм сюресъёсад, луонтэм улонад, кытчы ке ноку но зэм ӧвӧлтэмаз, кытын тынад номыр каремед уз луы, уго адӟонэд тынад – вордӥськем дырысеныд, со быръемын ӧвӧл, со вакытэн кылдытэмын, тынад мӧзмоно сюресъёсыд асэныд ик котыртэмын.

Лыдӟиськон

Луэ сыӵе дыр, пушкад кисьтӥсько кадь кыдёкысь малпанъёс, берыкто тынэсьтыд малпан ӧрдэ, кӧня калыкен тон герӟаськиськод, капчи бурдъёс вылын дырез но, интыез но вормиськод, тонэн вераськисьёс артэ-а уло, оло Латин Америкаын, оло соос гоноесь но куинетӥ даурын улэмъёс, озьы ке но сыӵе чебересь но тыныд матынэсь соос, оло, соин ик та нуналъёсын, кык адямиосын тырмытэм нуналъёсын, тон одно ик улыны кулэ, валаны, тон шӧдӥськод сое ик, мае шӧдо дуннелэн мукет пумъёсаз тынэсьтыд азьло но, тон бере но, соку тон выльысь валаськод, малы кулэ на тон, номыр выльзэ малпаны уг луы ни ке, уго малпанлэн пумыз уг ке луы, тон ялан утчаськод солэсь пыдэссэ, валэктӥськод котькудзэ вамыштэ, кытын аспӧртэмлыкед, кытын улонлэн кутсконэз, кудзэ тон ас пушкысьтыд лэзид, со мукет мугор мед луоз шуыса, утчаськод, кытын со пияно карись кыл, малпаськод выль дуннеосты, оскиськод вӧтъёсыдлы, но кылемед отчы тынад уг поты, потӥз ке но, ӧй быгатысалыд, соин ик тон выльысь утчаськод, кытын тынад пушкысьтыд со аспӧртэмлыкоез, кудзэ тон пырыосын кылдытӥськод, оскиськод дуннеез паймытыны быгатэмедлы, малы со ваньмыз кулэ тыныд, калык но история одӥг люк, паймымон вольыт люк ке луэ, малы та дуннеын тон – нош ик ноку лэсьтонтэм комбинация, соин тон шуиськод аслыд – шедьты сое, аслэсьтыд интыдэ, сое, марлэсь тон мӧзмиськод, шедьты со ӝамдэ дырдэ, тырмыты нульдэ, малы ке шуоно али номыр но ӧвӧл ук, тон али интыын но дырын огшоры вӧлмиськод, тон вошъяськись но ачиз ветлӥсь лыдпус, тон оскиськод, тонэ нокин уг адӟы шуыса, бен, соос асэнызы быремын, но вуиз ини тодонлы дыр, тынад котьмарлы ик тупась «уг тодӥськы» шуэмед пожаськоз одӥг шокчемен, чилектозы пӧртэм пала кошкись сиос, тон шумпотыны кутскиськод ни, серекъямед но потэ, малы ке шуоно тон тодӥськод, талэсь возиськемед тынад уз луы, вань со – мар ке но, со чиля, зэмзэ но, огпол пальма вылысь усёз ни со ваньзэ тодэмед сярысь шӧдон.


Эстон кылысь берыктӥз Муш Нади.