Боб Дилан
Поэзия

Боб Дилан

293 {num}

Боб Дилан – культовый музыкант, автор песен, актер, художник и писатель. Культовая фигура американский фолк- и рок-сцены с 60-х годов XX века. Автор бессмертных хитов «Blowin’ in the Wind» и «Knockin’ the Heaven’s Door». Основатель течения «кантри-рок». Один из негласных символов левого антивоенного американского движения. Лауреат Нобелевской премии по литературе 2016 года.

* * *
Соиз мукет дунне вал, вирлэсь, пӧсям вулэсь,
Сьӧлык кыскиз, ӟеч уж кадь, сюрес вал тузонлэсь.
Кырлуд пушкысь потӥ мон,  синвуослэсь вужер…
«Чаль пыр липет улам тон, пегӟод зорлэсь, эше…»

Со сюресэз выльысь мон ортчи ке, одно тод,
Мон вань ӟечсэ, райлы кадь, солы гинэ сёто –
Кулӥсь андан синъёс пыр ӟырдыт калыкъёсын!.. 
«Я, пыр липет улам тон, уз котты зор татын…»

Куара но мон ӧй потты, мон кышканы ӧй ву,
Угось котькуд нунал вал гурезь мында кайгу.
Тон малпа ай, инты вань, кытын шуныт, шыпыт…
«Ма, пыр, эше,  ӝоггес тон,  я, шунтӥськы ӧжыт…»

Мон жадёнлэсь жумми вал, йӧзор сётӥз куанон,
Куакъёс улын кӧлай мон, дорез ӧй тоды мон,
Висись крокодилэз кадь кырмиз ук чылкыт лул:
«Я, пыр ини коркам но аслад дорад кадь лу!»
 
Мон шуак берытски но – шуныт ӝуа синмаз,
Ненег выжыкылысь кадь сяська керттэт йыраз.
Небыт со матэктӥз но, шуккиз, оло, гырлы:
«Бен пыр, инты одно ик тырмоз кык сюлэмлы».

Но ыштӥмы марзэ ке, борддор ӝутскиз бусо – 
Малпай озьы кулэ, дыр, озьы малпаз, дыр, со…
Но со чебер кутскиз вал куке-соку ӵукна:
«Ӟечлык луоз липет но, корка но тон понна…»

Кыктос тодэ, возьма, дыр, Утись гурезь вӧзаз…
Но со сыӵе пичи вал валлян пыдберъёсам…
Нош коросчи учке бен выль коросэз валлин,
Ме, пыр, пе, киное тон, попкорн сиён сяин…

Нуны бӧрдон кылӥ мон, дыдык чипсон кадь ик,
Пелям пересь кеськиз кадь: «Яратонтэк жади!»
Валай шат ваземзэ мон, вань шат оскон солы?
«Ма, пыр ни тон, – шуиз со, – эн сылы зор шорын…»

Огпол лыэн шудо вал солы, мар вал вылам,
Шуд утыны малпай мон, мыным яд кисьтӥллям.
Но мон янгыш ӧй вал но – ути мырдэм йырме…
«Ма, пыр ни тон…» – шуиз со,  сётӥ солы киме.

Адӟи трос кунъёсты мон, ялан вамыштыса
Йылсо лезви вылтӥ кадь нуись сюресъёсам…
Эх, нош ик луысал ке дырез берыктыны…
«Тон пыр дорам,  – шуиз  со, – штормлэсь ватӥськыны…»


* * *
Кытын тон, пие, вал, чагыр синмое?
Кытӥ-о ветлӥд тон, пичи нуные?
Ветлӥ мон дас кык гурезьёс бамалтӥ,
Ортчи мон куатьтӥз пырдылэм сюрестӥ,
Бергай мон сизьым ӝуам тэль кушъёсын,
Сылӥ мон куасьмем зарезьёс пыдэсын,
Сюрс ар мон кылли шайгулэн вожераз,

Инмын нош ялан – гудыръяз, гудыръяз, гудыръяз, гудыръяз,
Гудыръяз кисьтыса зорыны...

Мае-о адӟид тон,  чагыр синмое?
Мае-о адӟид тон, пичи нуные?
Кион уллёос нуныез возьмазы, 
Ӧй вал ветлӥсез бриллиант сюресын,
Адӟи  вир виясь сьӧдэктэм улъёсты,
Адӟи мурӝолысь ӵӧкисен муртъёсты,
Адӟи ву пушкы мраморлэсь тубатъёс,
Адӟи ымъёсты, но ӧй вал кылъёссы,
Адӟи пыӵалъёс мон нылпи киосысь…

Инмын нош ялан – гудыръяз, гудыръяз, гудыръяз, гудыръяз,
Гудыръяз кисьтыса зорыны...

Мае-о кылӥд тон, чагыр синмое?
Мае-о кылӥд тон, пичи нуные?
Кылӥ вузонзэс туж кышкыт тӧлъёслэсь…
Кылӥ гурламзэ бадӟым ву нюртонлэсь… 
Кылӥ мон  сюрссэ ӵокисен шуккисьсэ,
Кылӥ сю сюрссэ шыпыртӥсь ымъёсты,
Кылӥ мон сютэм но шудо муртъёсты,
Кылӥ кылбурзэ мур нюкысь поэтлэсь,
Кылӥ клоунлэсь бӧрдэмзэ мон паркысь…

Инмын нош ялан – гудыръяз, гудыръяз, гудыръяз, гудыръяз,
Гудыръяз кисьтыса зорыны...

Кинэ пумитад тон, чагыр синмое?
Кинэ пумитад тон, пичи нуные?
Кулэм чуньызэ сермета вал гурт пияш,
Тӧдьы пияшен ӵош ветлӥз сьӧд пуны,
Егит кышнолэн мугорыз тылсияз,
Ныллэн ымныраз югекъяз инбаммы,
Огзэ пияшез бӧрдытӥз яратон…
Мукет пияшез узатӥз вожпотон…

Инмын нош ялан – гудыръяз, гудыръяз, гудыръяз, гудыръяз,
Гудыръяз кисьтыса зорыны...

Кытчы табере тон, чагыр синмое?
Кытчы табере тон, пичи нуные?
Табре бертӥсько мон, зор ву кисьтытозь,
Табре бертӥсько  пеймытэ ышытозь,
Кытын сьӧлыкъёс пыӵамын ни туж мур,
Кытын  сьӧд ӵынлэсь но ядлэсь паке шур,
Кытын коркае вить тюрьма тэль вӧзын,
Кытын палачлэн ымнырыз ворсамын,
Кытын кӧт сюма но лулэз каро выт,
Кытын буёл сьӧд но нолез каро лыд,
Кушто соослы мон кылме лулъяса,
Гурезь лангаен зуркато борддорзэс,
Чалмыт вуосы, зарезе ышыса,
Кылзо кырӟамзэ чылкытам дуннелэсь…


* * *
Кӧня сюресэз мед ортчоз адями,
Куке но зэмос адями луытозь?
Кӧня зарезез мед ортчоз юг дыдык
Луо ярдуре кӧлыны пуксьытозь? 
Кӧня ядроос ай кулэ лобӟыны,
Куке но огпол лобамысь дугдытозь? 

Валэктон бен, эшъёс, пеллясь тӧл ымдурын, 
Валэктон бен, эшъёс, – кошкылэ тӧлъёсын… 

Кӧня мед  сылоз та ӝужыт гурезед, 
Куке но огпол зарезе ышытозь?
Кӧня улыны бен кулэ адями,
Куке но огпол эрикен шокатозь? 
Кӧня бергатоз чыртызэ адями,
Куке но огпол адӟыны кутскытозь? 

Валэктон бен, эшъёс, пеллясь тӧл ымдурын, 
Валэктон бен, эшъёс, – кошкылэ тӧлъёсын… 

Нош ку со ӝутоз синъёссэ, адями,
Куке но огпол инбамез адӟытозь? 
Кӧня солы пель йыр бордаз ляконо,
Огпол адями бӧрдонэз кылытозь? 
Кӧня кулонэз со кулэ адӟыны,
Туж трос калыкез быдтӥськом шуытозь? 

Валэктон бен, эшъёс, пеллясь тӧл ымдурын, 
Валэктон бен, эшъёс, – кошкылэ тӧлъёсын… 


Удмурт кылэ берыктӥз Пётр Захаров.