Лариса Орехова
Поэзия

Лариса Орехова

681 {num}

Лариса Николаевна Орехова – поэт, журналист, переводчик, заместитель главного редактора журнала «Инвожо», директор Удмуртского ПЕН-клуба. Стихотворения включены в книги «Азвесь лодка = Hõbepaat» (Таллинн, 2005), «Neiu ja karu» (Тарту, 2005), «Kuum ӧӧ» (Таллинн, 2006), опубликованы в литературном журнале «Porsche» (Франция, 2008).


         *
..мынам тодам синвуосы –
бӧрдылыса ӝутсконъёсы..
али но кадь мынам бамы 
калмез пусэн тату-тамын,
нош пельёсы – зундэс-амын 
нуллӥсь чипен но спутникен, 
кудӥз берга дунне пумын,
кудзэ шуо шунды мумы..

..йырсазь кужым вотэсамын
тубон калме кортӵоганы, 
кылзӥськыса калмезъёслэсь,           
дышетскисько мон шоканы 
бамалъёсын пеллясь тӧллэсь,
кытын кылъёс вордско вӧсьлэсь,
кытын синву луэ азвесь,
нош азвесез луэ чигвесь
викышъёсме вотэсаны –
вӧтэз уг яра исаны..

..калмез викыш витэк, кыштэк,
ватка сямен ушъяськытэк, 
тодэ сьӧдзэ но шундыез,
бадӟым шунды песятаез,
кудзэ шуиськомы вал Тӧр,
кудӥз пуке чорыгаса,
аслаз  гурезь ярдур вӧзаз,
отын, кытын ачиз мустор,
солы чорыгъёссэ дася,
нош чорыгъёс выльысь улӟо,
пыже ке но чорыг колӟо..


         *
..синвуосме мон люкасько –
удмурт пуслы пӧрмытъясько,
соос пишто азвесь тылын
югыт пужыосы вылын,

нош пужыос лыкто пыжен,
уйпал валлянъёсмы музэн,
пилемъёс вылысь зарезьёстӥ,
калмез дунне югдон шортӥ..

         *
..эн ыш, эн быр,
пеймыт уйшор сямен –
тон утча сюресъёс
мынам сяська тэлям,
кытын ӝуйы кыскиз
ваньзэ сьӧд кылъёсты,
кытын мон адӟисько
луло писпуосты,
мон но соос сямен
инмозь ӝутӥськисько,
уг жаляськы асме,
туж юн возиськисько,
сэзъя ке но сильтӧл,
миське ке но зор ву,
сяська тэле сьӧд кыл
лысву вылтӥ уг ву..

        
  *
..кын-
          тыны кулэ 
тӧдьы дэраослэсь
ын..
кулэ ӵын, кулэ тыл 
юн..

..сюлэмлы кулэ 
кын..

та тылын
кыданы-юнманы
бадӟым сюрес-
ын..

  *
..та кезьыт сюресын
мон но йӧ..
жадем мугорын
тӧл шула – кынтэ..
уз кыльы ни тылы,
юг шунытэ, 
югдытыны
та дуннеез.. 

..мон поръясько
вуюись кадь
пуруша вылтӥ..

куке но вал ву,
зор ву, 
вань шуръёсты 
пачылмытӥсь, 
эктӥсь-поръясь..

валасько,
кызьы шундыез возьма
йӧ-зор салкым
шунаны-кӧсаны,
выльысь улӟыны
луд вылысь 
туж шудо сяськаен..


         *
..тыныд вазисько вал нырысь:
пичи ныл!
собере кеськыло вал: 
нылаш!
табере ни шуо:
кышномурт!
нош бӧрысь вазёзы:
песянай!

адями со 
ачиз но гурезь,
йылсаське
но инме
ӝутӥське..

         *
..пушкын жадён
ёрмиз – кызьы поттом сое?
со, ньылонэ
ӵогӟем лы кадь,
акыльтэ, уг сёты шоканы
быдэс гадь тыр..

капчи-а улыны тазьы?
калтонэ сюрем чорыг сямен ке
шӧдӥськод астэ?
улон  потэ ке туж-туж палэнын,
ортче ке со понназ тонтэк,
тонэн жадён, жадён, жадён гинэ ке?
тон вунэмын ке вуысь пыж музэн,
нуэ ке тулкымъя тонэ солань-талань,
чик буйгатэк но чик дугдылытэк..


         *
..мед кисьтоз зор дугдытэк.
мон уг вый со пыдсы –
кужмо луыса тэтчо
эшшо вылӥе-вылӥе –
туж кельше дуннеез учкыны..


         *
будосъёс бусыын, луд вылын
чебересь дэремзэс дӥсяллям,
кинъёслы кырӟало но экто, 
кинъёслэсь мылкыдзэс лӧпкыто?

нош шунды адӟытэ чеберзэс,
сяськаё йыръёссэс, мугорзэс.
шат ӧвӧл-а та шуд мон понна,
адӟисько ке тае мон ӵукна?

ой, кильтро чебермам апайёс,
выль нунал выль шудбур мед ваёз,
мед усёз тӥ вылэ капчи зор,
шунды си мед учкоз туж мусо.


         *
..шур азьын – толэзь,
шур сьӧрын – бусы,
бусы сьӧрын – нюлэс,
нюлэс сьӧрын – гурезь,
гурезь сьӧрын – зурод,
зурод сьӧрын – мон,
мон сьӧрын – шунды,
шунды сьӧрын –
йылтэм-пумтэм улон..