Любовь Ганькова
Поэзия

Любовь Ганькова

365 {num}

Любовь Леонидовна Ганькова — удмурт кылбурчи, прозаик, кырӟанъёс гожъясь. Вордскемын 1949-тӥ арын 12 куартолэзе Алнаш ёросысь Вуж Ӟуння гуртын. «Мон кышномурт», «Анае вералоз вал...», «Озьы вылэм», «Кышномурт мылкыд» но мукет книгаослэн авторзы. Ашальчи Оки нимо премилэн лауреатэз (2005). Удмуртиысь Писательёслэн огазеяськонзылэн ёзчиез (2013).

Шудо кожасько

Шаль кышетме  ке думисько,
Чебер мунё кадь адскисько.
Мунё, мунё кадь адскисько.

Вож дэремме ке дӥсясько,
Вудур шашы кадь луисько.
Шашы, шашы кадь луисько.

Ӝужыт ката ке кутчасько,
Веськрес кызьпу кадь потӥсько.
Кызьпу, кызьпу кадь потӥсько.

Зарни зундэс ке бырттӥсько,
Узыр кышно кадь йӧтӥсько.
Узыр, узыр кадь йӧтӥсько.

Шуныт кылъёс ке кылӥсько,
Ӝужась шунды кадь мынясько.
Шунды, шунды кадь мынясько.

Лулгажанме ке адӟисько,
Асме шудо мон кожасько.
Шудо, шудо мон кожасько.


* * * 

Вожпотэм шурдыт ӧвӧл,
Курадӟон секыт.
Кулыны чик жаль ӧвӧл,
Пересьмон курдыт.
Мед кулом гинэ чутрак,
Чик курадӟытэк.
Вожпотэм ортчоз чаляк,
Медам кул пересьмытэк.

 


Кышномурт мылкыд

Кышномурт мылкыд ыртӧл кадь
Ӟыгыртэ, куандырытэ.
Куддыръя со лек сильтӧл кадь
Йыркурен гадез ӵабтэ.

Кышномурт мылкыд инсьӧр кадь, 
Чилектэ но гудыртэ.
Чагыр ин пильмаськылэ ке,
Курытэз зорву гылтэ.

Кышномурт мылкыд муркож кадь,
Зумытэ но лӧпкытэ.
Тулкымзэ вылэ пазьге но
Шукыез марӟан луэ.

Кышномурт мылкыд шунды кадь,
Гордэктэ но ӟаректэ.
Мозмыкуз туссэ воштэ ке,
Нуналлэсь ямзэ быдтэ.

Кышномурт мылкыд ӵушъял кадь,
Веньёссэ пештырытэ.
Сямызлэн кузяз ветлӥд ке,
Гурезез но берыктэ.

Кышномурт мылкыд инкуазь кадь,
Сизьым пол дӥсьсэ воштэ.
Со чупа но, чепыльтэ но,
Син куспын алда куштэ.

Кышномурт мылкыд ошмес кадь,
Жингыртэ но жильыртэ.
Со ужа но, яратэ но,
Сьӧлыка – нылпи вордэ.


* * * 

Вожъяськон – пересьмытэ,
Кайгырон-катьтэммытэ,
Сюлмаськон – уйжомытэ,
Ӝожомон – лекомытэ,
Йыркуран – визьтэммытэ,
Шулдыран – дырез быдтэ,
Визьмоез – бадӟымъяське,
Йӧноез – нимазъяське,
Шулды-булды – сурыкме,
Ужтэк пукись – куанерме,
Вина юись – азьтэмме,
Быгатӥсез – узырме.


Осконтэм шудбуре

Осконтэм шудбурен улӥсько –
Мон доры со пыра лушкемен.
Пужыё дэремме дӥсясько –
Со азьын пурӟисько сяськаен.

Пукиськом шунтыса шудбурмес,
Юиськом яратон ӟелемес*.
Уж сярысь кенеше со монэн,
Улонэз дунъяськом ми ӵошен.

Кӧня пол ми сярысь зулемын,
Лулъёсмы пож вуын гылъямын.
Пыкылон мугъёсыз кылзытэк,
Лыктэмзэ витисько чидатэк.

Куинь пол ни чортӥз горд атас,
Люкиськыны  ни косэ ӵукна час.
Югдурез со вала, курадӟе,
Тупаз ке учыр, лыктоз ӵуказе.

Кугӟало сюлэме юанъёс,
Сьӧлыкын уяло кык лулъёс, 
Кусыпмес куйдыре быдэс гурт,
Мон, лэся, кылкылмес кышномурт.

 


Палэзь кисьма куарусёнэ

(ӟуч кылысь берыктэмын)

Палэзь кисьма куарусёнэ,
Жальма сӥзьыл пужмераку
Ортчо аръёс, будэ арлыд,
Дырез берен уд берыкты.

Акшан вылэ лэзьке инльӧль,
Вӧзаз ӧте зардӥсь ӝомал.
Тон эн жаля ортчем дырдэ,
Юнме ӧд ул тон улондэ.

Куазед ежма, толме шуыса,
Арлыдъёстэ тон эн лыдъя.
Тол палэзьлы кышкыт ӧвӧл,
Юнме гинэ со кынмысал.

Палэзь кисьма куарусёнэ,
Кынлэсь эшшо ческыт луэ.
Кильтыръяське палэзь ӟуски
Шуд сӥзьыса азьланезлы.


Трокай топольёс

Трофим Кузьмич Борисовез буре вайыса

Веськырес топольёс
Пӧсь куазьлэсь сайяло.
Шильыртӥсь вож куаръёс
Ыр тӧлэн чимало.

Трокайлэн тополяз
Кылемын тусбуйыз.
Вашкала выжыяз
Вормонтэм кужымыз.

Лабырес мугораз
Туг ӵыжин биниськем.
Вӧзысьтыз пушъетаз
Ошмес син усьтӥськем.

Мон мыно сайулаз
Ӝиптӥсько мугораз.
Верало кӧтӝожме,
Буйгато сюлэмме.

Мускыт му утчаса
Поръялоз гон-мамык.
Трокаез данъяса
Люкаськоз кун калык.