Микаль Михайлов
Поэзия

Микаль Михайлов

628 {num}

Микаль Михайлов – туала егит кылбурчи, кырӟась. Вордскемын но улэ Кукмор ёросысь Каньсар гуртын. Ужа школаын дышетӥсь луыса.

Кыдан

Тон дырекъясь ымдуръёсын
Черекъяськод шыпытлыке.
Нош осконтэм вамышъёсын
Выйылӥськод выль сьӧлыке.

Берлань чигнан лэсьтон азяд
Тон кылзы на ӧжыт монэ.
Мон котьку но сыло вӧзад.
Тодмад монэ чиль сьӧд дӥсен?

Кинлы ке но мон Оби-Ван,
Кинлы ке но, дыр, дышетӥсь.
Куке пушкад оскон на вань, 
Уг кошкы мон пельпум вӧзысь.

Куке кужым вань киосад,
Нюръяськыса, мын, пумитэ!
Мар асьмеды ӧз виы на,
Ӵуказелы ук кыдатэ!

 

Дзэн

Монэ уг паймыты сьӧлык та дуннеын.
Мар вал толон, со возиське туннэ.
Шакшы уя котьку ук вылӥын.
Синэз усьтса, нуэ мӧйымонэ.

Ваньмыз бездыт. Пурысь буёлъёсын
Нош суреда улон выль нуналэз.
Уг висъяськы дунне кибыосын,
Вань сюресэд: кутскон но быронэз.

Быдэс дунне вӧся кагазъёсыз.
Ӧвӧл ни зэм, шуныт мылкыдъёсмы.
Жадиз лулы витьса выльмонъёсыз,
Со дышетоз аслыз таре выль Дзэн.

 

* * *
Пуны вузэм куара кылзӥськыса,
Кыштыр гинэ потӥз пересь педло.
Нош мар ке но пушказ сюлворыса
Инме учкиз... кизилиос пишто.

Липет вылын лымы сулеп шуна,
Вукыремъёс вирсэр выллем кошко.
Азбар шорын пуны уг дугды на,
Вузон гуръёс пересь сюлмез бышко.

– Я, буйгатскы. Уйшор ини, тырмоз, –
Пуныезлы тамак ӵын пыр вераз. –
Нырысетӥ ӧвӧл тулыс, ортчоз.
Асьмес но чидалом, Инмар чидаз...