Пётр Захаров
Поэзия

Пётр Захаров

275 {num}

Пётр Михайлович Захаров – известный удмуртский писатель и общественный деятель, поэт, переводчик, драматург, журналист, критик. Главный редактор журнала «Инвожо». Основатель и президент Удмуртского ПЕН-клуба. Председатель Правления Союза писателей Удмуртии.

*
Кыӵе-о со луэ, зэмос кылбур?
Сыӵе ик-а, кыӵе вал Галатэя?
Туннэ тонэ гинэ со яратэ-а,
Ӵуказеяз муртлы луэ шудбур?..

Кыӵе-о со луэ, зэмос кылбур?
Оло сыӵе, кыӵе турттӥз Медэя?
Котьку тонэн со луыны медэ-а?
Вузад ке, со уз кары тонэ бур?..

Кыӵе-о со луэ, зэмос кылбур?
Ӧвӧл меда ачиз со Афродита?
Кытчы гинэ пыдыз солэн уг йӧта,
Ваньмыз яратыны кутске туж мур...

Кыӵе-о со луэ, зэмос кылбур?
Быдэслыко, кыӵе вал Артемида?
Огпол янгыш гольык сое адӟид ке,
Синтэк ветлод, Тиресий кадь гумыр...

Кыӵе-о со луэ, зэмос кылбур?
Удмурт тэльын улэ-а Амазонка?
Вань мугорыз солэн шунды тузон кадь?
Пукыӵ ньӧлаз кырӟа-а удмурт гур?..

Шуак кылдэ, шуо, зэмос шудбур,
Со Амазонка  синмыныз ыбе ке,
Тӧдьы валэз вылэ шуак тубе ке,
Шуэ ке: возьматом-а мон кылбур?..

Кыӵе-о со луэ, зэмос кылбур?
Луэ-а шӧдытэк шорысь тудӟон кадь,
Удмурт кылэн, анай кылэн шокчон кадь,
Куке потэ пыдлось ик удмурт гур...

Кыӵе-о со луэ, зэмос кылбур?..

 


*
Та дунне туж паськыт куараё,
Со доры вуиськод тон шыпыт,
Кизили дуннеысь айы куар,
Кизили дуннеысь куар шыпыр...

Ин писпу туж югыт но мусо,
Куаръёсыз ярдуртэм мур зарезь,
Куаръёсын куар пуштӥ мыныса,
Котькуд куар шыпыртӥсь бадӟым крезь!

Та крезьгур суреда гумырез,
Куар вылысь кизили пусъёсын.
Нуыса пичи куар тӧлпомес,
Толъёсты буйгатӥсь вӧсьёсын.

Вуиськом, дыр, паськыт но чебер
Дуннелэн нылпиез луыса.
Кизили дуннеысь ютубе
Котькулы улонмес гожтыса.


*
Чорыг сисьме йырысеныз, 
вунэтыса ас кылзэ, ужзэ:
«Учкелэ, – со шуэ, 
аслэсьтыз паймымон сисьмонзэ, –
вдохновение вань ке но, 
монэ югдытэ кӧш зын,
уг утьы хит-парад лэсьтӥсь хитин 
сьӧм-тэнкеосын».

Адями парланэ-ӟырда, 
кымалтэ рюмка, гожтэ кыӵе ке пост,
Курег мӧляез сие,  
чипейлэсь вайяськись быжзэ, 
гожтэмын ке ГОСТ,
Ветлэ  вужаз черке, 
кытын ладан но сюсь, 
коньдонэн картуз,
Адями кенжытэ ческыт тамаксэ,  
тэшкыльтэ пеньзэ пыдесысьтыз.

Райлэн пеньӟонэн пенӟытӥсь садэз, 
кизилиез сыномисез,
Гумыосты зол курласа, 
кадыр вуэз, жильыртӥсез,
Ваньмыз инмар доры бертэ, 
вань куасьмемез – вандылонлы,
Соосыз но, кин туж зол яратӥз, 
кин туж юн оскиз инмарезлы.

Ышылыса дунне радаръёсысь, 
тулыс азьланьтэ кырӟанзэ,
Тани возьматэ кадь со 
Петыр но Паша сярысь 
калтонлэсь куасьмонзэ,
мироточить каре музъем эгыр, 
тылыосын шобырске акрил,
улон 
кулонэз но утьыса, шӧдске, 
гожъясьёссэ но курбон кариз...

Нош ми шуиськомы 
утёно анай кылэз, 
эктытыса пересьёсты,
батлъёсы поттӥськомы графоманэз, 
вунэтыса акынъёсты.
ӟуч кылъёсын гожъямын пулъёс
котыр  дышетскон юртъёсын,
ӟуч кылъёсын кырӟа-югекъя 
котькуд вузаськись озын.

Чорыг сисьме йырысеныз, 
вунэтыса ас кылзэ, ужзэ:
«Учкелэ, – со шуэ, 
аслэсьтыз паймымон сисьмонзэ, –
вдохновение вань ке но, 
монэ югдытэ кӧш зын,
уг утьы хит-парад лэсьтӥсь хитин 
сьӧм-тэнкеосын».


*
Чукырча койык – амазонка 
сюро шлемен,
Зын турын бичатэ солэсь 
золтӥськем веразэ,
Ӝыт шунды ыше но 
ӟырдам клеммае
Тём-тём-тём лякиське 
кизили дукесэн.

Одӥго кыр уллё 
мынэ ву юыны,
Пыдгижы кусыпаз 
чваккетэ кыед сюрес,
Чукырча койык чик уг кышка 
асэныз луыны,
малы ке шуоно эрико, 
малы ке шуоно со мырккес.

Аслыз ачиз – мурт луись, 
ӟозъёсын кызьы ке тунась-марась,
учкылыса эмъюм турынэз, 
йӧныосты чуко-беко,
вуоноез 
бадӟым бензовозэн  
кымалскыса,
туж дыртыса матэктэ: 
«Мон тонэ яратӥсько».

Мед мынам синвуэ  
кельше микросхемалы,
Кудӥзлэн тодон-памятез 
кенерен котыртэмын,
нош кенер пушказ   
кыӵе ке страус утча 
Эммаез,
Шуыса Эммаен соос 
паръяськемын.

Чукырча ик койык – 
амазонка сюро шлемен,
кудӥзлэсь золтӥськем веразэ 
зын турын бичатэ,
ӝыт шунды  ке ыше, 
луэ мынам Эммае,
Тём-тём-тём лякиськись 
кизили дукесэн.


*
Мон тодӥсько на, сюресъёс
Уно вал котырын котьку.
Гурт котыртӥ ортчылыку,
Туннэ но адӟисько соос.

Куинез нуэ  ошмес доры,
Кыкез мастерскоысь бертэ,
Ньылез поезд доры дыртэ,
Ӧвӧл огез но огшоры.

Тани гуртысь бакча сюрес
Шур сьӧрысен пӧрме куиньлы,
Шумпотӥсько мон соослы,
Мын котькытчы, дунне котрес!

Урам сюрес – дынгыр-дангыр,
Трактор ворттэ, кутьы бертэ,
Бускель Ка-семсотсэ пуктэ,
Изо сюрес табре уг быр.

Нош из вылтӥ но куд-огез
Канжаськыса усьылӥзы,
Марзэ мултэс юылӥзы –
Уд перчы ни ӟугмем гердэз.

Гуртмы ватӥськыса ӧз ул,
Гарамурес вал ваньмызлы.
Уно пасе сюресъёслы
Нокин из бышкалля гын тул.

Быдэс Россия сюрестӥ,
Вӧзтӥ ортчо вал поездъёс.
Уно ветло вал бандитъёс
Городъёсысь городъёстӥ.

Кин ке ветлӥз соосын ӵош,
Блатняк кылэз тушлатыса.
Кин ке, огпол усьылыса,
Вольтчись сюрес вылэ ӧз кож.

Угось турнам нёжалъёсын
Октӥськыло вал турынъёс,
Возтӥ ортчо вал вагонъёс
Пӧртэм кырӟась купеосын.

Колхоз грузовикъёс шырыт
Нуо вал милемды уже,
Куддыр быдэс гужем ӵоже
Бертылӥськом вал туж бер ӝыт.

Угось мусо кырӟаллязы
Грузовикын сылӥсь нылъёс,
Пельто вал сокем пӧсь толъёс
Ӟырдам пельпумъёссы вӧзын.

Кызо кӧс нюк, Шакай ошмес
Котьку мыто  вал выль кырӟан.
Ягул ошмес, ошмес Шурӟан
Ялан уте вал йыртышмес.

Гуртын уно вал визьмоос,
Вераськимы соосын ӵем.
Кытысь но кин татчы вырӟем,
Кыӵе вал гурт вӧсяськонъёс...

Ми усьтӥськом вал кышкытсэ,
Кызьы быриз Кузон, Арча,
Кызьы быриз Ош Чукырча,
Кызьы Вуж гурт кельтиз ассэ.

Кызьы ышэм Уча, Каньсар,
Кызьы Зумъя луэм Юмья
Кызьы Киня ассэ эмъя,
Кыӵе вылэм со удмурт сар.

Уно кылӥ гуртэ сярысь,
Мар со шуэм, пе – ОШ-ТОР-МА.
Калык йырзэ ялан корма,
Биармия шуэ кытысь?

Биармия – со ош дормы,
Сое шуо «Ош тӧр музъем».
Тӧрэз овӧл,  пе, скал сием,
Ӧз быры Быдӟым книгамы..


*
Та улонын  быдӟым поэзия
Янгыш, дыр, луыны кулэ, ямсыз –
Лушкаськисё улон тодметсыя,
Кык пыдэстэм храмъёс – кисыосыз.

Зэмос кадыр! – чылкыт валанъёсъя...
Медаз луы интыосыз возьыт.
Но кырӟаны косо кабъёссыя
Ворлы кельшисьёссэ, ӵукна но ӝыт.

Кельшон сярысь ке, мар дыр возьытэз –
Нюлон интыосыз  ӧвӧл отын.
Но котькудӥз кылбур табре гожтэ
Зэмос бадӟым поэзия чотын.

Вор валанъёс уг шӧдо пумлыксэ,
Мар адями кельтоз ас ящиказ?
Кӧня ке килограм сюйзэ-пеньзэ,
Гожъяськем флешказэ шор кокраказ?..

Мон мынӥсько ышись гуртъёс вӧзтӥм.
Вотяк сямен шпалъёс кузя тэкит...
Кин ке шуиз ке кылбуръёс гожтӥ,
Мед со ортчоз паровозлэн гуртӥз...