Хассо Крулль
Поэзия

Хассо Крулль

134 {num}

Хассо Крулль – туала эстон кылбурчи, тодосчи, кылысь кылэ берыктӥсь. Вордӥськемын Таллиннын. Туннэ нуналлы Хассо Крулльлэн даслэсь трос кылбуръёсын бичетъёсыз потэмын, соос пӧлысь «Крезьгур лабиринтын уйлы быдэ» нимо кылбур сборникез 2010-тӥ арын печатласькиз Удмурт шаерын. 2006-тӥ арын потэм «Тол» книгаез пусъемын Таллинн Университетлэн премиеныз, 2009-тӥ арын потэм «Ньыль пол ньыль» бичетэз – Эстониысь Культуркапитал фондлэн премиеныз. Хассолэн улонэз герӟаськемын культураез эскеронэн, литератураен. Со тодмо луэ литератураез эскеронлы сӥзем эссеосыныз, соос ньыль нимаз книгаен потэмын. Паймымон уно Хассо Крулльлэн эстон кылэ берыктэм ужъёсыз. Француз, англи но немец кылъёсысь со берыктӥз уно тодосчиослэсь ужъёссэс: соос пӧлын – Жак Деррида, Мишель Фуко, Пауль Вирилио, Юлия Кристева, Делёз но Ф. Гваттари, Пьер Бурдье, Славой Зизек, Эрнесто Лаклоу, Вальтер Беньямин. Со сяна, Хассо Крулль уно кылбуръёсты берыктӥз: англи, француз, голланд, финн, швед, немец, испан кылъёсысь. 2001-тӥ арысен Калью Круузаен ӵош кылысь кылэ берыктон ужлы сӥзем «Ninnuku» Интернет-журнал поттыны кутскиз. Таллинн университетын Хассо Крулль студентъёсты кылбур берыктон ужлы дышетэ.


            *
Тол. Лымы котькытын, корка котырын.
 Йӧ. Пыд улын куажыртэ, кулэ ик ӧвӧл
юн лёгиськыны.
 Кезьыт. Сиресэ ӝутэмын, бадӟым шарф чыртыын, шунды
ӝоген пуксёз но, куазь талэсь но кезьыт луоз. 
 Газетъёс. Нуналлы быдэ пото, озьы ке но
мон соосты со понна киям уг кутӥськы на.
 Писпуос. Ялан корка котырын сыло, лымы люкъёс
вайёс вылын, малы соосты нуллонэз на, 
лымы шунан дыръёс ортчизы ни.
 Гур. Нуналлы быдэ ӟырда, мон корка 
 пу пыртӥсько ке, гуре тыл понӥсько ке.
 Автобусэн мынӥсько. Со пичи пеймыт бӧлет,
 кортлэсь, бен, бадӟым укноос кыкнапалаз ик ке но,
 мар ӧвӧл, со ӧвӧл ни. Югыт.
 Кӧня кулэ со. Пыд азь адӟиське ук.
 Компьютер. Монитор азьын пукисько, озьы ке но уг ужаськы,
крезьгур утчасько но азьтэмъяськыса
кылзӥсько, пеймыт ини, дыр вуэмын ини, озьы ук.
Изьыны мыныны.
Эрик час дугдэм но кема дыр ӵоже
сылэм. Куд-огез шуэ, солэсь но, пе, кема.
 Нокин но сое ӧз шӧды. Зэмзэ ке. 
 Кыллимы, валесъёсын кыллимы, изимы, огшоры эрико.
 Али мон кышнопала мыно но холодильникысь ӧжыт 
 чибинь вӧез ӟузё. Парагрипплэсь со умой.
 Гужем азьтэмез йӧнатэ. Толалтэ нош уг,
толалтэ нокызьы но уг юртты.
 Одӥг крезез кылзӥ, со вал
Ариадналэн сузэрез сярысь, мар соин луиз, мар луиз солэн абдрамон
лабиринтэныз. Гипполит. Но лабиринт лёгамын
лымые, тулыс шуналоз.

 

            *
Шуныт. Коркан шуныт, гурын шуныт, кырын 
 шуныт. Ноль градус, шунды яркыт пиштэ.
 Озьы со толалтэ гинэ пиштэ. Толалтэ гинэ
лымы вылэ пиштэ, йӧӟузыри пыр пиштэ.
 ӟузыриос ворекъяло, шапыкен вияло, соос йӧлэсь. Шунан
соосты шуныт куазен йӧлэсь кылдытӥз, шунан
шунтэ ӟузыриосты шуныт куазен. Соос шунало но, ву
кошке му улысь лабиринтэ, читыр-чутыр, ву
му улысь лабиринтын аслаз дораз луэ.

 

            *
Крезьгур лабиринтын уйлы быдэ. Пужымъёс
адскыны кутско, югыт сура пеймытэз, ӝомыт
югыт-лыз тӧдьы акшанэз кылдытэ
инты, тырмытэ сое аслаз мертантэмлыке
зӥбем юанэныз, озьы ке, мон но лыкто
лабиринтысь адскымонэ,
учко дунне шоры шонерак ӝыныё кынем
синъёсын.
 Югыт вӧт буёло. Вӧтъёс буёло луо ӵукна. Монэ
пыртӥм бышкалто, борддор
борды пукыӵало, мон поездлы пӧрми,
 тӥяськисько вагонъёслы, ӧс сьӧрын онграто
коӵышъёс, мыным султоно, султоно, султоно,
 ӧсэз усьтоно, котьку но корка пыре одӥг коӵыш,
 одӥгез потэ. Сыӵе такт.
Ваньмыз коӵышъёс
выльысь кыре потэмын ке, яке соос уг ни пото ке,
 изисько. Югыт-лыз тӧдьы
ышемын, син кусыпысь донгиське
крем-тӧдьы. Мон
сое уг учкиськы.
 Вӧтаса мон али адӟисько, лабиринтын
кылӥсько, сое ик, пужымъёс быдэсак потэмын
кыре, бадӟым киосынызы дуннеен
кивалто, мугорзы шунды шорын горд ярдэ.

 

        *
Бадӟым ош. Солэн сюръёсыз вискытӥ
ортчо шунды но толэзь,
коньы тэтча сюрлы
кузяз,
котыраз ваёбыж лоба.
Утчало
йырвандӥсез.
 Соизлэн сьӧраз лянэс, кытчы
вирез виято,
 сьӧраз тӥр, сьӧраз пурт но
лабиринтлэн
сюрес суредэз.
 Калык люкаське. Ваньзылэн адӟемзы потэ
кызьы виё бадӟым ошез, кызьы кузэ ниё,
 сюлзэ кыро. Туж чебер спектакль,
 сое телевизор пыр возьмато, верало со сярысь,
адӟылымтэ тулкым яке сюрс адями
ышем сярысь кадь.

 

        *
Гондыръёс. Сайкало но юало, 
кытчы пыриз со лымы? Кытчы пыриз
тол? Кезьыт куазь? Гӧртэм вайёс? Кӧс
гу нюлэскы люкам вай-
 гурезь пӧлын, небытэсь пичиесь гондырпиос
артысь артэ анай урдэс улын, кузесь
трос сериен вӧтъёс, кытын? Шат
тӥляд тулкымды но тудвуды нуизы
милесьтым вӧтмес? Озьы юало, умме уг усё
гондыръёс, нюлэс ултӥ котыр
ветло, пыд улазы ву пызьыра, пинь улазы
мар ке но утчаса, погмало соос
машинаосты но почта ящикъёсты, утчало
газет я мар куазез верасьсэ. Со
интые соос лыдӟо: «Ар адями луиз
Иракысь удмурт солдат.» Мар ар?
кин быръе? мар адямиос? отын
гондыръёссы вань-а? Асьтэлы быръе
Ирак ожез, вераськонлы быръе 
Абу Граиби тюрьмаез, адямилы быръе
умтэм гондырез, Удмуртилы нош быръе
небыт, ӝужыт, тӧдьы ӝужъем
кылем ар лымыосыз.

 

            4.1.4
 Нылпи куараос ульчаын,  машиналэн дыбыртэмез,
пу вайёсысь пучыос усьтӥськыны кутскизы,
синучконын кизер-ӵуж югыт азвесь луэ,
 жадён лыостӥ ветлэ, ку улысен куэз кыска.
 Ӵукна бертӥськод ужысь. Дас сизьым час пыд йылад. 
 Усиськод валесэ, уд ик выриськы, шӧдске, син- 
лысъёс гинэ выро, огшоры вӧт адӟыкуд.
 Тон сокем шумпотӥсь мылкыдо. Изьыкуд но чебер.
 Юаме потэ вылэм: дышеты монэ, кызьы улоно.
 Дышеты, кызьы вань луоно... тонъя улысал, соку
толэзь но шунды серекъяны кутскысалзы, йырсиосы
пежырскысалзы но кизэс чабысалзы.
 Пучыос усьтӥсько. Нылпи куараос кошко.
 Йырсиме вакчи ӵышки, озьы пурысьтаме
уг адскы. Кизер-ӵуж югыт азвесьлы берытске,
 жадён лыостӥ ветлэ. Тон ужын на.

 

            4.2.2
Тӧдьы шунды шормуӵ сьӧры пуксе.
Али гинэ вал инбамын,
аслобет лобем пытьыосын,
али отын вольытэсь пилемъёс гинэ.
Чылкак огнам шормуӵын.
Малы со озьы меда?
Оло нош, соин: выдӥсько ке,
уг луы ӵошен кылльыны.
 Чылкак огнам. Тӧдьы шунды пуксе.
Йыр котыртӥм чибинь лоба,
со но чылкак огназ,
 озьы ик, кызьы ӝӧк вылысь пелепон.
 Тон, пелепон, луиськод мӧзмон
символ, тынад ӧвӧл ни нокыӵе но
кулэлыкед, мон 
яратонэ дорын луытозь.

Удмурт кылэ берыктӥз Муш Нади.