Агафия Уткина. Лушкаськисьёс
Юмор

Агафия Уткина. Лушкаськисьёс

304 {num}

Верос

Одӥг шулдыр гужем уе вал со. Ми, ньыль кузя нылъёс, пиослэсь пегӟимы но кык иськем ёрос пичи гинэ гуртэ улмо лушканы мыныны кенешимы. Одӥг эшмы туж шаплы маке – мон, пе, тодӥсько – со гуртын улмооссы сокем ческытэсь. Милям мылкыдмы уката но бурдъяськиз.

Гурт сьӧры потӥмы но, туж зол кырӟаса мынӥськомы. Ӝыны сюресэз ортчеммы бере, мон шуисько:

– Нылъёс, ойдолэ кырӟамысь дугдомы ни, асьмеос лушкаськыны мынӥськомы ук.

Ми шыпак кариським. Азьлань вамышъяськомы. Озьы гуртэ вуимы но, бакчае пыримы. Юри милемлы дасям кадь, отын ог дасо мында туг шачыос тыремын вылэм. Милемлы удалтӥз – быдэн боды кутыса, улмопу вайёсы шуккылӥськом, эсьмаса, улмоос тапыр гинэ усьыло. Одӥг улмо но басьтыса ӧм вуэ – садэ чумолё быдӟа адями потӥз. Ма, ми сое адями но ӧм кожалэ – бодымес сэрпаллям но, ну бызиськомы ук! Садын ёмырам йӧгу вылэм – пырыкумы ми сое сик ӧм синйылтэ – отчы огмы бӧрсьы огмы усьылӥм. Песянай вунэтӥз, лэся, йӧгуэз сярысь – ачиз но ми сьӧры усиз. Табере оло серекъялод, оло бӧрдод – пересьлэн абдраменыз  ваземез но уг луы ни. Ярам, кызьы но озьы султӥз.

– А... ерпечкаос... – бӧрысь шуиз со. – Тау шуэ, толон пушнерез араса куреглы корай вал – иське, ымнырдэс таман ӵушкасалды.

Ми сереммес мырдэм кутыса возиськомы, куддыр пирсэктӥськом ик.

– Бӧрдоды угось, бӧрдоды... – пересь ми викышъяськом кожа.

Гужем уед мар гинэ – куазед но ӟардыны ӧдъяз. Пересь бакча тыр черекъяны кутскиз:

– Кен! Кен! Пагӟа потты!

Та песянай кенэныз гинэ улэ вылэм – пиез войнае бырем. Кенэз скал кыскыны потэм вал, дыр, ини – пересьлэсь кесяськемзэ кылыса, пагӟаен вуиз. Милемыз адӟыса, со воксё абдраз:

– Ма кинъёсын тон отын?

– Ма, улмо лушкасьёсын. Тани ваньмы огазе тюам, – шуиз пересь.

– Эхе-хе... кӧня вераським вал – согоно та йӧгуэз – таки кимы ӧз вуы, лэся, – пагӟаез йӧгуэ лэзёнъяз лулӟылэ кенэз.

Песянай йӧгуысь потӥз но – пагӟазэ берен кыскиз. Ми потыса ӧм вуэ. Шунды но ӝужа ини – ми ог-огмес ӝутыны турттӥськомы но берен сюен валче васькиськомы. Бӧрысь шаплыез эшмы кутскиз ук черекъяны:

– Юрттэ-э! Поттэ милемыз татысь!

Милесьтым черекъяммес бригадирзы кылэм но дорамы лыктыса шуэ:

– Сщас, мон поттало, – кошкиз но, кема ик ӧз улы – гозыен вуиз.

Ваньмес поттам бераз шуиз:

– Тӥни бакча берын кык гектар етӥн му вань. Адӟиськоды-а?

– Адӟиськом... – огымысь вазимы ми. Огмы шоры огмы учкыса сылӥськомы.

– Мынам сиеме потэ ини, — шуиз шаплыез эшмы.

– Ничего, чидалоды. Азьлань! – вазиз бригадир.

Косэмзэ быдэстытэк ӧйлась. Доре воксё шунды пуксем бере гинэ вуимы. Анай-атайёсмы но милемыз ыштӥллям ни вылэм. Нош ӵуказеяз та учыр сярысь пиос но кылӥллям – куд-огмылэн туганъёсмы но вал ни. Кӧня возьытэз чидано луиськиз со улмоосын йырин! Лушкаськон ӟече уг вутты вылэм.