АДӞОНЭЗ АДӞИСЬКИЗ. Николай Трубачев
Юмор

АДӞОНЭЗ АДӞИСЬКИЗ. Николай Трубачев

537 {num}

Юмор

Ымныр вылам усьытозь ужасько. Шундыен ӵош султыса, шунды пуксьытэк дорам уг бертаськы. Озьы ке но, кышно весь черекъя:

– Тынад ужамед – мынам ныр ӵушеме. Азьтэмдэ вормытэк, валесэз мертаса кыллиськод. Нош юрт котырме учке ай. Коркамы сандык кадь. Ул коръёсыз гинэ сисьмемын. Вуриськон машинамы «Зингер». Только кемалась уг ужа ни, маиз ке пӧсьтэм. Собере лапас уламы мотоцикл сылэ. Пал питрантэк.

Огпол кышно тэбиниз. Ымаз куака пырымон шорам черекъя. Калыкъёс эмезь но, губи но бускель нюлэскысь, пе, вортто, нош асьме палан эмезь но эмезь шӧмо ӧвӧл, губи но куарогуби сяна уг поты. Собере гуртэ пересьёслы турын, пу дасяны бертано луоз. Тон вылэ ныпъяськыса ворттылом-а, мар-а?

Кытчы пырод, коть шори пилиськы, аресъем ветылмес вузаса, Пуньырӟем Микталэсь «Иж–Юпитерзэ» басьтӥ. Киысь басьтэм – со киысь басьтэм ини. Берекетэз ӧвӧл. Гужем вылтӥ чик йӧназ ворттылыса ӧй вуы, камераез весь пасяське. Гужем но, сӥзьыл но ортчиз – эмезьзэ но, губизэ но веръятэк кылиськиз. Со мотое али ке но лапас улын питрантэк сылэ. Кылем арын питраназ кортӵог мертчиськиз вал. Лякыны дыр ӧвӧл.

Берло дыре семья кусып но ӝыжомем сиес тӥрлык кадь ӟезьдӥськыса кошкиз ай. Ачим Доротделын ужасько. Сюрес сузяськом-тупатӥськом. Коть чик эн шонеръяськы. Гижысь-пиньысь тыршид ке, купырмемдэ но валаса уд вутты. Жуммоно. Сюресъёс уродэсь. Ӝог ворттылыны уг луы. Зуркыт. Куске сётэ.

Милемлы эркынак шокчон дыр вуэ куазь пелляськон, жобан вакытэ. Соку сюрес вылэ потам уг йӧт ни. Горд сэргын доминоен шальккетыса пукиськом.

Валлян гинэ куазь быдэс нунал жобаськиз. Нуназеяны дорам бертай. Ческыт сием бере, диван вылэ ланьыртӥськи. Жадиськем. Умме усиськем. Сайкатӥсь вань. Синъёсме усьтӥ но – корка шорын чиган кышно. Вӧзаз пачанушы кадь пиез мон шоры быльк! учкыса сылэ.

– Юлтоше, – шуэ чиган кышно, – борддорад ковёр кулэ ӧвӧл-а? Туж тузӥ, импортной. Дуно уг куры.

– Милям асьмелэн ковёрмы вань. Мынэ, мынэ, – шуисько, – азьдылэсь берды чебер, пыдчиньыдылэсь – пыдтышты.

Кутскиз ук пиез бӧрдыны.

– Сиемез потыса бӧрдэ, – шуэ чиган кышно, – маке куртчон коть сётэ вал.

Кышноелэсь пыжем перепечсэ сётӥ но коркась туздырыса лэзи. Юртме тунгонаса, ачим но уже шонтӥ.
Нош домино йыгаса пуким. Ужысь бертӥ но, кышное, душес сямен, мон вылэ омыртӥськиз:

– Кытын борддорысь ковёр? Мар ымад ву ӟузид? А-а-а, гуньдӥд-а, мунчокузё! Тани кымысад кызбугорен васькытӥ ке, соку ик кылыд сэрттӥськоз.

– Ма, – шуисько, – кинлы кулэ со тузон люканэд? Ошем ковёредлы пыдъёс потозы шат? Кышно, пӧсь таба вылын кадь тэтчаса, сурым поттэ. Ну, сизьдэ ук, ну, пыже ук. Кызьы пельы чида. Вот та шунды, ноку кылымтэ кылъёсыз кылӥськиз, ява.

Вань та сильтӧлэз чиган кышно ӝутыса кельтӥз. Ӝамдэ нырулон куспын ковёрез маялтыны вуттэм. Огшаплы коркась пегӟытэк ӧйлась. Ӟырдам корт кадь луиськиз. Соин, лэся, быдэс мугоры пӧсекъя. Ялан кормаськисько.

Вот мар, эшъёс, эзель йыр вылад вуиз ке, юн мугоре но гижло потэ вылэм. Адӟон со. Зэмзэ но адӟон пыд улысь потэ вылэм.