Таӵеосыз  милям но  вань
Юмор

Таӵеосыз милям но вань

296 {num}

Юмор

Гуртамы куноос лыктыны кулэ. Чебер но егит апайёс шаерамы ортчись фестивале пыриськозы, пе. Ми соосты пумитаны но утялтыны дасяськиськом.

– Пӧлазы бызьымтэосыз но вань. Умой луысал, кудзэс ке кышнолы пыртыса. Соин ик, пиос, куноосмес умой пумитано, мед синмаськозы асьмелы, – шуисько эшъёсылы.

– Нош мар-о кароно? – дӥсьтытэк юаз Чабаксин Санька.

– Ну, Санька, мар тон али вордӥськем мурт кадь юаськод? Апайёслы шулдыр дырзэс ортчытыны кинъёс кулэ?

– Воргоронъёс, – дӥсьтытэк шуиз юлтош.

– То-то! Етӥз егит удмурт пиос. Кылыд но лэчыт медло, вамыштэмед но йыгмыт, мылкыдыд ӝутскемын, нош эктыны ке потӥд – тӧлпериен ӵошатскы. Куноосты пумитатозь, тыметысь чорыг кутыса, шыд пӧзьтоно, ӝӧкъёс но пуконъёс пуктылоно. Малпаськы, кыӵе шудонъёс, эктонъёс радъяны. Курытсэ ӧжытак мылкыддэс ӝутон вылысь гинэ юэ. Валады-а?

Пиос йырзэс шоназы, ваньмыз, пе, киноын кадь луоз. Дасяськон ужмы малпамъя пӧрмиз.


Чабаксин Санька эшъёссэ асьме но матысь гуртъёсысь ӧтем: Миша но Коли Мунчогуртысь фермаын кунян сюдо. Санька но Васи Кисальгуртын скалъёсты возьмло. Нош кылемез – асьме гуртысь – кин кытын ужа, доразы пукисьёсыз но вань.

Куноосмес пумитаны юрттӥзы гуртысьтымы фольклор кырӟанъя ансамбльысь нылкышноос. «Ми тӥледыз куное ӧтимы» кырӟан фестивале вуэмъёслы туж кельшиз, лэся. Нылшкыноос сьӧры эктыса но лэзизы.
Ӝӧк сьӧры ачим пуктылӥ: пиосты куноос вискы интыяй – мед, пӧй, утялтозы, вераськон но кырӟан мытозы. Пиосы куноос понна шулдыр улэммес данъяса олокӧня пол сябась каризы. Нылъёсты утялтэм интые асьсэлы лэзьяса ӟузьыны ӧдъязы.

Мон пӧсьвуаськем кадь котыртӥзы ветлӥсько:

– Санька, пал синмыд уг усьтӥськы ни, воксё кудӟемед, мар малпалозы куноосмы?

Нош со нокыӵе кариськытэк:

– Яратӥсь муртлэн синмыз но вераське, нош та куноосыд, Николаич, шушесьгес. Мынам пал синмы воксё кышказ но ворсаськиз ини. Уд оскы, чик уг поты вал юэм, но сазь йырын мон вӧзын пукисез шоры уд учкы.

Мынам тыбыры ик пӧсяса кошкиз возьдаськеменым. Куно нылмы Санька вӧзысь чорк! султӥз но кошкиз эшез вӧзы.

Но урод сям паласькись шуэм выллем, мукет пиос но мыдлань бӧтьыртыны ӧдъязы. Гуртысьтымы Пронька Васька вӧзаз пукись нылашлэсь ваньмызлы кылымон юа:

– Нош тон трос-а уждун басьтӥськод, тазьы ветлыса?

Дыды шуэ:

– Аслым тырме.

Васька паймыса:

– Аслыз, пе, тырме, нош карттэ но нылпиостэ кин сюдоз-дӥсялоз? Тон кырӟаса ветлод, нош кузпалыд нуны утёз, сиён пӧзьтоз-а? Собере мынам вожан сямы вань, яратонын сотэк уг луы. Мон ачим однолюб, нош тыныд оскон со порма, дыр. Дэремед но вакчигес, ымдурыд но яркыт буямын. Шонерзэ верано ке, тон стервалы кельшиськод.

Мынам таӵе вераськонэз кылыса, пыдтышъёсы ик ӟырдазы. Эшшо  одӥг ныл кенакъёсмы вӧзы пуксиз.

Мунчогуртысь Коли ӝӧк сьӧрысь сэзъяськыса потӥз но вӧзаз пукись ныл шоры чиньыеныз возьматӥз.

– Мон татчы лыктӥ вал чебер, егит нылъёсын тодматскыны. Нош со вӧзам пуке но вина юэ. Мынам юись кышноосты адӟеме ик уг поты.

Мон пиосты улляны кутски. Нош соосты дугдытод на шат? Соос огез бӧрсьы огез вуэ зымылӥзы. Таин гинэ ӧз тырмы ай: шудэмъяськыса куноосмес вуэн пазяны ӧдъязы.

Ӝӧк сьӧрысь люкаськем калык кин кытчы пазьгиськиз. Огег-оген куноосмес кутылыса, пиос соосты вуэ донганы ӧдъязы. Соин но ӧз буйгатске – юон тырмымтэен-а, мар-а асьсэ куспын ченгешон поттӥзы.

Мырдэм-мырдэм пиосме люки но гутазы улляй. Огзы бӧрсьы огзы доразы кошкизы. Вот, албастыос, пень вылэ пуктӥзы, ява, шулдыръяськонэз саптазы. Кыӵе возьыт пиос понна. Сазь дыръязы ведь востэм, сюлмо но ужась адямиос. Мар шуод, вина ӟенеликын гинэ шыпыт пуке. Со востэмзэ шаплы каре, визьмозэ визьтэммытэ…

Со ӝыт тымет дорын пеймытозь чузъяськизы куноослэн но гуртысь нылкышноослэн кырӟам куараоссы. Соос фольклор ансамбльмылэсь быдэс репертуарзэ кылзӥзы, милемыз но выль кырӟанъёслы дышетӥзы.

Пиосмылэн дауртэмзы понна куноос азьын туж возьыт вал. Фестивале вуэмъёс шуизы:

– Ми малпам вал, палэнысь гуртъёсын воргоронъёс мукетэсьгес, таӵеосыз милям дорамы но вань.