Быдэс семьяен. Пётр Чернов
Рассказы

Быдэс семьяен. Пётр Чернов

433 {num}

Верос

Федяез машина зуркатыса-зуркатыса туж кема нуэ ини. Анаеныз атаезлэн куаразы вӧзаз ик кылӥське ке но, асьсэос соос уг адӟисько. Тапала но шонтэ пияшез машина, сопала но. Медаз шонаськы ни шуыса, со кык киыныз ик пуштрес маке борды вай-вай кырмиськиз, нош озьы но интыяз кылльыны ӧз быгаты — Федяез машина ялан солань-талань шоназ. Вожзэ поттыса, со йырзэ ӝутӥз, огшап кытынзэ-марзэ валаны турттыса, котыр утчалляськиз но анаеныз ваче ымныр луиз. Анаезлэн тусыз малы ке чылкыт ӧз пуксьы. Федя синъёссэ кӧня ке пол кыниз-усьтӥз но, анаезлэн ымнырыз чылкытаз. Пиез вадьсы мыкыртӥськыса, со пальпотэ. Бордысьтыз ческыт пӧрам зын лыктэ.

— Сыӵе-а чечым вал, пие, уммед? — либыт вазиз кышномурт. — Таки соиныд люкиськыны уд вормиськы. Сэзъяса-сэзъяса мырдэм сайкатӥ. Я, султы. Ми дась ни. А то огнадэ кельтыса кошком.

— Уже мынонды вуиз-а? — юаз вал Федя но ачиз ик шуиз. — Я, иське, мон ӧжыт кыллё на но султо, сиён сӥяса уз ву.

Солэн йырыз каньсыраса выльысь миндэре выйиз, синъёсыз соку ик кыниськизы. Пал бамыз гинэ кыре кылиз на, паньгес нырыз серемес кырыжтӥськиз, ӵужпыр-горд йырсиез, кӧлонэз валасьтэм маке, ӵогыр-ӵогыр урдӥськыса сылэ.

— Йӧндэ шедьтом, — кылӥськиз анаезлэн куараез но, пияшлэн шобретэз каллен-каллен вылысьтыз гылӟыны кутскиз. — Шундыен ӵош ке но сайкано, пие. Толон выдыкуд, шундыез кельтыса султо шуиськод вал ук. Вунэтӥд шат?

— А-а!.. — соку гинэ тодаз лыктӥз Федялэн. — Та изён куспетӥ ваньмыз сураськыса кошке. Мон али ик!
Сое косъяськыса улоно ӧз луы ни: туннэ губияны мыноно ук! Кӧня пол кутскыса ини соос быдэс семьяенызы (куиньназы ик!) нюлэскы потыны верасько, нош та дырозь малпанзы ӧз быдэсмы на. Соос арня нуналэ гинэ ӵукнаысен ӝытозьлы огазе луо. Федя но, анаез но, соку сяна, школаысь уг ваньмо, нош атаез толэзен-толэзен гуртаз уг возьматъяськы — ялан командировкаын. Пияшлэн анаез ӝытъёсы но бер берта: я солэн классной часэз, я собраниез, я со дышетскись пиналъёс доры ветлэ. Федя азьло ик пӧзьтыса-пыжыса дасям сиёнэз шунтэ, гуртэ сётэм урокъёссэ дася но собере ӝытбыт укно дурын пуке. Соослэн квартираысьтызы ураме но, гидкуазе но учкыны луэ. Азбарын мӧзмыт йӧтэ, одӥг писпу но ӧвӧл. Урам палан шулдыргес: пу юртъёс, ӝужытэсь топольёс, льӧмпуос, яблокпуос. Нюк сьӧрын — сик. 

Сое бен, оло, сик шуыны но ымыд уз пыры. Со кыдёкысен гинэ сыӵе йӧтэ. Нош пушказ пырид ке, саюлзэ но, куакъёссэ но, турын-куарзэ но уд шедьты, котыр музъем, кечат-вамат сюресъёсын шормамын, отын но татын — сисьмыса пограм кызъёс но ньылпуос бервылэ кылем пинё-пинё лӥялъёс.
Агбаевъёс туэ гинэ городлэн тапалаз лыктӥзы. Чылкыт асфальтъёс, тодмо скверъёс, Федялэн эшъёсыз но сюлмыз — ваньмыз азьло интые кылизы.

Пияш кытӥяз тӧлатскыны пота ик. Нош кема калгыны солы мӧзмыт йӧтэ. Юртъёс чебересь, вылесь ке но, ог-огзылэсь пӧртэмзы чик ӧвӧл. Огпол Федялэн песятаез, гуртысь лыктыса, соослэсь квартиразэс лумбыт утчаса поръям. Ма, гуртысь лыктэм мурт гинэ-а озьы? Федяез урамысен кӧня пол ёртылӥзы ини: «Пияш, сыӵе юрт кытын? Пияш, таӵе адресъя кызьы мыноно?» Тодэмезъя со вера.

Федя быдэсмыса кухняе пырыку, анаеныз атаез ӝӧк сьӧрын вал ини.

Пияшлэн пукыны чиданэз ӧз тырмы, анаез косыса-косыса вылысь но ӝыны стакан чай юиз-а, ӧз-а.

— Эн ёрты, сиемез ке потӥз, сиёз, — пыриськиз Федялэн атаез.

— Нюлэскозь но уз чида тани, — шуиз анаез.

Пияш ӧс дорын вал ини. Бӧрсяз атаезлэн кылъёсыз вуизы:

— Мон рюкзаке тырмыт донги.

Дӥсяськыса Федя корзиназэ кутӥз но педло дыртӥз.

Куазь сайкыт, инбамын одӥг пилем но уг адӟиськы. Тӧл но ӧвӧл. Гидкуазьын, сояз но таяз подъездъёс вӧзысь машинаос котырын, адямиос выро. Соос нюлэскы мыныны кадь дӥсяськемын. Ваньзы одно ик губияны дасясько кожаз Федя. Соослы ма — машинаосазы пуксёзы но ширтозы. Нош Федяослы автовокзалозь трамваен вуоно на, отысен автобус возьмано.

Вӧзтӥз киязы корзинаосын кошкисьёсыз адӟемез бере пияшлэн сюлмыз ик вырӟиз: таосыз трамвай пала мыно. Нош Федялэн анаеныз атаез татчыозь ӧвӧл на, оломар туннэ гозызы сокем кузь луиз. Зӥрак берыктӥськыса, со, кык-куинь лёгет вамен тэтчаса, асьсэ этаже тубиз. Анаеныз атаез соку гинэ ӧсэз пытсало вал ай.

— Чалякгес, папа! Ваньмыз асьмемыз кельто ни. Нюлэскын губилэсь трос калыкез луоз.

— Эн курда, пие, — шуиз бадӟымез Агбаев. — Асьмелэсьсэ нокин уз бича. Асьмелэнэз асьмемыз ик возьмалоз.

— Возьмалоз меда? — ӧзгес оскы Федя.

— Огпол сиымон ке но шедьтом — асьмеос быдэс семьяен ук.

Озьы вераськизы атаеныз Федя, ураме потытозязы. Анайзы шып улӥз, я картэз, я пиез шоры гинэ учкылӥз. Федя но урамысен вераськыны турттэ вал но, атаез «тани кылдэ куртчод» шуиз. Ма, вераськонэн йырин но ӧз луы ни — анаеныз атаез сьӧры дыртонъяз, пияш амалтэк гонӟыртӥз. Нош трамвайысен Федяез пичи дырысеныз бӧтьыртыны уг лэзё: адями, пе, олокыӵе мылкыдоез но вань, кудӥз жадемын, дыр, кудӥз висе, муртлэсь вераськемзэ чик но кылзэмзы уз поты.

Автовокзалын калык укыр огыр-бугыр выре. «Арнянуналэ автобусъёс ӵем ветло», — шуэ вал Федялэн атаез — ӧйтӧд, мар туннэ озьы луэм. Автобус вырӟем бере люкаськем калык кизерме кадь, ӧжыт улыса, нош ик ӝук кадь напче. Черодэ чуртнаськон кал ӧвӧл.

Атаез, анаез но пиез кема гинэ ӟудыса улӥзы. Федялэн сюлмыз гизь-гизь потыны кутскиз. Куазь но маке сӥялскиз. Ярано коть — бӧрсьысь бӧрсьы кык автобус вуыса, соос кызьы но озьы пуксизы.

Федяез ӝокамон ӝиптӥзы вал но, бӧрысьгес атаез адямиослэсь ӧжытак сайяны быгатӥз. Нош озьы но кема возьмам нунал сярысь но, губиян сярысь но пияш ӧз малпаськы ни. Я отӥ зӥбо, я татӥ мырӟо. Окыт. Черекъям куараос пеле пыро. Чальгес автобус мед дугдысал но васьконо мед луысал ини. Нош соиз дугдыны кутскиз но, вань калык азьлане сётӥськиз, кыӵе ке кышномурт чирак кеськиз.
Котькыӵе сюреслэн пумыз вань. Агбаевъёслэн но мынонзылы пум вуиз.

Федя музъем вылэ лёгиськиз но, йырыз оломар сямен палэнэ кыскиз.

— Корзинаед-а кыске, пие? — серемпыр юаз атаез.

— Тазьы мыныса, соиз но луоз, — сюлмаськыса шуиз анаез. — Корзинадэ папаедлы сёт али.

— Мон ачим, — корзиназэ юнгес кырмиз пияш. — Тани кыӵе шонер вамышъясько.

— Ортчоз, — пиеныз соглаш луиз атаез. — Воргорон бӧрдэ-а, ма... Озьы гожтӥз удмурт кылбурчи. Озьы-а, Федя?

— А мон бӧрдӥ шат? — ӝожомемен суро паймиз пияш.

— Кылбурчи чылкак бӧрдон сярысь гинэ уг гожты: секыт ке но, пиосмурт уг ӝожтӥськы, уг нискеты, аслэсьтыз нуонзэ мукетъёслы уг кушты, тужгес но мӧйыос, нылкышноос, покчиос вылэ...

Соос нюлэскы нуись сюресэ кожизы. Федя азьпала дыртӥз. Анаеныз атаез берегес кылё, куспазы маке кенешо. Дырын-дырын Федя соосыз витён сямен дугдэ, берыктӥське но шоразы учкыса сылэ. Анаеныз атаез солэн огӝуждаесь, кыкназы но лыз костюмен, вож курткаен. Атаез йырзэ мыкыртыса вамышъя. Ымнырыз солэн питырес, ӵыж-ӵыж, горд йырсиез керттэм такъя улысьтыз потэм, пельпумаз ӧжыт гинэ уг пуксьы, пельёссэ ӵоксам. Синъёсыз али уг адӟисько но, Федя тодэ — соос пурысесь, кытын-отын вож пырыоссы вань. Кинлы кин но, пияшлы атаез учкымон кадь йӧтэ. Сое ассэ атаез выжые мынэмед шуо. Соиз бен ӧйтӧд ай. Атаез тӥни кыӵе мугоро. Федялэн анаез но со ӝужда ик ке но, чиндыр-вандыреныз-а, мар-а воксё пичи потэ. Ӵемгес вамышъя но. Пыд улзэ чик уг синйылты, ялан картэз шоры учкыса мынэ. Солэн нырысь ик кузь, векчи нырыз но вераськыкуз вырись ангесыз адӟисько.

Кельше Федялы анаеныз атайзэ палэнысен эскерыса улыны. Ӵошен ке кылё, соос куспазы вераськыса уг ӵыдо кадь.

Шунды бурласянь пиштэ, писпуослэсь йылъёссэс югдытэ. Ӵужектыны ылам кызьпуос шунды шорын эшшо но ӵужекто, нош кытын но отын пазьгиськем палэзь ӟускиос кӧсытгес йӧто. Кызъёс, пужымъёс, оло, сӥзьыл куазен выль лыс лэзиллям — сыӵе нап-вожесь. Сюрес вылтӥ мыныны каньыл, тузонэз лысву лапкатэм. Саюлын ыркыт, нош шергес писпуо интые вуиськод но, шундылэн шунытэз соку ик мугоре пыӵа, вылтырез бичатэ. Кыр азьёсын сокем яркыт — отчы вамыштыкуз, Федя огдырлы синъёссэ ик кыне. Собере выльысь саюл шеде но, шуак салкым луэ.

— Эке, нюлэсэз пырак ортчыны уд-а турттӥськы тон? — кеськиз Федялэн атаез. Лыкты ай татчы.
Пияш йӧн-йӧн мынӥз со доры. Бадӟымезлэн Агбаевлэн паллян суяз корзина ошемын, бур кияз паки чиля. Лысвуэн котмем сапегъёсыз но чиль-дол пишто. Олоку озьы коттӥськыны вуэм.

«Губияны дасяськем ни», — вожъяськыса пусйиз Федя ас понназ.

— Тодмаськод-а, ма та таӵе? — корзиназэ чукинтыса возьматӥз Федялэн атаез.

Корзина пыдсын — куреньйыръёс. Модосъёссы зӧкесь, токыль-токылесь. «Одӥг... куинь... сизьым...» — лыдъяз пияш. Кӧня ке гордйыръёс но кыллё.

Федялэсь гадьзэ вожъяськон таӵе ик шымыртӥз кадь, оло, шоканэз но пытсаськиз.

— Кытысь... кызьы... шедьтӥд тамында? Мар куспын? — мырдэм кылӥськымон юаз со.

— Утчась мурт шедьтэ, пе. Шуи ук — асьмелэн губимы нокинлы уз возьматӥськы, асьмемыз возьмаса сылоз.

— Асмелэн... — нёртӥз Федя. — Мынам нош номыре ӧвӧл на.

— Тынадэз но астэ исаса сылэ, дыр. Нюлэс дуртӥ ортчы ай. Нош мон пыдлогес пыро. Мамаед но озёлогес кариськиз.

Федя нюлэс дуртӥ шок-пуль кошкиз. Пурысьтаны кутскем турын вылын ӵужак-ӵужак виштыос адӟисько. Матазы вуыса, пияш мыкырске но — усем куаръёс озьы губи кариськыны ӧдъяллям вылэм. Со мукет азе бызе.

Федя лысъёсыз ӝутъяса но утчаз — меканӟем шыргуби сяна, ӧз шедьты.

Шундыё азетӥ мыныкуз, пыд улаз маке куажырак вазиз кадь. Федя берыктӥськиз но турын пӧлысь тӧдьы пырыосыз адӟиз. Нингуби вылэм. Ассэ ачиз тышкаськыса-тышкаськыса, пияш со пырыосыз бичаз. 

Лаптӥськем интыысьтыз ӝутӥськытэк ик утчалляськиз но — эшшо кык пурысьйыръёс мычиськизы. Таоссэ Федя выжытӥзы пакиен уретӥз. Собере кӧня ке пыдесъяськыса ортчиз. Эшшо куатез шедизы на.

Выльысь но выльысь котыръяськиз со — номыр ӧз донгиськы ни. Амалтэк султоно луиз. Федя визьмаськиз — дыртытэк, эскериськыса вамышъя. Ӵем дыръя юнме ке но йыбыртъя, ойдо, кускыз аслаз, муртлэсь дунэн басьтэмын ӧвӧл. Нош анаеныз атаез шедьто меда?

— Ау! Папа, мама! — кеськиз со чангес куараен.

— У-у-а-а! — кылӥськиз пумитаз.

Малы ай таос сокем пыдло кариськиллям шуыса, Федя нюлэскыгес сётӥськиз. Нош отын сарда кускозь будэм, со выжыын — ӝуймем лӥялъёс но улвайёс гинэ. Губиос ӧвӧл. Чигем вайлэсь боды вӧлыса, пияш сарда модосъёсыз кема гинэ палэнъяз — пайдаез ӧз луы. Со анаеныз атаез пала кыстӥськыны турттэ ни вал — азьпалаз шуак пичигес куш усьтӥськиз. Шунды вылӥе ӝутӥськемен, лэся, отын одӥг вужер но ӧвӧл. Пытьыос но уг адӟисько. Адями я пӧйшур ортче ке, со интыетӥ турын сьӧдэктэ. Азьло сямен ик бодыен гинэ турынэз бугыръяса ортчонъяз, Федя гордйыр сюремлы нырысь ӧз оскы. Нош со тӥни ук — азяз ик ӧтьыса выллем мыня. Федя утчалляськиз — гордйыр огназ вылымтэ, кыдёкынгес люкрак-люкрак эшъёсыз сыло. Юри мерттэм кадь. Пияш мынясьсэ вандыса эскериз — кукыз но, йырыз но сисьмымтэ, шарк-шарк гинэ. Модосэз, оло, ӝыны суй кузьда — корзиналэн дурысеныз дурозяз сузиз.

Федя одӥг интыысь губиосыз октӥз, мукет интыысь. Чылкак вожомиз. Корзинаез уртчиз ни, озьы но тырем вылысь тыре. Витёнтэм шорысь азьпалысьтыз гордйыр вырӟиз но нюш-нюш кошкиз. Ма шуыны паймыса сылӥз Федя но соку гинэ валаз: коньы ук! Ваньзэ вунэтыса, пияш со сьӧры бызиз. Нош коньы нокыӵе кариськытэк кыз кузя тубиз но зӧк вай вылэ пуксиз. Федя матэ лыктӥз. Оло, тубысал но — улӥын вайёс ӧвӧл. Коньы сырзэ но уг шедьты, адями шоры учкылыса, маке сие. Ымдуръёсыз ӵем-ӵем выро.

— Папа! Папа! — куараезлэсь потэмзэ ик ӧз шӧды Федя.

— Мар луиз? — кышкаса юаз атаез. Со матын гинэ вылэм.

— Коньы! Коньы!

— Ох, Федя! Чылкак куалектытӥд ук! Коньыез адӟылэмед ӧвӧл шат?

— Нюлэскысь ӧвӧл.

— Я, иське, возьматы.

— Тӥни отын.

Учкизы но — коньы чиптэм-чаптэм ышем.

— Али гинэ татын вал... — ӟудӥз пияш.

— Ӵок ойдо, мед пуалоз, — шуиз атаез. — О-о, тон коньы сьӧры гинэ уйылӥськымтэед. Корзинадэ тырмытон сярысь но сюлмаськемед.

Солэн но корзинаез пачылмемын, вылтӥз беризь куарен шобыртэмын. Нош бичамтэ губиосыз адӟыса, со ӧпкельыны кутскиз:

— Да... Таоссэ бичаны инты ӧвӧл ни. Рюкзаке тырид ке, арам гинэ луозы. Оло, анаедлэн корзинаез тырмымтэ на? Давай дасялом... Валя, чаль татчы!..

— Папа, таоссэ коньылы кельтом шат? Кин тодэ, оло, та солэн дасяса возем интыез...

— Хм... Ма бен, озьы ик каром. Марысь-мар ке, мамаедлы асьмелэсьсэ ӧжытак сётом.

Нош кузьмаськоно ӧз луы — Федялэн анаез но губи ёмыртэм, жиль нингуби гинэ.

— Вот удалтӥз ке удалтӥз, — шуиз бадӟымез Агбаев. — Я, табере мон сьӧры вамыштэ.

Кема ик мынытэк, соос нюк дуре вуизы. Писпуос пыртӥ солэн сьӧраз ӟег узьым синэз мальдытэ. Нюк пыдсытӥ ву кошке, куаръёсыз сьӧраз нуэ.

Семья яр йылэ, кызьпуос улэ, интыяськиз. Бадӟымез Агбаев рюкзакысьтыз термос, кружкаос поттӥз. Федялэн анаез ӵушкон вализ но отчы нянь, курегпуз, помидор, сылал тыриз. Пияшлэн атаез чай лэзьяз. Юон сяменызы куиньназы ик кылзӥськыса, нюлэс дурысь чильпырась писпуос пала учкыса пукизы. Куазь гужем кадь шуныт кариськиз. Нюлэскын чал-чал. Тылобурдо чирдэм но, нокыӵе тачыртэм куара но уг кылӥськы. Тӧл но ӧвӧл. Усись куаръёс гинэ, вайёс вискытӥ музъем вылэ васькыкузы, каллен ӵаштырто. Нюкын огсыр жильыртэ пичи шур.

Оло жадеменызы, оло кӧлыны дасяськись нюлэсэз кышкатонтэм вылысь куиньназы но Агбаевъёс шып сиськизы. Федя сярысь ке верано, со быдэс улонзэ тазьы пукысал кадь. Анаеныз атаез гинэ ялан вӧзаз мед луозы вылэм. Куиньназы ик соос лумбытэн-лумбытэн огазьын мед луысалзы.
Нюлэскын азьло сямен ик ӵаштыртӥзы усьылӥсь куаръёс, жильыртӥз пичи шур.