Вож пӧйшур. Харуки Мураками
Рассказы

Вож пӧйшур. Харуки Мураками

234 {num}

Верос

Картэ, котьку сямен ик, уж дораз кошкиз но, мон гуртэ огнам кыли. Лэсьтыны номыр ӧй вал кадь. Укно азе пукси но возъет вистӥ садэ учкыны кутски – мугтэк гинэ, кыӵе ке тупась малпанлы оскыса сямен. Синмы нош вож сылӥсь тыпы шоры жальмаз – со мынам яратоно но нуныям вордосэ вал. Ӵошен ик ми будӥм но. Мон соин ӵем гинэ эшеным кадь бӧтьыртылӥ. Ӵапак соку но мон со тыпыеным ас поннам гинэ вераськыса пукисько вал. Map сярысь... али тодам но уг вайы ни. Уг ик тодӥськы, кема-а озьы кыстӥськиз: садэ жальмасько ке, дыр шурысь ву кадь кошке. Укно сьӧрын воксё пеймытаз. Бе-ен, пукиськиз, лэся... Пыдлось лыктӥсь шаугетӥсь куаралэсь сазьтӥськи. Музъем   ик зуркатске.  Азьвыл  малпай:   пушкам шаугетэ кадь. Синмы-пельы пӧртмаське шат? Мон лушкем шоканы кутски но, умойтэмзэ шӧдыса, сак кариськи. Куара нош, каллен ке но, весь будӥз. Маин сое ӵошатыны бен... Кӧшкемыт гуретэмъёсызлэсь мугоры юзыр-кезьыр кариськылӥз. Мон интыям ик пуми.

Шӧдтэк шорысь тыпылэн выжыяз сюй ӝутӥськиз, путылӥз но воксё пилиськылӥз. Вылаз нош мар ке лэчыт гижы выллем потӥз. Киосы асьсэ понна мыжыке пӧрмизы, синмы со шоры жальмаз, нош йырам шуккиз: «Map ке но луоз!» Нош гижы чупырес гинэ сюез палэнъяз но, пӧрмем гутёысь ӝабыръяськыса потӥз вож пӧйшур.

Азьло ик со курткиськиз но, чилясь вож сьӧмыз вылысь сюй погъёс куашказы. Солэн паймоно кадь кузь, пеймыт пумо нырыз векчи ньӧр выллем мычиське. Нош синъёсыз – воксё адямилэн кадесь. Со синъёссэ адӟыса, амалтэк куалектӥ: отын малпанъёс уло вал – мынам яке, шуом, тӥляд выллем.

Пӧйшур корка доры матэктӥз но ӧсэ ныр пумыныз йыгаськиз. Кӧс куара кылӥськиз: тук, тук-тук... Лушкемак, со медаз шӧды шуыса, пыдлось висъетэ палэнски. Кесяськыны толыкез ӧвӧл, котырын нокин но уз кылы, нош картэ туннэ беромоз. Пегӟыса но уд кошкы: коркан одӥг гинэ ӧс; нош али отчы юрӟым вож пӧйшур йыгаське. Ватӥськыны гинэ кылиз на, мед малпалоз, нокин но ӧвӧл шуыса, оло, соку буйгатскоз но кытчы ке кошкоз. Но пӧйшур ӧз чигна. Ныр пумзэ куасалтыса тунгонэ месӥз но... Тунгон сётӥськиз, шлачкетыса ӧс кӧня ке усьтӥськиз, отчы каллен гинэ нырыз чуртнаськиз. Со мур-мур висъетэз эскериз, кый сямен йырзэ ӝутыса, котыр утчаськиз. «Эх, сылоно вылэм ӧсын, пурт кутыса, но ӵогоно со нырзэ самой инъетэз дорозь». Кухняын тыраз лэчыт пуртъёс. Нош пӧйшур, монэ кылыса сямен, лякиз:

– Т-т-толыкез уз лу солэсь. – Паймымон вераське со, оло, кылъёс шуген быръе. – Та ныр – к-к-кенӟали быж кадь: кӧня эн ӵогы, весь будоз. Ӵемгес ӵогылӥд ке, зо-золгес но к-кузьгес гинэ луоз. Озьыен, т-токма гинэ со ваньмыз. – Шимес синъёсыз зӥр берганы кутскизы.

Бен со малпанъёсме лыдӟе ук! Ну, таиз ортчыт ини! Нечего йырвимам копаськыны, укыр ик таӵе валантэм но кышкыт пӧйшурлы. Кезьыт нюламен шобырски. Map бен со зэмзэ лэсьтыны турттэ? Тулляны монэ? Оло, ас сьӧраз муэ кыскыны? «Огезлэсь мукетыз шукрес», – малпасько. Я, бен умой коть, со воксё адӟемпотостэм ӧвӧл: ымныраз но учкыны шимес уг йӧты. Кузь пыдъёсаз гижыосыз нош, учконо ке, ничего, муспотонэсь гинэ вылӥллям. Паймоно кадь, со воксё сьӧсь ӧвӧл...

– Валам-м-мон ини! – вазиз пӧйшур, чыртызэ позыръяса.    Вож   сьӧмыз   каллен   жингыртыса погыльске, озьы кофе чашкаосын ӝӧкез йӧтӥськод ке вазе. – Н-н-неуж-жто тӥ малпаськоды, мон т-тӥледды сиё? Ы-ы, уг сиы! Мар-о тӥ озьы, а? Мон т-тӥлед пумит воксё ӧвӧл! Ӧвӧл мон сыӵе в-в-варвар!

Зэм ик, со вань малпанме вала!

– Э, мусо кузё кышное, кузёе! Мон татчы тӥледды кураны лыктӥ. Валаськоды-а? Юри со понна м-мур гуысь потӥ. Капчи уж ӧй вал со: тырмыт сюй копано луиз. Учке ай, вань гижыосме кесяй! Луысал ке мынам урод малпанэ, урод малпанэ, урод малпанэ, быгатысал шат мон озьы дауртыны? Нош татчы лыктӥ, малы ке шуоно тӥ кельшиськоды мыным, ой, кельшиськоды. Тӥ сярысь малпай мон м-мур гуын. Ӧй ни быгаты чиданы но п-п-потӥ татчы. Ваньмыз ало вал, нош мон ӧй чида ни. Вань к-к-кепыранэлэсь куштӥськи, тодӥ ке но, тӥ тазьы малпалоды шуыса: «Ишь, кыӵе пӧйшур шедем! Возьытэз но ведь ӧвӧл монэ кураны!»

–  Хм, озьы ӧвӧл шат? Сыӵе возьыттэм пӧйшур, эшшо ке яратонме курыны дӥсьтэ!

Та кылъёсылэсь пӧйшурлэн ымнырыз мӧзмыт луиз. Сьӧмызлэн буёлэз соку ик бусӥр кариськиз, мугорыз шымырскиз но пичигес луиз кадь. Киосме кечат понӥ но куасьмыса кулэсмем маке шоры жальмай. Оло, солэн мугорыз мылкыдызъя воштӥське? Оло, со юрӟым тусыныз ӵош солэн ляб, али лэсьтэм пунем кадь небыт, вӧсь луись сюлэмыз вань. Озьы ке, мынам осконэ вань на! Эскером на ай одӥг пол. 

«Адӟемпотостэм пӧйшур ук тон!» – шара малпай мон. Со малпанэ сюлмам пуны утэм кадь шуккиськиз: «Адӟемпотостэм пӧйшур ук тон!» Сьӧмъёсыз соку ик лемлет-лыз луизы. Пӧйшурлэн синъёсыз вань синазькыль каремме пушказы кыскизы кадь, паськытазы, жильыр гинэ синкылиосыз виязы.

Кышканэ тӧлӟиз. Оскалтон понна йырам самой шимес ужпум суредай. Малпанам гинэ, пӧйшурез керттылыса, мон лэчыт пинцетэн одӥген-одӥген вань со вож сьӧмъёссэ ишки; ӟырдатэм пуртэн шукы кадь небыт пыдкӧтъёсаз месылӥ; сутскем паяльникез вань кужмысьтым инжир кадь тӧрнам синъёсаз донги. Огез бӧрсьы мукетыз син азям потылӥзы кӧшкемыт курадӟытонъёс, нош пӧйшур бӧрдӥз, вӧсь луэмезлы чидатэк кесяськиз, курадӟеменыз косказ; малпалод, ваньмыз соин зэмзэ луэ кадь. Яркыт синкылиос, ымысьтыз – нап дыльды, пельысьтыз – роза зыно пень тусъем газ, тӧрнам синъёсыз мур учко...

– Э, кузё кышное! Дугдэ, Инмар понна! Эн малпалэ вал сыӵе сьӧсьяськонъёсты! Туж курисько, эн п-п-пуктэ син азяды ваньзэ тае!.. Мынам н-н-нокыӵе урод малпанэ ӧй вал, – мӧзмыт ватсаз на со. – Мон номыр аламазэ уг лэсьтӥськы ук. Т-т-тӥ сярысь гинэ малпаськисько вал.

– Вазьылы на ай, вазьылы! Шудон уж-а со – азбарам потӥд, юатэк ӧсэз усьтӥд, коркаям пырид. Мон шат тонэ ӧтчай? Ишь, мар потэ, сое ик малпасько.

Йырам нош со вакыт соосызлэсь но кышкытгес суредъёс пуксьыло. Мугорзэ пӧртэм пумо механизмъёсын, тӥрлыкъёсын вандылӥ-курадӟытӥ, одӥгзэ но ултӥянэз вунэтыса ӧй кельты. Кызьы быгатӥ – сантэмай.

– Кылзы ай, пӧйшур! Тон ведь уд тодӥськы, кин со – кышномурт! Нош озьы ке, мон тон сярысь котькӧня-котькӧня оломар но малпало!

Пӧйшурлэн вужерыз пумен сылмиз, ачиз со нызьыли порма куасьмиз, шукрес вож нырыз гинэ кылиз на. Выж вылын коскакуз, пӧйшур ымдурзэ выртӥз, берлозэ мыным мар ке верамез потыса сямен. Map ке туж кулэ луисьсэ, лэся, – оло, вашкала дауръёсысь вунэтэм ивор... Со вакыт ымнырыз вӧсезлы чидатэк кырыжаз, интыяз кынмиз кадь, пумен сылмиз но воксё быриз. Тусыз солэн адӟыны луонтэм ӝыт вужерлы пӧрмиз. Омыре кылизы солэн пыльккес ӝожмыт синъёсыз гинэ.

– Монэн маскаръяськыны малпад шат?! Учкы-учкы, тыныд номыр но уз ни юртты. Тынад номыр уг луы верамед. Тынад номыр уг луы лэсьтэмед. Быриз тынад улонэд.

Соку ик синъёсыз но буш омырын ышизы. Куаратэм дуннеез уйлэн пеймытэз тырмытӥз.

Удмурт кылэ берыктӥз 
Надежда Ефремова.