Куазь жобаськыку
Рассказы

Куазь жобаськыку

480 {num}

Улонысь учыр

Яратӥсько инкуазез. Тужгес но толалтэ жобаськон вакытэз. Кыллисько шуныт гур вылын но кылзӥсько муръёысь тӧллэсь вузэмзэ. «Метель» операысь сюжетъёс син азям пуксё. Кыӵе ке инструмент кутысал ке, крезьгур пӧрмысал. Муръёысь гурез кылзыса, мемиелэсь верамзэ тодам вайи: «Мон тонэ, пие, сюлэм вӧзам нуллыкум, гур вылын кӧлай. Яратӥсько вал муръёысь тӧллэсь шуламзэ кылзыны».

Мон но кылӥ, луоз, мемиен ӵош муръёысь та аспӧртэм гурез. Соин сяна кызьы-о валэктод на та мылкыдме? Адямиос радиоысь, телевизорысь кырӟамез кылзо-учко, мон ке гурысь концертэз витисько.

Бакча ужъёс быремен инкуазь но уйпал тӧл пельтэм улсын воштӥськиз. Музъеммес тӧдьы мамык лымыен соге ни.

– Ойдо, – шуисько Маниелы, – сад-бакчаямы ветлом, толалтэлы дасяськом. Синоптикъёс шуизы туннэ уйин куазь жобаськоз. Шуныт гур вылэ выдыса, крезьгур гожтом: тон диктофонэз возёд, нош мон муръёын тӧллэн вузэмез улсын пеллян гумыен шудо.

Озьы кыкнамы гур вылэ интыяськимы. Гумыеным пӧртэм гуръёс пӧрмытъяй, кышное диктофонэ гожтӥз. Кылзӥськом но маиз ке но уг тырмы на кадь. «Ойдо огшап шутэтском но эшшо гожтом на», – шуисько Маниелы.

Озьы шутэтскон куспам умме усиськем. 

Вазь ӵукна ик Мание сайкатэ:

– Кылзы ай, кылзы, Микол, мон крезьгуредлы тырмисьтэм куара шедьтӥ – соргетыса иземдэ гожтӥ. Тӧл вузэм улсын туж шулдыр кылӥське вылэм. Тани кылзӥськы.

Зэмзэ но, соргетэме туж но туж интыяз луэм. Тӧл золгес пельтыку соргетэме но кузь но секыт пӧрмылэм. Нош муръёын тӧл лябомыку соргетэме мырдэм кылӥське.

Зэмос шедевр, сое нотаосын гожтыса, «Куазь жобаське» произведение кылдытыны мылкыды вань. Возьмато ай тае композиторъёслы, оло, ужме дунъяса, калыке вӧлмытыны юрттозы.