Кузебай Герд
Рассказы

Кузебай Герд "Гӧршок"

1122 {num}

Верос

 – Ма, тӥляд нылкышноёслэн уно-а ужды? Ӵукна искал кыскон, гур эстон, шыд пӧзьтон сяна ӧвӧл, – шуса, Исьтапан Мавразэ тышкаське.

– Тон мынам интӥям ужа вал – соку адӟысалыд, – кӧтыз ӝож луса, Мавра вера.

– Ма, маро отын адӟонэз! Искал кыскон, шыд пӧзьтон – уж-а ма?.. Тон тэльын кор кора вал, вукойын мешок ӝутъя вал – соку адӟысалыд.

– Ой, Исьтапан, Исьтапан! Кылэме но уг пот ни уг. Нуналлы быдэ монэ ужамтэен туйылӥськод!

Озьы зулиз-зулиз но Исьтапан, вал кыткыса, тэле пу вайыны мынӥз...

Мавра гуртаз кылиз... Гур эстӥз, шыд пӧзьтӥз, пудоез сюдӥз, коркаез миськиз, сюкась лэсьтӥз – ма, ваньзэ вераса но уд быдты...

Ужа Мавра... Машина кадь, ужа. Кӧтыз ӝож, ас понназ малпаське: «Мар-о таӵе Исьтапан мынысьтым ужме уж чотэ ик уг поны. Мар карод али соин?»

Ужан, малпаськон куспетӥ нунал ӝыт пала берытскиз...

Тэльысь быдэс воз пуэн Исьтапан но бертэ инӥ...

Мавра сое адӟиз – кукыз чигмон бызьса, потӥз: капка ӟезьы усьтэ, Исьтапанлэсь валзэ юске.

Исьтапан, буржуй сямен, воз вылысьтыз васькиз, пыр корка пыриз... Пыдзэ кылиз, ӝӧк сьӧры пуксиз...

Мавра ӧсэтӥ пырса ӧз на вутты али, Исьтапан ӝӧк сьӧрын кесяське инӥ:

– Кудняла-о озьы вал юскыны курадӟиськод?! Сием потэ, сиён вай!

– Сёто али, Исьтапан... Мон ачим но ӧй на сиськы на али...

Гурысь шыдзэ поттыса, Мавра тусьты тыр шыд понӥз но ӝӧк вылэ Исьтапан азе пуктӥз. Ачиз одӥг пуньы но шыдзэ ӟуӟса ӧз вуы – Исьтапан тусьтыез бушатэм инӥ:

– Нош ик пон на! – шуса, кесяське. Мавра нош ик шыдзэ понӥз но нош ик ачиз одӥг пуньы но ӟуӟса ӧз вуы – шыдэз тусьтӥысь бырем.

– Нош ик пон на! – шуса, Исьтапан кесяське.

– Шыд ӧвӧл нӥ, Исьтапан!..

– Малы ӧжыт пӧзьтӥд? Ачид сиса быдтӥд, дыр, – кесяське Исьтапан.

– Тьпу! Нушы йыр! Ачим одӥг пуньы ке сисал, сокем кӧты но ӝож ӧй луысал. Быдэс нунал ужай, быдэс нунал бызьылӥ, сиёно ке – шыд но мыным ӧвӧл, – шуса, бӧрдоно кадь, Мавра ас понназ малпаське.
Исьтапан ӝӧк сьӧрысь нюштыр гинэ потэ.

– Исьтапан! Сиськид ке сиськид но, табере гӧршокез миськыны тыныд черод, – шуэ Мавра.

– Мар?!. Мыным гӧршок миськыны черод?!.

– Котьма кар, мон гӧршокез уг миськы; арня ӵож мед сылоз гур азьын! – шуэ Мавра.

– Мыным маке-а? – шуэ Исьтапан.

Нунал пеймыт луиз... Вал сюдон дыр вуиз... Исьтапанлэн гӧршок миськон сярысь сюлмыз шуг...

Вал сюдэмысь пыризы но, Исьтапан Мавралы вера:

– Мавра! Миськы гӧршоктэ...

– Котьма кар, мон уг миськы. Тон шыд сиид, тон ик гӧршоктэ но миськы!

Изён дыр но вуэ инӥ... Гуртын огез бӧрсьы огез тылъёс но кысо инӥ...

Исьтапан нош ик куаретэ:

– Ма, неужели, Мавра, гӧршокез уд миськы? Уй котыр со чырсалоз, кӧшектоз уг?

– Уг шуэм бер, уг! Верай уг инӥ мон тыныд, уг миськы шуса. Туннэ гӧршок миськыны тынад черодэд!

Мар карод сыӵе кышноен? Изьны выдэмезлэсь азьло нош ик Исьтапан Мавраезлы вера:

– Мавра, миськы...

– Тон шыд сиид, тон ик миськы...

– Я, иське, Мавра, асьмеёс тазьы кенеш пуктом: ӵуказе ӵукна кин первой кыл вераз ке, солы гӧршок миськоно мед луоз.

– Яралоз, – шуэ Мавра.

Изьны выдӥзы: Мавра ӟус вылэ выдӥз...

Гӧршок нош гуразьын, чик миськытэк, сылэ...

        * * *
Ӵукна шунды вылэ ӝужаз инӥ, Исьтапанэн Мавраен изё на: нокинлэн султэмез, первой кыл верамез уг поты, гӧршок миськемез уг поты.

Гуртысь кышноёс пудозэс но сюдӥзы инӥ, гурзэс эстӥзы инӥ, – Мавралэн искалэз сюдымтэ, гурез эстымтэ: гӧршок миськыны Исьтапанлы йырыз кур.

– Туклячи! Ма, маро таӵе Мавра кен туннэ кулӥз-а, маро: пудоез гид тыр бӧксэ, гурез уг эстӥськы, – шуса, ваче Олёнаен пересь Катяен верасько.

– Ветлы аль, Олёна туклячи, эскеры.

Олёна Мавраёс доры лыктӥз. Корказы пыриз: Мавра ӟус вылын кылле, Исьтапан сэндрайын кылле.

– Мавра! Ма сыӵе кема изиськод? Оло, уд тэ-а висиськы?

Мавра Олёна шоры учке но одӥг кыл но уг куареты: первой кыл верамез уг поты, гӧршок миськыны йырыз кур.

– Исьтапан! Султы! Васькы сэндрайысьтыд!

Исьтапан Олёна шоры учке но одӥг кыл но уг куареты: солэн но первой кыл верамез уг поты, шыд сием гӧршоксэ миськемез уг поты.

– Ма, мар таӵе таослы луэм? Таос кылтэм-ымтэм усиллям, лэся: мынса иськавын-бускельёсыз ӧтёно, – шуса, Олёна кошкиз.

Иськавын-бускель кышноёс корка тыр люкаськизы, Мавраен Исьтапанэн вераськыны туртто – уг луы: Мавра но, Исьтапан но, синзэс толэзь быдча усьтыса, шоразы учко но одӥг кыл но уг куарето.
– Таёсыз мурт лэсьтэм – вегналлям, кылтэм кариллям. Попез вайса, вӧсятоно луоз, – шуса, кенеш пуктӥзы.

Дас изькемысь попез ваизы. Поп вӧсяз-вӧсяз, нӧкӵе пайдаез ӧвӧл, собере: «Соёслэн пушказы шайтан пырем, – шуиз. – Оло, соёс кулозы – коркан кинэ ке возьманы кельтыны кулэ».
Кышноёс вераськизы-вераськизы но гуртазы бертылӥзы: гуртын котькинлэн но ужез вань.

– Нош таосыз возьманы кинэ кельтоды? – шуса, поп юа.

– Ма, тани уг, кураськись Пекла вань, сое кельтоно, – шуо кышноёс.

– Мон кылё ке, кылё но, дунтэк уг ужа, – шуэ Пекла.

– Ма, мар тыныд сётод таӵе, – поп шуэ. – Э, тани уг татын, ӧс дорын, Мавралэн урод кесяськем дукесэз вань, сое ужам поннад басьтод...

Поп кылзэ вераса ӧз быдты на, Мавра, <татын валантэм гожтэмын. – С.А.> сяен ик, ӟус вылысьтыз тэтчиз:

– Мар?! Мынысьтым ваньбурме, мынысьтым юатэк, люкылӥськоды-а инӥ? Али ик, татысь потса, кошке, – гур суран кутӥз но ваньзэс улляса лэзиз.
Со куспын Исьтапан сэндрайысь каллен васькиз но Мавралы вера:

– Мавра! Тон первой кылдэ верад, тыныд ик гӧршок миськон уж...

Мавра ог кыл но ӧз куареты – гӧршоксэ миськиз но гурзэ эстыны кутскиз...

Гудыри. 1925. 6 февр.