Кынмымтэ  сяськаос. Роман Валишин
Рассказы

Кынмымтэ сяськаос. Роман Валишин

257 {num}

Верос

Тани тазьы ӵукналы быдэ: валесысь султыса, гур эстӥськод, кидэ-ымнырдэ миськиськод, собере сиён пӧзьтыны кутскиськод. Гур котырын бергамысь дугдӥськод ке, уже мынон азьын кема сылоно луэ на синучкон азьын: куамын вить аресъем кышномуртлэн калыкын егитгес адӟиськемез потэ. Веськрес мугорыз, вакчи дӥсез, ӵем вошъяськись причёскаез зэмзэ но егит каро сое. Гуртысь кышномуртъёс ог-огзылэсь юало: кӧня арес ини со школаысь директорзылы, ялан огкадь улэ.

Школа... Берло аръёсы Эмилия Павловналэн вань улонэз – куректонэз, сюлмаськонэз, шумпотонэз – школа луиз. Куке но солы шуысалзы ке, «школаын тӥ уд ужалэ ни, кыӵе ке мукет уже мыноды», – улонлэн чеберез солы ышысал, дыр. Вал солэн улоназ сыӵе учыр – огвакыт солы шунды пиштэмысь дугдӥз. Институтэз быдтыса, соос одӥг пиен кошкизы гуртэ. Кышнояськизы. Улӥзы-вылӥзы. Кык ар ортчиз. Выль ар дыръя школаын вечер ортчытӥзы. Ёлка котырын шулдыръяськизы – эктӥзы, кырӟазы. Бен, ваньзэ сое вераны кема – пумыз со вечерлэн Эмилия Павловна понна синкылиё вал. Егит кышномурт картсэ практиканткаен пеймыт классысь шедьтӥз...

«Эк, улон, бышкись ез кадь ик лек вылэмед тон, тол куазен бырдам йӧ выллем кезьыт вылэмед тон», – тазьы чигиськылӥз Эмилия Павловна, картсэ куштыса кошкемез бере. Нош пумен сюлмыз басылмиз. Сюлмысьтыз яраез бурмиз. Ужез ке, школа сярысь сюлмаськонэз ке ӧй луысал, туж шуген вормысал, дыр, со кайгузэ.

Эмилия Павловналэн вань на одӥг туж но туж гажано ужез – сяськаосты утялтон. Сиён сярысь но вунэтыса, гвоздикаосыз но георгинъёсыз котырын бергалоз: сюез небӟытоз, ву киськалоз. Нырысь аре сяськаоссэ забор вӧзы мерттӥз вал. Мария Яковлевнаослэн – со но школаын ужа – азбарзы, юртъерзы вырйылынгес, нош пож вузэс асьсэ палтӥ забор вӧзы киськало. Пыӵаса вуымтэ пож ву, забор ултӥ Эмилия Павловналэн азбараз пырыса, сяськаос выжые вуэ. Куасьмизы сяськаос. Мария Яковлевналы вераз но, соиз киыныз шонтӥз. Мукет гужеме Эмилия Павловна отчы ӧз мертты ни.

Кемалась ик ӧвӧл, Эмилия Павловна теплица лэсьтытӥз. Пичи гинэ со. Тол нуналъёсы теплицаысьтыз гурзэ ӵукналы быдэ но ӝытлы быдэ эстэ. Кӧтыд-а ӝож, кинлы ке вожед-а потӥз, сюлмыд-а висе – та теплицае пыр но, ваньмыз ортче. Ульчаын кезьыт, бамез чепылля, куддыръя синтэм-пельтэм жоба, нош татын вож куаръёс, льӧль чебер сяськаос. Нош вордскем нуналаз Эмилия Павловна со сяськаосты ӝӧк вылаз вуэн стаканэ пуктэ.

Школаын выль завхоз, егит пи, ужаны кутскиз. Спиридон солэн нимыз. Кытысь гинэ сыӵе ним шедьтӥллям.

– Укыр востэм ук тон, Спиридон. Табере тон кузё, завхоз. Куддыр вазерпиньдэ но возьматоно луод – улон со сыӵе...

Бен, бен, таӵеосты куд-огез яратэ: зӥбыт, пумит номыр уз вера. Нош Эмилия Павловналы жаль пото соос: улонын мае ке но ышто, асьсэ шудзы понна нюръяськыны уг быгато кадь. Кыӵе луоз та Спиридонлэн азьпал улонэз? Завхозын ужалоз. Праздникъёсы директор приказъёсаз солы благодарность ялылоз. Спиридон улонэзлэн сыӵе каньыл мынэмезлы шумпотылоз. Кышнояськоз. Мар косоз кузпалыз – шумпотыса лэсьтоз. Ужысьтыз бертыса, юрт котырын сюлмысь бергалоз, ог вить-куать нылпи вордозы. Кулыкуз шуоз: «Тау ваньмызлы, пересьмытозям улӥ, муртъёслы урод ӧй лэсьты, калык яратӥз-гажаз, ӧй лушка, ӧй обидьы...» Нош малы-о серемпыр озьы малпаськод ай тон, Эмилия? Уг-а яра таӵе улон сюрес? «Улон – со картаен шудон. Огезлы ялан козырной туз вуэ, мукетызлы огшоры шестёрка сяна уг сюрылы», – озьы шуылоз вал атаез.

– Кытын-о семьяед улэ?

– Мон ӵужанае дорын быдэсми. Анае кулыку, мыным дас арес но ӧй вал на. Атайме уг тодӥськы: милемыз куштыса кошкем со.

Бен угось, таӵе быдэсмо нылпиос, анайзы-атайзы но соослэн уг луы. Эмилия Павловна выль завхозлэсь ӵужанайзэ син азяз пуктӥз: кулэ но, кулэтэм дыръя но куаретылэ, вордосэзлэсь ужтэк пукемзэ ке адӟе, одно ик косъяськыны кутске: «Мын ай, пу пырты, Спиридон». «Сиыны гинэ валаськод, Спиридон, бакчаез уры вал-а, мар-а».

– Маке вераны медӥськод на кадь? – юа Эмилия Павловна кабинетысь потыны дасяськем завхозлэсь.

– Тӥ монэ... туж курисько... Спиридон эн шуэ, туж уг яратӥськы нимме... Ӵужанае корказе потыса кеськоз вал: «Спиридон! Тырмоз ини гын сапег пӧськытыса бызьылыны – гуртын уж тачак! Пыр корка». Оло, со дырысь тӥни адӟонтэм кари ас нимме. Сеня шуылэ монэ.

Эмилия Павловна соку директорлэн кресло вылаз уг пукы на вал. Огпол Мария Яковлевна но со куспын бадӟым керетон ӝутскиз. Малы Мария Яковлевна озьы лэсьтӥз меда? Со мӧйы дышетӥсь ук, школаын кызь ар пала ужам адями.

Ваня нимо дышетскись картаез тодымтэ: Миссисипи шурез утча Австралиысь, нош Дунаез – Америкаысь. Географиен дышетӥсь Мария Яковлевна пӧсекъя. «Кышно басьтыны вуэмед ини, нош тон, ослоп, сапег пӧськытыса но нунал ортчытыса, школае ветлӥськод. Пиналъёс али гуртэ бертозы, нош тон ӵукнаозь картаез дышетод». Озьы шуыса, со классэз ӵогаз но усьтонзэ сумкаяз понӥз. Урокъёс бере кельтэм дышетскисез сярысь вунэтӥз-а яке зэмзэ но уйлы кельтыны малпаз-а – сое классэ пытсам. Котьма ке но, бӧрдыса тӧрнам синъёссэ зыраса, Ваня ӵукна со классысь, пиналъёс лыктэм бере гинэ, гуртаз кошкиз. Кӧня ветлӥз со пи доры классной руководителез Эмилия Павловна – нокызьы но ӧз луы ни Ваняез школае берыктыны.

Ой, макем пӧсекъяса вераськиз педсоветазы Эмилия Павловна. Бератаз ватсаз на: дышетыны ке уд быгатӥськы, школаысь кошконо... Нош Мария Яковлевна пештырскиз, лэчыт гижыоссэ возьматӥз: «Тон, нылок, шыпгес выр, ымдурысьтыд ӵужед бырымтэ на. Адӟом, кин азьлогес школаысь кошкоз – тон-а, мон-а!»

Со бордысен ик кутскиз. Педсовет ке луэ, Эмилия Павловнаез курласа, Мария Яковлевна вераське. Я со уроксэ ортчытымтэ, я ляб дышетэ, я «советской педагогикаез тӥя» (бен, озьы ик шуэ), директор ке со, нокыӵе законъёс но солы ӧвӧл ни-а ма?

Озьы ке но, Мария Яковлевна нокызьы но Эмилия Павловнаез «пыд йылысьтыз погыртыны» уг быгаты. Директор соин умоен но вераськылӥз, куаретылӥз но – азьвыл сямен ик ӵужектэм ымныро, кисыриё бамо пичи гинэ кышномурт «йырзылэсь» сьӧд виштызэ утча. Шедьтыны гинэ уг быгаты.

Директорлэн нуналэз ӝог лобӟе. Шӧдыны луонтэм ӝог. Эмилия Павловна ӝытазе, кабинетаз огназ кыльыса, куддыръя шуак малпаське: кӧня час ини, малы коридорын чалмыт? А-а, урокъёс быремын. Дышетӥсьёс но пиналъёс – гуртазы. Таня апай, техничка, учительскоез котьку сямен утялтэ: ӵуже, миське, ӵушылэ...

Бен мар ай таӵе кароно на вал? Ӵуказелы план тани настольной календарь вылэ гожтэмын: «1. Мария Яковлевналэн урокъёсаз пуконо. 2. Валлы фураж шедьтоно. 3. 8 «б» классысь Мироновен вераськоно. 4. Завхозэн – склад пумысь...»

– Таня апай, завхозэз татчы ӧть ай. Гуртаз кошкымтэ на ке...
Кӧня пол ини тазьы ыстылэ? Малы? Олома ведь малпалозы. Уз. Супыльтэмзы шоры учкыса, ужез-а вунэтоно?

Кӧня ке улыса, Таня апай аслаз эшезлы, техничкалы, вера:

– Тодӥськод-а, Окыльна, ма дауртэ асьмелэн «йырмы»! Уд но малпа, ява. Мар тазьы кажной ӝытэ завхозэз ӧтьылэ та, шуисько. Нырысь пал бензопила но пу сярысь верасько, собере ини театрез но, операзэ но уг кельто. Тьфу, озьы-а, пе, выроно вал ини мӧйы кышномуртлы. Соослэн виссы но ог дас вить ар луоз, вылды?

Час ортчыса ини, Окыльна мукетызлы техничкалы маде: «Ой, мар мон кылӥ: директормы, пе, завхозэн аслаз кабинетаз чупаськем. Ой, возьыттэм-возьыттэм, арлыдо нылкышно озьы-а, пе, егит муртэн шудоз?»
Ортчизы нуналъёс. Табере пурысьтам йырсиё дышетӥсьёс но вераськыны кутскизы: «Аморально... Директормылэн выросэз чидантэм: кыӵе пример пиналъёслы возьматӥськом?»
Одӥг нуналэ директор (урокъёс бырем бере ини) учительское пырыса паймиз: малы тазьы вань дышетӥсьёс люкаськемын? Нокин солы вазись ӧвӧл, ас кабинетэзлэн ӧс бордаз кутскемез бере гинэ, Мария Яковлевна пыриськыса сямен вера:

– Эмилия Павловна, тӥледыз витиськом...

Директор, чернобуркалэсь вурем воротнико пальтозэ ӵоге ошыса, буш пукон шедьтӥз но пуксиз: ма пумысь-о тазьы вераськыны ӧдъяло?

– Мон профкомлэн председателез бере, – шуэ Мария Яковлевна, – мыным ик кутсконо, вылды. Чидаськод-чидаськод но, чиданлэн но пумыз вуэ, шуо. Асьтэос тодӥськоды, таӵе учыр огшоры адямиос пӧлын... кызьы шуод ай, необразованнойёс пӧлын... луысал ке, соку, оло, чидасалыд но. Нош дышетӥсь – со дун ву кадь чылкыт адями, со нокытын ас данзэ уз ышты, завхозэн учительскойын уз чупаськы, малы ке шуоно со шоры сю пар – куинь сю пар синъёс учко, дышетскисьёслэн синъёссы...

«Тӥни мар!» – Эмилия Павловналэн, оло, быдэс мугорысьтыз вирез ымныраз пальккиськиз, бамъёсыз виштыё-виштыё гордэктӥзы, йыраз кин ке тук-тук йыга... Ма кароно? Али ик султыса, та мӧйы кенаклы ӝот-ӝот верано, вань учительской тыр кесяськоно: «Тырмоз! Тырмоз котькуд адями вылэ пож ву палькканы!» Собере, оло, зӥбытак юано: «Мария Яковлевна, вералэ ай: вань-а тӥляд сюлэмды? Вань-а йырвизьды? Ма кылемын на та сисьмыса куасьмем картош кадь шымырскем мугорады? Пӧсьтэм сэпты? Отысь конялзэ тӥ котьма вылэ кисьтаськоды: льӧль сяська вылэ, тулыслэн чеберез вылэ. Выль ар уе пиштӥсь кизилиос вылэ». Нош Мария Яковлевна дугдылытэк вера:

– Мар-о луысал школаын, вань дышетӥсьёс Эмилия Павловна сямен дауртысалзы ке: мон тани математикез, Сидор Петровичез, ӟыгыртысал ке...

– Кулэед, пе, вал. Кышноеным уг вошты, – кылӥське Сидор Петровичлэн куараез. Куд-огез пальпотӥз, серектӥсез но луиз.

– Мар-ось серекъяськоды? Серекъям интые бӧрдыны кулэ... Эмилия Павловна кадь дауртысалмы ке, соку дышетскисьёсмы но асьмелэн кутскысалзы...

Соку огез егит дышетӥсь ӧз чида ни, интыысьтыз султӥз но дырекъясь куараен вераны кутскиз:
– Мар-о тӥ, Мария Яковлевна, тодыса-тодытэк Эмилия Павловна вылэ пож ву киськаськоды? Тӥ, оло, ас синмыныды адӟиды?

– Ас синмыным ӧй адӟы но, ваньмыз верало ук. Тӧлтэк, пе, куар уг выры.

– Кин – ваньмыз? Тӥ но техничкаос гинэ супыльто. Собере, мар «аморальнойзэ» адӟиськоды тӥ отысь? Оло, соослэн куспазы чылкыт яратон?

– Яратон? – лек серектӥз Мария Яковлевна.

Нош кӧня ӧз выры Мария Яковлевна директорез сьӧдманы, ӧз пӧрмы, дышетӥсьёс тросэз пырак шуизы: «Кулэтэмаз нырдэ эн чуртна». Мария Яковлевналэн малпамезъя ӧз луы, соин ик со уката лекомиз но гижызэ пыдло ватӥз.

Валаз Эмилия Павловна: дышетӥсьёс тросэз супыльтонъёслы уг оско. Озьы ке но, сюлэмаз солэн та вераськон йӧнасьтэм яра кадь кылиз.

...Бер ӝыт. Эмилия Павловналэн вордскем нуналаз куноез куинь-ньыль мурт гинэ. Соос пӧлын ик Сеня но: интернатэ продукт ваён сярысь вераськыны пыриз но, Эмилия Павловна ӝӧк сьӧры пуктӥз – ӧз лэзьы ни.

Сюлэмлы каньыл та коркан: шуныт, югыт. Ваньмыз тодыса-валаса пуктылэмын. Эмилия Павловналэн шулдыр мылкыдыз. Нылмурт но нылмурт: кит-кит серекъя (чик но школаын кадь лек ӧвӧл), чыртыысьтыз весез, азвесь кадь, чильк-вальк кисьтаське, сьӧд дэрем вылысьтыз бисерез шунды ӝужаку уно лысву пырыос сямен чилектылэ.

– Куамын вить арес тырмиз ни.

– Егит адӟиськиськоды тӥ. Ог кызь сизьым-кызь тямыс сяна уд сёты, – шуэ Сеня.

– Егит-а? Оло, кышнолы но басьтысалыд? Ха-ха-ха!.. Эн кепыра тон, бызьыны вуэм нылмурт кадь эн возьдаськы, ӧжыт сэзьгес кариськы.

Собере ассэ ачиз ик пыкылэ: озьы-а вераськыны кулэ, егит пи олома но ведь малпалоз.

Бен, тросэз ӧз валалэ Эмилия Павловналэсь сюлэмзэ: малы та пиен эшъяськиз, малы сое мылысь-кыдысь дышетыны выриз, малы, дасэтӥ классэз быдтэмез бере, сое институтэ дышетскыны келяз. Ма, ачиз но валаса вуттӥз меда? Мария Яковлевна тазэ нокызьы валаны уг быгаты: кызьы-о огшоры палэнысь адямилы (бен со родняез но, кинэз но ӧвӧл ук!) юнме шорысь коньдон быдтод – вуэ киськам кадь луэ ук со. Уждунзэ басьтэмезлы быдэ городын дышетскись Спиридонлы почта пыр коньдон ыстэ. Бен, бен, юнме шорысь ӧвӧл со: собрание дыръя танӥськиз ке но, али но Спиридонэз уйвӧтаз адӟе на, шӧдске. Ма, учкымон ик луиз со пияшед: веськрес, йӧно дӥсяськем, синмаськоно кадь, нырулаз сӥньыс кадь гинэ векчи мыйык будэтэм – уд но малпа, ява, куке но завхозын ужаз шуыса.

Эмилия Павловна нырысь пал Спиридонэз жаляз: «востэм», «шудбурез вӧзтӥз ортчоз», ас понназ гинэ тышкаськылӥз сое, «нюлымтэ кунян» шуыса. Бератаз, син азьын воштӥськись Сеня шоры учкыса, мукет мылкыд ӝужалляз солэн сюлмаз – сад утисьлэн но сыӵегес луэ, дыр, мылкыдыз, ас киыныз будэтэм садэз сяськаяськыны кутскыку.

Одӥг пол Сеня-Спиридон, институтысь бертэмез бере, котыръяса-котыръяса вераз: улонзэс соос пырак азелы герӟаны кулэ.

«Шузи тон, Сеня, та сярысь ноку но, ноку но кылпум эн поттылы ни. Вераським-а?» – тазьы шуиз соку Эмилия Павловна. Мак сяська кадь гомӟиз студент. «Малы тӥ монэн, – шуэ, – коӵышпиен кадь шудӥськоды, тани корка тырады коӵышъёсты, шудэлэ соосын». Кошкиз. Кема ӵоже ӧз вуылы ни Эмилия Павловна доры, уксё переводъёссэ но берен ыстылӥз. Олокӧня гожтэтъёс бере гинэ соослэн кусыпсы тупатскиз: ог-огзэс праздникен, вордскем нуналэнызы ӟечкылало, ог-огзылы гожтэтъёс ыстыло. Школалэн директорез доры куное ӵем вуылэ студент.

«Эх, Сеня, Сеня... Неужели тон мон сярысь урод малпаськод? Адямиез жаляно ӧвӧл, гажано. Туж ӟеч тодӥсько Горькийлэсь со кылъёссэ. Нош мон нырысь тонэ жаляй, огшоры жаляй. Сирота. Востэм, адями шоры пырак учкыны но керпотӥсь. Кызьы ай валэктоно тыныд: тани тон карнанэн ву вайиськод, нош сюрес дурын, тузон пӧлын, сяська пашме, солэн юэмез потэ. Неужто мон со ненег сяськалы куасьмыны сёто? Кык ведраосысьтым вуэ одӥг сузен уз быры, со ӵужектӥсь будос вылэ палькко – оло, озьы луиз тонэн но...»

Гужем пӧсь куазьёсын, сӥзьыл зор липет йылын ӵашетыку, макем мӧзмоно тол нуналъёслэсь. Бус-бус валиськем лымы вылтӥ мынэ-а яке ӟырт-ӟырт кынмем дӧдьы сюрес кузя-а вамышъя, синтэм-пельтэм жобаку-а яке уно миллион лымы пырыосын шунды сиос шудыку-а – котьку но мусо потэ Эмилия Павловналы та тол куазед.

Туннэ жоба. Лымы ляк-ляк кырмиське пальтое, кышет борды, ымныре йӧтскыса, вулы пӧрме... Туннэ Сеня городысь вуыны кулэ. Эмилия Павловналэн вордскем нуналаз со котьку ик бертылэ – туннэ ньыльдон тырме.

Эмилия Павловна выль штораоссэ укноосаз ошылӥз корказэ чылк-чылк кариз. Капка азьысьтыз, азбарысьтыз лымызэ мычиз. Пичи нылаш кадь укылтэмъяське: лопаткаеныз лымыез вылэ ӝутыса зӥртэ но, лымы пырыос воротниксэ, кышетсэ зӧк сӥен шобырто.

Огдырлы малпаськонзэ но вунэтӥз. Ӵукна солэн сюлмыз укыр ӝожомиз вал. Кылем уе теплицаезлэсь ӧссэ кин ке но вӧлак усьтэм. Вань сяськаосыз кынмиллям. Кыкез гинэ, рама улысьёсыз, кезьытлы сётскиллямтэ. Кинлэн со ужез? Эмилия Павловна Мария Яковлевнаез алигес куаретӥз. Наглядной пособиос вань вылысь, урокъёсаз уг басьты, учебниксэ кутэ но кошке. Мария Яковлевна котьку сямен ик пӧсекъяны ӧдъяз, монэ, шуэ юри выйтыны малпаськоды, только номыр уз пӧрмы. Кынтэм сяськаос – со кышномуртлэн ик ки бервылыз, дыр. Эмилия Павловна со вылэ ӧй сьӧлыкасал но, теплица вӧзы кылем пытьыос бускелезлэнлы укшало.

ӝӧк выл сиён-юонэн тырмытэмын. Оген-кыкен куноос но вуо: физик – пилеш йыро но чилясь очкиен пиосмурт, литератор – котьма сярысь кушетскыса вераськись нылаш, Мария Яковлевна – ӧтьымтэ куно (Эмилия Павловна дорысь чаркаос нуэм вал но, соосты вайиз).

Корка пушкын куноос муш палэп кадь гужланы кутскем бере, Эмилия Павловна Сеня-Спиридон сярысь малпаськыса пукыку («бертыса оз вуы ведь»), ӧс усьтӥське. Пыре Сеня. Огназ ӧвӧл – егит нылмуртэн. Соос, кылиськем беразы, ваче ки кутскыса, чусомем залоетӥ ортчизы но Эмилия Павловна доры дугдӥзы.
– Эмилия Павловна! Мон одӥг часлы гинэ но ӧй вунэтылы огпол вераськеммес, тӥ соку шуиды: «Шузи тон, Сеня, та сярысь ноку но, ноку но кылпум эн поттылы ни». Мон соку тӥледды пумтэм обиди. Малы со озьы луиз? Мынам пелям, акылес кут сямен, ялан одӥг кышномурт жужгетылӥз, – Сеня-Спиридон Мария Яковлевна пала учкиз. – Со шуылӥз: синчеберед понна-а тонэ дышето, сюдо, дӥсяло. Дунне вылын ваньмыз ас палаз капыръя, дунне вылын ваньмыз вузаське, уксёен басьтӥське, тау каремед понна гинэ-а тонэ пыд йылад султыто? Эмилия аслыз карт будэтэ. Озьы мыным шуылӥз со кышномурт. Вождэс эн вае мыным, шузилы, – ӧжыт гинэ ӧй оскы солы, Эмилия Павловна. Кин бен тӥ мон понна? Сузэр-а? Сузэр ке, вын мурт ас сузэрзэ мон сямен яратыны кулэ, дыр. Анай-а? Озьы но шуыны луысал: тӥледын пумиськеме бере мон кыктэтӥзэ вордски. Только аресын тӥ анайлы уд тупаське. Котькызьы шу но, туннэ мон туж матысь адями доры лыктӥ, лыктӥ со муртэн, кинэн ми, тани тазьы ик ваче ки кутскыса, улонтӥ ортчомы. Шуд сӥзе милемлы, Эмилия Павловна.

Пушкыз тырыса, Эмилия Павловна кыкназэс ик ӟыгыртӥз, шумпотон синкылиоссэ ватон вылысь-а, мар-а, со йырзэ егит ныллэн пельпум вылаз мыкыртӥз. Та вакыт, шыпытак ӧсэз ворсаса, Мария Яковлевна дораз кошкиз, изьыны выдэмез бере картэзлы шуиз: «Сюдӥз-вордӥз, кышно басьтоз кожа вал, дыр. Быжзэ гинэ возьматӥз, бен озьы ик кулэ со албастылы».

– Монэ эн ыштэ, куноосы. Мон ӝоген вуо, – озьы шуыса, Эмилия Павловна коркась потӥз. Огшап улыса, кияз сяськаосын пыриз, со кынмытэк кылем льӧль но тӧдьы сяськаосыныз.

Та улэп будосъёсты пуктӥз егитъёс азе. Корка пушкы пӧсь гужемлэн ог «кесэгез» пыриз кадь, ӝӧк вылэ мальдытӥсь шунды сиос вуизы кадь, ачиз шуд, ӧсэз усьтыса, та юртэ вамыштӥз кадь – сыӵе мылкыд вӧлдӥзы та огшоры, кезьытлы сётскытэк кылем кык сяськаос.