Петр Чернов. Люкиськон
Рассказы

Петр Чернов. Люкиськон

352 {num}

Тодэ ваен

Вуиз Москваен но, эшъёсын но, дышетӥсьёсын но люкиськон дыр. Берпуметӥ экзамен бере ми быдэс курсэнымы Ленин гурезьёсысь актовой залэ люкаськылӥмы, отысь потыса, Ломоносовлы сӥзем памятник выжыын фотое шуккиськимы.

Со ӝытэ мыным дырын-дырын мӧзмон мылкыд лыктылӥз ке но, кемалы ӧз: ваньзэ одӥг малпан вормылӥз – ӝоген, дор палъёсам бертыса, ужаны кутско. Вить арзэ ӵош дышетскем эшъёсыным люкиськыкум но мылкыды сыӵегес ик вал.

Нырысь мон кыдёкысь лыктэмъёсын люкиськи. Тан Сючжеен ог-огмылы туспуктэмъёсмес кузьмамы – котькудӥз аслэсьтыззэ. Мон солы вуоно ужан интыелэсь адрессэ но сётӥ, нош со ӧз быгаты: кытчы ужаны каремзэс ӧз тоды – созэ бертэм берамы вералозы, шуиз.

Кызьы мон кунгожсьӧр эшъёсы-тодмоосы пӧлысь Тан Сючжеен ваньмызлэсь азьло люкиськи, озьы ик ваньмызлэсь вазь соин кусыпме ыштӥ. Асьме страналэн Китаен кусыпъёсыз пумен сӧриськизы но сӧриськизы, нош отӥяз воксё куашказы. Одӥг аре ай соос Амур шурысь чик кулэтэм шормуӵ сэрен жугиськон но ӝутылӥзы. Собере Китайын олокӧня аръёслы огыр-бугыр вакыт кутскиз.

Дырын-дырын мон сюлмы вӧсь луыса малпалляй: улэп на меда Тан Сючже? Улэп ке но, ӧз пытсалэ меда сое? Нош со, инмарлы тау, огыр-бугыр аръёс пыр улэпкын потыны быгатэм; нокытчы сюрымтэ но. Созэ мон люкиськеммы бере ог куамын ар ортчыса тодӥ ни. Кызьы ке «Советская культура» газетэ печатласькиз Александр Авдеенколэн Китае ветлэмез сярысь очеркез. Со отын кӧня ке чур Тан Сючже сярысь но гожтэм: ми, пе, куке-соку соин ӵош дышетскимы, али, пе, со Синьхуа агентстволэн корреспондентэз луыса Москваын ужа но улэ. Мон чаляк гинэ «Советская культура» газетлэн редакцияз Александр Авдеенколы гожтэт ыстӥ: уд-а, пӧй, вера, Саша, Тан Сючжелэсь координатъёссэ? Нош мыным нокыӵе ивор ӧз вуы: оло ӵош дышетскем эшмы быдӟияськыса гожтоно ӧз кариськы, оло мынам гожтэтэ со кие ӧз шедьы. Озьы ке но, Синьхуа агентстволэсь адрессэ мон тодӥ вал, нош гожтэт лэзьыса ӧй вутты ни.

Йожеф Сасси сярысь но та аръёс куспын кӧня ке пол кылӥськылӥз. Со но университет бере Москвае ужаны лыктэм-а, мар-а: отын улэ, шуизы.

Мукетъёсыз сярысь номыр ӧз кылӥськылы; ачим но ӧй утчалляськы.

Нош Жан-Люк Мороен тазьы луиз.

Люкиськон азямы ми соин ог-огмылы адресъёсмес сётъямы. «Комсомолец Удмуртии»-«Удмуртиысь комсомолец» газетлэн редакциезлэсь сяна, мон солы Сизьгуртысь дорелэсь но верай на: кин тодэ, шуи кадь, оло, монэ кытчы ке мукет интые карозы; яке азьланяз кызьы-ма луонозэ шӧдӥ-а.

Ужаны кутскеме берегес ик мон Жан-Люклы Париже гожтэт ыстӥ. Со мыным ӝог гинэ гожтӥз – Ижевске, «Комсомолец Удмуртии»-«Удмуртиысь комсомолец» газетлэн редакцияз. Но шӧдӥськиз, мынэсьтым иворме басьтымтэ шуыса: кылсярысь, уже интыяськеме сярысь юалляськем – мон ке солы ваньзэ сэрттӥ-пертчи вал. Кӧня ке улыса, кыкетӥзэ, гожтӥ – соиз но гожтэтэ вуымтэ. Жан-Люк паймыса, лэся, Сизьгуртэ открытка лэзиз ини.

Отысен озьы ик кошкиз: мон Жан-Люклэсь гожтэтъёссэ октылӥсько, нош со мынэсьтымъёссэ – уг. Бератаз со мынэсьтым кылме юаны ӧдъяз: малы уд гожъяськы?

Ӧйтӧд, ваньзэ кӧня гожтэт лэзиз меда мыным Жан-Люк. Та чуръёс борды кутскемелэсь азьло бумагаосам бугыръяськыкум, мон огзэ шедьтӥ на. Нош тодӥсько – витьлэсь-куатьлэсь ӧжыт ӧй вал. Ӧйтӧд, кытчы пыриллям.

Со кылемаз Моро тазьы гожтэм – удмурт сямен:

«Гажано Петя, чырткем!
Кыӵе тазалыкед? Мар уж быдтӥськод? Мынам тазалыке умой. Нош ик улӥсько Парижын. Удмурт эшъёсме уг вунэтӥськы. Гожъяськы!
Ӟеч лу! Жан-Люк».

Ми ар ёрос озьы гожъяськимы кадь – собере дугдӥмы: мон гожтэтъёсме Париже вуттытъяны амал ӧй шедьты, нош Жан-Люк мон чалмыт улӥсько шуыса дугдӥз, дыр.

Сыӵе ужъюгдурлэсь мугъёссэ берло гинэ тодӥ ини.

Огпол, ньыль-вить кузя оскымон эшъёсын пукыкумы, та сярысь кылпум поттылӥ но, кин ке кунгож сьӧры гожъямъёс пӧлысь юаз:

– Нош гожтэтъёстэ кыӵе конвертъёсын ысъяд?

– Суредо конвертъёсын, – шуи мон.

Ваньзэ сыӵеосын лэзьяй вал уго, ай чебересьгесъёссэ бырйыны тыршыса.

– Сыӵеосын уг яра вал, – валэктӥз со мурт, – огшоры тӧдьы конвертъёсын, вылазы марка гинэ лякылыса.

Иське, кин ке мынэсьтым гожтэтъёсме октэ но яке корзинае куя, яке папкае тыре. Со сярысь тодэме бере мынам виры ик кисьтӥськиз: октӥськод ке октӥськод ини со гожтэтъёсыз – коть вера вал ук, сыӵе конвертъёсын кунгож сьӧры гожтэтъёс лэзьяны уг яра шуыса – мон мукет амал утчасал.
Но озьы дауртэмзы бератаз соослы асьсэлы ик мултэс сюлмаськон вайиз кадь.

Кызьы ке милям ужан кабинетамы лапеггес гинэ, тып-тып мугоро, шоро-куспо арлыдо воргорон пыриз. Солэн вылаз зӧк пурысь плащ, пыдаз сапег, йыраз пурысь-а, сюрсо-а картуз вал. Дӥськутэзъя мон сое гуртысь лыктэм мурт, кожай.

Ми одӥг – зэм, бадӟымос гинэ – кабинетын ньыль кузя пукиськомы вал; мынамез ӝӧке – укно дорысен паллян палаз. Со нуналэ нуназе бере мон дымбыр огнам кыли. Оло озьы тупаз гинэ, оло ӵош пуконо эшъёсме азьло ик алӥллям – воргоронэн вераськонмы бырытозь, огзы но ӧз вуэлэ.

Пырем муртлы мон нокыӵе ӧй кариськы: кин но уг ветлы редакцие – оло, дорам но ӧз лыкты ай, шуисько; арлыдызъя но, ми доры пырасьёс сярысь, мӧйы йӧтӥз.

Нош воргорон монэ юаз. Мон асме верай но солы азям сылӥсь диван шоры возьматӥ. Со пуксиз но, кисыысьтыз горд выло книжказэ поттыса, мыным мычиз. ГБ-ысь адями вылэм, капитан. Нимыз-тулыз но татчыозь тодам, нош созэ татын уг усьты.

Шуак керӟегтӥськыса, мон но капитанлэн ныр улаз горд выло книжкаме – удостоверениме – донги. Со паймыса выллем киме палэнтӥз:

– Ма, мон тӥ доры киндэс тодыса лыктӥ, Пётр Константинович. Собере тани али гинэ тодматскимы но ук.

– Малы нош соку горд книжкадэс мычкаськоды? Мынам аслам но сыӵеосыз куинь но, ньыль но, – азьло сямен ик керӟег шуи мон.

– Радыз сыӵе, – зӥб-зӥб валэктӥз воргорон.

Бен шонерзэ вераса, созэ мон умой тодӥсько вал.

Юалляськонзэ капитан кыдёкысен кутскиз: кызьы, пе, тӥ Москваын дышетскиды, кызьы-мар общежитиын улӥды, кинъёсын эшъяськиды. Мон Александр Аннинлэсь, Андрей Болдыревлэсь, Алексей Быстровлэсь но эшшо куд-ог асьмелэнъёслэсь нимъёссэс верай. Кунгожсьӧръёслэсь юри ӧй потта – оло асьме калыклэн эскериськон-чакласькон сямызъя, оло соку ик ини капитанлэсь ма витемзэ шӧдыса.

– Тодмоосты пӧлын кинъёс ке кунгож сьӧрысь вал-а? – монэ дугдытытэк но аслыз кулэ пала берыктытэк ӧз чида ни капитан.

Соку мон Тан Сючжелэсь, Ли Мун Соблэсь, Йожеф Сассилэсь но кӧня ке мукетъёсызлэсь нимъёссэс потта – социализм лэсьтӥсь странаосысь эшъёсылэсь-тодмоосылэсь гинэ.

– Нош мукет странаосысь тодмоосты чик ӧй вал шат? – весь аслыз кулэ пала кожытыны выриз монэ капитан. Зэм, кыӵеесь со – мукет странаос, ӧз вера. Мон озьы но валало, кожаз, лэся. Бен мон солэсь кытчы вуттыны турттэмзэ но, ма витемзэ но кемалась анлай ни – соин Жан-Люк Мороез верай.
– Вот, вот, вот, – куанӥз воргорон.

Отӥяз со монэ воксё какалмытӥз: малы Моро одно ик монэн тодматскыны тыршиз, мар сярысь юалляськылӥз, со монэн тодматскыны мылкыд каремысь мон ӧй кушектӥськы-а но мукет со выллем.
Кызьы вал, озьы ик верай, номырзэ ватытэк но, будэтъятэк но.

Капитан мыным Жан-Люкен кусып тупатыны дэмлаз. Мон тупато, шуи. Кин тодэ, оло лэзьысал на мон гожтэт Моролы, оло ӧй, лэзьысал ке, со мыным пумитам гожтысал на-а, ӧй ни-а. Нош югдур отын ик чутрак берыктӥськиз. ГБ-ысь адямилэн кичӧлтэмезъя. Капитан мынам Жан-Люклы выльысь гожъяло шуыса кыл сётэменым гинэ ӧз буйга – мыным ГБ органъёсын огкылысь ужаны ӵектӥз. Соиз ласянь но со азьло ик кинэн ке кенешем-а, ачиз гинэ кортэз ӟырдам дыръяз дуроно кариськиз-а, ӧйтӧд. Мон нырысь «уг, уг» гинэ шуылӥ. Нош капитан весь аслэсьтыз силиз. Соку мыным чурытгес вазьытэк ӧйлась:

– Кылзэлэ ай, капитан эш, кызьы тӥляд ымды пыре Москваысь университетэз алигес йылпумъям муртлы сыӵе ӵектон сётыны?!

– Ма, милемын ӧжыт-а ужало университетъёсыз быдтылэм адямиос? – абдраз воргорон.
Мар карыны чылкак тодытэк ни, мон улляса жадем пӧйшур музэн котырак утчалляськи. Ӵош ужась эшъёсы пӧлысь таки огез но ӧз вуы на. Юромо тупатэм сямен, пырись но ӧз луы. Эсьма, телефон но ӧз жингырты.

– Али ик ӧд ке кошкелэ, мон быдэс этажысь калыклы кесяськыны кутско, – кызьы потӥзы со кылъёсы, ачим но ӧй вала, нош сыӵеосыз потӥзы бере, соос сьӧразы мукетъёссэ но кыскизы. – Ми тӥледыз тубатэтӥ кужмысь васькытомы!

Соку капитан но ма вераны ӟудыса сылӥз но шуиз:

– Нош ми тӥлесьтыд вань карьерадэс сӧромы!

– Сӧрелэ! – кеськи мон.

– Ми тӥлесьтыд улондэс быдтомы!

– Быдтэлэ!..

Мышказ учкылыса-учкылыса, капитан кабинетысь потӥз ик: мон сьӧраз уйисько шуыса ӧз кӧбера-а, мар-а. Мынам тусы сыӵе вал, лэся.

Ӵош ужась эшъёсы со нуналэ редакцие ӧз лёгаськелэ ни.

Эшшо кӧня ке ар ортчыса, Жан-Люк мыным гожтэт ыстӥз на – табереяз Парижын потӥсь «Финн-угор этюдъёс» журналэ печатлам статьязэ; улэм-вылэмез сярысь нимысьтыз ивортымтэ ни, статьяез вылэ гинэ вить-куать кыл гожтэм.

Лэзи на-а мон солы гожтэт, ӧй-а, уг тодӥськы ни.

Моролэн статьяезлэсь пуштроссэ мыным сокугес ик француз кылэз йӧндырись эше Феликс Симаков мадиз – ми соин одӥг редакциын ужамы. Собере, мынам куремея, Феликс сое удмурт кылэ берыктӥз но, ми сое «Советской Удмуртия» газетэ сётӥмы. Отын со потӥз.

Таяз учыре ГБ-ос мон азе ӧз возьматъяськелэ. Ӧйтӧд, мар каризы ини соос асьсэ ласянь, но ӝамдэ улыса, Жан-Люклэн статьяез борды асьме критикъёс но тодосчиос кырмиськизы – куке-соку сое адӟылэмъёсыз но, адӟылымтэосыз но. Моролэн ужез соослы уно аръёс ӵоже йырйыны тырмиз: со, пе, сыӵе-таӵе адями, буржуазной учёной, антисоветчик, эшшо ке ведь удмурт литератураез иса, албасты, асьме чылкыт литературамы шоры буржуазной синъёсыныз учке.

Со статья куд-ог учёнойёсмылы диссертациоссэс но утьыны ӧз юртты-а, мар-а: котьма ке но, эскероно наука му удыссэс паськытатӥз ук, тужгес ик москваос азьын – уть ай, таос французъёслэсь но котырзэс мисько ук. Вал на ваньмызлэн солэн эшшо одӥг палыз: французъёс удмурт литература борды басьтӥськизы бере, иське, со литературалэн маиз но соиз вань.

Огез но Жан-Люк Моролы, Западэз удмурт литератураен тодматэмез понна тау карем гинэ ӧвӧл, кыӵе ке музон ӟеч кыл но ӧз шедьты. Солэн кызьы-малы асьме литература борды кутскемез, статьязэ кытысь-кызьы шедьтэмзэ но верась-марась ӧз луы – кожалод, асьме учёнойёс асьсэос Сорбонналэн журналъёсаз но бугыръяськизы, берыктӥзы-лыдӟизы но. Утёд ке, солэн оригиналэз весь мынам архивам кылле – эсьма, татчыозь кураськись ӧй вал на. Асьме учёнойёс бӧрысь ке но «Финн-угор этюдъёс» француз журналын бугыръяськизы шуыса уг малпаськы.

Жан-Люк Моролэн статьяез удмурт литературалы сӥземъёсыз пӧлысь Западын нырысетӥез луиз. Собере ини сыӵеос Америкаын но, мукет азьёсын но потаны кутскизы.
Со, Сорбоннаысь профессор, трос пол вуылӥз финн-угор ужпумъёсыз эскеронъя конгрессъёсы. Ӧйтӧд, ма сярысь вераськылӥз асьме учёнойёсынымы (куд-огеныз бератаз тодматскиз), нош мыным огпол гинэ но салам ӧз вера: оло маке сярысь шӧдӥськиз, оло мыным кӧтсэ ӝож кариз, оло асьмелэнъёс вераса вылысь но ӧз вералэ.

Жан-Люклэсь ивор мыным 1991-тӥ арын, удмуртъёслэн быдӟым конешсы дыръя, солэн дышетэм нылыз Ева Тулуз вуттӥз ини: Ева удмурт кылэз дышетон, литератураез но культураез эскерон борды басьтӥськем. Нош 1995-тӥ арын профессор мыным эшшо одӥг ивор (кузьымен валче) лэзем.
Париже Удмурт университетысь дышетӥсь Наталья Петровна Долгина ветлэм но соин пумиськылэм. Француз сямен вераськем-вераськем беразы огпол Жан-Люк шуак ӟуч сямен юам: «Тӥ Петя Черновез тодӥськоды-а?» — «Уг», – шуэм Наталья Петровна. Озьы но Моро мыным кылбур книгазэ ыстэм.
Моролэсь сизьым-тямыс кылбуръёссэ Василий Ванюшев (Долгиналэн юрттэмезъя) удмурт кылэ берыктӥз но, «Кенеш» журнал соосыз печатлаз... 

Асьмелэнъёс пӧлысь мон уно аръёс ӵоже кусып вози Андрей Болдыревен. Со кусыпмы эше секыт висьыса кулэмен сэрен гинэ уриз. Андрей берпуметӥ нуналозяз Ростовысь газетын ужаз.
Алексей Быстровен ми туннэ ке но ог-огмылы кытӥ-отӥ гожтэтъёс но гожъялляськомы, телефонэн но жингыръялляськомы, мон Москвае вуылыку, пумиськылӥськомы но. Университет бере со кема улӥз но ужаз Краснодарын, нош али тӥни Москваын.

...Корка пырыса ик, мон ӝӧк пуме дипломме понӥ. Нэнэен атай доре тупазы. Соос сяна, мукет семьяос ӧй вал. Висъет ӧс дорын сылӥсь нэнэй номыр ӧз вазьы; интыысьтыз но ӧз вырӟы. Атай, котьку сямен, мыным кизэ сётӥз но нэнэйлы шуиз: «Маке-со ӝӧк вылэ утчаськод-а, мар-а, козяйка».
Озьы ик номыр вазьылытэк, нэнэй висъет сьӧры кошкиз но кематэк отысь ӧз поты. Чидатэк, мон висъет сьӧры мынӥ. Нырысь син шорам йӧтӥз солэн губыртӥськыны сётӥськем тыбырыз, собере – мыкыртэм йырыз но кышет пумыныз синзэ ӵушылӥсь киыз. Мон сое мышласянь ӟыгыртӥ: «Я, нэнэй, табере вань секытэз ортчиз».

Тодысал ке мон соку азьланьзэ...

Басьтэмын Пётр Чернов «Егит дыр кырӟанъёс» книгаысь, 1998 ар