Трофим Архипов. Анай
Рассказы

Трофим Архипов. Анай

32 {num}

Рассказ

Станцилэн дежурноез вокзал азьысь звонок борды кык пол шуккем бере, паровоз, омырез ик зуркатыса, кема кеськиз но быдэсак тӧдьы бусэн ӵоктаськиз. Поезд вырӟиз. Вагонлы быдэ укноосысь но тубатъёсысь киосын но тӧдьы кышетъёсын шоналлямъёс адско. Матвей Чайников анайзэ эшшо одӥг пол чупаз но кошкись поездлэн тубатаз ӝог гинэ кечырскиз.

Берпумез вагон син азьысьтыз ышытозь, Пелагея Михайловна пиезлы шоназ. Собере нюромем синъёссэ кышет пумыныз ӵушылӥз но, интыысьтыз вырӟылытэк, шунды пуксён пала учкыса сылӥз. Но отысь, паровозлэн ӝуштэмез сяна, номыр ӧз кылӥськы ни. Озьы Пелагея Михайловна бадӟымзэ вордэм пизэ фронтэ келяз.

Сюрес вылэ потыкузы, пиезлы со уно шуныт кылъёс вераны малпа вал. Ваньмыз соос олокытчы ышизы. Пушкыз тырыса интыяз кынмем кадь огшап сылэмез бере поезд вырӟон азьын гинэ со вераз:

– Тон гинэ огнад уд мынӥськы, пие, – шудэд ке вань, тазьы ик вордскем юртад берытскод. Трос индылыны кыл уг шедьтӥськы, верало пересьёслэсь верамзэс гинэ: кышкам луд кеч ачиз пыӵал шоры, пе, лыктэ.

Шонер сюрес вылысь кожид ке, анайдэ алдад ке, уд шедьты сюлмысьтым шуныт инты.

Со вал 1941 арын. Сьӧсь тушмон лыктэ асьме музъем вылтӥ. Позыръяськыса пограло сюрес дуръёсысь бабылес кызьпуос, ӝуало син сузёнтэм паськыт музъем вылысь ӵуж-ӵуж кисьмам, удалтэм юос. Самолётъёсысь куям бомбаос сьӧд сюен ӵош омыре пазьго вож-вож сад пушкысь коркаосты, куашкатъяло городъёсысь бад-ӟымесь из юртъёсты.

Фашистъёс ялан пыдло но пыдло пыро асьме шаере. Вуизы туж секытэсь но кышкытэсь нуналъёс. Тушмон вуиз Москва доры.
Тӥни соку Родинамы фронтэ ӧтиз Пелагея Михайловналэсь кыкетӥ пизэ – Капитонэз.

Тросэз анайёс, туж тросэз – сюосын, сюрсъёсын анайёс – яратоно пиоссэс келязы вордскем шаермес но музъеммес утьыны, сьӧсь тушмонэз жугыны. Котькудӥз вераз ас пиезлы ӟырдыт кылъёс: кудӥз бӧрдыса вераз, кудӥз бӧрдытэк. Но ваньзылэн соослэн сюлэмзы одӥг малпанэн тырмемын вал: «Берытскы, пие, анай юртад, одно ик берытскы, но берытскы вормыса».
Нырысь толэзьёсы Пелагея Михайловналы арнялы быдэ сямен иворъёс вуылӥзы. Та куинь сэрего пичиесь гожтэтъёсты со куалекъясь киосын басьтылӥз но пиезлэн пиезлы Генялы лыдӟыны сётъяз. Котькудзэ соосты одӥг пол гинэ ӧвӧл, трос пол выльысь но выльысь лыдӟытъяз. Солэн соку син азяз пуксё вал пиосызлэн туссы, пель сьӧраз кылӥсько соослэн асьсэлэн верам куараоссы: «Чида, анай, ми бертом, юнматскы, анай, ми вормом!»

Вуонояз аре бадӟым Волга шур дурын но ӝужыт Кавказ гурезьёс дорын лек нюръяськонъёс дыръя Пелагея Михайловна келяз бадӟым пиезлэсь пизэ Олексанэз. Пелагея Михайловналэн кадесь ик трос сюрс пиос мыно, городъёсмес но гуртъёсмес мозмытъяса.

Пиосызлэн тазьы быркыт кужымен жугиськемзы сярысь тодыса, анай сюлэм шумпотэ. Со дыре ик пересь анай аслыз ачиз шуэ: «Мынам пыдъёсы ветло на, мынам киосы ужало на. Юртто мон пиосылы татын, уж дурын». Озьы ик лэсьтӥз Пелагея Михайловна. Фронтэ кык пиоссэ но пиезлэсь пизэ келямез бере кенэныз ӵош уен-нуналэн тыршизы.

Кенэз пуксиз трактор вылэ. Нош ачиз Пелагея Михайловна соослы сиён дася. Ӵукна шунды ӝужамлэсь азьло ик сайкатэ: «Султэ, гыдыкъёсы, куазь сактӥз ини». Пӧсь сиёнэн пумита нуназе, утялтэ ӝытазе. Бусы ужъёс йылпумъяськем бере Пелагея Михайловна черсэ, куиське, керттӥське. Солэн черсэм, куэм но вурем мешоказ колхоз ю тыре, солэн керттэм пӧзьёсыз но чулкиосыз фронтовикъёслы мыно, кенэныз ӵош ужаса поттэм тямыс сюрс манет коньдонзэс Оборона фондэ сётӥзы.
Озьы юрттэ вань калык фронтлы, наступать карись армилы. Озьы юртто пересез но, пичиез но бадӟым нюръяськонмылы.
...Огшап вераськеммы бере Пелагея Михайловна, мон шоры учкыса, юа:

– Мон сярысь мазэ бен гожтод, мазэ вералод? Мон кадь адямиос котырын ӧжыт шат?

Зэм, тон кадь анайёс, Пелагея Михайловна, асьмелэн туж трос. Соос туж устоесь нылпиос будэтӥзы. Соослэн сюлмазы ас шаерзэс яратон мылкыд пыӵатӥзы. Соин ик тӥни асьме калык, асьме музъем вормонтэм. Соин ик тӥ сярысь калык сюлмысь ӟеч кыл вера, кырӟанъёс кылдытъя. Собере памятникъёс пуктылоз.

Анай! Котькудӥзлэн асьме пӧлысь, вераськыны дышыкуз, нырысь кылыз вал «анай». Со кыл бордысен вераськыны кутским. Вань улытозямы, анай кыллэсь номыре дуноез ӧй вал но ӧвӧл. Толалтэ кузь уйёсы, калык изьыку, укноетӥ тыр толэзь пиштыку, тон, анай, кырӟаса ветталляд вордэм пидэ. Веттад но ас поннад кырӟад, шудо улон сӥзьыса. Гужем вакчи уйёсы, ужысь жадьыса бертэм берад но, семьяосыд изьыку, тон огнад кӧкы дурын нырулыса, нуныдэ веттаса пукылӥд. Пыд йылазы султэмзы бере, нылпиосыд тэтэ карыку, киостӥзы тон валтӥд. Нош ас кожазы ветлэмзэс адӟыса, шумпотыса бам вылад синкылиосыд потылӥзы.

Ӧжытак быдэ вуэмзы бере быдэс нунал луоын, сюйын шудыса, саптаськыса бертыло вал тынад нылпиосыд. Тон нош ик соосты сузяськод, утялтӥськод. Тышкаськиськод ке но, гажаса тышкаськиськод, йӧттӥськод ке но, умойлы, пичиысен ик визьлы дышетыса йӧттӥськод вал. Нош праздник нуналъёсы тон нылпиосыд вылэ чылкыт миськем дӥсь дӥсяськод, учкиськод. Эскериськод вал котькуд бирдызэ, маялляськод но вешаса келяськод ураме, возь вылэ, шур дуре.

Анай кадь нокин уг гажа, нокин сокем юн мусо уг кары ас вордэм нылпизэ. Но куке вордскем музъеммылы кышкытлык кылдэ, куке вордскем шаермы вылэ тушмон ӝутске, соку нырысь ик анай вазиське аслаз вордэм пиезлы: «Мын, пие, кияд пыӵал кут!»

Кузь сюрес вылэ потон азьын анай уйзэ но умме усьыны уг ни быгаты. Семьяез изьыку дася пиезлы дӥсь, пӧзь, пыдкутчан. Ӵукна вазь ик гурзэ эстэ но пыжиське. Изись пиез доры каллен гинэ мыныса, синъёссэ вошъятэк, со шоры кема учкыса сылэ. Учке но пайме – ку со такем бадӟым будыны вуиз! Солэн син азяз пуксе пичи гинэ тӧдьы йырсиё, луоын погылляськись пиез, тодаз лыктэ кӧкыын веттамез. Нош табере? Табере воргорон. Тодаз вае но шумпотэ анай. Кызьы нош сотэк! Тылобурдо гинэ но, пиоссэ карысьтыз поттэ ке, шумпотыса учке соослэн ас кожазы эркын лобамзы шоры. Нош адями азьын, асьме музъем вылын быдэ вуэм адями азьын, ма пасьта сюрес, ма быдӟа шуд! Ӝужыт гурезь йылын быдэ вуэм быркыт кадь, со эркын вӧлъя бурдъёссэ, шунтэ сое улонлэн либыт шундыез. Таӵе шунды, асьме советской музъем вылын кадь, ноку нокинэ ӧз шунтылы на вал. Асьмелэсь тӥни та шудмес, шудо улонмес таланы медэ вал фашист. Турттэ вал со асьмелэн ваньмылэн сильсьӧрамы пуксьыны но пудоез сямен сюлоен, бодыен улляны. Бен кудӥз, кыӵе анай соглаш луоз ас вордэм нылпизэ зӥбет улэ сётыны! Ӧвӧл сыӵе анайёс асьме Вордскем шаерамы.

Макем со уг ӵыды люкиськыны пиосыныз, макем потэ соосты ас дораз воземез. Но Родина понна, Вордскем шаер понна, азьпалан шудо улон понна со ваньзэ сётыны дась. Сыӵе асьмелэн анайёсмы.

Мӧзмеменыз но сюлмаськеменыз анай умме усьыны уг быгаты, уката ик секыт луэ, гожтэт уг ке вуы. Тани Пелагея Михайловна доры но почтальон уно толэзьёс ӵоже ини тодмо куинь сэрего гожтэтъёс уг пыртылы ни. Али но со, почтальонэз ке адӟе, оло, пыроз шуыса, укноетӥз учке. Со малы ке но ялан уг кожы, укно ултӥ ик кошке.

– Тани та йырсиосме учкы, пие, – возьматэ со, кышетсэ пертчыса. – Али со берло аръёсы таӵе луэмын. Тодам вайисько егит дырме, Матвейме кӧкыын нуллон дырез. Со вал турнан дыръя. Кужым трос, турын ӟеч, кусо ву кадь. Уж дурын озьы бадьпу куаклэн салкымаз кельтэм пиме вунэтӥськем. Шунды вылэ тубем бере ини, кузпалэ тодаз вайиз: «Палаш, пимылэн куараез но уг кылӥськы, кый ӧз вуы меда дораз?»

Куалектыса кусоме куштӥ но бызьыса мынӥ. Пие нош бадьпу куарен шудэ, сое ымаз кыскыны турттэ. Вераны кутскем бере верало ини: али но мынам ӵем тодам лыктылэ кузпалылэн соку верам кылъёсыз: «Малы куаразы уг кылӥськы ни вордэм пиосылэн, сьӧд кый ӧз быдты меда мусоосме?»

Ӵукналы быдэ сямен, куазь ӟардыку ик, Пелагея Михайловна, капка азяз потыса, шур сьӧрысь Можга палась лыктон сюрес вылысь учке. Со тодэ, тушмон вормымтэ на, быдэсак пазьгемын ӧвӧл на. Со тодэ, пиосыз берытскозы ожын вормем бере гинэ. Озьы ке но, анай сюлэм интыяз ӧвӧл, маке но возьма, мӧзме. Соин ик со, тушмонэз ӝоггес вормон понна, ачиз но юрттэ фронтлы. Али но та кузь уйёсы уйшор берозь черсыса пуке. Ӵукна нош ик, вазь султыса, уж борды кутске.
Мусо анай! Родинамес возьманы, лек сьӧд кыез быдтыны ыстӥд тон вордэм пиостэ. Тон ачид но кужымдэ жалятэк ужаськод вормон понна. Дан тыныд, Анай! Азьланьын но тазьы ик тыршом. Тушмонэз музъем вылысьтымы уллямы ке, нош ик эркын шокыштом.

Можга район, 

«Югыт сюрес» колхоз, 1944 ар.