Пётр Чернов. Тулысысен сӥзьылозь (Романысь люкетэз)
Рассказы

Пётр Чернов. Тулысысен сӥзьылозь (Романысь люкетэз)

1450 {num}

Пётр Черновлэн "Тулысысен сӥзьылозь" романысь люкет

Лысо Гурезе вуэмлэсь азьло ог дасо иськемысен гурезез ялтраса улэ ини, сокем со ӝужыт ке но ӧвӧл. Сое шобыртэм нюлэс арлэн котькыӵе вакытаз лызпыр-вож адӟиське: ньылпуос сыӵе возьмато. Нап-вож виштыосыз но вань — пинал пужымо ягъёс.

Гурезьлэн паллян палыз, гурт вадестӥ, меӵак усе, бурпалыз, пумен нялмытаса, ӵошкыт интыен огазеяське.

Асьсэос лысоос, огшап мурт шаертӥ поръяно луо ке, сюрес вылысен гурезь адӟиськыны кутскыса, дораз вуытозязы шорысьтыз синъёссэс уг вошъяло ни, оломар воштӥськемзэ шедьтыны туртто кадь — одно ик автобуслэн азьпалаз кыстӥсько. Ёросооссы соосыз озьы выремысьтызы уг куарето: йылолзы тодымтэ ӧвӧл, палэнысьёс бен ӟуро ик но, лысоос нокыӵе уг карисько: палэнысьёслы ваньмыз дунне уго — гурезь но, шур но, бусыос но.

Павел Игнатьевич но соиз ласянь пӧртэм ӧвӧл. Егит дыръяз берталлякуз — маин гинэ, кызьы гинэ уг бертылы вал, — сюлмыз ялан дыртытэ: чальгес гинэ пинал уй-нуналъёсаз лёгам Лысо Гурезе мед вуоз, собере, ас гуртысеныз ини, анаеныз, атаеныз мед пумиськоз. Берпуметӥ иськемъёс солы секытэн сётӥськылӥзы: лыктыса-лыктыса таки Лысо Гурезь доры вуоно кадь ик ӧз йӧтылы.

Берло аръёсы дор палъёсаз берталлякуз, солэн мылкыдыз сураськылэ. Азьло выллем ик, ӝоггес но вуэмез потэ, со дыре ик — ӝегатскемез но. Сое кӧня ке ар анаез но, атаез но уг пумитало ни, Лысо Гурезьын но, ас гуртаз но ӵыжы-выжыосыз, эшъёсыз, тодмоосыз гинэ но ӧжытгес но ӧжытгес кылё. Озьы ке но вордӥськем палъёсыз кытӥяз сокем бордазы кыскыны кутско — мытэм ужъёссэ куштыса ик, Павел Игнатьевич ог-кык уйлы ке но городысь кӧче.

Али бен со азьло ик кемалы шуыса вырӟиз. Аслыз озьы шуиз. Нош отӥяз кин тодэм — кызьы пӧрмоз, югдур мар возьматоз.

Павел Игнатьевичез Лысо Гурезь палъёсы машинаен мынӥсь эшез нялтас басьтӥз. Со пумысь но азьло ик вераськизы. Вапум воштӥське: егитгес дыръяз, редакциын ужакуз, Павел Игнатьевич нимаз машина кураськыса уг улы вал — мар тупа, соин сюрес вылэ потэ. Уно гинэ иськемъёсыз пыдын но мерталляз. Оломалы, кык-куинь арня пала городысь уг ке пота, интыяз пукыны уг чида ни, сюлмыз сэректыны ӧдъя вал. Огназ йырыныз дыръя но озьы вал, кышнояськыса но, нылпиосыз вордӥськыса но.

Нош табере шуныт луыны ӧдъям карысьтыз шуген ӝутӥське. Арлыдэз вылэгес чӧлтӥськыны турттылэ Павел Игнатьевич. Ма, шуылэ соку ачиз ик, арлыд гинэ ӧвӧл ни со. Арлыд борды уно мукетыз итӥське на…

Быдэс сюресэз куатланыса мынэм мурт, Лысо Гурезьлэн лызо-пурысё-вожо йылыз инвис сьӧрысь ӝужам бере, Павел Игнатьевич чалмытскиз. Эшез юалляськыку но я чик ӧз вазьылы ни, я вазьыса но умойтэм вераны шедьтылӥз. Эшез солы сюрес секыт йӧтӥз, кожаз. Нош озьы ӧй вал. Сюрес карта кадь. Ижысен Лысо Гурезёзь — асфальт. Кемалась лэсьтымтэ маке вылын, отын одӥг тэшкам интыез но ӧвӧл на.

Вало шур сьӧрысен ини Павел Игнатьевич эшез азьын шара тодаз вайиз, кызьы соос куке-соку, сюреслэн оломар даураз ай, отӥ пыдын бертӥзы.

Сизьнер станциын апаез доры сокугес гинэ улыны мынэм пичи пизэ атаез Октябрь праздниклы дораз ваёно кариськем. Музъем тын-тын кынмемын ни вылэм, нош лымы усьымтэ на. Вамышъяны каньыл. Ӝоген сюресчиосыз кыӵе ке машина сутэм ик но, кизэс ӝутыса вылысь но дугдымтэ. Атаеныз пиез шум гинэ потӥллям: ойдо, пе, ярам, коньдонмы быдэс кылёз. Коньдонзы бен кыкназы азьысь дас манет сяна вылымтэ.

Огшап мынӥллям озьы атаеныз пиез. Но пумен пиезлы сюрес кузьгес йӧтыны кутскем. Вылаз ик, кӧтсы но сюманы шӧтам. Нош пырыны инты ӧвӧл — куамын вить иськем ӵоже одӥг гурт но уг шедьы. Нокыӵе машина но сутымтэ ни.

Ӝыт пал, инвис сьӧрысь Лысо Гурезь мычиськем бере, Павел чылкак катьтэммем. Кӧня ке вамыш мынэ но кезьыт музъем вылэ ик зуняк лэзиське, пе. Атаез сюлворемен гинэ мырдэм но кызьы султэ.

Лысо Гурезь соку пияшлы туж кыдёкын йӧтыны кутскем: дораз мыныса-мыныса вылысь, таки матэктыны уг вала.

Пеймытэн ини атаеныз пиез Лысо Гурезе вуиллям. Асьсэ гуртозязы кык иськем сяна вылымтэ ни ке но, столовое пырыса сиськиллям — воксё уралтӥллям уго. Шыръям коньдонзы гуртазы вуымтэ. Ярам, шол, сиськем беразы, Павел доразы кырӟаса вуэм.

Эшез сое серекъяса-серекъяса кылзӥз. Нош Павел Игнатьевич выльысь чалмытскиз. Кӧня пол со ортчылӥз меда ини та сюресэз? Пыдын но, валэн но, тракторен но, машинаен но. Кызьы ке пересь кышномуртэн ӵош Лысо Гурезьысен станциозь мыныны быдэс нунал курадӟизы, нош вуыны ӧз ворме. Пеймыт луыса ини, сюресчизэ кышномурт артысь гуртэ чортӥз но черке кужмысь пыртӥз. Пересез ваньмыз тодмало вылэм. Со, отысь музон кышноос сямен ик, кырныж кадь сьӧд дӥсяськемын. Соиз Павеллэн син шораз бӧрысь гинэ йӧтӥз ини. Кӧлыны выдон азязы пияшез пересь вӧсяськон пӧлазы пыртӥз но куинь манетэн сюсьтыл басьтыса пуктыны косӥз. Амалыз ӧз луы Павеллэн — коньдонзэ жаляса ик, возьдаськыса ик, сюсьтыл пуктӥз. Пересь, ма, шуиз, кӧлон инты понна, пе, оло, солэсь но тросгес тырысалыд, эсьма, утчаськыса-кураськыса ӧд курадӟы.

Собере ваньзы, ӝужыт сэндрае тубыса, ог-огзы вӧзын кӧлӥзы. Сэндраысен вӧлдэтозь но инты кылиз гинэ на, коть пыд йылад ветлы. Бен огез но озьы ӧз ветлы ини — ньыльпыдъяськыса гинэ, вераськыны но шыпыртыса сяна ӧз вераськелэ.

Улӥын, сэрегысь оброс дурын, уйбыт ӝуазы сюсьтылъёс. Пересь кышноос, сэндраысь вожмин васькалляса, ӝуамъёссэ быдэсъёсын вошъяллязы.

Ӵуказеяз ӵукна, вазь ик, Павел огназ кошкиз. Азьло но, берло но черкын кӧлэмез сярысь нокинлы ӧз вера. Тодысалзы ке, сое, оло, комсомолысь но уллясалзы, кышкаса малпаз пияш.

Али но ӧз потта. Табере бен кышкамысьтыз ӧз ини — малы ке мылкыдыз ӧз сузьы. Ма, Лысо Гурезь но матэктӥз, машина азьысь инбамез возъяса.

Бератаз но пумтэм мерталляз со сюресэз Павел Тугаев. Сӥзьыл пал эшъёсыныз вожмаськыса куриськылӥзы ю келяны. Школаез йылпумъякуз, колхозазы машина уськытӥзы вал ини. Шофёре Тугаев выжыез ик пуктӥзы но, Павелэз со сьӧраз мукетъёслэсь ӵемгес басьтылӥз. Кабиналы мышланьтӥськыса тыр мешокъёс вылын пуконъяз, пияш нуналаз кык пол но, куинь пол но (кызьы удалтылӥз) чаклалляз Лысо Гурезьлэсь син азяз пичияллямзэ но инвис сьӧры ышылэмзэ, нош бертыкуз, кабина борды кутӥськыса сылонъяз,— бадӟымаллямзэ но бератаз ӝыны инбамез возъяллямзэ.

Гуртысьтыз пыраклы шуыса кошкыкуз но туж учкемез потэ вал но, брезентэн шобыртэм кузовысь йырзэ мычыны ӧз быгаты.

Лысо Гурезь гурт шорысен сюресчиос люкиськизы. Эшез Павел Игнатьевичлы ӧжытак вить шуэ вал, ачим ик, пе, мынон интыяд келяса кельто, нош со лачмытак но мыр-мыр пыкиськиз: Лысо палъёсын, пе, мон уг йыромы, мыным луыса эн ӝегатӥськы.

Солэн та нуналзэ но азьло ик кызьы ортчытыны малпамын вал ини: вуэм бераз ик Лысо Гурезе тубано, собере выльысь гуртэ васьконо.

Мынон-ветлон сюресъёс вакыт ортчемъя вошъясько ке но, Лысо Гурезь котырысьёссэ Павел Игнатьевич уйшор уйин но шедьтысал. Со нюлэскысь пичи сюрестӥ гинэ шайвылэ сюроно кариськиз.

Нюлэскын интыен-интыен лымы возиське на.

Вазен Лысо Гурезь бамалын таӵе вазь тулысэн тачак кечсинъёс ӝужало вал, нош али Павел Игнатьевич, утчаськыса-утчаськыса но, кӧнязэ ке сяна ӧз шедьты. Озьы но, ишкыны жаль йӧтэменызы, со ньылпу лыс тӥяз но, сюресэз ыштыса, пырак писпуос пӧлтӥ выллане ӝутӥськиз.

Шайвыл солы шимес потӥз. Пичи дыръяз сыӵе уг йӧты вал. Тулыс но сӥзьыл кисьтон нуналъёсы соос эшъёсыныз, школаысь бертон ласянь, одно ик шайвылэ кожыло вал. Анайёссы со нуналэ, кошкем анай-атайёссэс, картъёссэс буре ваён понна, шайвылэ ма но со сиён-юон нуллылӥзы уго. Нуналэн-нуналэн сюмаса ветлӥсь пиналъёслы ӧвӧлзэ но вань карыса пыжылӥськемъёс укыр иназ мынылӥзы. Буре ваён но мар сярысь йыразы ик соослэн ӧй вал. Табере бен, со сярысь понназ гинэ тодаз вайыса, Павел Игнатьевич юзыр-кезьыр луиз но, ортчемезлэсь уд пегӟы ни, мар вал — со вал.

Шайвыл азьвылгес но мӧзмыт, куштӥськем выллем потылэ вал ини но, али укыргес аналтэм кадь адӟиськиз.

Шайлы бен вашкалаос шулдыр инты бырйиллям вылэм. Котырак — ньылпуэн суро кыз сик. Соосыз олокуд дырысен исась ӧвӧл. Пӧлазы палэзьпуос, льӧмпуос, шупуос тэрытӥськыса будо. Соос адями киын мерттылэмын. Гужем но, тол но отын тылобурдоос уло.

Нош шайгуослэн ямзы ӧвӧл. Куд-огез котыртэмын, нош уноез котыртэтъёс вужмыса куашкамын ни. Тросэз гуос чик котыръямтэ, ветлӥсь калык соослэн вылтӥзы ик лёгаськем.

Кема утчаз Павел Игнатьевич атаезлэсь шайгузэ. Соиз кыз улын но вал кадь, таиз но. Кемалась ни атайзэ чакламез. Бен, ар пала ини.

Ассэ тышкаськыса, Павел Игнатьевич дугдӥз но огшап утчалляськиз. Йырзэ урдыса, писпу йылъёсыз сак учкемез бере гинэ, со атаезлэн пыд азяз будӥсь кызэз тодмаз. Кызлэн тапалаз гинэ сылэ вылэм, нош атаезлэн шайгуэз — мукет палаз.

Корт кирос копак сынэм ке но, вылысьтыз кораса гожтэмзэ лыдӟыны каньылэн луэ. Утялтымтэ гу вылэ но котыраз эмезьпуос, пушнер, йӧны аляллям: мимала будосъёслэн куасьмем модосъёссы чоняк сыло; выжыысьтызы вож куаръёс мычиськиллям.

Эшезлэн машинаеныз лыктоно вылэм, ӧпкельыса шуиз понназ Павел Игнатьевич, шофёрезлэн ма но со тӥрлыкез вал, дыр. Огшоры гинэ малпаз, музон, пыдлось, малпанэз медаз лӧпты шуыса. Нош соиз кыре потӥз ни.

Кӧня ке ар ӵоже ини Павел Игнатьевич вакытэн-вакытэн, кытӥяз, чик витьымтэ шорысь, кайгырыны кутске: малы люкиз со анаеныз атайзэ? Соос улонысь кошкем бере ини. Анаез Ижын кылле: берло аръёссэ со пиез вӧзын улӥз.

Кулэмезлэсь азьло ик атаез Сизьнер шае куриське вал — Павел Игнатьевичлэсь но, Сизьнер станцие каръяськем нылызлэсь но: отын, пе, шайзы чебер, шайгу вылтӥ шайгу уг лэзё, нош Лысо Гурезьын озьы кошке. Сопал дуннелэсь, пе, укыргес но соизлэсь кепырасько — вылам нокинэ медаз понэ вал.

Нош пыриз тӥни Лысо Гурезе.

Анайзы номыр алыса ик ӧз вутты. Ялан учкыны мед быгато шуыса, Павел Игнатьевич сое городэ ватӥз. Эскерыны бен, зэмзэ но, ӵем ветлэ, шайвылаз мраморлэсь памятник но йӧндыриз. Нош атайзылэн, доразы ватӥськыса вылысь но, нокыӵе утялтытэк кылле.

Анаез куазь шӧтэм сарпаськыку быриз. Соин но нокытчы нуллӥськон йӧныз ӧйлась.

Атаез городэз уг яраты вал. Кытӥ-отӥ пизэ чакланы ветлыкуз но, отын улыны кема ӧз чидалля. Нош анаез одӥг гинэ улэп кылем пиезлы вӧсяськыны ик дась вал кадь, кытчы гинэ мед мыноз — артэ мед луоз. Соин пересьмон уй-нуналаз картэзлэсь бӧлиськыса выллем ик городэ, пиез вӧзы, кариськиз. Кыкназы но пересьёс туж шумпото вал пизы дышетӥсе дышетскемысь: дышетӥсьлэсь бадӟым мурт, пе, дунне вылын ӧвӧл — врач гинэ шат, дышетӥсез но врачез гинэ улытозязы рос-прос адӟылӥзы уго. Нош Павел Игнатьевич школаысь кошкиз, укыр кема выриз ке но — бератаз школаен кусыпсэ уретыса ик кошкиз. Анаез но, атаез но созэ адӟыса ӧз вуттэ ни. Ярам коть, ӧз вуттэ, буйгатэ ассэ Павел Игнатьевич, ӧйтӧд, мар шуысалзы ай озьы дауртэмысьтыз, оло, пимы ӧз удалты шуы- са малпанэнызы улонысь кошкысалзы. Лушкем малпасалзы, вераны со сярысь нокинлы ӧй верасалзы — пизылы но. Атаезлэн бен дӥсьтонэз тырмысал ик шат.

Ӧйтӧд, ӧйтӧд, мар шуысалзы ни соос Павел Игнатьевичлэсь туннэ улэм-вылэмзэ. Анаез бен гожъяськон борды басьтӥськемзэ тодӥз на ай, нош атаез ӧз ни.

Йыр вадьсысьтыз кӧс вай борды кырмиськыса, Павел Игнатьевич весь кыз выжыын сылӥз — оло озьы капчигес йӧтӥз, оло аслэсьтыз мар дауртэмзэ ачиз ӧз анла.

Матысь шупу йылэ ӝакы пуксиз но, чик кӧбератэк, я ог синмыныз, я мукетыныз адями шоры уӵертылӥз. Адями нокыӵе ӧз кариськы, сое сактӥз но кадь, ӧз но. Ӝакы шуак юр-яр поттыны ӧдъяз. Сыӵезэ гинэ витьыса улэм музэн, пумитаз коӵоос вуӵектӥзы. Вань шайвыл но, нюлэс но куаш вазьыны кутскиз. Ас ужзэ лэсьтэмезлы шумпотыса, лэся, ӝакы кызъёс пӧлы лобӟиз. Соку но Павел Игнатьевнч ӧз вырӟы. Нош пельдораз ик, маке ыбем кадь тарс! кариз но, куалектыса быдэс мугорыныз сэзъялтӥськиз. Учке но — кияз чигем кӧс улвай пум.

Павел Игнатьевич озёлысьгес турын пушкысь пуклёкез синйылтӥз но вайыса со вылэ пуксиз.

Уллане васькем шундылэн шунтӥсьтэм тылсиосыз ымныраз ик мертчиськизы. Чиданы калыз ӧз луы — урдэслань берыктӥськытэк ӧйлась.

Шайвылэ пыремез бере бадӟым сюрес палась куараос уг шуккисько вал кадь, яке ӧз кылы-а, нош табере вуыны кутскизы. Шунды пуксён азьын куараос кыдёке шуккисько, соин, дыр, шуиз Павел Игнатьевич. Машинаос бамалэ тубыкузы ӝушто, васькыкузы кузов бордъёссы шалтыр! вазё.

Шайвыллэн шыпытэз сӧриськиз.

Витьымтэ шорысь шай вӧзтӥ кошкись кужен сюрес вылысь, шуныт гужем ӝытазе ярдуре тулкым сямен, Павел Игнатьевич пала кышномуртлэн кырӟамез пальккиськиз.

Васькисько, васькисько
Вало шур кузя,
Чебер чагыр сяськаез
Ой но утчаса…

Мӧзмонэз-а сокем вылэм сюлэмаз, ас куараезлэн кӧлыны дасяськись нюлэскытӥ тулкымъяськыса вӧлмемез-а сое эшшо но бугыртӥз — кышномурт чигиськыса ик кырӟаны ылаз.

Нюлэскын эшшо но мӧзмыт луиз. Тылобурдоос изьыны-а интыяськизы, адями кырӟан азьын-а чалмизы — куаразэс ӧз сётъялэ ни. Бадӟым сюрес вылысь машинаос но быризы. Кышномуртлэн куараез гинэ умме усьыны курадӟись инкуазез сак возиз на кадь.

Павел Игнатьевич пукыны ӧз чида ни. Зубектэм кукъёссэ небӟытыса, огшап сылӥз но, «ӟеч лу, атай, выльысь лыктытозям ӟеч кӧл» шуыса, нюлэс дуре кыстӥськиз.

Городысь потыкуз но, лыктыкуз но, Лысо Гурезе тубыкуз гинэ но ай Павел Игнатьевич ӝамдэлы ке но ас гуртаз пыраны малпа вал, собере ини Лысо Гурезе мыныны. Нош али со малпанэз тӧлӟыны кутскиз. Олокин доры пырод ай вордӥськем гуртад. Ма, ӵужапаеныз бӧлякъёсыз капчи кариськысалзы, кужмысь кӧлтыны но кельтысалзы; мӧйыос но, ас ёзъёсыз но ӧз вунэтэ на, куд-огез соин мултэс данъясько но, созэ Павел Игнатьевич тодэ, озьы ке но гуртаз кожатэк кошконо кариськиз. Мынӥз ке, одно ик юртсы интые ветлоз. Нош отын куасьмем, тӥяськем улмопуос гинэ вань на. Кыӵе ялтраса сылэ вал корказы! Атайзы кулон азяз выльдӥз вал сое. Ӝутыкуз но, бӧрысь но азьланьзэ шӧдыса кадь шуылӥз: «Мон ке кулӥ, юрт быроз». Озьы ик луиз. Атайзы кулэм бере, ар ортчыса ик, юртсы вузаськиз: Павел Игнатьевичлэн ӵошен гинэ кылем бызьымтэ апаеныз сузэрез сое кутыны ӧз быгатэ ни; яке кутэмзы-а ӧз поты — бадӟым апайзы вӧзы станцие сётӥськизы.

«Мыдъят ветло ини, — кутӥз ассэ Павел Игнатьевич. — Кыдёкын уг улы ук. Кематэк но уг кошкы».

Со кыре потыку, шунды шоры пырак учкыны луэ вал ини. Павел Игнатьевич тубем интыетӥз ик васькиз. Лысо Гурезь ураме пырытозяз, шунды шоры мынӥз.

Гуртлэн тапал пумаз из юртъёс ӧвӧл на. Куке-соку Тугаев отысь вань юртъёсыз тодэ вал, табере огзэ гинэ на — вашкала ӵыжы-выжыезлэсь, гуртоезлэсь, Савелий Никифоровичлэсь, яке, гурт сямен, Миквор Савалэсь. Юртсэ со, Павел Игнатьевич школае ветлыку ай, вуж макеез сэзъяса сазназ вал. Выльдон-мар сярысь кынарыз вань дыръя но чик кылпум уг потта вал, нош пенсие кошкыса, чын вылез борды кутскиз, ачиз кор кораз, пул пилиз. Ар куспын юрт пуктӥз ик, нош пырыны кыкетӥ-а, куинетӥ-а арзэ ини шугадӟе. Ачиз весь вужаз улэ.

Павел Игнатьевич капкаез донгиз гинэ но, кунян быдӟа пуны, куара сётытэк, пыд выжыяз ик вуыса, жильы лэзьымтэен, зуняк пограз. Собере оломар йылкытӥ бер кукъёсыз йылэ султӥз но кекам вылысьтыз но тэтэ кариз. Кӧш шокамез Павел Игнатьевичлэн ымныраз шуккиськиз. Со соку гинэ чигнаны валаз но капкаез урам ласянь пытсаз, огшап ма карыны ӟудыса сылӥз но, Савелий Никифоровичлэсь куаразэ тодмаз:

— Та измертанэн! Кызьы тон жильыдэ кузятӥд? Ойдо, Дамка, ойдо.

Вордосэныз либыт бӧтьы-ртыса, кузё солэсь жильызэ вакчиятыса думиз, лэся. Собере гинэ капказэ усьтӥз.

— А, Павел Игнатьевич!

Со бур кизэ мычиз, паллянэныз капкаез берен пытсаськемезлэсь кутыса возиз. Кӧс ке но, киыз кезьыт вылэм. Савелий Никифорович гурт куспын нуллон саестэм шубаен, колошаё гын сапеген, ымнырыз пичи но восьтэт, алигес ӝужам тушез кисыриоссэ ватэ, пурысь синъёсыз пичиесь но сэзесь. Солэсь арлыдзэ тодымтэ мурт кызьы шуыны уз шедьты. Нош Павел Игнатьевич тодэ — куатьтонысь кемалась потэмын ни.

Куно ялан вамыштыны дӥсьтытэк сылӥз: пунылэсь шуак луэмез ӧз ортчы на. Кузё мурт сое, суйтӥз кыскыса, гидкуазе валтоно луиз.

Корказь дорозь куинь-ньыль вамыш сяна ӧвӧл — Павел Игнатьевич отчыозь, та шуытозь, вуттӥськиз но суйзэ мозмытӥз. Соку ик аслыз кепыр йӧтӥз: воксё пичи мурт кадь дауртэ ук. Солэсь мылкыдзэ шӧдыса-а, куноез сыӵе пумитамысьтыз-а, Савелий Никифорович пыриськыса шуиз:

— Озьы уго, нокинэ куртчемез ӧвӧл ке но, оломалы шӧмало Дамкалэсь. Уз но куртчы. Пӧйшурась пуны ук со.

— Пунылэсь визьзэ озьы гинэ валасалыд ке,— ялан кепыраса вазиз Павел Игнатьевич.

— Соиз но, шол, шонер… Ма, бусыослэсь мӧзме, дыр: туэ тол вылтӥ огпол гинэ кыре потамы. Думет йылын века тани. Соин но лекъяське, луоз… Бон мон ачим но думет йылын — думетэ уг гинэ адӟиськы…

Корказь выжыысен Савелий Никифорович сапегзэ куштӥз, ыж гон пыдвыл коже гинэ кельтӥськиз. Павел Игнатьевич но, катазэ кылёно-а, ӧвӧл-а шуыса, кӧня ке туназ (выжзы дэри йӧтӥз) но кылиз ик. Ёросоосыз татӥяз оломар сыӵе йылол кутӥзы — гужемен толэн пыдкуксэс корказе келляло. Кунооссылы бен «эн кыле, со куен ик пыдло ортче» шуо ик но, Савелий Никифорович али дауртэм сямен ик,— ньӧмыз понна гинэ.

— Та коркаен таиськиз ни,— весь ымыз ӧз подӥськы Савелий Никифоровичлэн. — Мар гинэ кулэ ӧвӧл ук, Павел Игнатьевич! Кӧня уксё, ӟигар, дыр кошке! Кор дасяны гинэ куинь тол выри: я калык уг шедьтӥськы, я трактор. А кытчы, кожаськод, сётӥзы ай? Бызара нюлэскы. Куамын иськеме. Созэ но нюк пыдсы. Воксё кал быриз поттаса. Трактор я уг вормы, я сӧриське. Трактористъёс бератаз косыса-косыса но уг мыно ни. Котьмар кар тон соосын! Ма, кӧяськиз-вӧяськиз ини, ӵукнаысен ӝытозь ньылонзэс гылляськиз. Ӧжыт кӧсаны кутске но, быжзэс урдо. Ӝыны митрейёсыз сьӧрам песьтэрен нуллӥ, ява, — уд но оскы.

— Квартира ӧз сётэлэ шат? — кӧсыт юаз Павел Игнатьевич. — Кыӵе из юртъёс лэсьтыло ук.

— Ӧй ик юалляськы. Из юртын мон ӝокасько. Война берегес ик ай Иже газетэ чорто вал. Первой, пе, общежитиын улод, собере аслыд сётомы. Отчыозь из юртэ, ёркыт комнатае, чуртназы. Бон воксё чидантэм ӧй вал кадь но, мон арня сяна ӧй чида. Лулы потӥське вал. Лысое самолётэн бертӥ но ӝыны нунал аэродромын турын вылын кылли. Кер-кор гинэ шокасько: тыысь город зын бугыртыса потэ, ява, уд но оскы. Городын ке улысал, мон кемалась сопал дуннее вуысал ни… Татын но, из юртын, озьы луысал. Нош пу юртэ ке мыноно, туалаяз бускеледлэн кизьнэмез гинэ но кылӥське. Марлы мыным сыӵеез кулэ? Собере, котьма ке но, ас каред — ас каред ни.

— Ӧйтӧд, сомында курадӟыса вылысь, кулэ луоз на меда ас каред. Ачид шуиськод ук: кӧня дыр но кужым быре. Коньдон — соиз мукет уж. Тодӥськод на-а, азьвыл кызьы малпаськод вал? «Пенсие потӥ ке, ваньзэ куштыса гожъяськыны кутско». Нош али? Мон маке газетъёсысь но, журналысь но нимдэ-тулдэ куддырысь уг адӟылӥськы ни, радиоысь но уг кылӥськы.

— Со выллемгес кырӟай вал уго, Павел Игнатьевич, со выллемгес. Нош улон тӥни кызьы берыктӥськиз. Вӧтай-а, кожаськод, мон со сярысь? Кытын, пе!

— Вакыт ортче ук, Савелий Никифорович!

— Мыным нокыӵе уг йӧты ни…

Кылзэ куспатытэк ик, Савелий Никифорович кухня нергеысь ӧс дор пала сиён-юон нуллӥз. Павел Игнатьевич ураме потӥсь укное учкыса сылӥз. Корка пичи, висъетъёс пул гинэ бере, соос ог-огзэс куаразэс быдтытэк но ӟеч кылӥзы. Павел Игнатьевич книга ӝажы азе лыктӥз. Со но вуж ини. Савелий Никифорович но, кузпалыз но выль тӥрлык сьӧры ӧз уйиське-а, соин йырин-а ӧз луы соослы. Павел Игнатьевич Гиреевъёс доры пыраны кутскем бере кыӵе ӝажы сылэ вал, со ик сылэ. Книгаос но отын йылӥллямтэ.

Нош Савелий Никифоровичен Тугаевлэн кылзы кемалась тупа, арлыдзыя кусыпсы бадӟым ке но. Атаез, Гиреевъёсын ӵыжы-выжыяськыса, Лысое васькакуз, соос доры ялан кожа вал, со сьӧры калъяськыса — Павел но. Берлогес, Лысоын дышетскыны кутскыса, Савелий Никифоровичлэн агаезлэн пиеныз ӵош пыраны ылазы: соос одӥг классын пукизы. Отӥяз эшшо муг луиз на. Кызьы ке со пияш Павеллы киын гожтэм кылбур возьматӥз. Кинлэн шуыса юамысьтыз, паймыса нёртӥз: ма, пе, Сава агайлэн, со гожъяське ук, кылэмед-адӟемед ӧвӧл шат? Павеллэн Гиреев гожъя шуыса кылэмез но, гожъямзэ газетысь лыдӟылэмез но вал ке но, кылбурен кагазэз со, ноку адӟылымтэ мае ке сямен, кема бергатӥз, мышпалзэ но учкиз, малы ке зынъяз но. Гожъясьлэсь ас киыныз гожтэмзэ отчыозь ӧз адӟылы на вал уго.

Собере Савелий Никифорович шоры Павел мукет синмын учкыны ӧдъяз: кызьы со вераське, кызьы лёгаське, сиське, пуке… Нокинэн но, нокин сярысь но йыркуръяськыса я вожпотыса вераськемзэ ноку ӧз кылылы. Огвакытэ Павел юри соя вераськыны, лёгаськыны но дауртӥз но, ӧз пишмыты.

Пиналысен ик Савелий Никифорович вань нуналъёссэ бусыын, нюлэскын, шур дурын ортчытъялоз вылэм.

Пӧйшурасьёслэсь но чорыгасьёслэсь ӧвӧлзэ но вань, адӟымтэзэ но адӟем, кылымтэзэ но кылэм карон сямзы калык пӧлын вашкалаысен пӧллиськонлы пӧрмемын. Павел Игнатьевич берлогес ас понназ шуиз ини: соослэсь сыӵе сямзэс адямиос валамтэенызы серем улсы каро, кудӥз инкуазез тодымтэеныз, мукетыз кинэ ке но быгатэмезъя ултӥяны, солэсь висъяськыны турттэменыз, куинетӥез ваньзэ одӥг кабен мертаменыз — озьы уз луы, малы ке шуоно озьы луыны кулэ ӧвӧл.

Савелий Никифорович вӧзтӥ но со адӟон йӧтытэк ӧз кошкы, куддыр вӧсь карымон ик зырӟылӥз, нош Гиреев кутэм сямызлэсь но ӧз куштӥськы, сюлэмзэ но вӧсь карыны ӧз сёты. Бератаз аслэсьтыз юмоке шедьылэмъёссэ, сое серекъямъёссэс, ачиз но будэтъяса, эшшо но маскаръяса гожъялляз; книгаос но поттаз. Озьы но шораз серемпыр, вылтӥяськыса, бадӟымъяськыса учкисьёс ӧз быре. Ачиз кадь ик пӧйшурасьёс, чорыгасьёс но гожъяськисьёс гинэ верамъёссэ но, гожъямъёссэ но мылкыдзэс поныса ик кылзылӥзы-лыдӟылӥзы. Соос пӧлын но бен олокыӵеосыз но вал но, вань но. Асьсэ палась ик потэм (егитысен ик данэ потэм) писатель Павел Игнатьевич азьын кызьы ке Гиреев сярысь пинь пыртӥз гинэ шуиз: «Кияз чачаё пинал — шудо пинал».

Павел Игнатьевич татӥяз сое огдыре ик гажа но, жаля но, солы йыркуръяське но. Вазен нош тӥни ӧжыт гинэ ӧз йыбыртъя. Савелий Никифоровичлэсь адӟем карыса, со, школаын дышетскыкуз ик, район газетазы гожъяны кутскиз но, Гиреев солэсь пӧрамъёссэ ачиз тупатъяса поттаны дасялляз, гуртаз я школае гожтэтъёс ысъялляз; уногес калык мед тодоз шуыса лэзьялляз, дыр, кожаз бератаз Тугаев: учкелэ — пияш али ик газетэн кушлаське ини, азьланяз но сое чакласа возелэ. Школаысен но, институтысен но Павел Игнатьевич гожъясь луыны, гожъяськон ужлы улонзэ сёто шуыса уг ик вӧта вал бере, со пумысь ини трос вакыт ортчыса малпаськытэк ӧйлась. Али но солэн ваньмыз интыяз ӧз пуксьы на. Пуксем гинэ ӧвӧл, оло, али укыргес но керӟег дырыз — сомында арескысен улонэз чутрак ӧрзэ воштӥз. Бен ас понназ ӧз вошты ини — Павел Игнатьевич ачиз воштыны малпаз. Кожытытэк чылкак йӧныз ӧз луы ни-а, шуод.

Куке-соку Гиреевъёс доры пыракуз, шкаф пияла сьӧрысь Джек Лондонлэсь инкуазен герӟаськем произведениосыныз книгазэ синйылтыса, Павел Игнатьевич юаз Савелий Никифоровичлэсь: кудӥзгес, пе, кельше солы — «Курень кионэз-а», «Тӧдьы вазерпинез-а», «Улонэз яратонэз-а» яке кыӵе мукетыз-а? Со гожъямъёслэн ӵошатон мугзы бен ӧй вал кадь но (адямилэсь азьчиньызэ пӧлыеныз я чӧльыеныз уг ӵошато ук), оломар кыл йылаз сыӵе юан лыктӥз. Гиреев ӝажы шоры киыныз гинэ шонтӥз:

«А-а, соосыз Санко, бадӟым пие, октэ. Ас выжыям мынӥз, тяпыр: эрик ке сётысалыд, школазэ кулэ ик ӧй карысал, пӧйшураса но чорыгаса гинэ ветлысал. Нош мон сыӵе книгаосыз киям но уг кутылӥськы».

«Кызьы озьы? Малы?» — чылкак абдраз Тугаев.

«Киосыз медаз сьӧлталэ, — капчияк гинэ шуиз Савелий Никифорович (со сярысь малпанэз азьло ик кисьмам вылэм, иське, малпаз Тугаев). — Лыдӟид ке, соосъя гожъяны кутскод эшшо. Ачид шӧдытэк сьӧразы валтозы».

«Нош Пришвинэз, Паустовскиез, Соколов-Микитовез?» — со писательёс понна ӝожомыса но Савелий Никифорович понна олокин азьын мупыр вияно кадь луыса выжыятӥз Тугаев. Аслаз соку ваньмыз укыргес йыраз вал на уго, тодон-валанэз вылэ ӧжыт но тузон пуксьымтэ. Инкуазь сярысьгес гожъясьёслэн гожъямъёсынызы тодматскыны солы ас вакытаз ӧз кылды — институтэз быдтэмез бере ини ылаз. Соиз но малпамтэ шорысь луиз. Ужаны кутскемезлэсь азьло, та арлыдозям Москваез ӧй но адӟы шуыса, Павел юри отчы мынӥз (дышетскисьёс юазы ке, мар возьытэн Москваез татчыозь ӧй адӟы, пе, шуод). Пыдын ветлонъяз-ветлонъяз учке но — огаз вашкала урамын Паустовскийлэсь вань томъёссэ кыре поттыса вузало. Коньдонэз сопала-тапала ворттылыны тырмымон гинэ ке но вал, аслыз библиотека люкан сярысь сокугес сюлмаськыны кутскем Павел вузкарисьлэн ӝӧкез котыртӥ гожеръяз-гожеръяз но буш киын кошкыны таки ӧз вормы.

Уксёез огъя вагонэ билетлы тырмиз ик ай но, кык нуналзэ ву юыса гинэ бертӥз. Паустовскийлэн гожъямъёсыз ӝоген сое Пришвинлэн книгаосыз вылэ вуттӥзы, собере — Соколов-Микитовлэнъёсызлэн вылэ но.

Савелий Никифоровичлэсь Лондон сярысь юалляськемез но со пумысь сэраз. Соин но, соосыз Гиреев тодымтэысь, уката шальтраз Павел. Ма, кызьы, пе, уд тоды? Тодыны но уд тыршы? Инкуазез яратӥсь, со сярысь гожъясь мурт инкуазез сыӵе ик яратӥсьёсыз, со сярысь гожъясьёсыз!

Вожпотонзэ мырдэм зӥбыса, Павел юаз:

«Савелий Никифорович, тон, пӧйшуранын сямен ик, литератураын но пытьы кузя уд кошкы-а собере? Ачид валатэк ик? Алигес журналысь лыдӟи: Африкаысь кыӵе ке негр, пе, вуриськон машина лэсьтэм. Пулэсь. Со сярысь нокытысь лыдӟытэк. Ас кожаз. Нырысез бере кык сю ар ортчыса. Человечество тӥни пӧртэм шаеръёсын, пӧртэм вакытъёсы одӥг малпанэ вуылэ. Котькуд удысын. Тон но, мукетъёс бере кык сю ар ортчыса, соослэсь ик гожтэмъёссэс выльысь уд гожты-а?»

«Асьмелэн кадь ик-а, пе, бен со негрзылэн машинаез?» — мыркак кариз пияшез Гиреев.

«Созэ гожтӥллямтэ но, вурыны, пе, вуре», — ӧжыт шып улэмез бере валэктытэк ӧйлась гуньдэм Павел.

«Вот угось. Мынам но озьы ик. Котькыӵе бадӟым писатель мед луоз но, со мынэсьтым ик гожтономе ӧз гожты, дыр: мынэсьтым адӟемме со ӧз адӟы ук. Мынэсьтым тодэмме но ӧз тоды».

«Малы нош, иське, соосъя нёръямедлэсь курдаськод?»

«Бадӟым мурт мон кадьёсыз зӥбоз. Коть пыкиськы, коть эн. Кызьы чуньы анаез сьӧры кошке, мон но озьы соос сьӧры бызё».

Савелий Никифоровичез Павел Игнатьевич ялан эскерыса возиз. Ма, нуналмысь улэм-вылэмзэ ӧз ини — гожъяськемзэ. Кытӥ-отӥ Гиреевлэн веросъёсыз — инкуазьлы сӥземъёсыз я серемесъёсыз (соосыз но одно инкуазен герӟаськемын луо вал) — газетъёсын но журналын потылӥзы, очеркъёсыз но ӧжыт вал.

Савелий Никифорович ӝожтӥськылӥз, гуртъёстӥ ветлыны уг ваньмиськы ни шуыса: удмурт кылынзэ «Горд кизисез», пе, быдэсаксэ солэн тыбыраз ныпъязы, ужасьёс, пе, весь вошъясько; кудзэ, пе, тэтэ каремысь ветлыны дышетӥсько гинэ но, сое я асьсэ газетазы ик мукет интые пукто, я республикае басьто.

Вань осконэз солэн пенсие потыса гожъяськон вал. Потэмезлэсь азьло ик олокӧня ар лыдъяса улӥз: тани вуэ ни со дыр, тани вуэ.

Нош югдур тӥни кызьы берыктӥськиз.

— Маид ке бон дась-а, Савелий Никифорович? — юаз Тугаев, солэн выль гожтэмъёсыз сярысь малпаса, оскыса но кышкаса.

— Мытэмъёсыз трос но, огез но йылаз-пумаз вуттымтэ на. Уг-а шуиськы: шокчыны маза ӧвӧл. Азьло редакциысь какалмыса бертӥсько ке но вал, дорын уйбыт ӵабъяськемъяськыса пукыны чидалляй. Табере, юрт котырын гинэ вырыса, ӝытозь тышкам кадь луисько: кытын, пе, пукод на — инмар кысыкгес миндэрзэ мед куштоз… Но ничево, коркатуй лэсьтӥ ке, саесме пужалляса кутско мытэмъёсыз борды но, выльёсыз борды но. Аслым сэрег но висъяй ни. Нокыӵе ӵашетэм медаз пыры. Эсьма, гурез но нимаз. Укнооссэ бакча пала ӵогытӥ — сад весь син азям мед луоз. Кышнолэсь бӧлисько…

«Кӧня нош таиныд йыринтод на? — шуиз ас понназ Павел Игнатьевич. — Нимаз кабинет юрттоз на меда? Оло, чик кулэ но уз лу ни…»

Лысо Гурезьысь Ижевске вуылӥсьёсыз кемаласьгес ини Тугаев огпӧртэм юанъёсын пумита: «Кыӵе отӥ Савелий Никифорович? Корказ ӧз пыры на-а?» Лысоослэн но кылзы огвыллем: «Нокызьы уг пишмыты» я «Синмы ик ӧз йӧты».

— Малы кулэ луиз тӥледлы кыкнады азьысь собыдӟа корка? — чебер ӧз ке но поты, шонерак юано кариськиз Павел Игнатьевич.

— Анетта Никитичнаед сюлэм вылэ султӥз но васькыны ӧз вала ни уго: лэсьты но лэсьты. Ма, аслым но нылпиослэсь умой ӧвӧл: соос котькуд выходное вуыло ук. Уката ик асфальт но, чугун сюрес но кыскемзы бере. Сюресъёс таре Лысолэсь палэнэтӥ кожыса кошкыны уг дӥсьто, ява.

— Озьы уго, Лысоед Рим кадь луоз ини ай, — пальпотӥз Тугаев.

— Кыӵе Рим? — ӧз вала Гиреев.

— Вашкалаослэн сыӵе веран кылзы вылэм, Савелий Никифорович: вань сюресъёс, пе, Риме нуо.

— Озьытэк-а сэре? — нокыӵе серекъятэк шуиз кузё мурт, — Италиын — Рим, странаын — Москва, Удмуртиын — Иж, асьме палъёсын — Лысо. Асьме палъёсын вань сюресъёс, конешно, Лысое кыстӥсько.

«Нокин ноку сяммес уз вошты вылэм ини асьмелэсь, лысоослэсь», — выльысь мыньпотӥз Павел Игнатьевнч.

Лысоосыз палэнъёс серекъяло: со Лысо Гурезьдэс, пе, олома кожаськоды, со кадь дунне но ӧвӧл ни, оло. Лысоос бен, зэмзэ ик,— кулэ-а, ӧвӧл-а, интыяз-а, ӧвӧл-а — одно асьсэ ёроссэс лякозы; трос дышетскемъёсыз но, олокыӵе дышетскымтэосыз но. Павел Игнатьевичлэн тодмо профессорез, ёросоез, кызьы ке мадиз: весь Лысоез поттамысьтым, пе, дышетскыкум, исамес карыса, кытӥяз ёрто вал: «Нош созы (тазы) Лысояды вань-а?» Чеховлэн героез сямен, пе, шуылӥ: вань, Лысоын котьма вань.

Тазьы учкыса, лысоослэн шаерзэс сокем ушъямзы палэнъёслы серемес ик йӧтэ, дыр. Нош куд-огезлы — акылес. Вань вожъяськисьёсыз но. Лысоын уго трос тодмо адямиос будӥзы. Но соин гинэ палэнъёс уг вожъясько. Музонэзлы луыса. Уноез, кыре-данэ потыса, гуртсэ, гурт калыксэ вунэтэ; вунэтэм гинэ ӧвӧл — соослэсь возьдаськыса озёлтӥське. Нош лысоос ог-огенызы кушласько, ог-огзэс гырпумтӥзы сямен кутыса возё. Тӥни со понна вожзэс ваё кадь сьӧрлоос лысоослы. Соослэн но, оло, сыӵе кариськемзы потэ вылэм но, уг пишмы-а, мар-а. Яке соос визьмынызы озьы лэсьтыны уг туртто, нош сюлэмзы весь сипыртэ: тӥни кызьы кулэ — лысоос сямен, лысоос сямен!

Тугаевлэсь малпаськон ӧрзэ Савелий Никифорович пожаз:

— Тулыс пал, ӧжыт шундэктэ ке, бадӟымез нылы но пие пичи пиналъёссэс татчы вайыса кельто. Гужем дышетскисьёсыз но вуо. Берганы ӟигарыд гинэ мед луоз, ява.

«Уд, уд гожъяськы ни тон, гажано эше, — шуиз понназ Павел Игнатьевич. — Инкуазь сётэмысьсэ кӧнязэ лэсьтыса вуид ик меда? Ма, гумыред но озьы тупаз. Пыкылыны ым ик уг пыры но, пыкылоно кожасько, лэся, весь умоенгес адӟем потэ уго».

Савелий Никифорович Октябрь революциен ӵап огнуналэ вордӥськемын. Граждан ож вакытэ ик, номыре валасьтэм дыръяз ай, пӧсьсэ-кезьытсэ шӧмъям ини: атаез гордъёс сьӧры кӧчиз шуыса, тӧдьыос анайзэ кысканы кутскиллям но, кышномурт быдэс толэз вож нуныеныз гуртысь гуртэтӥ ӵыжы-выжыосыз дортӥ пегаса ветлэм.

Гиреевлэн атаез берытскымтэ ни, чиптэм-чаптэм ышем; берло но нокыӵе иворез кылӥськымтэ.

Пиез солэн сюрестӥз кошкем. Еж мурт ай, колхозъёс кылдон вакытэ узыръёслы маза сётымтэ. Арессэ йылэтыса, комсомолэ гожтӥськем. ӧтчамъёсын но нырысь ик со вераськылоз вылэм. Бордгазет поттам. Лысое но, Иже но газетъёсы гожъяллям. Сооссэ бен мукет нимын ке но потталлям, кылызъя-а, укыр пыдлось бугыртэмезъя-а, гуртоосыз кинзэ-созэ шӧдӥськиллям. Узыръёс сое быдтыны амал шедьтӥллям. Лысо Гурезьысь школаысь бертӥсь муртэ толалтэ куазен шыр гольык кылиллям. Дораз Гиреев ачиз ик вуэм но, кемалы валесэ усем; школаын но дышетскыны быгатымтэ ни, колхозын но ужаны. Куинь-ньыль ар пала погылляськыса, ӧжытак катьяськемез бере, сое Лысо Гурезьысь редакцие ӧтиллям: висьыкуз но отчы ялан гожъя вылэм уго — заметкаос но, кылбуръёс но, веросъёс но.

Дышетскыны бӧрысь но пӧрмытымтэ ни.

Войнае сое, ӟызы муртэ, куриськыса-куриськыса вылысь но нырысь басьтӥллямтэ. Но тужгес ик секыт ньыльдон кыкетӥ арын, сӥзьыл, Гиреев валъёсыз келяса мынэм но, фронтэ сюремез со луэм.

Ожмаськемез сярысь Савелий Никифорович, кыллы сокем бырем мурт, азьло ик мылкыдтэк, кӧсыт мадьылӥз, али но вераны уг яраты. Но Павел Игнатьевичлэн йыраз озьы но кӧня ке верамез кылиз ик. Куинь ар пала жугиськытозямы, пе, куиньмой ке но липет улын кӧлӥ-а, ӧй-а; артиллериын, пе, вал, разведкаын, толэн-гужемен — кырын. Нош нокыӵе чер, пе, бордам ӧз думиськы. Огпол, пе, котыртэме ӝимыса, толэзь ӵоже чыртыозямы нюрын кыллимы, соку но, пе, ӧй черла, огмы но, пе, ӧм черлалэ.

Война сярысь Гиреев одӥг гинэ уж гожтӥз — бадӟымгес верос-а сое шуод, пичигес повесть-а.

Павел Игнатьевич пиналысен ик война сярысь произведениосыз сэстэ; уноез соос пӧлысь — ас вакытазы туж ушъямъёсыз но — визьмысьтыз тӧлӟизы, нош Савелий Никифоровичлэнэз пыӵаз. Тугаев ялан витьыса улӥз, тани-тани со войнаын ветлэмез-адӟемез борды выльысь басьтӥськоз но рос-просгес гожтоз шуыса; эшшо ик фронтэз ортчем гожъясьёсмы азьвыл но трос ӧй вал, табере соосыз лыдъяны одӥг киысь чиньыос но мултэс луозы. Ожмаськон тема удмурт литератураын таки усьтӥськытэк кылиз. Со пумысь Павел Игнатьевич Савелий Никифоровичлы пумиськылыкуз, пеляз пырымон вушйылӥз, нош пырак номыр ӧз вера. Озьы ке но оскиз, со гожтоз шуыса. Нош Гиреев пӧйшурасьёс но пӧйшуран, чорыгасьёс но чорыган сярысь гожъяны ӧдъяз, асьсэ газетазы но, Ижевскысьёсаз но соосыз бусьтыр гинэ печатлаз. Соизлы луыса, Тугаевлэн кема сюлмыз писырлаз, нош Савелий Никифоровичлы со номыр ӧз шокчылы ни. Озьы ке но весь оскыса улӥз: тани Гиреев кутскыса война сярысь гожтоз.

Савелий Никифорович ӝӧк вылэ олома но пуктылӥськиз. Бен веръямтэез ик ӧй вал ини но, пыжем луд кеч сӥль но ас сылалтэм чорыг дурысь Павел Игнатьевичлэн озьы гинэ мозмемез ӧз луы. Тани-тани дугдо ини шуэ но, кузё ачиз ушъяса-ушъяса утялтӥськемысь, со сьӧры уйиськоно кожаз, лэся.

Ӵошен луд кеч сӥлен но чорыген тусьтыосыз бушатӥзы. Савелий Никифорович соку ик висъет сьӧры ветлӥз но соосыз азьлолэсь но чумолёгес карыса вайиз. Дырын-дырын куноезлэсь сюмыксэ но тырмытъяз, нош ачиз, пересь кышноос сямен, ымдураз гинэ йӧттылӥз. Озьы но курень тушез пыр бамъёсаз ӵыжытэз потӥз, кисыриосыз ӧжытак ӵошкытазы. Павел Игнатьевич пальпотыса учыртылӥз сое. Палэнысен учкыны быгатысал ке, со аслэсьтыз но трос воштӥськемзэ адӟысал: солэн но восьтэт, мыт ымныраз горд виштыос пуксизы, курень синъёсыз эшшо но пеймытазы, кымес вылаз усьылӥсь йырсиез выллань ӧз ӝутскылы ни.

Огазьын пукисьёслэн тусазы номыр огкадез ӧвӧл кадь ке но, тодӥсьтэм мурт но соосыз одӥг выжыысь шуысал, нош марзы кельше — вераны соку ик ӧй шедьтысал.

Куноезлэсь пумен бичаськемысь дугдэмзэ сактыса, Савелий Никифорович ӧз мычкаськы ни.

— Мон туно-пелё кариськыны турттӥсько ни ай, Павел Игнатьевич, — шуиз со, пигон гинэ кылем чильпырась йырсизэ йыртышкысьтыз йырвекчи вадесаз улляса.

Солэсь исаськон йылолзэ тодӥсь Тугаев юри куалектэмъяськыса юаз:

— Озьы-а?

— Озьы, ӵужодӥг пие (Савелий Никифорович кытӥяз Тугаевлы сыӵе нимын но вазьылэ). Вералом-а, мар тон та виын малпаськод?

— Ойдо кисьты, Савелий Никифорович, — пичи муртлы бадӟым мурт сямен шуиз Павел Игнатьевич. Со пиджаксэ пертчиз, галстуксэ лябатӥз: кема, пе, кылзыны дасяськисько. Солы Гиреев куддыр зэмзэ но ачиз сярысь норедгес потэ.

— Тон али жаляськод монэ, — вазиз Савелий Никифорович, азьло сямен ик пальпотыса. — Я, пырак вера — жаляськод ведь?

— Оло нош, — котыръяса вазиз куно. Солэн ымнырысьтыз быдӟияськон тусыз киын басьтэм кадь тӧлӟиз: Савелий Никифорович уго зэмзэ но лушкем малпанзэ шӧдыса улэ вылэм.

— Иське, жаляськод, — чылкак оскыса шуиз ини кузё. Со ӝӧк пала сётӥськиз, сюмыксэ гучыктӥз: — Ма, кызьы, пе, уд жаля? Адями вань гумырзэ газет ужын веказ. Газет кадь газетэз луысал ке эшшо, ато — «Горд гырись». Арняяз куинь пол потӥсь кикур быдӟа газет… Сводкаос, лыдпусъёс, азьмынӥсьёс, бере кылисьёс, гырон-кизён, кыед… Нош тон валаса вуттӥд-а, гажано Павел Игнатьевиче, ма со «Горд гырись» Лысо калык понна? Собере… Кин котьку вань район газетъёслэсь трос литературной материалъёс печатлаз но али но печатла? «Горд гырись». Кытын литературной кружок весь ужаз но ужа? «Горд гырисьын». Али бон соиз но, таиз но редакциос кружокъёс-объединениос усьтыло ни — «Ошмес син», «Егит тулкым», «Вуюись»… Нимъёссы, шол, чебересь, жингыресэсь. Нош пайдазы? А кема-а соос чидалозы? Ӧйтӧд. Вуюисьёс инкуазьын кемалы уг кылдо. Ошмес син но ӵоктаське, тулкым но быре. Нош милям «Кужыммы» кыле. Война вакытэ гинэ быдэс газетэн валче ик пытсаськылӥз…

Павел Игнатьевич номыр ӧз куареты. Савелий Никифоровичлэн ӟырдамез но, верамез но со понна витёнтэм луизы, кудпала нуэмзэ но таки ӧз сакты на. Бен огзэ шӧдӥз ини: Гиреев солэсь верамзэ али кулэ но уг кары — аслэсьтызгес усьтыны турттэ.

— Кин тынэсьтыд нырысь заметкадэ печатлаз? — юаз Савелий Никифорович, куноезлэсь кылзэ юам кадь кылӥськиз ке но, буйганы ӧз вормы ни.

— Асьме газет, — либыт вазиз Павел Игнатьевич.

— Нош веростэ?

— Со ик, Савелий Никифорович. Ачид ик.

— Вот угось, гажано ӵужодӥг пие. Мон туннэ ке но со заметкадэ тодӥсько. Клубе ю кисьтазы шуыса ӝожтӥськид вал: табере, пе, гуртамы кино уг нулло ни. Сыӵе учыръёс соку но, берло но луылӥзы, коть номерлы быдэ гожъя. Ми сыӵе гожтэтъёсыз сельсоветъёсы гинэ келяськомы вал. Нош тынэсьтыдзэ мон поттоно кариськи: асьме гурт ук. Собере тонэ газетлы гожтӥськытӥмы — гонорар нергеед чотын. Тон паймыса редакцие но вуылӥд… Оло, гожъяськон мылкыдыд но ӵапак соку ӝутӥськиз. Мон сое ялан аратыса возьыны тырши… Нош Дмитриев, Алексеев, Егоров?.. Тодмооссэ гинэ литераторъёсмес верасько. Ваньзы соос «Горд гырисьысь» потӥзы. Бон, берло дышетскизы — номыр уг шуиськы… Нош али будӥсьёссэ верано ке? Ӵок ини, уг вера… Бон, ваньзы соос гожъясьёс уз луэ. Но дасэз, кызез, куамынэз пӧлысь огез ке но луоз. Со понна шедьтоно ук соосыз, пужноно, эскероно. Мон соосыз утчасько… Нош газет но поттоно ук, — со ужез мон вылысь ӧз басьтэлэ. Ачид тодӥськод, кӧня материал со сие. Ваньмызлы ӟигар но, дыр но кулэ… Асме ке верано, малпамея, конешно, улонэ ӧз пӧрмы. Гогыедлэсь вылӥе уд тэтчы, шуо. Мынам но озьы луиз… Кин вӧтаз со войнаез ик? Но котьма ке но, Павел Игнатьевич, мынам йырсиме кысканы муге ӧвӧл. Кысканы ке но турттысал, ӧвӧл ни тани…— Савелий Никифорович йырсизэ-пигонзэ кутыса ик возьматӥз. — Я, ойдо эшшо одӥген лэзёмы на. Тон зол воргорон луэмед ни. Пичи но уд сётӥськиськы. Да, созэ но быгатоно, Павел Игнатьевич. Асьме выжыосыз со быгатымтэмы кӧнязэ погыртӥз ни. Тӥни кинъёсыз, сюлмы пилиськымон висе ке но, мон жалясько. Соос луэмзэ кыдёке но ӧз лэсьтэ. Нош кыӵе талантъёс вал пӧлазы! Монэн ӵошатод шат? Я, вай ӝут. Собере ачид вералод… Мон ас кылме уг быдты. Вождэ эн вай. Аслам карыса верасько. Мыным татын кенешыны, тазьы пукыны но нокинэн… Эсьма, лулы ик ырак луиз. Огшапсэ чидало ини… Кемалы-а? Малы, кытчы лыктэмдэ но ӧй тоды на ук, шузи.

— Соиз сярысь берлогес, Савелий Никифорович, ачим но рос-прос уг тодӥськы на.

— Я, иське. Уй кузь. Вуод.

Педлон вожомыса утыны кутскиз пуны.

— Кыӵе окты-калтызэ таӵе бер куазен сюрес вуттэ? — Савелий Никифорович дӥсяськыса кыре потӥз.

Павел Игнатьевичлэн мылкыдыз огвакытлы берыктӥськиз вал. Адями улон сюрессэ сокем вала вылэм ук, озьыен, одно ик гожъялоз. Нош соку ик выльысь сӧриськиз: трос-а вуоз на? Нош аслаз солэн кызьы луоз?

Машина кураськыса Тугаев ӧз акылляськы: мултэс пыриськоно луэ, озьы но ай кытӥяз донгиське, кытӥяз — уг.

Сюрес вожын тырмыт гинэ сылытэк ӧйлась. Мугшур пала машинаос малы ке уг кожало. Мар бен каром шуыса, Павел Игнатьевич одӥг шофёрлэсь юаз но, соиз сьӧраз чортӥз: мон, пе, тӥледыз станциозь нуо, нош отӥзэ поездэн шонтоды, кыдёкын, пе, ӧвӧл, ӝоген поезд но лыктыны кулэ.

Адӟем муртлэсь кылзӥськытэк ӧз луы.

Станцие вуыкузы, поезд но лыктӥз. Павел Игнатьевич, вокзал нергее пыраса, билет басьто шуэ вал но, шофёр сое соку но нодъяз: пырак, пе, вагонэ пуксьы, кондуктор ачиз билет вуза.

Озьы ик вылэм.

Нош поезд кема ӝегатскиз на. Павел Игнатьевич я педло учкылӥз, я котыраз. Вагонын дасо мурт сяна ӧй вал — нылпиё анайёс но пересьёс.

Та чугун сюресэз кыскемзы ар-а, кык-а гинэ ай. Сое, пе, войналэсь азьло ик лэсьтыны чаклаллям вылэм но, кыскыса вуттӥллямтэ — война кутскем. Отӥяз кужым но, коньдон но, тӥрлык но тырмымтэ ни. Табере тани со борды но киос вуизы. Со Казань—Свердловск сюресэз Агрыз но Набережные Челны пыр лымшортӥгес ортчисьёсыныз герӟа. Кузь ик ӧвӧл. Кӧня ке иськемез Лысо Гурезь палъёстӥ кошке. Та дырозь Тугаевлэн отӥ ветлэмез ӧй вал на. Соин со ӵапак поездэн мыныны кемдэмезлы шумпотӥз, кыло-буро шофёрез тау карыса малпаз. Ижевске вуылӥсь гуртоосыз азяз но, куспазы но кемалась куано вал ини: сюрес, пе, зыра каньыл луиз, ӵукна пуксьыса Иже мынӥськод, ӝыт берен бертӥськод.

Мугшурозь поезд дугдылӥз на. Гурезь йылысен бур палась но, паллян палась но гуртъёс адӟисько. Ваньзэс Павел Игнатьевич кызьы шуыны шедьтэ, ваньмаз огпол ке но вуылэмез вань ке но, вылӥысен соос асьсэлы асьсэос уг кельшо; тросэзлэн пасьёссы-виштыоссы но син шоры йӧто.

Сюрес Мугшур вӧзтӥ ик ортче вылэм. Та палтӥз Павел Игнатьевичлэн сое адӟемез ӧй вал на. Нырысь пурысь липетъёс возьматӥськизы, собере — сыӵе ик пурысь, горд, тӧдьы борддоръёс. Отӥяз сенаж возён башняос ялтраса сыло. Соосыз но Тугаевлэн адӟемез ӧй вал на.

Поездысь чылкак огназ гинэ васькыса, Павел Игнатьевич дыртытэк Мугшур пала вамыштӥз. Шунды вылӥе ӝутӥськем ни, сиосыз ымнырез таӵе ик шунто. Уй ӵоже йӧ улын кӧлэм вуос улӟиллям но ас гурзэс мытӥллям.

Шуак кытысь ке матысь ик тюрагай лопыртӥськиз но, ӧжытак гинэ вылӥе ӝутскыса, соку ик гурзэ улӥе кисьтӥз. Инме мырдэм адӟиськымон ӝутскытозяз, весь кырӟаз но кырӟаз. Собере сое шунды вадьсысь адӟыны ӧйлась ни, нош куараез ялан кылӥськиз…