Читыр-чутыр сюрестӥ. Михаил Шолохов
Рассказы

Читыр-чутыр сюрестӥ. Михаил Шолохов

336 {num}

Рассказ

Алигес гинэ Нюра шораз учконтэм нылаш вал. Зӧкмет но шушмет. Ветлыкуз, ӵӧжлэн сямен, мугорыз сопала-тапала бекыръяське, пыдъёсыз вамен пуксьыло, кузесь суйёсыз асьсэ кожазы кадь азьлань-берлань шонаськыло. Тодмотэм адямиосын пумиськылыкуз, шоразы со огвакытэ ик куймырес но возьдаськыса учкылӥз.

Нош туннэ Васялэн азьтӥз ортчиз веськрес, ӝужыт нылмурт. Гадьёсыз буй-буй ӝужамын, сьӧдэсь синъёсыз нокыӵе кепыратэк учко. Васялэн ымныраз шуныт тулыс тӧл шокыштӥз, оло.

Мальдыса выллем, пияш огшаплы синъёссэ ик кыньылӥз но, нылашлэн мышказ урамлэн мукет палысьтыз юртъёс сьӧрысь ышытозяз учкыса сылэмез бере, валзэ гонӟыртытӥз. Шур дурысен гинэ ини валэзлэсь сермет кортнэтсэ куштыкуз, со понназ пальпотӥз. Солэн син азяз ялан возиськизы на Нюралэн карнан вылэ тырем киосыз но вамыштэмезлы быдэ кылясь ведраосыз; карнанэз пӧртэм-пӧртэм сяськаосын чебермамын, нош ведраосыз вож-вожесь.

Со дырысен Васялэн нылашез выльысь но выльысь адӟемез потылыны кутскиз. Шур дуре валзэ люктаны пияш юри соослэн ураметӥзы ветлыны ӧдъяз. Нюраез адӟыкуз, сюлэм вылтӥз шумпотон тулкым погыльскылӥз. Со сермет ӟезьзэ ас палаз шуак кыскылӥз но, валэз озьы ик шуак дугдылӥз. Нош сылыны кема ӧз сылылы.

Арнялэн пумаз Вася возь вылэ мынӥз – турнам турынзэс чакланы. Зор бере турын парлананӥз. Бордысьтыз ӧжытак сисьмем зыныз но лыктӥз.

Авдеевъёслэн удыссы вӧзысь Вася витёнтэм шорысь Нюраез адӟиз – соиз огез бӧм дорын сылэ вал; юбкаезлэн сӧзыез ӝутэмын, кияз – векчи ньӧр.

– Ӟечбур, чебер апи! – со доры матэктонъяз шуиз Вася.
– Ӟечбур, уд ке исаськиськы, – пальпотӥз нылмурт.

Вася вал вылысьтыз тэтчиз но сермет ӟезьзэ сэрпалтӥз.

– Кинэ-мае утчаськод, Нюра?

– Кунянмы олошае пыриз... Кытысь ке ӧд синйылты-а?

– Пудо кемалась гуртэ бертӥз ни, нош тӥляд кунянды син шорам ӧз йӧты.

Вася кисыысьтыз тамак пуйызэ но газетсэ поттӥз.

Бинялтэм тамаксэ дыльдыеныз ляконъяз юаз:

– Мар сямен ай тон, нылаш, такем ӝог будӥд? Али гинэ эшъёсыныд луо пӧлын гурезь лэсьтыса шудӥськод вал, нош табере тани учкы шорад...

Нюралэн пальышась синъёсыз кыньыртӥськизы.

– Малы нош монэ гинэ адӟиськод, Василий Тимофеевич? Ачид но бен кемалась-а штантэк бызьылӥськод вал, нош али йырыд мумыкоре йӧтэ, дыр, ини...

– Малы бен татчыозь уд бызиськы? – Вася тамаксэ кенжытӥз, мускыт омыре сьӧд-пурысь ӵынэн пельтӥз.

Нюра шудэм улсын лулӟиз, собере жаляса выллем киоссэ вӧлъяз:

– Нокин уг басьты!

– Ма, мон басьто – мукетъёслэсь пӧртэм ӧвӧл, – Вася но шудэм улсын вераны турттэ вал, ай паль но потӥз, нош пальпотэмез ӧз пӧрмы – ымнырыз гинэ кисыртӥськиз. Солэн соку тодаз лыктӥз, кыӵе адӟиське со синучконын: ымныр тыраз – чача висён бере кылем муресь гопъёс, кымесаз – бабылес йырсиез: бабылес ке но, кузёзэ куйсор тус возьматэ.

– Мукетъёслэсь зэмзэ ик пӧртэм ӧвӧл кадь, но ымнырыд шадрагес...

– Базарысь басьтымтэ уго... – ӵыжектыса шуиз Вася.

– Соиз но шонер!.. Ма, сокем кельшисько ке, дорам курасьёстэ ысты, – ньӧрыныз шонанъяз мусо пальпотӥз Нюра но гурт пала вамыштӥз.

Бӧм улэ пуксьыса, Вася кема посӥз шуям чуньыбыж куарез. Ас понназ малпаз: «Серекъя-а монэ та укылтэм, уг-а?»

Шур палась салкым омыр лыктыны кутскиз. Турнам турын, пуктылэм бӧмъёс, куакъёс вадьсы бус лэзиськиз. Ӧжыт улыса, со ваньзэ согиз. Нош шунды пуксьыку льӧльмаськем инбам ялан яркыт пиштӥз на. Отчы пазяськем пилемъёс легезьпу сяськалэн бурдъёсызлы кельшизы.

* * *
Кутчаськись Вася номыр ӧз вазьы. Ымнырыз гинэ дарали кадь луиз – оло сапегзэ вань кужмысьтыз кыскеменыз (соиз ӟоскытгес), оло мукет муген.

Анаез кышет пумыныз кӧсытэсь ымдуръёссэ ӵушиз:

– Я, иське, Вася, мон Осьып доры ветло ик. Нош коркасьтыз ныл курасез туздырыса лэзиз ке, ӧйтӧд, кытчы но кызьы пегӟод меда возьытэдлэсь. Быдэс гурт серекьялоз... – Собере вис кариз но, пиезлэсь азьло сямен ик шып пукемзэ адӟыса, ватсаз, – Котьма медло ини – мон кошкисько.

– Мын, анай, – Вася султӥз но пальпотэмъяськиз.

* * *
Вераны кутскемезлэсь азьло котмем кымыссэ саесэныз ӵушылыса, со шуиз:

– Тӥляд, Осип Максимович, вузды вань, нош милям – басьтӥсьмы... Со пумысь мон дорады лыктыны ӝутӥськи... Кыӵе меда тӥляд кылды луоз?

Ӟус вылын пукись воргорон нырысь тушсэ позыртӥз, собере вӧзысьтыз тузонзэ пельтэмъяськиз – соку гинэ ӟазыртӥз:

– Валаськод-а, мар бордын уж, Тимофеевна... Мон, оло, пумит но ӧй луысал... Василийлы милям семьяямы инты шедьысал. Нош озьы но ми нылмес ум сётэлэ... Ӧжытак мед шудоз-серектоз на... Нылпи вордыны вуоз ай...

– Соку ӟеч луэ! Пырамысьтым вождэс эн вае...

Васялэн анаез сандык вылысь султӥз но йыбырттӥз. Кӧсытэсь ымдуръёсыз шымыртӥськизы.
– Вожмес, пе, ваёмы ини... Ма, кытчы озьы дыртӥськод, Тимофеевна? Оло, милемын ӵош нуназеясалыд?
– Уг ни ай... гуртын возьмало... Ӟеч луэ, Осип Максимович!..

– Азьыдлэсь берыд чебер! – интыысьтыз султытэк, пытсаськем ӧс пала нукыртӥз кузё воргорон.

Гидкуазьысь кышноез пыриз. Табае шундыберган тысь кисьтонъяз юаз:

– Мар бен ветлэ Тимофеевна?

Осьып понназ лек кылъёс вераз но сялӟиськиз:

– Шадраезлы кышно кураны. Сёрос юбо, калык сьӧры уйиськыны ведь турттэ!.. Ачизъя писпу мед быръёз... Вот туклячи! – киыныз шонтӥз.

* * *
Туэ понна вань юосты октӥзы-калтӥзы. Кабанъёсын котыртӥськем итымъёс кутсасьёсты витьыны чӧлтӥськизы.

Вуиз сӥзьыл.

Ӵукъёсы музъем бусъёсын шобырскылӥз. Шунды дырын-дырын гинэ пилемъёс сьӧрысь возьдаськыса учкылӥз. Нош гужем пӧсьлэсь мӧзмем нюлэс шумпотыса шокчиз: писпуос тулыс куазен кадь вож-вож сылӥзы.

Ӵемысь зорылӥз. Бӧрсьысь бӧрсьы ортчылӥзы пурысесь нуналъёс. Луд ӟазегъёс малы ке шундыӝужан палась шундыпуксён пала лобӟылӥзы. Куреньмем зуродъёс висись адямилы кельшыны ӧдъязы.

Толэз витьыны ылам музъем, кожалод, нырулӥз. Нюлэс сямен ик, возьёс вож-вож улӥзы ке но, соослэн шулдырзы ӧй вал ни.

Васялэн гинэ мылкыдыз шулдырлэсь но шулдыр вал. Соос нуналлы быдэ Нюраен пумиськылӥзы – я нуназе шур дурысен, я ӝытазе шудон пӧлысен. Куасьмиз пияш, нокыӵе ужез но уг мыны ни...

Ӵапак сыӵе пилемо сӥзьыл нуналэ, ӝытпал арган гурт пумын куаразэ сётӥз вал но шуак гуньдӥз...

Васяослэн гидкуазязы бызьыса вуиз Гриша, комсомол ячейкалэн секретарез. Эшсэ адӟемез бере ик бам тыраз пальпотонэз вӧлдӥськиз.

– Тон мар сокем паляськод? Кыӵе ке чача шедьтӥд шат? – исаськыса юаз солэсь Вася.

– Нокыӵе чачаен йырин ӧвӧл ни ай, эше... Асьме ёзъёсмылэн армие мынон дырзы вуиз! – Гришалэн шоканэз мырдэм ӧраз пыриз. – Куинь нунал ортчыса ваньмес призыве ӧтёзы. Валад-а?!

Васялэн йыраз кин ке, оло, нушыен васькытӥз. Нырысь дусымез сярысь малпаз: «Нош Нюраен табере кызьы?»

Со кимышкыныз кымыссэ вай-вай зыраз:

– Малы нош тон армие басьтэмысьтызы сыӵе куанӥд?

Гришалэн синкашъёсыз йырсиез дорозь ӝутӥськизы:

– Кызьы бен уд куаны? Армиысен вань югыт дуннеез адӟомы ук! Малы но солы дышетскомы но. Вот та маскара адямиен – малы, пе, сыӵе куанӥд... Нош татын марлы дышетскод? Кыедын бугыръяськыны? Соизлы асьмеос пичиысен дышемын ни...

Вася берыктӥськиз но йырзэ ошыса обиньзы пала кошкиз. Эшезлы пал кыл но ӧз вера ни...

* * *
Уйин Осьыплэн сад кенерез вӧзын Вася Нюраез кема гинэ возьмаз. Нылаш бер потӥз. Лыктыкуз но, лыктэм бераз сылыкуз но вылаз ялан ӝикытгес кыскыны выриз анаезлэсь дӥсям дукессэ. Куазь салкым кариськиз. Омыр но ай мускыт вал.

Вася солэн синъёсаз учкиз, маке отысь утчаз, нош номыр ӧз адӟы.

– Монэ армие басьто, Нюра...

– Кылӥ.

– Нош тон табере кызьы?.. Монэ кык ар ӵоже возьманы чидалод-а? Уд-тэ шуак мукетызлы бызьы?..

Нюра кит-кит гинэ серектӥз: куараез но, серектэмез но Васялы тодмотэм кадь йӧтӥзы.

– Кемалась ик ӧвӧл, мон тыныд шуи вал: атаеным анаелэсь но уг кылзӥськы – бызё... Нош табере – ӧйтӧд... Кык ар – со ой-ёй-ёй!.. Со куспын тон отын, оло, кыӵе ке городскойзэ шедьтод, нош мон тонэ татын возьмаса мед уло? Туала вакытэ сыӵе шузиос быризы...

Кинлы ке мукетызлы вазиськы – оло, возьмалоз...

Вася сое кема оскытыны курадӟиз: куараез дырекъяз, йырыз виын-виын куалекъяз. Нош Нюра кияз векчи кӧс ваез чигтылӥз но одӥг кыл вылаз сылӥз:

– Уг! Уг! Уг!

Бератаз, чидатэк но вожез потыса, Вася кеськиз:

– Ярам, пӧрмостэм!.. Иське, мыным но уд сюры, мукетызлы но! Нош кинлы ке бызид ик ке, мынам киы тон доры вуоз – тод но ул!

– Тынэсьтыд кидэ вакчиятозы – мон дорозь уд сузьы! – пуштӥз Нюра.

– Кызьы ке но сузьтӥсько!..

Вася кенер вамен тэтчиз но ышиз. Нюра огшап солэсь пыд куаразэ гинэ кылӥз на. Собере ваньмыз шыпак луиз.

* * *
Ӵуказе ӵукнаяз Вася вакчи шубаезлэн кисыяз ӝыны туриж мында нянь донгиз, анаезлэсь лушкемен пуйые пызь понӥз но лесничий доры кошкиз.

Уез чырым но карытэк потэменыз солэн йырыз весь уллане лэзиськыны турттӥз, куректӥсь синъёсысьтыз ялан синвуосыз виязы, быдэс мугорыз висиз.

Пукись вуосыз котыръяса-котыръяса, Вася корказь доры матэктӥз. Лесничий куйыысь ву ӝутъя вылэм.
– Тон монэ утчаськод-а, Василий?

– Тӥледыз, Семён Михайлыч... Армие басьтэмзылэсь азьло огпол пӧйшураны ветлэме потэ на вал...

Паллян пала кырыжтӥськысагес, кияз ведраен лесничий лыктӥз, Вася шоры синъёссэ кыньыртыса учкиз.
– Ортчем арнянуналэ бен мар ке кутӥд-а?

– Одӥг луд кечез бекмыльтӥ.

Соос корка пыризы. Лесничий ведразэ ӟус вылэ пуктӥз но висъет сьӧрысь вуж пыӵалзэ поттӥз.

– Мыным винтовка кулэ вал, Семён Михайлыч... Турын нюкысь мон алигес ӟичыез адӟи.

– Ма, винтовка но сюроз. Нош патронъёсы ӧвӧл.

– Патронъёс ачим шедьто.

– Соку ме винтовка. Бертыкуд пырыса кошкы, ява, ӟичыдэ возьматод!.. Я, сюресэд мед удалтоз!.. – шуиз Васялы лесничий.

* * *
Гурт дорысь ог ньыль иськемын нюлэс вань. Отчы, мур нюклэн меӵ бамалаз, сильтӧлэн погыртэм писпулэн выжыяз, Вася гу лэсьтӥз. Интыез горд сюй тупаз, гудӥськыкуз укыр шугадӟоно ӧйлась: сюез сокем ӧз куашка. Бен со гузэ укыр бадӟым но карыны ӧз тыршы – мугорыз гинэ тэрымон.

Со караз пияш куинь нунал улӥз.

Нюлэскын нуназе шуныт но мускыт, нюк пыдсысь быдэс мугорез юзматӥсь зын лыктэ: со озьы тыпы куар сисьме. Уйин, али гинэ вордӥськем толэзь югытсэ жалятэк кисьтэ ке но, нюклэн пыдэсыз уг адӟиськы ни. Нюклэн вылӥысьтыз ӵаштыртэм, улвай тачыртэм куараос кылӥсько. Соос амалтэк сюлэмез шымырто: кин ке но яр йылтӥ лушкемен лыктэ кадь. Ай дырын-дырын пинал кионъёс вузыны шӧтало – соосыз ини куаразэс уг жаляло, ог-огенызы ӵошатскыса сямен лэзё.

Нуназеосы Вася нюлэскы ӝутӥськылӥз, кынартэм пересь мурт выллем пыдъёссэ мырдэм кыскаса, бусые поталляз. Усьымтэ куаръёс пыр ӟарыт-лыз шур, нош шур сьӧрысь тӧдьы буям коркаос возьматӥськыку, Васялэн сюлмыз кыскаса висьыны кутскылӥз. Собере, шурлэн ӝужыт ярдураз куакъёс пӧлы ватӥськыса, со кема кылльылӥз. Кышноос но нылъёс вулы ветлӥзы. Кыкетӥ нуналаз анаез но вуылӥз. Вася солы черектӥськыны малпа вал ини – гурт пумысь ӵап валэн уробо потӥз.

Нырысетӥ уяз ик, куасьмем куаръёслэсь лэсьтэм валес вылаз выдыса, Вася сур-сур кӧло кожа вал, нош быдэс уез погылляськыса ортчытӥз. Малпаськонъяз-малпаськонъяз мае гинэ ӧз бугыръя – выльысь но выльысь берыктӥськылӥз одӥг малпанэз вылэ: со читыр-чутыр (оло нош, воксё кырыж-мерыж) сюресэ кожиз. Эшшо огзэ валаз на Вася: табере ваньмыз солы пумит луозы – Нюра но, армие кошкем ас ёзъёсыз но, трос мукетъёсыз но. Эшъёссэ арган шудыса келязы, дыр, табере соос выль дуннеез лёгало ни, нош со татын, гондыр гуын, кылле, та нюлэскысен ик сое гуртоосыз быдтозы, со пуны кулэме кошкоз.

Ӵукна ӟардыку ик Вася винтовказэ куштӥз но гурт пала вамыштӥз. Мынэмъяз ассэ дыртытӥз: «Ӵок, котьма мед карозы – милицилы сётӥсько... Пытсазы ке но, калык пӧлын луо... Чидало...»

Со бызьыса сямен шур дуре вуиз но дугдӥз. Шур сьӧрын муръёосысь ӵын ӝутӥське, пудо бӧксэ. Шуак кышкаменыз Васялэн вань вылтырыз суч-суч котмиз. Кышкамез пыдкуказ ик васькиз.

«Куинь арлы пуктозы ук – солэсь ӧжыт уз сётэ... Уг, уг возьматӥськы!»
Вася чутрак берыктӥськиз но, пӧйшурасьёслэсь пегӟись ӟичы музэн, пытьыоссэ сураса-сураса, нюлэс пала шонтӥз.

Куатетӥ нуналаз солэн сьӧраз басьтэм пызез быриз. Винтовказэ пельпумаз поныса, уйин Вася гуртэ кошкиз. Гуртысен, Осьыплэн обинез вадьсы вуыса, со дугдӥз. Гольык улмопу вайёс вискытӥ пиштӥсь укноос адӟиськизы. Витьымтэ шорысь Васялэн Нюраен пумиськемез потӥз.

Пумиськемез но солэн синмаз пальккемез: соин сэрен со дезертир кариськиз, соин сэрен тазьы костаське!

Кенер вамен тэтчиз, ӝог гинэ садэтӥ ортчиз, корказе тубиз, ӧсэз кыскиз – ворсамтэ. Собере корка ӧсэз вӧлак усьтӥз. Ымныраз соку ик адями карлэн шунытэз но зыныз шуккиськизы. Васялэн йырыз поромиз.

Кузё кышно лайиське вылэм. Со ӧс ӟукыртэм пала берыктӥськиз гинэ но, вӧшез выж вылэ усиз. Ӝӧк сьӧрын пукись Осьып нылонзэ кужмысь тазатэмъяськиз, нош Нюра чир кеськиз но висъет сьӧры пегӟиз.

– Кыӵе-мар улӥськоды? – кежмыт вазиз Вася.

– Та-а-ау... ин-марлы-ы... – гуньдылыса шуиз пумитаз Осьып.

Изьызэ гинэ но куштытэк, Вася висъет сьӧры потӥз. Нюра шыкыс вылын пуке вал. Пыдъёсыз дыр-дыр куалекъяло.

– Ӧд шат шумпоты, Нюра? Малы номыр куарадэ уд сётӥськы? – Вася со вӧзы пуксиз, винтовказэ борддор борды урдӥз.

– Шумпотод, о-о! – сипыртӥз Нюра. Собере золгес вераны кутскиз, киосыныз шонаса: шӧдӥськиз, со синвузэ мырдэм-мырдэм гинэ кутыса возе. – Кошкы, Вася, татысь чалякгес! Туж курисько... Районысь милиция лыктэмын, быдэс гуртэтӥ арт шуккыса ветло... Аракы пӧзьтӥсьёсты утчало... Кутозы тонэ... Мын, Вася!.. Жаля монэ!..

– Нош тон монэ жаляд-а? Жаляд-а?!

* * *
Вася висъет сьӧры потыса гинэ вуттӥз – Осьып, йырыныз бӧрсяз шоналтыса, кышноезлы шыпыртӥз:

– Али ик Семён доры бызь!.. Милиция отчы дугдэмын!.. Кысыкгес! А то та шпана чальтчоз я йыруж лэсьтоз!..

Нюралэн анаез шыпытак гинэ корка ӧсэз усьтӥз но пеймытэ ышиз.

* * *
Дыльдызэ шуген ньылыса, Вася куриз:

– Нюра, маке куртчондэ сёт вал... Кыкетӥ нуналзэ ымам номыр ӧй тыры ни...

Нылмурт султӥз гинэ но, со куспын висъетэ пырон дорын Нюралэн анаез кылдӥз. Кияз лампаен, кышетэз пельпумаз лэзиськемын, пӧсяса котмем йырсиез тур-пар пазяськемын. Со жиетэм выллем черектӥськиз:
– Тани со, муньылон! Кырмелэ сое, эшъёс-милицаос!..

Пыран дорын милиционер но адӟиськиз. Кышномуртэз палэнтыса, со янак вамен вамыштӥз но, Вася «та» шуытозь винтовка прикладэныз лампаез шуккиз. Собере укно рамаез ӵыжиз но педло тэтчиз.

Солэсь бамзэ кезьыт омыр ӵушказ. Со кытынзэ-марзэ соку ик валаз. Коркалэн урам палаз будӥсь писпуос ултӥ урам шоры вуиз. Бӧрсяз черекъям, бӧрдэм, косъяськем куараос кылӥськизы. Ӧжыт улыса, корка ӧс йыг ворсаськиз.

– Сыл, Васька!.. Сыл – ыбо ведь!..

Куараезъя Вася тодмаз Прошин милиционерез.

Ӝамдэлы гинэ берыктӥськыса, бызёнъяз ик куара шоры нырысь ачиз ыбиз. Солы пумит наганэн ыбизы. Вася шӧдӥз, кызьы солэсь пельпумзэ маке ӵушказ. Ӟырдатэм бодыен шуккизы кадь. Вӧсь луэмзэ кужмысь вормыса, пияш нош ик винтовказэ ӝутӥз. Табере ни улмопуос вискытӥ бызись вужер шоры ыбиз.

Улмопуос улысь Прошинлэн лябӟем куараен ваземез кылӥськиз:

– Йӧттӥз ук мыным, сволочь!.. Кӧтам... О-о-ой, вань пушкы ӝуа!..

Вулэсь нокыӵе кезьытсэ шӧдытэк, Вася шур вамен пыдын потан азетӥ выжиз. Бӧрсяз топкетӥз кыкетӥез милиционер. Берзэ учкылыкуз, пияш солэсь тӧласькись шинель сӧзыоссэ но киысьтыз наганзэ адӟылӥз. Со вӧзтӥ пуляос шулазы...

Ӝужыт ярдуре тубыса, Вася ачиз но шур дорысь кошкись милиционерлы пулязэ ыстӥз но, дэремезлэсь сирессэ пертчыса, сӧсырмем интыяз ымзэ вуттӥз. Аслэсьтыз кузьыт но шуныт вирзэ кема гинэ сюпсиз. Собере, одӥг ымтыр сюй сыскыса, сое сӧсыр интыяз понӥз. Ньылонысьтыз тани-тани кион сямен вузэм куара потоз шуыса, пиньзэ вань кужмысьтыз куртчиз.

Ӵуказеяз, ӝомал усьыку, Вася выльысь шур доры мынӥз но куакъёс пӧлы выдӥз. Паллян пельпумыз солэн пыктӥз, пуля йӧтэм котыртӥ лызэктӥз ке но, азьло кадь ик ӧз висьы ни, кизэ выретыкуз гинэ вӧсь луылӥз, дэремез ку бордаз бурмиз.

Кема кыллиз пияш, ялан ымаз люкаськись дыльдызэ му вылэ сяласа. Йырыз макмыр дыръя кадь секыт. Вылаз ик воксё уралтӥз ни. Сием потэмзэ ӧжыт ке но зӥбон понна со бадьпу сулэз сыскиз. Дыльдыез эшшо но золгес кошкыны кутскиз.

Шур дуре кышноос вулы вуылӥзы, ведраоссэс тырмытъяса, гурт пала ӝутскылӥзы. Пельпумъёсазы ведраоссы лэйказы. Чылкак пеймыт луыку ини гурт пумысь корка сьӧрысь эшшо одӥг кышномурт потӥз. Сое адӟыса, Вася соку ик гырпумъяськиз вал но, амалтэк музъем вылэ лэзькиз: пельпумыз но, суйыз но сокем вӧсь луизы. Озьы ке но, со выльысь гырпумъяськиз но винтовказэ кутӥз: шур дуре Нюралэн анаез лыктэ вал. Керттэм кышетэз син вылаз ик кыскемын. Шӧдӥське, дыртэ. Вася со шоры мертаськыса учкиз на: «Бен, со». Быдэс гуртын сыӵе яркыт-ӵуж кофта Нюралэн анаез гинэ нуллэ.
– Ме тыныд, кобла, чагиед понна!..

Ыбем куара омырез пилиз. Ведраоссэ куяса, кышномурт гурт пала лашкинтӥз.

– Эк, ма... Ӧй йӧтты ук!..

Васялэн мушка йылаз нош ик ӵуж кофта тэтчаны ӧдъяз. Кыкетӥзэ ыбемез бере Нюралэн анаез мылпотытэк гинэ луо вылэ выдӥз но купыртӥськиз.

Вася дыртытэк шурлэн мукет палаз потӥз но кыллись кышномурт доры матэктӥз. Мыкыртӥськиз. Ныраз соку ик кышномуртлэн пӧсям зыныз пыриз. Вася кышномуртлэсь пертчиськем кофтазэ но кесиськем дэремзэ адӟиз. Син шораз йӧтӥз тӧдьы ноны, ӵыжалэс ноны бирды, нош улӥысьтызгес – пуля пырем пась; со пась котырысь кулэм муртлэн дэремез весь горд вирен котмиз.

Вася солэн кымысаз учкиз но, пумитаз Нюралэн кысӥсь синъёсыз учкизы.

Нюра шур дуре анаезлэсь кофтазэ дӥсяса мынэ вылэм.

Созэ валаса, Вася шуш кеськиз но, луо вылэ купыртӥськем Нюра борды ӝиптӥськыса, котыр дунне тыр вузыны кутскиз. Нош гурт палась воргоронъёс бызьыса лыкто вал ини. Кудӥз-огез бызён сяменыз ик зырен шонаське. Азьпалысьтызы воргорон вӧзын шумпотыса пуны тэтча. Со нош но нош кузёезлэсь тушсэ нюлыштыны тырше.

1925-тӥ ар.

Берыктӥз Пётр Чернов.