Катя. Филипп Кедров
Повесть

Катя. Филипп Кедров

723 {num}

Повесть

ШУР ДУРЫН

Куазь ӝыт вал. Омыр мускыт. Шур вылысь вутурын зын лыктэ. Шунды пуксён пал дарали кадь кисьтаське. Гурезь уллань сусыпуос пӧлтӥ Катя кунян кенере кунян вайыны ваське, эбекъёслэн кесяськем куараосынызы сураськыса, азвесь коньдон кисьтэм кадь, кыдёке пазьгиське ӟозъёслэн чиргетэмзы. Катялэн гинэ мылкыдыз ву пыдсы куштэм из кадь секыт. Кунян кенере лулпуос пӧлы пыриз но, йыраз малпанъёс бугырскизы. Оло улоно, оло ӧвӧл? Улонлэн но пайдаез ӧвӧл. Кудзэ карод? Дораз кунянъёс люкаськизы, бӧксо. Кин ке но гурезь уллань кырӟаса ваське. Ватӥськиз Катя. Ас понназ одӥгзэ малпаз: «Ӵок, уг ул... Мар бен пайдаез тазьы улонлэн? Йырме быдтӥ ке, умойгес луоз...».

Лушкемак бызьыса кошкиз со лулпу арама кузя. Бызе но бызе. Чебер нюк сьӧры вуытозяз бызиз. Нап лулпуос пӧлы пыриз но котырак учкыса пуксиз. Ини толэзь но ин вылэ ӝутӥськиз. Ӟарыт югытэз Катялэн ымныр вылаз усе. Йырысьтыз чалмазэ со куштӥз но бинялтыса зыбын кисыяз понӥз. Паллян кияз кунян гозыез. Нош со куспын кытын ке пыд куара кылӥськиз.

– Катя-а! Катя-а! Кытын то-он? – Максим кесяське.

– Я, кытчы луиз? Кытчы пыриз со? Ӧвӧл, – лулӟылэ Одотья.

– Шае пыроз-а, бертоз али, шедьтэм куректон. Ойдо, анай, бертӥм, – маке ӟеч уж лэсьтэм бере кадь капчи вазиськиз Максим анаез шоры. Озьы кошкиз сюрес кузя.

«Инмар утиз, ӧз шедьтэ. Одно ик виысал со лул басьтӥсь монэ. Ӵок, аслам киыным куло. Та шулдыр куазен, – туж каллен вераз Катя ас понназ. Шуак учкиз котырзэ, кин ке но кылӥз кожаз, лэся. Нокин но ӧвӧл. – Аслам мусо но яратоно интыям мыно», – Катя султӥз но Чимошур дуре вамыштӥз.

Котырак лулпуос. Ву дурын ик бадӟым лабрес лулпу. Зӧк лулпулэн вӧзаз пуксиз. Вуж вуколэн йылыз адске, чал-чал пуке ву, ӝужась толэзь югытъя кисьтаське.

«Тани татын валлян тулыс Койыкен тодматским. Визнаськон сьӧраз ваем вал со... Вӧзаз ик пуктӥз но ӝиг-ӝиг ӟыгыртӥз, чупаз. Ву вылын – визанъёс. Нош сюлмын – шумпотон. Шуныт вераськон... Туннэ ӧвӧл ни со шумпотон. Мон огнам, Койыктэк. Быдтӥз мынэсьтым улон азьме Максим. Мын вал Койык доры – кышкыт. «Кыкнадэс но виё» шуэ. Мыным луыса Койыкез быдтоз. Эк, сюлмы, улэме но потэ, нош малпасько ке, йыры берга. Мон уг ни сюры Койык доры. Максим кие бырытозь, татын, Койыкен тодматскем интыям, йырме быдто. Тэтчо ӧре, ӧр ньылоз монэ, буйгатоз... уз ни лу кайгуэ», – Катя бӧрдӥз но султӥз, кужымез ик бырем, мырдэм вамышъя.

«Тани та лулпу улысен тодматским, татчы кельто тусбуйме. Мед адӟоз Койык, мед шӧдоз сюлмыз, кытын мон. Тани чалмае, мон сое ачим ӝуткаса куи, чеберъяй. Та чалмаез вож йырам эриктэм думизы, улонме соин быдтӥзы, – думиз Катя лулпу улвае аслэсьтыз чалмазэ но пуксиз, секыт, туж секыт бӧрдӥз со ас понназ, кинлэсь ке юрттэт курыса кадь. – Я, ваньмыз, лэся, табере. Ӟеч ул, югыт дунне, огпол ке но буре вай шудтэм Катядэ», – ярдуре ик султыса вераз. Со куспын араматӥ пыд куара шуккиськиз. Катя сое умой-умой кылыса но ӧз вутты, адями дораз вуон азьын гинэ берытскыса учкиз но – Койык! Уг оскы Катя, либрак усиз со ярдуре. Учкиз но – зэм ик Койык. Погылляськыса кутскиз бӧрдыны.

– Мынам шудам, дыр, вуид, мусое. Берпум кылъёсме кылзыны... – музъем вылэ кымин выдыса кыла-бура Катя.

– Учкы ай, зэмзэ но Катя! Малы татын тон? – паллян киысьтыз чорыг лянэссэ но бур пельпумысьтыз кык визнанъёссэ куаляк луыса уськытӥз. Бызьыса мынӥз Катя доры.

– Уд ни тодма монэ, Койыке. Одӥг гуртын улыса, шорад но вазьылыны ӧй дӥсьты. Тани та дуре вуттӥз кион Максим. Ымныры кадь ик, вылтыры копак лыз-вож, уд ни тодма, Койыке, быриз мынам чебере. Мар на мон табере, кытчы пыром, мултэс мурт мон. Мыным котыр сажем музъем тырмысал, уг быгатӥськы кулыны, – чыртыяз ӟыгырскиз Катя дораз мыкырскем Койыклэн.

– Умойтэм вераськиськод, Катя. Кулон сярысь-а кулэ егит муртлы малпаськыны? Улон сярысь малпаськоно, шулдыр улон сярысь. Эн бӧрд, гыдыке, эн чигы сюлэмдэ, трос малпаськи тон сярысь мон, трос уйёсыз ӧй изьы. Тани нош ик кытысен пумиським тонэн, мусое. Кер эн поты, Катяе, мон тонэ азьло кадь ик яратӥсько, уг сёты со урмем пунылы тонэ. Астэ быдтон сярысь нош ноку эн малпа, зарние. Максим кадь эгыр ӝушъёслы сётсконэз ӧвӧл. Асьме кадьёсты мыскылляны соос кемалась дышемын. Маин урод соослэсь асьмеос? Баенызы гинэ вормо котькинэ, калыклэн дасеныз улӥсьёс.
 
Асьмеос ужаськом, соос шулдыръясько, кузёясько. Нош одӥг пол асьмелы но улон вуоз, Катяе, со сярысь мыным Иван Сидорович дышетӥсь вераз. Кыӵе со визьмо, кыӵе усто вераське, нош мылкыдыз буртчин кадь ик. Вань куанер улӥсьёс, пе, одӥг пол эрике потозы, шуэ со. Асьмеос, пе, сое адӟомы на. Нош тон кулыны малпаськод. Улом, Катяе, кема улом, валче, ум сётӥське Максим кадь сьӧсьёслы, – алвылаз выдтыса, йырсизэ маялляса вераз Койык Катялы.

– Зэм-а вераськод, Койык, уг оскиськы? Уд учкы ни ук тон монэ, ныл йырме со тушмон Максим саптам бере, – туж каллен вераз Катя, Койык шоры учкыса. Бам вылтӥз быльыр-быльыр васькись синвуэз толэзь югытъя лысву кадь чиля.

– Зэмзэ верасько, дыдые, яратӥсько мон тонэ, азьвыл сямен ик кужмо. Мынэсьтым со яратэмме нокин но таланы уз быгаты. Трос пол мон малпай, гажанэ, мын но, пӧй, пыр со шайтанъёс доры, тала Катяез. Уг луы, юртсы котыр сандык кадь, собере кышкытэз но озьы туж бадӟым. Кутозы но виёзы.

– Койык, мон доры нош ваньмыз берен берытскиз. Улом, яратонэ, кулытозь огмылэсь огмы ум люкиське. Кызьы ке емыш шунытэз но зорез яратэ, мон но тонэ озьы ик юн яратӥсько. Оскы! – Катя, синъёссэ кыньыса, яратонэзлэсь суд небыт йырсизэ маялляз. Сокем небыт вал солэн кылъёсыз, Койыклэн сюлмаз ӵыжтэм вӧй выллем пыӵазы. – Луоз меда шудмы, мусое? Тани выльысь яратонме шедьтӥ, но... нош ик уг ышты меда? Тонэ быдтэмзылэсь кышкасько... – пыдлось лулӟыса, дырекъясь куараен вераз Катя.