Вармай шуд
Улонысь учыр

Вармай шуд

515 {num}

Рассказ

Котькинлы тодмо: скал вордӥсь муртлы туж трос турын дасяно луэ. Турынэз милям, нюлэс кушъёсысь, нюрвылъёсысь погыртыса, чугун сюрес дуре тыбыр вылын поттылоно луэ вал. Макем секыт уж со.

Вармайлэн турнан удысэз гуртмылэсь ог вить иськемын, «Ударник» станция дорынгес вал. Али отын сюресэз но ӧвӧл ни, нюлэсэз кораса быдтӥзы, Никольскойысь леспромхоз соин йырин куашказ-быриз.
Турын дасян – со ӟырдыт вакыт. Азьвыл вань семьямы кужым тырмемезъя турын бордын выриз:эмеспиос, нылъёс, нылпиос, вармай – ваньзы та секыт уже кыткемын вал.

Огаз шутэтскон нуналэ ми варматаен, тепловозэ пуксьыса, куасьтэм турынмес чугун сюрес дуре поттылыны мынӥм. Ужмес быдэстӥм, ялкарыны пуксим гинэ но, тепловозлэн боз-боз шултэм куараез кыдёкысь кылӥськиз.

Варматай шуэ: «О, та асьмелэн бадӟым шудмы, таид чаклам дырлэсь вазьгес лыктэ ук! Нош малы озьы, уг валаськы».

Ми ке та вие аракымес пичильтык ӟамыртыны, ӧжытак шутэтскыны малпаськом вал. Ӧм вуттэ. Ӝоген тепловоз адӟиськиз. Варматай кизэ ӝутӥз но, со ми вадьсы дугдӥз. «Таӵе тепловозъёс татӥ уг ветло вал кадь» шуыса варматае паймыса машинистлэн кабинаяз ӝутскиз. Мон – бӧрсяз. 

– Коньдондэс татчы понэлэ, – машинист боз-боз куараен милемыз пумитаз но пичи каналэсь корт ӧссэ усьтӥз.

Вармае шорам учке, мон – со шоры. Коньдонмы огмылэн но ӧвӧл. Платформаын пукись бусёнме синйылтӥ. Машинистлы валэктӥсько:

– Гуртамы вуим ке, солэсь коньдонзэ курыса, сюрес дунмес тыром.

Тепловозмы шукырес ӝог мынэ. Кожонъёстӥ ортчыкуз рельсъёс вылысь тани-тани тэтчоз кадь.Вармае пель дорам кариськыса шуэ, мон, пе, та машинистэз уг тодӥськы, мукетъёсыз огзы но коньдон уг курыло вал. Таизлэн кудӟемез но вань кадь.

Посьтол шур вамен выж но ӝоген адӟиськиз. Отӥ потыкумы, тепловозмы рельсъёс вылысь тэтчиз но, шпалъёс вылтӥ кӧня ке дымбыр мыныса, чукинскиз. Нош кызьы меда выж вылысь шуре ӧм усе? Инмар утиз, лэся, милемды. Ву вылозь выж вылысь ог куинь метр. Мон куазь пӧсен усьтэм ӧс куспын сылӥсько вал. Олокызьы ӧсэз ворсаны вуттӥ на. Тепловоз урдэс вылаз усиз но куажыр карыса мон палась ӧсэз паньгатӥз. Кабинае туйнаськыны ӧй ке вуттысал, музэ палдысал но, монэ со нажгатысал.

Варматае, кабинаетӥ питыраса, вань вылтырзэ вӧсь кариз. Платформаын мынӥсьёс сюрес урдсысь куакъёс пӧлы пештылӥзы кусоосын, мажесъёсын, саникъёсын суро. Угось адямиос ваньзы сямен турын дасясьёс вал. Тросэз соос пӧлысь сӧсырмыны сюризы. Нош мынам вылам пӧртэм корт арбериос усьылӥзы но ымнырме вирӟектытӥзы, лыз-вож каризы.

Ӝуштыса, ойгетыса но мар тепловоз доры кызьы но озьы люкаським. Кин ке юаз:

– Нош кытын машинист?

Адӟисез но соку ик шедиз:

– Тӥни, тӥни, нюлэскы чутыса пегӟе!

– Э, варматай, тӥни кыӵе вылэм тынад шудэд, – пограм машина шоры возьматӥсько.

– Бен, вармай шуд таӵе но луэ иське, – воргоронъёс пӧлысь кин ке но куаразэ сётӥз.

Ма, шуд шуод ини, таӵе шукырес адӟонэ шедьыса, улэп кылим бере. Та учыр бере куамын арлэсь кема ортчиз ини, варматае но улонысь кошкемын ни. Нош Посьтол шур доры тепловоз пограм интыез постолъёс табере «Вармай шуд» нимало, шудтэм учыре ӝимон дыръязы бырытэк кылемзэс тодазы вайыса, дыр.