Жозе Сарамаго
Мировая литература

Жозе Сарамаго

465 {num}

Жозе Сарамаго – современный португальский писатель, поэт, драматург и переводчик, лауреат Нобелевской премии по литературе (1998).

Жозе Сарамаго (1922–2010) — тодмо португал писатель, поэт, драматург, эссеист, литература удысын Нобель премилэн лауреатэз (1998). 

1947-тӥ арын Сарамаголэн нырысетӥ «Земля греха» нимо книгаез потӥз. Та книгаез бӧрсьы со эшшо кӧня ке романъёс гожъяны кутске, но берло вала, солы, егит адямилы, дунне литература удысын номыр сярысь вераны шуыса. Озьы 19 арлы Сарамаго ыше португал литератураысь. Но солэсь ышемзэ соку ӧжытэз кин адӟиз, вылды. Угось та нырысетӥ книгаяз Сарамаголэн аслаз манерыз но, талантэз но уггес адӟиськы на вал. Нош 1966-тӥ арын «Возможные стихотворения» нимо кылбуръёсын сборниксэ критикъёс но лыдӟисьёс вылӥ дунъязы.

Сарамаго котькуд ласянь таланто адями вал, но тужгес но яркыт со висъяськылӥз дунне улон шоры философ сямен учконэныз. «Учебник рисования и каллиграфии» романэз но, философской новеллаосын «Квазиобъект» нимо сборникез но (1978), «Возможные стихи», «Быть может, это радость» (1970), «С этого и с того света» (1971) кылбур бичетъёсыз но, драматургиез но — ваньзы соос сӥземын политической ужпумъёсты рос-прос сэрттон-пертчонъёслы.

1980–1990-тӥ арын Сарамаголэн творчествояз самой висъяськись аръёс луо. Ӵапак та вакытэ солэн пероез улысь пуштроссыя, формаоссыя но темаоссыя ог-огзылы ваче пумит луылӥсь книгаос кылдыло. Кылсярысь, «Что я буду делать с этой книгой?», «Ночь» пьесаосыз, «Восставшие из праха», «Балтазар и Блимунда», «Год смерти Рикардо Рейша», «Каменный плот», «История осады Лиссабона» романъёсыз но мукет. Малы та произведениос тужгес но тунсыкоесь? Сарамаго та произведениосаз вань сюлэмзэ усьтыса вера аслэсьтыз дунне шоры учконзэ, со уг кышка, сое йӧспӧртэм малпанъёсыз понна жугозы, кокчалозы шуыса.

Кылсярысь,  солэн «Воспоминание о монастыре» романэз, кудзэ ас вакытаз экранизировать карыны турттэ вал ачиз Федерико Филлини, авторлэн кышкатэк верам малпанъёсызлы луыса, со вань Ватиканэз ик Сарамаголы пумит ӝутскытӥз. Но католической черкез тужгес но зол пуромытӥз Жозе Сарамаголэн 1991-тӥ арын печатлам «Евангелие от Иисуса» романэз. Со дыре ик пусйыны кулэ, та «богохульной книга, кудӥз дуннеысь зэмлыко историез таркаса, серемес каре Выль Заветысь персонажъёслэсь сямъёссэс», берыктэмын куамынлэсь ятыр дунне кылъёсы, кызь пол переиздаваться кариськемын Сарамаголэн аслаз шаераз.

Зэмзэ ке учконо, Сарамаголэн лыдӟисьёсыз «Евангелие от Иисуса» но «Каменный плот» романъёсты Евангелиысь геройёсты серекъян понна киязы уг кутыло, дыр. Писателез соос ӵемысь пырто «магической реализмлэн» ӧраз, ӵошато сое тодмо латиноамериканской писательёсын: Борхесэн, Кортасарен, Маркесэн. Но ачиз Сарамаго соглаш ӧз кариськылы таӵе ӵошатонъёсын, со ассэ Сервантеслы но Гогольлы матэгес карылӥз. Таяз номерамы Сарамаголэн уно пӧртэм интервьюосысь тужгес тунсыко веранъёсыз.

— Кызьы валэктоно — Тӥ португал писатель шуыса — угось Тӥ туж кемалась улӥськоды ини Испаниын, Канар шормуӵъёсын?

— Малы мон Лансарот шормуӵе улыны кошки — со тросэзлы туж тодмо тема. 1992-тӥ арын португал правительство мынэсьтым «Евангелие от Иисуса» романме аспӧртэмлыко критикаен ӵабышъяны ӧдъяз. Культурая министерстволэн указэзъя та романэ, со вакытэ ог дасо пала кылъёсы берыктэмын ке но вал, быдэсак ӵушыса куштэмын луиз Европаысь литературной премиен дунъян понна чаклам произведениос пӧлысь. Христианъёслэн религиозной шыкысъёссы борды, пе, мон кырмиськисько. Со, конечно, монэ туж паймытӥз но вожомытӥз.

Озьы ик тӥляд юандылы пыр-поч валэктоно ке, Канар шормуӵъёсын мынам ӵыжы-выжыосы уло, соин сэрен Пилар кузпалэным — со испанка — малпамы отчы интыяськыны.

— Кызьы ужан  нуналды ортче, куке Тӥ гожъяськон уж борды кутскиськоды?

— Мон  тыршисько  нуназе бере ужаны: вить часысен укмыс час ӝытозь.  Куддыръя  ӵукна. Но ӵукна мынам дыры мукет писательёсын но лыдӟисьёсын вераськыса яке электрон почта пыр гожъяськыса ортче, яке книга лыдӟыса но мукет. Нош гожъяськон уж борды, кызьы верай ини, ӝыт басьтӥськисько. Но зэмзэ ке, куддыр со ужан радлыкез воштоно луэ. Кылсярысь, книгаме йылпумъян азьын, куке рукописьме печате ӝог сётыны кулэ, мон ваньзэ куштӥсько-палэнтӥсько — ӝытсэ но, ӵукназэ но ужасько ни.

— 1998-тӥ арын Тӥледлы Нобель  премия  сётӥзы. Трослы-а  со  воштӥз творческой но общественной улондэс?

— Со вал вунонтэм вакыт. Но та учыр туж ӧжытсэ воштӥз мынам  творческой  ужам. Мукет сямен вераса, туж но туж трос дырме  быдтӥз. Таӵе премия басьтэм бере конгрессъёсы, конференциосы, пумиськонъёсы,  заседаниосы сомында ӧтёнъёс «омырско».

Со сяна, издательстволэсь куронъёссэ быдэсъяно луылӥз. Котькуд выль книгалэн тиражез потэм бӧрсьы мыным кулэ вал лыдӟисьёсыным пумиськонэ пыриськылыны. Со понна мыным эшшо но ӵемгес кунгож сьӧры потано луиз. Но вераны кулэ созэ но, Нобель премия басьтэмелэсь азьвыл но мон дорам туж ик ӧй пукылы.

— Нобель премия котьку но мукет кылъёсы берыктон доры вае. Кыӵе кылъёсы но кыӵе странаосын книгаосты берыктэмын?

— Кызьы али тодам вайисько, Нобель премия басьтон азьын мынам книгаосы куамын кылэ берыктэмын  вал  ини.  Но та премия  бере ог ньыльдонозь йылӥз. Берыктӥзы, кылсярысь, корей, фарси, турец, китай но япон кылъёсы. Мукет  сямен вераса,  Нобель  премилэн лауреатъёсызлэн книгаоссы туж секыт кыл барьеръёсты ортчо.

Конечно, котьку но сюлэмын шуныт луэ, куке басьтӥськод аслэсьтыд книгадэ, кудӥз туж шер пумиськылӥсь но тодмотэм кылъёсы берыктэмын. Кылсярысь, хорват кылэ.

—   Португалиын сяна, кыӵе кылъёсын Тӥляд книгаосты бадӟым тиражъёсын потӥзы?

—    Англи кылэ ваньмыз книгаосы  берыктэмын шуыса  тодӥсько.  Соос печатласькизы уно тиражъёсын Великобританиын но, США-ын но. Кыкетӥ интыын сыло, вылды, испан  кылын  потӥсьёсыз. Испаниын но, Латинской Америкаын  но  уно  берыктэм изданиос  потӥзы. Мыным секыт вераны цифраосын. Но, малпасько, трос лыдӟисьёс — испан кылэз тодӥсьёс. Кылсярысь,  «Пещералэн» тиражъёсыз одӥг Испаниын гинэ  140 сюрс экземплярозь будылӥзы. Со сяна, та книга бадӟым тиражъёсын вӧлмемын Мексикаын, Аргентинаын, Чилиын. Нош Португалиын «Пещера» романлэн вань тиражез, куиньзэ ик изданиосты ке пусъёно, 90 сюрслэсь ятыр ӧз луы.

—   Туннэ вакытэ, куке СМИ, тужгес но телевидение, планеталэн  вань  пасьёсаз-сэрегъёсаз  пырыны быгатэ,  художественной литературалы  аслэсьтыз позициоссэ ӧжыт чалмытатоно луиз. Кызьы Тӥ СМИ  шоры учкиськоды, тужгес  но  телевидение шоры?

— Берло дыре мон ӧжытгес телевизорез учкисько. Испаниын гинэ ӧвӧл, Португалиын но. Мукет странаосын  мынӥсь каналъёсты но. Мыным туж ӵем дыръя отельёсын улыны кылдэ, но отысен мон «ящикез» уг ик лэзиськы. Азьвыл телевидение ке вылӥ уровенен вал, туннэ нуналэ сыӵе телевидение ышемын. Мукет сямен вераса, учкись понна жугиськон «обратной эффектсэ»  сётӥз.  Ваньзы малпазы вал, каналъёс куспын конкуренция  телевиденилэсь качествозэ будэтоз шуыса. Нош туннэ нуналэ асьмеос тодӥськомы, со озьы ӧз луы. Телевизор но телевидение, культуралэсь   узырлыксэ утьыса возись арбери, калыкез палэнтӥсь тӥрлыкезлы пӧрмиз.

—  Тӥ телевидение шоры вожомыса учкиськоды?

— «Мыным телевидение нокыӵе уг поты» шуыны мон уг турттӥськы, но мон адӟисько солэсь урод палзэ, кудӥз пожа-сура вылӥ уровенен культураез. Ӵемысь отысь кылӥськод уно йӧнтэм,  йырез  висьытӥсь, сюлэме йылсо пуртэн бышкась «информациез», кудзэ  кытӥяз оло вераны но кулэ ӧвӧл, дыр. Оглом,  телевидение туннэ туж ляблыко ужа. Та сярысь тодо асьсэос учкисьёс но, телевизионной программаосты дасясьёс но.

—  Нош мар Тӥ лыдӟиськоды?

—  Мынам улонам вуиз ини сыӵе дыры, куке ӧжытгес но  ӧжытгес  лыдӟиськыны кутскиськод.  Ӵемысь мон кемалась лыдӟем яке алигес «усьям» произведениос борды выльысен  берытскылӥсько. Конечно, выль книгаосты но  чаклатэк  уг  улӥськы. Но мынэсьтым арлыдме басьтоно ке, дыры мынам зэмзэ но туж-туж ичи ини. Соин ик мон ӵемгес но ӵемгес гожъяськон удысам быдэсак «выйылӥсько».  Но выль литератураез эскерыны тыршисько ик, тужгес но егит авторъёсты.

— Тӥ гожтӥды даслэсь уно романъёс но повестьёс, кудъёсыз литературной критикъёсын но лыдӟисьёсын пӧртэм сямен дунъямын. Кудзэ соос пӧлысь тужгес но пусйысалды?

— Таӵе  юанъёслы  мыным секыт валэктон сётыны. Литературоведлэн но авторлэн учконъёссы трос дыръя одӥг кадь уг луо. Автор аслэсьтыз книгаоссэ кыӵе ке ранге пуктэ тужгес кулэлыко луэмезъя но кельшемезъя. Но со, котьма ке но, литературоведъёслэн ужзы мед луоз. Ӵемысь дыре писательлэн аслаз книгаосыз шоры учконэз герӟаське книгалэн кылдон дыр кусыпеныз, со вакытэ кылдэм учыръёсын. Соин ик мон котьку верасько, тужгес но кельше берпуметӥ гожтэм книгае.

Мыным дуно ваньмыз книгаосы, соосын мынам вань улонэ герӟаськемын. Но соос пӧлысь одӥгзэ пусйыны быгатӥсько ик. Со произведениме гожтыкум, мон бадӟым шуг-секытъёсын пумиськи, оло соин но со шоры мукет учконэ. Улонам кылдэм ужпумъёсты мон сэрттыны-пертчыны быгатӥ шуыса малпасько, книгае но алама ик ӧз пӧрмы кадь. Нимаське со –  «Год смерти Рикарду Рейша». Отын мон  Фернандо  Пессоа Португалиысь писательлэн улонэныз герӟаськем темаез басьтӥ.  Романын вераське мынам шаерам 30-тӥ аръёсы вылэм учыръёс сярысь. Конечно, со Европалэн историез. Та книгае мыным туж дуно потэ. Но со уг вера, мукет книгаосы борды мукет  синмын, мукет мылкыдын  учкеме  сярысь. Вераны быгатӥсько, одӥгъёсыз соос пӧлысь ӟечгес гожтэмын, нош мукетъёсыз уродгес... Кызьы ваньмыз асьме улонамы.

– Прессаез лыдэ басьтоно ке, творчествояды тужгес но валтӥсь инты «Евангелие от Иисуса» роман басьтэ?

— Малпасько, татын саклык висъяны кулэ романлэн темаезлы историе пырем  геройлэн, Иисус Христослэн улонэз книгаын шараяськемезлы. Та романлэн туж  тодмо но валтӥсь луэмезлы кичӧлтӥсь луиз, конечно, португальской правительстволэн сое цензурае сётыны турттэмез. Озьы ик «Евангелие от Иисуса» кыкетӥез пӧртэм кылъёсы берыктэм книгае луиз. (Нырысетӥ интые потӥз «Воспоминания  о  монастыре» романэ.) Та произведение котырын правительствоен ӝутэм-вӧлдэм ченгешонъёс солэсь популярностьсэ туж зол йылэтӥзы. Лыдӟисьёс гинэ но кык группалы люкиськизы, кин ке соглаш луиз правительстволэн янгыше уськытэменыз, мукетъёсыз пумит султӥзы кивалтэтлэн литературной улонэ пыриськемезлы.

Дасо арлэсь азьвыл та книга котырын ӝутӥськем ченгешонъёс али ке но улэп на. Католикъёс та книгаез туж шимес шуыса лыдъяло. Но, учконо ке, визьмо католикъёс дунъязы та романме. Со кельшиз соослы. Соос пӧлысь тросэз гожъязы но жингыръязы мыным, ӟеч кылъёс вераса.
Мон понна Иисус Христос вал огшоры адями. Адями, кудӥзлы удалтӥз яке ӧз удалты, солы Инмарлэн быръёнэз тупаз шуыса. Инмарлэн, кудӥзлы Христос оскиз. Мон, кылсярысь, уг оскиськы Инмар вань шуыса. Со Инмарен сётэм миссиез быдэстон понна быръемын вал, но, кызьы асьмеос тодӥськомы, со ик сое кулонэ вуттӥз.

— Ӵемысь  авторъёс произведениязы  асьсэлэсь философизэс пыӵато — дунне шоры учконзэс, политикаен герӟаськем  малпанъёссэс но мукет. Со Тӥляд творчестводылы тупа-а?

— Малпасько, тупа. Зэмзэ ке, мон литератураез категориосъя уг люкиськы. Вань, кылсярысь, развлекательной литература. Со но кулэ. Дырын-дырын мон но киям басьтӥсько со книгаосты, кудъёсыз юртто кыӵе ке кулэтэм яке люкетӥсь малпанъёсылэсь палэнскыны.

Но вань мукетыз но литература, кудӥз малпаськыны косэ. Ачим сярысь ке верано, мон ноку но ӧй быгатысал роман гожтыны, монэ бурдъятӥсь, сюлмаськытӥсь темаос, юанъёс ке отчы ӧз пырысалзы. Книга мон понна — со инты, кытын автор малпаське дунне сярысь, улон сярысь, общество сярысь, история сярысь, дыр сярысь, ортчемез но вуоноез сярысь. Конечно, азьпалэз сярысь но. Соин ик литература — со малпаськон понна инты но пространство.

Солы, кинлы тунсыко потэ мынам учконэ, туж капчи басьтыны со сярысь информациез. Мынэсьтым книгаосме лыдӟыса, со одно ик пушкам вордскись малпанъёсме но, тужгес сюлэмшугъяськытӥсь юанъёсме но шӧдыны-валаны, аслыз усьтыны быгатоз.

— Берло  10 ар  куспын дунне вылын бадӟымесь воштӥськонъёс луизы. Кызьы тӥ пумитады, кылсярысь, СССР-лэсь куашканзэ, Европа сообществолэсь Европа союзлы берытсконзэ, уно пӧртэм ож конфликтъёсты Африкаысь, Азиысь яке, шуом, Вуж дуннелэн аслаз сюлэмысьтыз ик?

— Дунне туннэ экономической  глобализацилэсь феномензэ улыны-вормыны курадӟе. Мон сямен,  со тоталитаризмлэн ик  выль формаез.  Асьмеос улӥськомы синтэмлыко вакытэ, кудаз ӧвӧл выль но шонер политической идеяос, нош вужъёсызлы пумит султыны нокин но уг дӥсьты. Асьмеос улӥськомы сыӵе вакытэ, кытын калыккуспо профсоюзной движенилэн ӧвӧл аслаз ымнырыз, секталаез но данэз.  Асьмеос улӥськомы сыӵе вакытэ, куке туж трос верасько демократия сярысь, но ассэ демократиез уг лэсьто. Угось уг луы вераськыны демократия  сярысь, куке зэмос власть калыкъёсын быръем правительствоос киын ӧвӧл,  куке солэсь тэльбугозэ возё  транснациональной монополиос.

Ужпум татын абсурдозь вуэ. Асьмеос демократия сярысь вераськиськомы, мае ке но шӧдыны луымонзэ син азямы пуктыса. Нош валаны тыршыса, умойгес ке учкиськод, соку ик валаськод, асьме вакытэ демократия сярысь вераськон со умойтэм сямлы тупа шуыса. Дунне вылын власть туннэ чик но демократической ӧвӧл. Зэмос экономической власть но демократической ӧвӧл, малы ке шуоно нокин но ӧз бырйы бадӟым транснациональной компаниослэсь кузёоссэс. Вот со бордын ик драма.

Мукет сямен ке учконо, паллянъёс, яке соос, кинъёсты асьмеос инерциезъя «паллянъёс» шуыны дышемын, туннэ чик но паллянъёс ӧвӧл ини. Паллянъёс туннэ прагматикъёслы берытскизы. Туннэ паллянъёс — со политической «центрлэн» выль формаез. Нош паллян правительствоослэн властьсы ӧвӧл. Озьы ке но граждан калыкъёс али но малпало, быръёнъёсы ветлыса, соос мае ке но воштыны быгатозы шуыса. Бен, шонер, соос быгатозы воштыны правительствоез, куштыны президентэз, соос интые пуктыны мукет правительствоез но мукет президентэз. Но асьмеос ум быгатӥське воштыны, асьмеос йӧтскыны но ум быгатӥське зэмос экономической власть борды, малы ке шуоно со дорозь асьмелэн киосмы уг сузё, нош ачиз со быгатэ асьмемын кивалтыны. Озьы луоз со дырозь, куке уз кылдэ выль малпанъёс, кудъёсыз быгатозы асьсэ котыре калыкъёсты огазеяны.