Марио Варгас Льоса
Мировая литература

Марио Варгас Льоса

623 {num}

Таяз арын 28-тӥ южтолэзе Марио Варгас Льосалы тырмиз 80 арес. Марио Варгас Льоса – Перуысь прозаик, туала латиноамерикан литератураын тужгес валтӥсез гожъясь. Со куамынлэсь трос романъёс, эссе но пьесаос гожтӥз, кудъёсыз пӧлын «Город и псы» (1963), «Зеленый дом» (1968), «Разговор в Соборе» ( 1969), «Исследование о творчестве Флобера» (1975), «Война конца света» (1981), «История майты» (1984) но мукет. 2010-тӥ арын Марио Варгас Льоса литература удысын Нобель премилэн лауреатэз луиз.

– Тӥ лыдъяськоды, писательлэн улонэз юн герӟаськыны кулэ калык улонэн? (1990-тӥ арын Тӥ баллотироваться кариськиды Перуын президентэ). Тӥ али ке но оскиськоды-а, литератор политикалэсь палэнын луыны кулэ ӧвӧл шуыса?

– Мон вырисько политикаен писатель сямен. Мон гожъяськисько, пӧртэм дебатъёсы пыриськисько. Но мынам ӧвӧл быгатонлыке но, призвание но политикаен вырыны. Мынам удысэ – литература. Озьы ке но, мон лыдъясько, писатель аслаз странаезлэсь улонзэ ӟечгес карон бордын тыршыны кулэ, тужгес но соосаз, кытын улон туж ик капчи ӧвӧл, нош со – дуннеысь тросаз странаосын. Мон Перуын президентэ баллотироваться кариськыку, странаын туж секыт вал, соин мон мынӥ политикае. Демократиез утён понна. Но озьы ке но мон асме политикен уг лыдъяськы.

– Иське, мон юало мукет сямен: мар со писатель луон, кудӥз мынӥз политикае?

– Таиз писатель бордысь потэ. Одӥгъёсыз быгатыса куто гожъяськон ужзэс но политической улонэ пыриськонзэс. Мукетъёсыз тыршо туж шер потаны калык азе. Соос тожо сӥлы карымон. Но, мон сямен, тросаз учыръёсы, политикаез адӟемпотостэм кариськод ке но, тон одно кулэ астэ со удысын эскерыны: малпан сётыны, публичной дебатъёсын кулэлыко темаосты ӝутыны – ӟеч улон, война, адямилэн правоосыз, лушкаськон-йыртэман, культура сярысь. Вань уно темаос, кудъёсызъя писательёс быгато асьсэ малпанзэс шараяны. Мон сямен, соослы библиотекаосы пытсаськыса пегӟыны кулэ ӧвӧл асэнызы историез лэсьтонлэсь.

Мыным потэ, литературалэн быдэсак реальностен герӟаськытэк кылемез яке кӧш, яке кузьыт, яке лултэм луэ. Вылӥ литературной произведениос котьку иворто, мар луэ обществоын, кыӵе солэн валтӥсь ужпумъёсыз, кыӵеесь адямиослэн учконъёссы. Та пумысен ке, мыным потэ, литература но, оглом искусство но юн-юн герӟетэн возиськыны кулэ котырысь дуннеен, писательлэн визьлобанъёсыныз, пилемсьӧр малпанъёсыз гинэ отын луыны кулэ ӧвӧл.

– Иське, Тӥ лыдъяськоды, литературной произведение быгатэ мае ке воштыны котырысь улонын?

– Шонер. Мон малпасько, искусстволэн бадӟым кужымез вань зэмос улонэз воштыны. Ужпум со бордын гинэ, асьмеос со воштон кужымез нокызьы но мертаны ум быгатӥське. Асьмелэн уг луы шуэммы: «Война но улон» сярысь роман кыӵе ке эффект сётэ». Сое уг луы адӟыны но киын кутылыны. Но мон  оскисько, аслэсьтым адямиос но дунне шоры учконъёсме юн кари, малы ке шуоно мон лыдӟи быдӟым книгаез. Литература тонэ эшшо но шӧдӥсь каре – курадӟонысен кутскыса шудбурозь. Но мон юн оскисько, литературалэн но искусстволэн вань бадӟым кужымез улонэз воштыны.

Котькуд тоталитарной режим ялан тырше литератураез «кырмыса возьыны», оскытэкгес со шоры учкыны, малы ке шуоно отын властез курлан но ватӥськыны быгатэ. Со зэм. Умой произведениосын тодматскем бӧрсьы адямиосын секытгес луэ манипулировать карыны – пропаганда но власть кужымъёсын.

– «Похвальное слово мачехе» романды Тӥляд кӧня ке укша Гарсия Маркеслэн «Сто лет одиночества» романэзлы?

– Татын магической реализмез ӧвӧл, Маркеслэн кадь. Латиноамерикан литератураын фантазия туж кулэ, со шонер. Маркес, Борхес, Кортасар. Мынам книгаосы матынгес реальной дуннелы, фантази дуннеен ке ӵошатоно.

– Маркес сярысь вераськон потӥз бере, верало, Тӥляд соин 30 ар ӵоже кусыпъёсты уродэсь возисько ини (кубинской революция шоры учконъёсты пӧртэм луэмен сэрен). Кыӵе Тӥляд кусыпъёсты Гарсия Маркесэн?

– Та сярысь мон номыр но уг вера. Мынам но, Маркеслэн но азьланяз биографъёссы луизы ке, соослы вань мар бордын йырзэс тӥяны. Со но, мон но та югдурез комментировать ум кариське (серекъя).

– Валамон. Тӥ Флобер сярысь книга гожтӥды…

– Зэм, «Мадам Бовари» сярысь.

– Мар Тӥледыз герӟа Флоберен?

– Нырысь ик, мыным потэ, со вал быдӟым писатель. Со гожъяз паймымон чебер романъёс, тужгес но «Мадам Бовари». Но уж со бордын ӧвӧл. Со мыным туж юрттӥз, куке мон егит вал. Мон вуи Францие 1951-тӥ арын. Мон вал сокем синмаськемын «Мадам Бовари» романлы, соин кутски Флоберлэсь вань ужъёссэ лыдӟыны. Но со эскерон мыным бадӟым пайда вайиз, тужгес но гожтэтъёсыз, кудъёссэ со гожъяз, вить ар ӵоже романэз бордын ужакуз. «Мадам Бовари» романзэ гожъякуз, Флобер гожъяськыны гинэ дышетске вал ай. Аслаз нырысь произведениосаз Флоберез ачиз кадь ӧй вал – троссэ со басьтылӥз лыдӟем книгаосысь. Но солэн вал быдӟым амбициосыз. Солэн потэ вал быдӟым писатель луэмез. Но аслыз ачиз со луиз жалятэк курлась критикен. Флобер трос пол выльысен тупатъяса гожъяз, котькуд кылыз бордын ужаса. Со малпаз гений луыны. «Мадам Бовари» зэм но возьматэ, со озьы луыны быгатэ шуыса. Дисциплина, гожъямед шоры критической учкон котьку сюрес сёто дуннее вылӥ ужъёсты поттыны. Гениен вордӥськыны луэ, нош астэ гений дорозь вуттыны капчи ӧвӧл. Флобер ассэ быдӟым писательлы пӧрмытӥз лул кужымезлы но мылкыдэзлы луыса. Солэн примерез – бадӟым юрттэт-оскон солы, кин гениен ӧз вордскы. Мон ӧй вордӥськы гениен, но мон дышетски Флоберлэн примерез вылын.

– Политика улонэ юн басьтӥськем писатель, мар Тӥ малпаськоды экономической кризисысь потон амалъёс сярысь?

– Асьмеос туннэ улӥськомы мукет дуннеын – глобализация дуннеын, нош солэн межа гожъёсыз ӧвӧл. Со кылдытэ выль югдур. Мынам шӧдонэ вань, асьмеос, азьвыл улонэн ӵошатоно ке, ӟечгес улыны кутскомы, вылды. Глобализация улсын куанер странаос али быгато азинскыны азьло дыръёслэсь эшшо но ӝоггес. Мон оптимистлэн синъёсыныз учкисько улон шоры.

– Но та кризисэз нимало капитализмлэн кризисэныз.

– Капитализмлэн котьку но кризисъёсыз луылӥзы – солэн кылдэмез дырысен. Ойдолэ оскоме, та кризис асьмелы системалэсь шекъёссэ тупатыны юрттоз шуыса. Кылсярысь,  капитализмлэн  валтӥсь проблемаез – коррупция, финансовой системаез ӧжыт чаклан. Капитализм воксё но – со система, кудӥз урод ик уг ужа. Тодады вае ай мукетъёссэ «выйытӥсь» общественной системаосты, кудъёсыз калыкъёслы сомында шуг-секытъёс но курадӟонъёс вайизы XIX-тӥ дауре, – социализм, коммунизм. Соос уг ужало,  катастрофаосы гинэ нуо, тоталитарной режиме. Нош асьмеос туннэ нуналэ ортчись системаосты «усьтӥмы» ке – прессалы ке эрик сётӥмы, властьлы пумит вераськонъёсты шара поттыны дӥсьтӥмы ке, политика партиослы эрик сётӥмы ке, адями катъёсыз чакласа улӥмы ке, – ваньмыз со капитализмлэсь    «мылкыдъёссэ» кулэстоз но ӵошкытатоз сое.

– Тӥ Бродскиен тодмо вал шуыса тодӥсько?

– Ми эшъёс вал. Со вал туж харизматичной адями. Сыӵе ӟуч адями:  сентиментальной, лякыт, идеалист. Туж умой тодэ вал англи литератураез. Англи но американ поэтъёслэсь кылбуръёссэс учкытэк   вераны быгатэ вал. Ми пумиськылӥмы соин США-ын, Великобританиын – милям вал одӥг издательмы.

– Нош  марлы  дышетыны кулэ литература?

–  Литература дунне шоры критически учкыны кулэ. Адямиосыз шудо карыны – вот марлы кулэ дышетыны асьмемыз литература. Асьмеос тыршиськомы  буйгатыны асьме мылкыдъёсмес, куронъёсмес, но луэ вутскыны бадӟым ужъёс дорозь но. Литература луонлык сётэ кыӵе ке но опытэз адӟыны, кудзэ асьмелэн куке но бӧрысь басьтэммы луоз. Асьмеос быгатӥськомы   пӧртэм   кунъёсы вуылыны, вераськыны соосын, кин улэ мукет странаосын но мукет дыръёсын. Асьмеос лыдӟиськомы Гомерез, Дантеез но сыӵе амалэн пыриськомы вашкала дуннее. Асьмеос шедьтӥськомы со текстъёсысь сое, мар луэ валамон но кулэлыко туннэ нуналэ.

– Озьы ке но асьмеос Гомерез яке Дантеез валаськомы туала сямен.

– Конешно, «Дон Кихотэз» туннэ лыдӟоно мукет сямен, кызьы со вал IV даур талэсь азьвыл, но усто книгаос уг куло. Соослэн «веранзы» кыле мукет дыръёслы но, мукет культураослы но.

– Тӥ малпаськоды,  Тӥляд книгаосты, кудъёсаз Тӥ ӝутӥсь-коды туннэ нуналэ политикаен герӟаськем ужпумъёсты, тун-сыко луозы на 100 ар ортчыса но?

– (Серекъя.)  Мон  оскисько. Мон уг быгатӥськы меӵак озьы ивортыны, но куке мон гожъясько, мон тыршисько сое лэсьтыны умой но оскисько, книгалэн кузь улонэз луоз шуыса. Соиз ини вуоно дырысь лыдӟисьёслэн ужзы. Оло нош, сю ар ортчыса, книгаос но уз луэ ини – одӥг гаджетъёс кылёзы. Но озьы ке но мон туж тыршо (горе).

– Нош кызьы Тӥ учкиськоды книгаосады асьтэ улонысьтыды басьтэм учыръёсты пыртон шоры?

– Котькуд книга кылдэ гожъясьлэн улонысьтыз. Йырсазь писатель понна туж кулэ, но со уг возьматы, вань романъёс автобиографической кулэ луыны шуыса. Фантазиед борды пыкиськыса, тон лэсьтӥськод мар ке но бадӟымзэ, со бадӟымгес луэ аслад улон опытэдлэсь.

– Кыӵе книга, Тӥ малпамъя, дуннеез зуркатӥз, историлэсь азьлань сюрессэ воштӥз?

– Мыным потэ, Виктор Гюголэн «Отверженные» романэз, – та книга нациослэсь улонзэс воштӥз. Ламартин гожъяз кӧшкемыт арбериос «Отверженные» книгалы пумит: со урод книга, кудӥз адямиез дышетэ ноку луонтэмзэ утчанлы-осконлы. Мыным потэ, «Отверженные» – со тужгес устоез произведение, кудзэ луэ лыдӟыны. Та луонтэмзэ «юэм потонын» вань мар ке но выжыкыл пушкысез, ведь ноку луонтэмез сярысь малпаськон – со адямилы сыӵе тупа. Мон лыдъясько, ваньмыз быдӟым произведениос, вань-мыз вылӥ книгаос зэмос улон вылэ туж зол влиять каризы.