Мо Янь
Мировая литература

Мо Янь

1667 {num}

Мо Янь – тужгес тодмо китай писатель, Нобель премилэн лауреатэз. Солэсь произведениоссэ туж ӵем пӧртэм кылъёсы берыкъяло. Вордӥськиз 1955-тӥ арын Шаньдун карын фермеръёслэн семьяязы. Кызь аресаз ас мылкыдызъя калыкез мозмытон армие кошкиз но со вакытэ ик гожъяськыны кутскиз. Со дырысен Мо Янь кӧня ке романъёс но веросъёсын сборникъёс гожтӥз ини. Тужгес тодмо луэм произведениосыз: «Горд гаолян», «Бадӟым гадь, паськыт берпал», «Улон но кулон жадьыто монэ», «Бака».

Тӥляд романъёсады действиез ӝыныё малпам – кызьы со вал, шуом, Фолкнерлэн (Америкаысь лымшорпал) – ортчо городын, солэн прототипез луэ Гаоми кар. Мар бен Тӥледыз выльысен берытскытэ ӝыныё малпам дуннее но лыдӟисьлэсь учконзэ чылкак мукет пала воштонэ?

− Нырысьсэ гожъяськыны кутскыкум, котыр дунне мон котырын улӥз. Со вал туж зэмос, но ваньмыз мынам гожъямъёсы – мынам аслам опытэ вал. Печатласькем ужъёсылэн лыдзы будэмен, котькуд нунал басьтэм опытэ мыным тырмемысь дугдӥз, соин ик куддыръя аслым малпалляно луиз.

Куд-ог книгаосады Гюнтер Грасслэн, Уильям Фолкнерлэн но Габриэль Гарсия Маркеслэн ужъёссы кутӥсько. Тӥ будон вакытэ Китайын та гожъясьёслэсь книгаоссэс шедьтыны луэ вал-а? Соос творчестводылэн азинсконаз кыӵе ке воштӥськонъёс вайизы-а?

– Нырысьсэ гожъяськыны кутскыкум, 1981-тӥ ар вал. Соку мон ӧй лыдӟы вал ай Гарсия Маркесэз но, Фолкнерез но. Нырысьсэ тодматски соослэн книгаосынызы 1984-тӥ арын, но та кык писательёс мынэсьтым йырсазьме берыктӥзы, улон шоры учконме воштӥзы. Мон валай, мынам улон опытэ соослэн опытсылы туж тупа шуыса, но бергес валай. Соослэсь книгаоссэс азьвылгес лыдӟысал ке, кыӵе ке шедевр кылдытысал ини, соос сямен…

Нырысьсэ Маркесэз лыдӟеме бере, мон туж паймемын но вожомемын вал. Мылкыды ӝутскиз: ма, ваньзэ, мае со быгатэ, мон но быгатӥсько ук. Ачим со сярысь ӧй валатскысал ке, Маркес сяменгес гожъяськысал. Но соин сэрен ужъёсам троссэ воштоно луиз. Малпаське ай: Маркес ке ӧй луысал, Китайын асьсэлэн Маркессы вордскысал. Но, жаляса верано, со нырысьгес вутскиз.

Кызьы учкиськоды ӟуч литература шоры? Вань-а Тӥляд яратоно ӟуч писательды?

– Кунгож литература пӧлысь нырысьсэ ӟуч литератураен тодматски. Пичи дыръям бадӟым вынылэн школьной учебникысьтыз Пушкинлэсь «Чорыгась но чорыг сярысь выжыкылзэ» лыдӟи, собере Горькийлэсь «Пичи дырзэ» («Мынам университетъёсы»). Конечно, со дыръёсы, китай егитъёс сямен ик, «Кызьы кыдаз андан» произведениез лыдӟи.

Яратоно ӟуч писателе – Шолохов, солэн «Шыпыт Донэз» мынэсьтым улон шоры учконме, писательлэсь сямен, туж юн воштӥз. Шолохов сяна, мынэсьтым учконъёсме «юнматӥзы» Лев Толстой, Иван Тургенев.

Кызьы китай литературалэсь берпуметӥ куамын ар куспын азинскемзэ дунъяськоды? Туала китай литератураысь кыӵе книгаосты тужгес кужмоосыз пӧлы пыртыны быгатӥськоды?

– Лыдъясько, берпуметӥ куамын ар ӵоже китай литература бадӟым вормонъёс басьтӥз. Мукет авторъёслэсь произведениоссэс сяна, татчы пыртыны луэ мынэсьтымзэ но ужъёсме – «Горд гаолян», «Бадӟым гадь, паськыт берпал», «Виналэн шаерез», «Улон но кулон жадьыто монэ».

Тӥлесьтыд творчестводэс вылӥ дунъяз Кэндзабуро Оэ. Кызьы солэн творчествоез шоры учкиськоды? Герӟало-а Тӥледыз эшъяськон кусыпъёс?

– Мыным туж кельше Кэндзабуро Оэлэн нырысетӥ гожъям прозаез, со сяна, «Пудолэн пуштросэз» веросэз, «Мынам опытэ», «Футбол 1860 арын» романъёсыз но мукет произведениосыз. Со мынам дышетӥсе но эше.

Тӥ висъяськиськоды трос ужаны яратэменыды но вакчи дыр куспын бадӟым романъёс гожъяны быгатэменыды. Гожъям произведениостылэн быдӟалазыя, Тӥ арлыдъем гожъяськисьёсты басьтоно ке, ТӥЛЕДЫЗ нокинэн но ӵошатыны уг луы. Мар сётэ сомында кужым но кызьы уно ужаны быгатӥськоды?

– Зэмзэ ке, мон сокем трос ик ӧй гожты на, оло, солэн мугез пӧртэм образъёс кылдытэме бордын; сое валэктыны луэ, дыр, тазьы: котькуд мынам гожтэм книгае маиныз ке но вырӟытыны но адямилэсь саклыксэ ас палаз кыскыны быгатэ.

Номыре но мон огшоры уг гожтӥськы, но гожъяны кутскыкум, пушкысьтым материал тылгурезьысь лава сямен потыны кутске. Одӥг книгаме йылпумъяса, кӧня ке ар уг гожъяськы. Кылсярысь, «Улон но кулон жадьыто монэ» печатласькиз 2006-тӥ арын, нош 2009-тӥ арлэн пумаз гинэ «Бака» выль произведениее кылдӥз.

Ӟуч лыдӟисьлы творчествоеныды тодматскон понна быръемын туж аспӧртэм но мукет романъёстылы тупасьтэм «Виналэн шаерез» романды. Тӥ малпамъя, быръён шонер-а лэсьтэмын?

– Ӟуч лыдӟисьёслы кельшиз Булгаковлэн «Мастер но Маргарита» романэз, соин ик оскисько, «Виналэн шаерез» романме но валаны быгатозы шуыса.

«Виналэн шаерез» романын сокем трос визькылъёсыз но лэчыткылъёсыз, чэнъюосыз, литературной аллюзиосыз, классической поэзиысь цитатаосыз, вань вэньянеен гожтэм текстъёсыз но. Кин тӥляд вашкала даурысь яратоно кылбурчиды но кыӵе тӥляд яратоно кылбурды?

– Вашкала поэтъёс пӧлысь мыным тужгес кельше Ли Бо, нош тужгес но яратоно кылбуре – «Вина вайыса» – тужгес таӵе чуръёсыз:

Нёжто тӥ уд адӟиське, эшъёс,
Кызьы тодмо Хуанхэ вуос,
Ин вырйылысь ӝутӥськыса
Дырто шаетыса зарезь пушкы,
Выльысь берытсконтэм понна?
Нёжто тӥ уд адӟиське, эшъёс,
Кызьы эксэй коркан синучконъёс
Мӧзмо-бӧрдо йырсиос сярысь, – соос толон
Сьӧдэсь вал буртчинлэсь но,
Нош туннэ луизы лымыен?

Тани ӝоглыко вал,
Тани выль плащ, –
Ыстом слуга-пиез,
Мед воштоз соосты,
Но выльысен, эшъёс, асьмеос
Вунэтом бӧрдонъёсмы сярысь.

«Шур ву кожъёсысь» басьтэм цитатаосъя но образъёсъя малпан кылдэ, со яратоно китай классической романды шуыса. Озьы-а?

– Мон туж яратӥсько «Шур ву кожъёсты», пичи дыръям сое уно пол лыдӟылӥ.

Тӥляд яратоно афоризмды?

– Конфуций шуиз: «Эн лэсьты мукетъёсызлы сое, мае аслыд мылкыд уд кариськы». Со мынам улон критерие но яратоно афоризме.