Павел Эль
Музыка

Павел Эль

1213 {num}

Павел Перевозчиков – Шарканысь егитъёсын ужанъя «Зангари» центрын тырше, озьы ик режиссура но крезьгур ужен выре. Сое T-D.A.B. псевдонимен тодо музыкант, электрон амалэн крезьгур гожъясь шуыса, нош Павел Эль нимын – удмурт клипъёслы видеообзор лэсьтӥсь шуыса.

– Маиныз тонэ синмаськытӥз крезьгур удыс?

– Дас арес дыръям гужем велосипедэн доре бертӥсько вал. Азбаре пырыса, шуак бускель укноысь магнитофонысь эктон гурез кылӥ, со кунгож сьӧрысь «Eurodance» нимо альбом чузъяське вылэм. Та музыка мыным туж кельшиз. Бускельёслы кассетазэс берен сётэме ӧз поты ни, сокем ӵем но трос пол мон сое кылзӥ. Со дырысен электрон музыкалы синмаськи.

– Нош ачид ку крезьгур гожъяны кутскид?

– 2000-тӥ арын кӧня ке крезьгур кылдытӥ, нош 2002-тӥ арын Стас Хохряков эшеным школаын, кык синтезаторен шудыса, быдэс концерт возьматӥмы. Со дырысен дас кык ар ортчиз ини. Но та концертмы улонам бадӟым пытьы кельтӥз. Нош 2004-тӥ арысен электрон амалэн крезьгур гожъяны кутски.

– Та дырлы кытысь крезьгурдэ кылзыны луэ, кыӵе проектъёс бордын ужаськод?

– Вотэсын потӥзы «Sparkle» (2013) но «Morning» (2014) крезьгур бичетъёсы. Соосты iTunes но Beatport музыкальной ресурсъёсысь шедьтыны луэ. Та дыре Богдан Анфиногеновен ӵош «Мурӝол Underground» но Наталья Дзыгаен «Shoodja-Choodja» проектъёс бордын ужасько. Озьы ик, Николай Анисимов, Алёна Тимерханова, Chupai Eli но Ladi Sveti – удмурт кырӟасьёслы – ремиксъёс лэсьтӥ. Вань на Хабаровскысь «Simple is Good» но «Scooter» группаослэн кырӟанъёссылы ремиксъёсы.

– Малы кутскид удмурт клипъёсты эскерыны?

– Куке «Суперудмурты» клипез адӟи, тросэз мыным ӧз кельшы. Кема ӧй малпаськы, малы ке соку ик малпан кылдӥз: BadComedian (фильмъёслы обзор) выллем лэсьтоно. Нырысь малпанъёсме гожтӥ, собере тупась видеоподборка дасяй. Калыклэн критикаезлы мон дась вал. Нош шӧдтэк шорысь тросэз ужме азьланьтыны дэмлазы. Со бӧрсьы Марина Михайловалэн «Бабыля» но Никита Ильинлэн «Выль ар» кырӟанъёсылэн клипъёссылы обзор лэсьтӥ.

– Та куинь видеообзор сяна, эшшо мар ке лэсьтод на-а?

– Малпасько, ньылетӥ обзорам трос критиковать уг кары, серемес капчи видео лэсьто.

– Кызьы малпаськод, мар бордын удмурт клипмейкеръёслы ужано?

– Удмуртъёс пӧлын шоу-бизнес, выль кырӟасьёсты «поттон» амал азинскемын ӧвӧл на, соин ик клипъёс но ӧжыт. Калыклэн яратоно кырӟасьсэ клипысь адӟемез потӥз ке, соку кырӟась но клип поттонлы уксёзэ уз жаля. Нош куке клипъёсты ӵемгес лэсьтыны кутскозы, соослэн ӟечлыксы но будоз. Озьы ик, рос-прос клип лэсьтон понна, кырӟан но умой луыны кулэ. Малпасько, шаерамы вань адямиос, кудъёсыз быгатозы та ужен вырыны, но ужан опытсы ӧжыт. Со понна экспериментъёслэсь кышкано ӧвӧл, трос видео бугыръяно, дышетсконо.

– Нош тон кинлы клип лэсьтысалыд?

– Тодон-валанэ та ужын ӧжыт, нош валась адямиосын, командаен ӵош Богданлы лэсьтысал, дыр.

– Тон режиссёр ужен но выриськод. «Зор шапык», «Память» нимо вакчи видеосыд пӧртэм конкурсъёсын пусъемын. Малы та удыс тыныд тунсыко потэ?

– Тодӥсько на, кызьы 11-тӥ классын туж потэ вал мар ке лэсьтэме, нимысьтыз сценарий но гожтӥ. Эшелэсь камеразэ кутыса, тодмоосме ӧтьыса, съёмкаос лэсьтыны мылкыды вал. Но малпанэ соку ӧз быдэсмы. Нош собере ГТРК «Удмуртиен» радъям «Школа телевизионного мастерства» курсъёсты ортчем бере, короткометражкаос бордын ужай. Мыным кельше, куке лэсьтэм уже зэмос кинолы тупа. Кельше на формаен, пуштросэн шудыны. Со туж тунсыко.