Светлана Ручкина
Музыка

Светлана Ручкина

1466 {num}

«Silent Woo Goore» группа котькуд программазэ тунсыко лэсьтэ. Егитъёс пӧлын тужгес но адӟем карымон коллективлэн кутскон сюресэз, туала куронъёс но удмуртлык сярысь юанъёслы валэктэ Светлана Ручкина.

– Кызьы удмурт лулчеберет удыслы яратон пыӵаз?

– Пичи дыръям мон удмурт кылын уг вераськиськы вал. Нош 2000-тӥ аре «Шундыкаре» ветлӥ, кельшиз отын, эшшо вуылэме потӥз. Соку мон ӟуч кылын кырӟасько вал, трос конкурсъёсы пыриськылӥ. Нош «Шундыкар» бере крезьгуро школамылэн директорезлы Людмила Витальевна Прокопьевалы «Ӝужась кизилиос» вожвылъяськонлэн положениез вуиз.Мыным дэмлазы отын асме эскерыны, конкурслы удмурт кырӟан дышетыны кутски. Нырысь уг валаськы вал, котькуд кылзэ берыктӥзы, валэктӥзы мыным. Али но тодам вайисько на, кызьы бӧрдӥсько вал, та ужрадлы дасяськыку, валатэк кырӟаны секыт потэ вал. Вожвылъяськонын нырысетӥ интые потӥ но Гран-при утӥ. Удмурт кылэз умойгес валаны кутски. Татьяна Борисовна Меркушева – вокалъя дышетӥсе – кырӟаны кыстӥськемме адӟиз, монэн ужаз.

– Нош семья куспады удмурт кылын ӧд вераське шат?

– Мынам атае Алнаш ёросысь Кадик гуртысь, анае – Серп гуртысь, техникуме распределения вуизы, куспазы котьку удмурт кылын вераськизы. Нош Асанэ вуэмзы бере таӵе учырен пумиськизы: мынам Андрей агае гинэ удмурт кылэз тодэ вал, нылпи садэ мыныса, ӟуч кылын вераськемзэс ӧз вала. Нырысь ӝожтӥськылӥз, садике мынэмез уг поты шуыса. Школаын но ӟуч кылынгес вераськылӥзы. Соин анай-атае монэн но апаеным ӟуч кылын вераськыны тыршизы.

Со вакытэ милемын ӵужае улӥз, удмуртлыклы гажан пыӵатӥз. Тодӥсько на юамзэ: «Нылы, тон кин: удмурт-а, ӟуч-а?» «Мон – удмурт» верамелы со туж шумпотэ вал. Ӵужае Ольга Николаевна Дружинина удмурт кылъя дышетӥсь вал. 

– Тон понна «Шундыкар» удмуртлыкез шӧдон инты луиз-а?

– «Ӝужась кизилиос» конкурс бере эстрадая отрядэ котькуд ар ветлӥ. Али но тау шуэме потэ со дырлы но, ӧнерчиослы но. «Шундыкарын» мынам дышетӥсьёсы Надежда Уткина но Марина Галичанина вал. Зэмзэ но, татчы удмуртлыкез пыӵатыны ветлӥ.

– Крезьгуро удысэн пичи дырысеныд тунсыкъяськемед, нош малы психологогияя факультетэзбырйид?

– Мынам улонам крезьгур но школаын дышетскон кык пӧртэм дуннеос кадь мынӥзы. Соинмон понна психологияя удысэз быръеме туж ӟеч вамыш луиз. Мыным,гуртын будӥсь ныллы, тунсыко вал, мар со сыӵе психология. Та тодослэн туж мур пуштросэз, кудзэмилям улӥсьёсмы валаны но улоназы пыртыны дасесь ӧвӧл на. Асьме кунын туж секыт персональной психологлы дышетскыны.

– Ку но кызьы кылдӥз «Silent Woo Goore» группа?

– Вова Жуйковен, Гриша Степановен, Толя Галихановен «Шундыкарысен» эшъяськиськомы вал, кинлэн ке малпанэз кылдӥз, удмурт кылын кырӟаломы шуыса. Нырысь пӧламы Анатолий Галиханов ӧй вал на, гитараенЕвгений Сухих шудӥз. Милемлы Кузебай Герд нимо гимназиын репетицилы инты сёто вал. Но соку милям номыр ӧз пӧрмы, мылкыдмы ӧй вал. Павел Поздеев милемлы «Авиаторын» ортчылӥсь ӝытлы быдэс программа дасяны дэмлаз.Микин мае быгатэ, сое ик лэсьтӥмы. Али, аръёс ортчыса, паймиськоини: кызьы кык толэзь куспын быдэс программа лэсьтыны вуттӥмы? Куддыръя туж секыт огкыл шедьтыны, группаямы пӧртэм дыръёс вал. Со вакытэ ми ӧм малпаськылэ, кемалы-а со шуыса. Нош алидыр шедьтыны тыршиськом. Студия снимать кариськом. Ми арняяз кык ӝытмес группамылы висъяськомы. Укмыс часлы репетицие уд вуиськы ке, коньдонзэ ачид тыриськод.

– «Авиатор» вакыт мар сетӥз улонад?

–Ми соку удмурт активной элита выллем вал, шуом. Али ветло сыӵе егитъёсРезиденцие. Со умой вал, но сыӵе вакыт ортчиз. Со эксперимент, астэ утчан-эскерон выллем луиз. «Авиаторын» сыӵе группаос но, туала крезьгурен кырӟасьёс но ӧй вал на. Отын ик Богдан но творческой сюрессэ кутскиз. Малпасько, со астэ утчанын умой площадка вал.

– Концерт дыръя ӟуч учкисьёслы куд-ог кылъёсты берыктӥськод, кырӟанъёсыдлэсь пуштроссэ мадиськод, удмурт кылын тодматӥськод.

– Куддыръя мыным потэ: асьмеос коконын пукиськомы, асьме понна «пыжиськомы». Нош тунсыко культурамес, тунсыко проектъёсмес мукет калыкъёслы ум возьматӥське. Ӧм кеусьтӥське, соку мукет адямиос ноку но уз валалэ, кыӵеесь асьмеос. Мон соос доры одӥг вамыш лэсьтӥсько ке, соос но мон доры лэсьто, соку ог-огмылы матынгес луиськомы. Ӵемысь ӟуч учкисьёс концерт бере верало: «Уг тодӥськы маиз, нош мыным кельшиз». Мынам туж потэ, соос концертъёсы мед ветлозы, удмуртъёс но аспӧртэмлыко культурной продукт лэсьтыны быгато шуыса мед адӟозы.

– Алигес концертты Филармониын ортчиз. Аспӧртэм экспериментлы кыӵе малпанэн дасяськид?

– Филармониын ар талэсь азьло, концертной сезонлы «World Music» абонемент дасякузы, милесьтым юазы, пыриськоды-а отчы шуыса. Ми соглаш луимы.

Программаез дасякумы, сыӵе адямиосыз ӧти, кин мыным тунсыко, кинэн кемалась ужаме потэ вал ини. Егит кырӟасьёслы импульс сётыны, мукет стилен вырыны, оло, мылкыдзы кылдоз шуыса. Ваньзылы тодмо ук: Ваня тунсыко кырӟанъёс пӧрмытэ, Аня Камали но Настя Рысаева аспӧртэм амалэн кырӟало. Антоновалэн вокалэз кельше. Малпасько, со ассэ шедьтоз ай. Мынам калыклы возьматэме потӥз: ӟуч адямиос но мед адӟозы, вань эшшо мукет егит артистъёс, кырӟасьёс, калык инструментъёс, со ваньмыз тунсыко луыны быгатэ. Кылсярысь, армянъёслэсь дудук крезьгуро инструментсэс басьтоно ке, со котькинлы тунсыко. Милям но вань сыӵе калык инструментъёсмы, ми ум быгатӥське сое возьматыны, промо лэсьтыны. 

– Адямиослы концерт тырмыт ӧй вал шуыса шӧдӥды-а?

– Адямиослэн эшшо кылзэмзы потэ на шуыса валамы ке но, верано, таиз сольной концертмы ми понна тужгес но кузез вал. Озьы ке но, 17 кырӟанлытрос кужым быдтэм бере ӧм жаде, залысь энергетикаез шӧдӥмы. Мон кышкасько вал та концертлэсь, адями уз люкаськы яке дуэтэн кырӟаммы уз кельшы шуыса. Нош Контактысь группаямыГужем садын та программаез ик возьматыны дэмланъёс кылдӥзы.

– Кыӵе шуг-секытъёсын пумиськиды альбомдэс гожтыкуды?

–Туж трос уксё кулэ гожтыны, собере поттыны но вузаны. Озьы ик кулэ валаны, кинлы вузаны. Финляндиын дунызъя умойгес вал гожтыны. Нош али выльзэ альбоммес Ижкарын ик гожтом, адӟом, кыӵе со луоз. Группаен вырыкуд валаськод: сцена вылэ потон но кырӟан бордын гинэ ваньмыз уг возиськы, со понна реклама, маркетинг луыны кулэ. Группаез кылдытыку, та ужпумъёс сярысь ум малпаськиське вал. Али валаськом ни: милемлы база кулэ, учкисьёсын ужаны быгатоно, соослы валэктыны кулэ, ми соостэк – нокин.

– Туала егит лыдӟисьёсмылы кыӵе дэмланъёсыд?

– Мынам туж аспӧртэмлыко дэмланэ: валалэ, культура – со туж умой, нош уксётэк ноку узыр уз луы лулчеберет удысмы. Шӧдӥськоды ке кыӵе ке коммерческой шӧдонды вань шуыса, лыдӟе нимысьтыз книгаосты, социальной кусыпъёс сярысь роликъёс учке. Удмуртиын уксёмы ӧз луы ке, культурамы нокинлы кулэ уз луы. Али малпанэ: асьме дорын но предпринимательской кластер кылдытыны но азьланьтыны умой луысал.