Музыка

"Шулдыр ӝыт"

132 {num}

Шулдыр ӝыт» ансамбльлэн улонэз пӧзе! Кемалась ӧвӧл коллективе егит кырӟасьёс вуизы. Гужем ансамбль кырын ортчылӥсь концертъёсы пыриськылӥз, нош шуркынмон толэзе дасяське бадӟым юбилей концертэныз шумпоттыны. «Шулдыр ӝытлэн» выльдӥськонъёсыз, туннэез но ӵуказеез сярысь кенешимы чеберлыкъя кивалтӥсеныз Наталья Ушаковаен но администратореныз Михаил Михайловен.

«Шулдыр ӝыт» выль куараосын узырмиз. Кыӵе выль проектъёс но номеръёс кылдозы выль адямиос вуэмен?

Наталья Ушакова: Берпуметӥ аръёсы коллективмы шӧдскымон егитомиз. Арысь аре дорамы выль адямиос, устоесь но быгатӥсесь нылъёс но пиос вуо. Мылкыдмы вань тросгес проектъёс но номеръёс егит кылзӥсьёсмы понна дасяны. Мон малпасько, егит артистъёс нырысь ик егитъёс понна ужаны кулэ. 

Тӥ ӵем концертъёсын потаськоды гуртъёсы но, республикалэн палэназ но. Зол-а висъяське гуртысь учкись-кылзӥсь калык? Кызьы тӥ сюлэмъёсазы сюрес шедьтӥськоды»?

Михаил Михайлов: Гуртысь адямиос висъясько. Шонергес вераса, калык ёросъёсъя висъяське. Лымшор удмуртъёс туж чупресэсь, туж кыло-ымоесь, концертъёсы но тросгес лыкто, коллективлэн улонэныз но тунсыкъясько, концерт дыръя зол, сюлмысь чабыса, пумитало котькуд кельшем кырӟанэз. Уйпал удмуртъёс востэмесьгес, концертын шыпыт пуко, чабыны дӥсьтытэкгес кадь, мылкыдзэс паськыт уг возьмато. Соиз, малпасько герӟаськемын уйпал ёросъёслэн ӟучомеменызы но. Башкир но Бигер улосъёсын котькуд концертамы туж трос калык люкаське. Угось соос туж возьмало но шумпотыса пумитало Удмуртиысь удмурт коллективъёсты.

Учкись доры сюресмы – со репертуар. Концертъёсамы пӧртэм арлыдо калык ветлэ, котькудӥз аслыз маке тунсыкозэ басьтэ, кырӟанъёсмы пӧртэм кылын быдэстӥсько, соос пӧлын котькыӵеез вань – лирическоез но шулдырез, серекъятӥсез но мур малпаськытӥсез.

Кыӵе кырӟанъёсты репертуарады пыртӥськоды? Кызьы КУлэ кырӟанъёсты бырйиськоды яке кыӵе поэтъёсын, композиторъёсын ужаськоды?

Н.У.: Репертуармы котькуд ар выльдӥське. Мон котьку выль кырӟанъёс утчасько: удмурт калык но авторской кырӟанъёсын бичетъёсты, классической но туала удмурт крезьгурчиослэсь ужъёссэс эскерисько. Тужгес но кельшисьёссэ соос пӧлысь асьме репертуарамы ватсаськом. Трос творческой номеръёсты артистъёс ӵектыло: яке асьсэ гожтэм кырӟанзэс быдэсто, яке Россииысь мукет кырӟасьёслэсь но коллективъёслэсь ӟеч кырӟанъёссэс бырйиськом. Удмурт крезьгурчиосын но кылбурчиосын кусып возиськом. Крезьгур удысын милемлы Е. В. Копысова туж юрттӥське. Со котьку милемлы тужгес но удалтэм кырӟанъёссэ дэмла. Кемалась ӧвӧл «Лучший гимн Ижевска» нимо ӵошатсконэ пыриськем паймымон чебер композициез быдэстӥм.


Вань-а мылкыдды азьланяз Ижкарын ортчись фестивальёсы пыриськыны?

Н.У.: Мылкыдмы туж бадӟым! Гужем, Удмурт кун филармония «Музыка рядом» фестиваль радъямен, Шор площадьын концерт возьматӥмы. Куазен кӧня ке ӧз ке но удалты (концерт вискын кӧня ке пол жаль-жаль зориз), кылзӥсьёсмы пумозяз милемыз кылзӥзы. Live но open-air форматъёс милемлы тужгес но бадӟым шумпотон кузьмало, малы ке шуоно соку учкисьёсмылы матэгес луыны, соосын вераськыны, энергетикамес кузьманы луонлыкмы кылдэ. Дасесь пыриськыны мукет фестивальёсы но. Ми котьку шедьтом, маин шумпоттыны яратоно кылзӥсьёсмес. 

Сяме пыӵам «Выль куара» ужрадэз туэ но ортчытоды-а? Кыӵе эшшо яркыт ужрадъёсты витёно?

Н.У.: Туэ «Выль куара» проектамы пичи вис карыны малпаськомы. Мед учкисьёсмы кӧня ке мӧзмозы. Калык куриз ке та проектмес азьланьтыны, соку выльысь сое радъялом. Кылзӥсьёсмылэсь мылкыдъёссэс ми котьку лыдэ басьтыны турттӥськомы. Юан луиз ке, ӵектон но луоз. 

Али тужгес но бадӟым ужрадмы – юбилей концертмылы дасяськон. Шуркынмонэ ансамбльлы 40 ар тырмоз ни! Осконтэм! Кӧня сюрс концертъёс сётэмын, кӧня сюрс иськемъёс ортчемын. Лыдъянтэм! 

Туала улонын туж азинскемын мерлыко вотэс (социальная сеть). Кызьы тӥ «интернетной» калыкен кусып возиськоды? Вань-а луонлык «Шулдыр ӝытлэн» концертъёсаз абонемент басьтыны?

М.М.: Учкисьёсмылэн оглюкетэз – егит калык но али будӥсь нылпиос. Туннэ нуналлы, Интернет котькуд корка вуэмен, ми но кылдытӥмы вотэсбамын «Шулдыр ӝыт» ансамбльмылэсь огинъёссэ. Учкисьёсынымы но пӧртэм организациосын ми юн кусып возиськомы «ВКонтакте», «Одноклассники», «Instagram» Интернет-бамъёс пыртӥ. Трос гинэ юанъёс но ӵектонъёс вуо егитъёслэсь но, шорлыдоослэсь но. Вазиськыло асьсэ гуртэ ӧтьыса но, концертъёсмылэсь ку но кытын ортчемзэс тодыны турттыса но, озьы ик куд-огез Удмуртилэн палэназ улӥсь удмурт калык вазиське юрттэт юаса, кырӟанъёс но видеоматериалъёс, кырӟанъёслэсь кылъёссэс курыса.

Абонемент басьтыны луонлык вань. Та пумысен Филармонилэн вотэсбамысьтыз (udmfil.ru/) пыр-поч информация шедьтыны быгатоды. 

Сезонлы программа публикалэн куронъёсызъя кылдытӥське. Кызьы тӥ эскериськоды кылзӥсьёстылэсь мылкыдъёссэс?

Н.У.: Ми кылзӥсьёсмылэсь мылкыдъёссэс кылзӥськом но лыдэ басьтӥськомы, оглом эстрадаын но шоу-бизнесын югдурез эскериськомы. Кызьы тунсыкъяськытоно калыкез, кызьы быдэс зал люкано — та юанъёс котьку милям йыръёсамы. Соин ик дышем проектъёсмы борды ми выль шӧм ватсаськомы. Сыӵеосыз пӧлы мон «Шулдыр джаз» концертэз пыртысал, кытын ми удмурт, ӟуч но кунгожсьӧр кырӟанъёсыз блюз, джаз, поп, рок-н-ролл амалъёсын быдэстӥмы. «Кырӟан но эктон – зэмос шумпотон» концертмес ми «Next» эктон студиен валче дасямы. Та проектъёс коллективмес мукет палысен усьтӥзы, выль сямен мылкыдъёсмес кузьманы луонлык сётӥзы.

Маин усьтыны малпаськоды сӥзьыл выль сезонэз? Мар бордын туннэ ужаськоды?

Н.У.: Сӥзьыл выль сезонмы усьтӥськоз «Шулдыр ӝыт – 40» юбилей концертэн. Со 10-тӥ шуркынмонэ Филармониын ортчоз. Сценарий, программа, кузьымъёс – ваньмыз та бордын уж мынэ ни. Дырызлэсь вазь вань секретъёсмес уг усьты, огзэ гинэ верало: одно ик луоз выль репертуар, ненег лирической но эктытӥсь шулдыр кырӟанъёс. Концерт ческыт, шулдыр луыны ӧдъя.