Валерий Сидоров
Персона

Валерий Сидоров

333 {num}

«Кӧня асме тодӥсько, котьку журналист луэме потэ вал. Тележурналистика – со быдэс улонэ...»

– Ку тӥляд журналист луон сярысь малпанды кылдӥз?

– 2-тӥ классысен ик журналист луо шуыса малпай, гожъяськыны кутски. Совето Союз вакытэ устоосыз пӧлысь устоосызлы «Артек» лагере ветлыны шуд усе вал. Гожъяськеме понна 1-тӥ инты сётӥзы, солы луыса Сьӧд зарезь дурысь лагере ветлӥ. Мон понна инме лобем кадь вал со. Отын Вера Пантелееваен тодматски, «Артек» бере мылкыды уката бурдъяськиз, озьы Вераен котькуд «Дась лу!» газетлэн номераз ӵошатскыса гожъяськиськомы вал. Ӵемысь кылбуръёс, зарисовкаос, очеркъёс ыстылӥ. Берлогес «Кизилиын» но печатласьки. Али куддыръя нылпиослы гожъясько. Корней Чуковский выллем пудо-животъёсты кылбуръёсам улӟытӥсько. Мынам хоббие – матысь адямиослы вордӥськем нуналазы нимысьтыз кылбур сӥзисько. 

– Со вакытэ УдГУ-ын кылосбуръя факультет улсын журналистика отделение гинэ вал бере, озьыен, дипломдыя Тӥ дышетӥсь луиськоды?

– Зэмзэ но, университетын милемыз дышетӥсьлы дасязы. Озьы ке но, журналистикалэсь пӧртэм сэрегъёссэ возьматыса, Татьяна Корнилова ӵемысь милемыз Коммунаров урамысь радиое нуллэ вал. Со сяна, студент вакытам ик тодӥ, кыӵе пуштросэзъя газет журналистика но: практикаме «Дась лу!», «Советской Удмуртия» но Шарканысь ёрос газетъёсын ортчылӥ. Ми дышетскон вакытэ ай, университет бере, одно ик распределения куинь ар ужано, мыным Ижкарысь усточиослэн 2-тӥ школа-интернатазы дышетыны мыноно вал ини. Нош Олег Корнилович Шибанов, (1986–1996-тӥ аръёсы УАССР-ысь Гостелерадиолэн председателез) мон пумысен министерствое вераськыны ветлэм, доразы ужаны кельтон вылысь. Со дырысен тӥни мон телевидениын.

– Озьыен, тележурналистикалы синмаськиды? Маиныз со сюлэмдыя луиз?

– Радиоын но печатной СМИ-осын ас поннад гожъяськыса пукиськод, нош телевидениын командаен ужано. Нырысь лыктэм берам мон возьдаськыса но кышкаса борддор кузя ветлӥсько вал. Ар куспын Вера Орлова, Александр Кузнецов, Альфред Артамонов, Светлана Овчинникова, Марина Томшич – быдэс элькунамы тодмо журналистъёс монэ пӧлазы кутӥзы. Со вал 1987-тӥ ар. Куинь ар пала иворъёсын ужай, валай – мынам кысык информациен ужаме уг поты. Соин нылпи редакцие выжи, собере егитъёслы редакция кылдытӥ. Тямыс ар ортчыса, телевиденилэн сяськаяськыса улон вакытъёсаз, 1995-тӥ арын монэ очно амалэн быдэс арлы Москвае телевидениын но радиоын ужасьёслэсь тодон-валанзэс будэтонъя Институтэ стажировкае ыстӥзы. Вера Алексеевна Шибеко, Игорь Леонидович Кириллов, Светлана Михайловна Моргунова дикторъёслэсь ужамзэс адӟыса дышетски. Мон туж шудо, та дышетсконэ телевидениез пуш ласянь тодыны уката но ӟечгес юрттӥз шуыса.

111

– Бертэмды бере выль передача борды басьтӥськиды?

– «Ведущий эфира» дипломен бертэме бере мылкыды бурдъяськемын, маке выльзэ лэсьтэме потэ. Режиссёрмы Андрей Русских пичи гуртъёс сярысь передача лэсьтыны дэмлаз. Соку командировкаосы но потаны быгатӥськомы вал (туж жаль, берло 7–8 аръёссэ сыӵе луонлыкъёсмы ӧвӧл ни, мон соослэсь туж мӧзмисько). Озьы «Эзь» передача вордӥськиз, котькуд районысь одӥг ке но гуртэз возьматыны малпамы. Учкисьёс эфирысь шудыса выллем лэсьтэм телепроектэз адӟо, угось, 15 минут эфирез учкыса, адямилэн пальпотэмез мед потоз шуыса ужпуммы пуктэмын вал. Нош котькуд передачамы – со бадӟым уж но вань понэм кужыммы. Ваньзы сотэк но валало, кыӵе шуг-секытъёс пичи гуртъёсын, нош кызьы адями, номыр шоры учкытэк, пальпотыны быгатэ – сое тыршимы возьматыны. Куддыр ог ӝыны час снимать карем материалмы уг но пыры вал эфире, малы ке шуоно героймы капчи мылкыдо луыны кулэ камера азьын. Та передачаме пӧртэм фестивальёсы нуллӥм, Гран-приосын но бертылӥм. 1996-тӥ арысен 2004-тӥ арозь «Эзь» мынӥз. Тямыс ар ӵоже вань ёросъёсыз 2–3 пол котыртӥмы. Али но тросэз, фондъёсмес юаса, вазисько, малы ке шуоно гуртсы быриз ини. Тани Евгения Васильевна Медведева («Италмас» ансамбльысь валтӥсь куара, Россиысь дано, элькунысьтымы калык артистка) туж тау кариз милемлы, Легомувыр гуртаз ветлыса вуимы шуыса. Отысь кадь куашкам сюресэ ноку пыраме но ӧй вал, тракторен кыскыса поттӥзы милемыз. Нош берло гуртсы ӝуаса бырем. Али но«Эзь» передачаос бордын ужаммы сярысь тодэ ваёнъёс сюлэмез шунто, передачалэн таӵе форматэз мыным туж кельше вал.

– Тросэз учкисьёс Тӥледыз «Мылысь-кыдысь» передачая тодмало но ярато.

– Ми сое Татьяна Корниловаен ӵош кылдытӥмы туж кемалась, 19 ар талэсь азьло, собере пӧламы Анна Федотова итӥськиз. Азьвыл передача бордын тунсыко вал ужаны. Нимыз кельше, нош пуштросэз акыльтэ, соин рубрикаоссэ арлы быдэ воштыны тыршылӥськом. Туала дыре кызьы лэсьтэммы потэ – луонлык ӧвӧл. Нош али декорациос мылкыдмыя ӧвӧлэн, павильонын гинэ съёмкаос мынэмен, кӧты уг тыры. Фондъёсынымы ужаса, асме ог 15–10 ар талэсь азьло палэнысен адӟыса, валасько, телевидениын котыр ласянь эстетика луыны кулэ, соин «Мылысь-кыдысе» ачим интые егит адямиез, кивоштӥсез утчано. Лыдӟисьёс пӧлысь но, оло, кин ке мылкыд кароз кастинге лыктыны, ассэ эскерыны.

– Кемалась ӧвӧл, выль проект борды басьтӥськиды?

– Али «Мон» нимо передачае сюлмыя, малы ке шуоно нимо-дано адямиосын пумиськыны луонлык вань. Туж шумпотӥсько, соос вазисько, мыным лул-сюлэмзэс усьтыны дӥсьто шуыса. Та уже ке ӧй луысал, кызьы ай соосын ваче пукыса вераськысал. Дышетӥсь луыса сомында адямиосын ӧй тодматскысал, дыр. Тани Валентина Пудова, Анна Плотникова, Галина Платонова, Михаил Ворончихин, Светлана Смагина, драмая артистъёс Ф. И. Будина, Л. Г. Романов, Г. М. Владыкина, элькунысьтымы мукет нимо-дано улосчиосмы та передачаын сюлэмзэс усьто. Вуоно арын телевидениын 30 ар ужамме пусъё, нош котькуд нунал али ке но тунсыко потэ.

– «Шундыкаре» но ӧнерчи луыса огвакытэ ветлӥды?

– Мон нылпиосын ужаны туж яратӥсько, журналист ке ӧй луысал, одно ик творческой дышетӥсь луысал, дыр, кадь потӥсько. Со мылкыды ик «Шундыкаре» вуттӥз. Аслам но егит вакытэ вал, 3–4 ар озьы ӧнерчи луыса ветлӥ. Котькыӵе пиналъёс отрядам вуылӥзы. ГТРК-е экскурсие ветлэм сяна, передачаос бордын ужаммес тодӥсько на. Тани кыкез фондамы кылемын. Кытын али со нылпиос, маин выро – троссэ тодыны уг луы, нош телевидениез яратыны соосты дышетӥ кадь потэ мыным. Пичи дыръя ваньмыз мукет сямен усьтӥське, нылпиос троссэ йыразы кельто, соин шуо ук пичи дырлэн тодэ ваёнъёсыз паймымонэсь.

– Уксё пумысен шуг-секытъёс ӧй ке луысалзы, кыӵе передачаос али лэсьтысалды?

– «Что? Где? Когда?» выллем интеллектуальной передачаосты лэсьтысал. Собере трос дано адямиос милям палэнэ кылё, соос сярысь документальной фильмъёс уг тырмо. 1956-тӥ арысен 1990-тӥ аръёс дырозь узыр фондъёсмы, нош собере ӧвӧл ни. Берло дыре авторской программаослы саклык висъяськемысь дугдӥз, нырысетӥ радэ иворъёсты пукто. Спектакльёс, концертъёс гожъясал. Кылсярысь, Валентина Загуляева сярысь передача лэсьтӥсько, архивмес бугыръяса, сыӵе тӥни шуг-секытъёсын пумиськи. Туэ 60 ар ГТРК-лы тырме, фондэз поттыса, спектакльёс но возьматыны тыршиськом, калык возьма соосты. Асьмелэн лулчеберетмы азинске, егитъёс трос кужымзэс со ласянь поно, туж жаль, ӧвӧл луонлык соосты гожтыны.

– Мар со Тӥ понна тележурналистика?

– Со быдэс улонэ. Тросэзлэн улон азинскемъя уж шоры учконъёссы воштӥсько: вань адямиос, кудъёсыз семьяен уло, нош мынам улонэ – телевидение. Котькинлэсь вазь уже лыктӥсько, ог 10 ар озьы: 7 час 30 минутэ – мон ужын ини. Кайф со мон понна. Вань эшъёсы – коллегаосы, палэнысь эшъёсы – кык-куинь сяна ӧвӧл. Мон туж шумпотӥсько, тележурналистика удысэ вуи шуыса. Та вакытлы но ужам бызьыса лыктӥсько. Куке адями сюлэмызъя уж шедьтэ, соку быдэс улонзэ со ужлы сӥзе.