Иван Белослудцев:  «АРМИЫСЬ ВУИ МОН  ТӤ ДОРЫ...»
Персона

Иван Белослудцев: «АРМИЫСЬ ВУИ МОН ТӤ ДОРЫ...»

130 {num}

Солэн кырӟанъёсыз – туала шӧмын чузъяськись крезьгуръёс но романтик малпанъёсын пачылмем кылбуръёс. Удмурт шӧмо но аспӧртэмлыко стилен гожтэм ужъёсыз тросэзлэсь сюлэмъёссэс вырӟыто. Таиз артист Удмуртиысь гинэ ӧвӧл, кунгож сьӧрысь кылзӥськисьёсты но синмаськытыны быгатӥз. Со – егит кылбурчи, крезьгурчи но кырӟась – Иван БЕЛОСЛУДЦЕВ. Кылем арын со армиысь бертӥз но выльысь крезьгур борды басьтӥськиз. Эстрадая «Шулдыр ӝыт» ансамбльлэн кырӟасез луиз.

– Армиысь бертэмед бере улон шоры учконэд воштӥськиз-а?
– Армиын малпаськыны дыры трос вал, улонэз котькуд паласен эскерыны луонлык шедиз. Одӥг ар ӵоже йырын ваньмыз воштӥськиз,  котьма шоры мукет синмын учкыны кутски.  Армиысь бертэме бере кӧня ке дорам шутэтскыны ӧдъяй. Собере Ижкаре лыктӥ. Соку валай:  та улонын, зэмзэ но, ваньмыз огшоры гинэ ӧвӧл.  Туала вакытэ  аслыд берганы кулэ. Юрттӥсьёс, визь-кенеш сётӥсьёс котьку вӧзын уз луэ. Троссэ аслыд лэсьтыны, бырйыны, лэсьтэм ужъёсыд понна кыл кутыны кулэ.  Ӵем кылӥсько таӵе веранъёсты: «Тон воштӥськемед, зӥб-зӥб луэмед». Малпасько, со зэм кылъёс. Ачим но сое шӧдӥсько. Нош азьло малпанъёсы копак мукет вал: та улонын ваньмыз капчиен сётӥське, котьма тыныд но тон понна… Ма, студент вал. Йырын тӧл поръяз.  Огшоры уг верало, дыр, пинал мылкыд – юмал йӧлпыд.  

– Крезьгуръя быгатонъёсыд армиын кулэ луизы-а?
– Бен. Синйылтымон, гитараен шудӥсьёсты но кырӟасьёсты нимысьтыз  гажало. Вылӥ нимын-данэн адямиос но кырӟаны косылӥзы. Мон понна, со бадӟым данъет вал. Сюлэмам вылтӥяськон дыръёс но каръяськылӥзы.  Но мон соосты ӧй возьматъя, пушкам возьылӥ.  Ӵемысь казармаысь пияшъёсын крезьгуръямы.  Аслэсьтым кырӟанъёсме но быдэсъялляй. Соослы тунсыко потылӥз удмурт кылын кырӟанъёслэн чузъяськемзы. Нош кызьы армиын армейской ӟуч кырӟанъёстэк? Соостэк нокызьы уг луы.

– Кыӵе ке кырӟанъёс гожъяны мылкыдыд ӧз поты-а?
– Зэмзэ ке вераса, армиын  кырӟанъёс кылдытъяны нокыӵе мылкыды ӧй вал. Куддыр ньыль чуро кылбуръёсты гинэ гожъялляй.  Мыным эрик ӧз тырмы, соин ик кырӟанъёс но ӧз вордӥськылэ. Армиын нырысетӥ толэзьёсыз туж секытэн сётӥськизы. Анай-атайлэсь, дорлэсь,  эшъёслэсь  мӧзмылӥ.  Кӧня ке дыр ортчыса гинэ ваньмыз воштӥськиз, армия улонлы дыши. Мӧзмон сярысь ӧй но малпаськылы ини.
 
– Одӥгаз интервьюад крезьгуръя дышетсконниын тодон-валан басьтон мылкыдыд сярысь верад вал. Али но сыӵе малпанъёсыд вань-а?
– Озьы, малы ке шуоно  эстрадая «Шулдыр ӝыт» ансамбльын ужаны кутски. Та коллективын крезьгуръя зэмос усточиос ужало.  Соин  соос пӧлын «берганы» секытгес потэ. Бен, кӧня ке крезьгур амалъёсты тодӥсько. Нош ӧнерчиос кадь  кырӟаны со тодонъёсы уг тырмо. Дышетскыны ноку но бер ӧвӧл, соин кытчы ке пыроно. 

– Кызьы «Шулдыр ӝыт» ансамбле вуид?
– Отчы пыриськыны ансамбльлэн лулчеберетъя кивалтӥсез но режиссёрез Наталья Ушакова ӵектӥз. Мон соглаш луи. Туж шумпотӥсько, сыӵе йӧно, бадӟым сюлэмо зэмос ӧнерчиос пӧлын ужасько шуыса. Соос ог-огзэсты туж гажало,  одӥг семьяын кадь тупаса уло. Крезьгуръя дышетсконэ ӧвӧл шуыса, монэ уг ултӥяло.  Вань сюлэмзэс сётыса, рос-прос дышето, кенеш сёто, крезьгуръя тодон-валанъёсме узырмыто но паськытато.

– Нош ансамбльлы кырӟанъёс гожъяны мылкыдыд ӧвӧл-а?
– Азьланяз со озьы ик луоз. Аслым кырӟаны но ужъёсты кылдытъяны, крезьгур шыкысме узырмытыны кулэ.  Угось ансамбльын мон аслэсьтым кырӟанъёсме но быдэсъясько. Матысь дыре ини калык шӧмо кырӟанъёсты но быдэсъяны кутско. 

– Кытын  кырӟаны умойгес потэ:  группаын яке ансамбльын?
– Туж секыт юан, малы ке шуоно та ӧнеръёс ог-огзылэсь висъясько. Бен, улонын соос одӥг ужез быдэсто: кылзӥськисьёсты кырӟанъёсын шумпотто. Озьы ке но, группаын  улон мукет сямен «пӧзе». Ӟуч сямен вераса, со аспӧртэмлыко движуха, кытын мукет куронъёс. Нош ансамбльын нимысьтыз крезьгур амалъёс пӧртэм луо. Отын зэмос ӧнерчи луыны кулэ.  Шонерзэ вераса, сыӵе выллем кырӟанъёс мыным ноку но матын ӧй вал. Куке ансамбльын ужало шуыса ӧй но малпаськылы. Улонэ ачиз сямен берытскиз. Мон солы шумпотӥсько.  Малпасько, котькытын астэ эскерыны кулэ. Мон «Шулдыр ӝыт» ансамбльын одӥг сямен кырӟасько,  дорын – мукет.  Огъя ваньзэ люкаса, кыӵе ке выль ӧр потыны быгатоз. Малпасько, со одно ик умой паласен берытскоз. 

– Кин тынад дун пуктӥсь адямиосыд?
– Мынэсьтым кырӟанъёсме анай эскерылӥз. Школаын дышетскыкум но, студент дыръям но ужъёсме котьку солы возьматылӥ. Куке тупатъяны косэ вал. Ӵемысь ушъялляз, азьланяз гожъяськыны бурдъялляз.  Соку туж шумпотӥсько вал. Озьы ик апаелэсь, эшъёсылэсь кенеш курылӥ. 

– Удмурт кылосбуръя факультетын дышетскемед тыныд юрттэ-а?
– Бен. Нимысьтыз кылбуръёс гожъяку.  Трос лыдӟиськоно луиз, кыллюкаме ялан узырмылӥз. Соин валче кулэ но тупась кылъёсты шедьтыны капчи.  Дышетскыку трос диалектъёсын тодматски, куд-огъёссэ кылӥ. Пӧртэм ёросъёсысь вераськон кылъёсын пачылмем кылбуръёсы но вань. Зэмзэ но, тунсыко ужъёс потылӥзы.

– Кызьы адӟиськод астэ дас ар ортчыса?
– Зэмзэ ке вераса, аслым инты трос утчай. Пӧртэм ӧнеръёсты эскери. Одӥгзэ валай: крезьгур –  со улон кузя вамышъян сюресэ. Яратоно ужме мон уг кушты.  Малпасько, «Шулдыр ӝыт» ансамбльын кырӟанме азьланьто. Одно ик выль ужъёс кылдытъяло.  Ваньзэ шараяме уг поты, оло, уз быдэсмы. Нош мар луоз отӥяз – уг тодӥськы.