Ксения  Тимеева
Персона

Ксения Тимеева

452 {num}

Кырӟа, эктэ, баянэн но фортепианоен шудэ,крезьгуръёс но кылбуръёс гожъя. Кин со? Удмурт эстрадалэн одӥгез ӝужась кизилиез – Ксения Тимеева. Вордскемын Пичи Пурга черкогуртын. Йылпумъяз Ижевскысь крезьгуръя колледжез. Али Удмурт кун университетысь Дизайнъя но устолыкъёсъя институтын дышетске.

– Мар бордысен кутскиз кырӟан удысэн эшъяськонэд?

– Пичи дыръям мон туж бӧрдӥсь нылпи вылӥськем. Соку песянае верам: «Та нылаш одно ик кырӟась луоз». Оло солэн капчи кылыныз, оло улон сюреслэн озьы гожтэменыз – кырӟан лулчеберет дуннеен эшъяськи. Зэмзэ вераса, песянае чылкыт но жингрес куараё вал, кырӟаны быгатонлыкез бадӟым вылэм. Малпасько, со выжые мынӥськем, дыр.

Нош зэмос сцена вылын нылпи садысен кырӟаны кутски: воспитателе быгатонлыкме ас дыраз синйылтэм. Дыр ортчыса, анай-атае монэ крезьгуръя школае сётӥзы. Отын баянэн но фортепианоен шудыны дышетски. Сое йылпумъяме бере Ижевскысь крезьгуръя колледже вокал удысэ тодон-валан басьтыны пыри. Таин гинэ ӧз тырмы, туала дыре вылӥ дышетскем но кулэ ук. Удмурт кун университетысь «Искусство народного пения» ӧнере пыроно кариськи.

– Кылбур гожъяськод, крезьгур малпаськод, кырӟаськод. Кудӥз та куинез пӧлысь тыныд тунсыко потэ?

– Крезьгур гожъяны. Нош со капчи уж ӧвӧл, одӥг нуналскын гинэ уд пӧрмыты. Умой крезьгур гожтон понна кык-куинь толэзь пала фортепиано сьӧрын пуконо. Баянэн но кырӟан гур кылдытыны луэ, нош фортепианоен со узыргес, пачылгес, «кырӟасьлыкогес» пӧрме.

– Мае возьматыны тыршиськод кырӟанъёсад?

– Тросэз мынам кырӟанъёсы яратонлы сӥземын. Туала быдэсъяськись ужъёс кадь мӧзмыт ӧвӧл соос. Сыӵе кырӟанъёсты воксё уг яратӥськы. Капчи но шулдыр мылкыдэн пачылмем крезьгуръёсты малпасько. Куке эскерисько, калык гуръёсты пыртӥсько. Жаляса верано, туннэ нуналлы кылбуръёс ӧжыт гожъясько ини. Ваньзэ вуыны уг луы.

– Вань-а тынад автобиографической кырӟанъёсыд?

– «Тонэ яратӥсько» уже яратоно пилы сӥземын.

Кыӵе вожвылъяськонъёсы пыриськылэмед вань?

– Пӧртэм ужрадъёсы пыриськылӥ, нош «Куарагур-2» но «Элькуноведение-2014» самой матысьёсыз но яркытъёсыз пото. Соос быгатонлыкме, мылкыд кужымме, лулме эскерон интыос вал. Кылем арын Пичи Пургалан «Чеберина-2015» фестиваль ортчиз, «Мусокай» номинациын вормисе потӥ. Азьланьын луозы на ай бадӟым вормонъёсы.

– Вань-а тынад адӟем карымон адямиосыд, кумиръёсыд?

– Туж яратӥсько бигер лулчеберет дуннеез! Ильшат Тухватуллинлэн кырӟанъёсыз кельшо. Уен-нуналэн но кылзысал. Николай Анисимов мыным «Тугоко» кырӟан гожтӥз. Отын но бигер гуръёс кылӥсько. Сое быдэстыку сюлэм ик шумпотэ. Мынам одӥгез яратоно кырӟанэ.

– Бигер лулчеберетэз яратэмед сэрен, оло, бигер кырӟанъёсты но быдэстысалыд?

– Одно ик! Шумпотыса ик бигер кылын кырӟасал, кылзэ умойгес тодысал ке. Мынам кыллюкамам кӧня ке гинэ кылъёс. Кузпалэ бигер мед луысал…

– Тон понна кыӵе со зэмос удмурт кырӟась?

– Нырысь ик, ассэ возьматыны быгатӥсь. Потэ ке со кырӟаны, ваньмыз солэн луыны кулэ: сцена но, учкисьёс но, кичабонъёс но, ваем сяськаос но. Та ласянь бигеръёс усто быгато. Бен, котькуд калыклэн сямыз ас рользэ шудэ, дыр.

– Тон астэ сыӵе шуыны быгатӥськод-а?

– Уг. Жаляса верано, сцена вылын мон асме эрико уг шӧдӥськы. Йырын мар ке пуке, кудӥз вӧлъяськыны, бурдъяськыны люкетэ. Ваньмыз ужамъя лыктэ, дыр, со. Нош улонын мон копак мукет: кызьы улэме потэ – улӥсько, мае лэсьтыны малпай – лэсьтӥсько.

– Дырыд луыку нош маин вырыны яратӥськод?

– Эктыны кельше. Куке хореография ӧнерын но дышетски. Пӧртэм вожвылъяськонъёсы, ужрадъёсы пыриськыса огыр-бугыр туала улонлэсь шутэтскисько. 15 арес дыръям флористикаен но выри. Али со вунӥз ини. Вуриськон, керттӥськон но пӧраськон – соос копак мынам ӧвӧл. Таӵе ужен вырыны мынам сямы уз чида.

– Кыӵе тынад льӧль малпанэд вань?

– Лулчеберетъя министр луэме потэ.