Оскар Хермавэн: Удмуртъёс  сярысь кылэме ӧй вал...
Персона

Оскар Хермавэн: Удмуртъёс сярысь кылэме ӧй вал...

308 {num}

Мадьяр шаерын стажировка ортчыкум, монэным одӥг группаын Индонезиысь пияш дышетскиз. Вылтусыныз но, сямъёсыныз но удмуртъёслэсь туж висъяське. Куке аслаз шаерез сярысь вералляз, куддыр мукет дуннеысь мурт кадь потылӥз. Нырысь учкыса, со огшоры туала адями, вань егитъёс кадь Интернетэн тунсыкъяськись но шулдыръяськыны яратӥсь. Но кӧня ке матэгес тодматсконо ке, адямилэн узыр пуш дуннеез усьтӥське. Оскар Хермавэн (Oscar Hermawan) вань сюлмыныз ас калыкезлэсь лулчеберетсэ, сям-йылолъёссэ гажа. Егит адями яратэ кылъёсты дышетыны. Али со немец кылэз дышетыны кутскиз, нош та интервьюез ми мадяр кылын дасям.

Соку кутском вераськонмес кылъёс пумысен. Кызьы озьы пӧрмиз, тон мадьяр кылэз дышетӥд шуыса?

2014-тӥ арын мон нырысьсэ Европае вуылӥ. Уно иськемъёс пыр аслобетэн лобӟыса, одӥг дуннеысь мукетаз кадь вуылӥ. Соку ик синйылтӥ Будапештэз но верай аслым: «Та карын мон улысал но ужасал». Мадьяр шаерын мадьяр кылтэк улыны секыт бере, мон ас поннам кылэз дышетыны кутски но калыккуспо дышетскон программаос пӧлын бугыръяськи. Шудэ вань ик вылэм: мон стипендия басьтыны быгатӥ но озьы Мадьяр шаере нош ик сюри. 

Кыӵе пӧртэмлыкъёсты Индонезия но Европа вискын синйылтӥд?     
                
Нырысь ик, дыр, семьяос. Ми дорын ӵемгес трос нылпиё семьяос. «Трос нылпи, трос коньдон вае» – шуо ми дорын. Ми но ньыль кузя анай-атаймылэн. Мукетыз бадӟым пӧртэмлык — оскон. Ми дорын туж трос мусульманъёс. Мон но оскись адями: пятницаосы черке ветлыны тыршисько, парсь сӥлез уг сииськы, Рамаданэз чакласько. Индонезия бадӟым шаер, уго 5 бадӟым остров котырын 180 сюрс пала пичиосыз. Котькуд сэрегаз вань аслаз аспӧртэмлыкъёсыз. Мон шоркарын, Джакартаын, вордскемын но будэмын. Тросаз интыосаз, жаляса верано, вуылэме ик ӧвӧл…

Маин тунсыко Джакарта? Мае отын адӟоно?

Нырысь ик верано, Джакарта — туж бадӟым кар. Отын 10 миллион пала улӥсьёс (быдэс Удмурт шаерын 1,5 миллион), машинаослэсь пробкаос но коркаос. Джакарта номырин уг висъяськы мукет шоркаръёслэсь. Карез адӟыны 1-2 нунал тырмыт луоз, тросгес тунсыкоез – кар сьӧрын. Ми дорын трос мечетьёс, христианской черкъёс, музейёс – оглом, котькытын кадь. Туристъёс трос вуыло, ӟучъёс но туж трос. Нош мон та карын быдэсми ке но, туж ик уг яратӥськы сое. Котьку но ӝокыт (быдэс ар 30 градус котыр), трос адями, машина… Озьы ик тросэзлы серем потэ индонез кыл. Кылсярысь, милям ӧвӧл лыдмы. Трос лыдэз адӟытон понна ми кулэ кылэз трос пол вераськом. Кылсярысь, адями – оранг (Orang), кык адями – Orang-Orang, jalan – поръяны, нош jalan-jalan – путешествовать карыны (ваньмылы тодмо луись «орангутанг» кыл – «нюлэсмурт» шуыса берыктӥське – ред).  

Сиён-юонэн но пӧртэм луэ-а? Мар сиё  Индонезиын?

Пӧртэм. Милям валтӥсь сиёнмы – рис. Ӵукна, нуназе, ӝытазе – котьку рис но бордаз маке сӥльлэсь яке чорыглэсь. Индонез сиён туж вӧё но курыт. Ми дорын тужгес но бадӟым процент улӥсьёсыз мусульманъёс бере, ми парсь сӥлез ум сииське но курыт юонъёс интые чай но кофе бырйиськом. Кылсярысь, котькуд празднике ӝӧк вылын вань тунпенг (индон. Tumpeng). Бадӟым тэркылэн шораз рислэсь «гурезь» но котыраз пӧртэм гарниръёс (но татчы огшоры пӧзьтэм рис уг мыны). Урамын вузаськись «ӝог» сиёнъёс пӧлысь тужгес но вӧлмемын мартабак пирогъёс (сӥльлэсь яке емышъёслэсь пушкесэз), «гореган» – пырсатэм емышъёс клярын, «сатэ» шашлык орех соус улын. Эшшо, ми киын сиськиськом, таиз тӥ понна валантэм, дышымтэ потоз, дыр. 

Ӟучъёс сярысь поттылӥд. Нош аслад Россие вуылыны вань-а мылкыдыд?

Туж потэ Россие вуылэме! Тужгес но бадӟым тодмо городъёсы – Москвае но Санкт-Петербурге. Зэмзэ вераса, ичи тодонъёсы Россия сярысь. Тодӥсько вал, со котыртонтэм бадӟым но кезьыт шуыса. Но, кылсярысь, Удмурт шаер сярысь, удмуртъёс сярысь ноку но кылэме ӧй вал. 
Турист интыын вуи ке, мае сувенир интыын басьтыны дэмлалод?

Магнитъёс, брелокъёс, кружкаос сярысь вераса уг улы – со котькытын вань. Индонезиын батиклэсь дӥськут яке басма басьтоно, лылэсь яке пулэсь лэсьтэм фигуркаос. Кышномуртъёс понна чебер пужыё зундэсъёс, пель угыос тунсыко потозы. Азвесьлэсь но зарнилэсь арбериос ми дорын дунтэмесь. Озьы ик экзотической емышъёсын, чаен но кофеен быгатоды паймытыны матысь адямиостэс.