Ульфат Бадретдинов
Персона

Ульфат Бадретдинов

137 {num}

Ульфат Шайхутдинович Бадретдинов – удмурт гожъяськись, «Кизили» журналлэн валтӥсь редакторез, Россиысь писательёслэн огазеяськонзылэн ёзчиез, Россиысь журналистъёслэн огазеяськонзылэн ёзчиез, Удмурт Элькунысь лулчеберет удысысь сӥё-дано ужась, Россиысь огъя дышетон удысысь сӥё-дано ужась. Нырысетӥ веросъёсын книгаез «Сяська сюлэмын но ӝужа» потӥз 1988-тӥ арын, бӧрысь – «Мар луоз ӵуказе?» (1991), «Мар со кадик?» (1994), «ӧте» (1997), «Пальпотон но малпаськон» (2002), «Шордин, сердцевина моя зоревая» повесть (2004), веросъёсын, повестьёсын но пьесаосын «Ӵушъял вордӥське веньёстэк» (2007), «Астэ утчан сюрес» (2017). 21-тӥ толшоре солы 60 арес тырмиз. Ӟечкыласьком!

– Маин Тӥледыз бордаз кыскиз гожъяськон удыс, литература дунне

 – Малы мон пичи дыръям «Дась лу!» газетэ гожъяськыны кутски, али валэктыны но уг быгаты. Нокин ӧз косы, ӧз бурдъя. Нырысь мар гожтыны но пайми вал. Ӟуч литературая учебникысь тодмо калык  
выжыкылэз удмурт кылэ берыктӥ но, улӥяз аслэсьтым фамилиме но нимме пуктыса, редакцие лэзи. Мыным гожтэт вуиз. Со дырозь нокин но мыным гожтэт ӧз лэзьы на вал. Сыӵе шумпотӥ! Гожтэтын кык гинэ предложениез: «Выжыкылэдлэн пуштросэз выль ӧвӧл. Гожъя». Валатски: газетэ гожтоно ке, ваньзэ аслыд малпано. 1969-тӥ арын «Дась лу!»-ын нырысетӥ выжыкылэ печатласькиз. Чеберлыко литературалэн ӧсаз йыгаськем выллем луиз, дыр, со.

Литература дуннелэн ас бордаз кыскись кужымез вань. Кинэ ке со ляб кыске, сыӵеос лыдӟиськыны  уг ярато. Куд-огъёссэ – туж зол. Лыдӟиськем сяна, соос асьсэос но литература дуннеез паськытатыны туртто, чеберлыко произведениос кылдытъяны кутско. Мон но сыӵеос пӧлысь.

Кызьы татчыозь ӧд на ыштэ пушкысьтыды со нылпиез, кудӥз юрттэ гожъяны выль произведениос? Кызьы тӥ сокем валаськоды но быгатӥськоды лыдӟись дорозь вуттыны ӵыжы-выжы (анай, атай, песятай...) но будӥсь нылпилэсь кусыпъёссэс, философизэс?

– Лев Толстойлэн верамезъя, гожъяськытэк улыны быгатӥсьтэм адями гинэ писатель луэ. Асме писателен шӧдон мыным соку ик ӧз вуы. Россиысь писательёслэн огазеяськонзылэн ёзчиез луэме бере но со пушкам ӧз пыӵа на. Куке произведениосме ӟуч, башкир, бигер, коми, мари, мордва, карел, эстон кылъёсы берыктыса пӧртэм изданиосын (кылсярысь, «Литературная газета», «Мурзилка», «Миша», «Воин России» но мукетъёсаз) печатланы ӧдъязы, асме  мукет писательёсын оградэ пуктыны дӥсьтӥ. Чеберлыко произведениос кылдытыны кыӵе ке но быгатонлыке вань. Со быгатонлыкез одно ик уже кутоно. Писатель троссэ улонысь басьтэ. Юрий Буйда гожъяськисьлэн пусъемезъя, писатель та улонысь образъёсты лушка, шпион сямен эскере адямиослэсь лулпушсэс, собере котырысь чилектэм кадь ӝог ортчись вакытъёсты «виылэ» но, соосты весяклы кельтон понна, ас произведенияз пыртылэ. 

Улонын туж трос учыръёс луыло.  Соос пӧлысь  куд-огзэ бырйыса, писатель соос пыр ас малпанзэ лыдӟисьёс доры вуттыны сюлмаське. Артист сямен ик, гожъяськись адями огдырлы врач но, следователь но, огшоры ужась но – олокин но кариськыны мед быгатоз. Маиз мынам умойгес пӧрме, созэ критикъёс но лыдӟисьёс мед вералозы.

 – Кыӵе со – Удмурт литературалэн вуоно дырыз?

– Удмурт литературалэн сюресэз одӥг даурлэсь кӧнялы ке гинэ кузь. Кыӵе со луоз эшшо ог сю ар ортчыса, нокин вераны уз тоды. Берло дас вить–кызь арскын элькунамы ог кык сю витьтон удмурт школаос ворсаськизы. Ваньмыз пӧлысь со ӝыныез. Анай кылэз дышетӥсь пиналъёслэн лыдзы но кулэсмиз. Озьыен, удмурт кылын лыдӟиськисьёсмес но унозэ ыштӥмы. Чеберлыко литература, солэн лыдӟисьёсыз ӧвӧл ке, лултэм макелы кельше, азьпал улонзэ со уг адӟы. 

Анай кылъёсты утёнъя политика кунамы, элькунамы ӧз ке воштӥськы, Россиысь эшшо кӧня ке калыкъёс кылёзы хантыос но мансиос выллем. Йӧскалык кылъёсын газет-журнал, книга поттыны бӧрысь коньдон сётӥзы ке но, пайдаез уз луы – лыдӟисьёс уз сюре ни.

– Вералэ, кыӵе улонысьтыды вакыт тужгес но шудо? Маиныз со тужгес но сюлэмады пытьы кельтӥз?

– Пичи дыр – со шудо вакыт. Анай-атаед но вӧзад, агай-вынъёсыд, апай-сузэръёсыд но артэ, эшъёсыд но трос. Аръёс ортчемъя дуно адямиос пӧлысь кинэ ке весяклы ыштӥськод, ӵош дышетскем эшъёстэ но шер пумитаськод ни. Соин валче тынад аслад нылпиосыд будо, собере нунокъёсыд но кылдо. Ӟечезлы шумпотыны быгатоно. Шумпотон, тазалык бордын шуд но возиське. Мон шудо шуыса шара вералляно ӧвӧл.

 Адямиос пӧлын вань сьӧд сюлмо вожъяськисьёс. «Шудо», «шуд» кылъёсты быдтон понна, соос оломар но лэсьтозы.

Кыӵе вал мынам пичи дыры, ваньмыз со «Шордин» повестям гожтэмын. Отын юри малпам учыръёсыз но ӧвӧл, эшъёсылэсь нимъёссэс но ӧй вошъя. Табере со повесть – гуртмылэн историезлэн пичи люкетэз. Произведениез лыдӟыса, кылем даурысь сизьымдонэтӥ аръёссэ но син азе пуктыны луэ. 

– Маин эшшо тунсыкъяськиськоды на?

– Гужем чорыганы яратӥсько. Гуртын коркамы вань бере, куддыр плотник но, столяр но, сварщик но кариськоно луэ. Боры, губи бичаны но дыр шедьтӥсько. Толалтэ куасэн ветлӥсько.  Инкуазьлэн чеберезлы паймемысь уг дугдӥськы. 

Тӥ понна котькуд выль нунал – со...

– Котькуд выль нуналлы шумпотыны кулэ. Ноку но со вордӥськытэк медаз кыльы. Выль нунал – со азьпал улонлы оскон, шумпотон, чеберлык, югыт, шуныт. Ӟырт кезьыт  нуналлэсь но шунытсэ шӧдыны быгатоно. Кызьы тӧдьы буёлын уло мукетъёсыз буёлъёс, озьы ик выль нуналын возисько югыт, шундылэн шуныт сиосыз, пальпотон но шумпотон.

– Тӥляд улон философиды.

– Кыӵе мынам улон шоры учконэ, ваньмыз чеберлыко произведениосам пыртэмын, пыӵатэмын.  Мае газет-журналын уд гожты, кивалтӥсьёс азьын уд вера, радиотелепередачаосын уд шарая,  чеберлыко литератураын возьматыны луэ. Мон озьы ик ужаны тыршисько.