Алексей Котков
Театр

Алексей Котков

444 {num}

Алексей Котков – Удмурт Элькунысь йӧскалык кун театрын драмая артист луыса ужа, «Эрико яратон» спектакльын Робертолэсь рользэ шудэмез понна «Театральная весна – 2016» фестивальын грамотаен пусъемын.

– Москваын дышетскыкуд, кыӵе шуг-секытъёсын пумиськоно луид? Мар туж капчи пӧрме вал, нош мар шуген?

 – Адями котьмалы дыше – зэм верало. Дышыны дыр гинэ кулэ. Монэ, пичи удмурт гуртын будэм пиез, Россилэн шоркараз вайизы. Мугоры но, сюлмы но «Осто!» шуыса вуизы гинэ но, «масковский» улонлы дышыны кутскизы. Ог ӝыны ар пала кыстӥськиз, лэся, дышон. Валамон ини, со дыр куспын стресс, депрессия, дискомфорт но эшшо кӧня ке со дӥньысь ик кылъёс. Отборочной конкурс дыръя ик веразы: «Котькуд нунал дас–дас одӥг час ӝытозь дышетсконо луоз». Ӧм оске. Кыкетӥ куарусёнэ дас кык часын уйин общагаысь валес вылам пограме бере гинэ осконо луиз. Зэмзэ верано ке, ваньмыз сокем секыт ӧй вал – дышыны гинэ кулэ, шуом, весь кытчы ке но дыртӥсь калыклы, бадӟым карлы. Дышетскон сярысь верано ке, актёрской мастерство секытэн сётӥськиз: отын пуш дуннедэ, мур малпанъёстэ, кышканъёстэ усьтоно. Мон, удмурт сямыным-а, маин-а, дӥсьтытэкгес ужме пӧрмытъяй. Капчиез сярысь веранэз ик ӧвӧл – ваньмыз сокем выль но аспӧртэмлыко потылӥз. Но ми марлы но солы дышимы, ньыль арлы дышетскыны ветлӥмы уго.

– Театръёсы кыӵе постановкаосты учкыны ветлӥды?

– Милям институтмы «при Малом театре» нимаське бере, отчы  ӵемысь вуылӥмы. «Ревизор», «Кабала святош», «Дети солнца», «Три сестры», «На всякого мудреца довольно простоты», «Наследники Рабурдена» спектакльёсты учкимы. Ми, театральной институтын дышетскисьёс, студенческой билетъя тросаз театре дунтэк пырыны быгатылӥмы. Шуом, МХТ-э Ленкоме.

– Кино удыс тыныд матын-а? Шудысалыд-а кыӵе ке киноын?

– Дипломамы гожтэмын «артист театра и кино». Но, зэмзэ вераса, дышетскимы сцена вылын гинэ шудыны. Кино бордын ужан сярысь туж ӧжыт тодӥсько. Москваын нуналлы быдэ сериалъёсы, киное пӧртэм кастингъёс ортчо. Одӥгаз сыӵе кастинге ми пиосын мыныны дӥсьтӥмы ик. Вуимы кыӵе ке студие. Калыкез ог куамын пала. Котькудмес регистрировать каризы, фотое уськытӥзы, черодэ султытӥзы. Милям сюлэммы йыгаське. Нош кыдёкынгес режиссёр но солэн юрттӥсьёсыз оген-оген учко конкурсантъёсыз – котькудзэ мар ке лыдӟыны косо, эктыны быгатэмзэс учко. Мынам воксё мылкыды куашказ – ма кыӵе мынэсьтым эктӥсь? Нош черод матэктэ но матэктэ. Кошкыны но ӧдъяй ни вал, асме ворми. Потӥ режиссёр азе, мар но со лыдӟи, эктэмъяськи. «Спасибо» шуизы но тӥни. Со бере кастинге ӧй вуылы ни. Нош кыӵе ке киноын одно ик шудысал, кастингез ортчысал ке (серекъя). Ма бен, «Пузкарлэн» одӥгаз эпизодаз вань ик мон – гитаристэз шудӥ. 

– Спектакль пуктон бордын ужакуды, тон нырысь ик сценарист кадь учкиськод-а? Аслад пьеса бордын ужамед вань-а? Кыӵе авторъёс тужгес но кельшо?

– Котькуд пьесаез мон нырысь ик артист кадь учкисько. Ролез эскерыку ик адӟисько ини, кызьы гожтэмын пьеса. Собере пыр-поч сюжетсэ учкиськомы, событиоссэ чакласькомы. Сыӵе милям ужмы: драматург пьесаяз кыӵе ке но идея, малпанзэ ватэ, нош ми режиссёрен сое утчаськомы, быгатэммыя валэктыны тыршиськомы. Пьеса гожтон дырозь ӧй буды на, сценарийёс кылдытон дорозь гинэ вуи ай. Кельшись авторъёс сярысь: шуак тодам лыктӥз Агата Кристилэн «Мышеловка» пьесаез. Со детектив амалэн гожтэмын бере, лыдӟись ачиз но геройёс сьӧры вамыш лэсьтэ. Нош аслам сценарий гожъяме вань «Камали» студилэн отчётной концертэзлы, «Театральная весна» элькун фестивальлы, «Удмурт кенешлэн» радъям концертэзлы, театрамы «Дэмен Выль арен» концертлы но одӥгаз Выль арлы сӥзем интермедилы.

– Кыӵе режиссёръёс, артистъёс тыныд кельшо театр, кино удысысь? 

 – Советской комедиосысь тросэз актёръёс. Паймисько соослэн шудэмзылы, серекъятыны быгатэмзылы: Никулин, Моргунов, Вицин, Куравлёв, Крамаров. Алиосыз пӧлысь верано ке: Владимир Машков, Евгений Миронов, Василий Бочкарёв.

– Алигес Удмуртиысь профессиональной театръёслэн XIV-тӥ элькун фестивалязы тонэ Робертолэн ролез понна грамотаен пусйизы. Вера та ролед сярысь кӧня ке.

–  Дарио Фолэн пьесаяз шудӥсь муртэз кык гинэ: кузпалъёс. Режиссёр Алексей Ложкин быгатӥз пыртыны татчы соослэсь пизэс но – Робертоез. Угось та роль уката но золгес кужмоятэ атаез но анаез вискын кылдэм конфликтэз. Спектаклья Роберто, анай-атаезлэн керетэмзылы чидатэк, анаезлы юрттыны кариське. «Атай юмша ке мукет нылъёсын, тон но шедьты аслыд воргорон», – шуэ со. Со сяна, анайзэ ачиз сямен дӥся, спортэн эшъяськытэ, пӧртэм дэмланъёс сётъя. Пьесая Робертолэн образэз гожтэмын ӧвӧл. Соин ик Роберто – мон ачим. Вань сыӵе валэктон – предлагаемые обстоятельства – мар мон, Олёш, карысал, пӧртэм учыръёсы сюрысал ке. Ми малпамы, Роберто рэп субкультураен тунсыкъяське шуыса. Соин ик мон англи кылъёсты ролям пыртӥ: «Ес, о май гад, кул». Сленг кадь луизы соос.

– Тынад улонад та диплом кыӵе ке пуштросэн тырмытэмын-а?

– Та диплом – артист улонам нырысетӥез вамыш. Аслым пусйи: театре юнме ӧй вуы, шонер сюрес лёгисько, иське. Ушъямез котькин яратэ ук (серекъя). Бурдъяськи. Диплом вӧзын кузьымез но вылэм – творческой командировкалы сертификат. Озьыен, шуд усиз выльысь Муское шонтыны. Ужъя – пӧртэм спектакльёсты адӟо, мэтръёс шоры учкыса, тодонме будэто.

– Туала театрез ӝутон понна мар кулэ тон малпамъя?

– Туала улон туж ӝог кошке, мон сое нимасал «эпоха быстрой информации». Адямилэн ӧвӧл дырыз Вашкала Грециын кадь дас–кызь час дугдылытэк спектакль учкыны. 

Мае али ми Интернетысь учкиськомы? Тужгес но чеберзэ, паймытӥсьсэ, быгатыса лэсьтэмзэ. Малпасько, театр но паймытыны быгатӥсь амалъёс шедьтыны кулэ. Соку егитъёс куспын ӵемгес кыломы: «Туннэ киное яке театре мыномы».

– Кыӵе тынад улон философиед?

– Та дырозь философиме ӧй бырйы на. Кыӵе ке крутой девиз но ӧз лякиськы. Улӥсько каньылля. Кин ке малпалоз, оло, талэн улоназ нокыӵе целез ӧвӧл. Вань. Со туж бадӟым. Ачим ик шара вераны кышкасько (серекъя). Улонэ сопала-тапала шоналля, ойдо ӵок – улӥсько каньылля!