Сергей Антонов
Театр

Сергей Антонов

1298 {num}

Сергей Анатольевич Антонов – артист-кукловод, Удмурт Элькунысь Мунё театрын ужа. Вордскемын Можга ёросысь Мельниково гуртын, собере Быдӟымсурд гуртын улэмын. Дышетскемын Казаньысь культурая но искусствоосъя университетын.

– Дышетскыны мыныкуды, рос-прос уд тодӥське вал, дыр, кызьы актёрлы дасяло?

– Тросэз адямиос Мунё театр сярысь тазьы малпало – ширма сылэ, ширма сьӧрын артистъёс бызьыло. Мынам но сыӵе ик малпанэ вал. Нош дышетсконмы драматической актёръёслэсь ӧз висъяськы: фехтование, акробатика, речь... Казаньысь университетэ пырон понна экзаменъёслы мыным Россиысь дано артист Александр Фёдорович Перевозчиков басня но проза дасяны юрттӥз. Со сыӵе ӵектон сётӥз: экзаменын комиссиысь валтӥсь адямиез быръёно но со вылэ гинэ ужано.

– Асьме Мунё театре малы ужаны бертӥды?

– Культурая министерство пыр дышетскыны пыри бере, соин контрактъя мыным Удмуртиын вить ар ужано вал. 2002-тӥ арысен татын ужаны кутски. Соку Олег Олегович Никитин кивалтӥсьмы вал. Казаньысь театре куара кулэ луиз, Людмила Александровна Дьяченко дышетӥсе ньылетӥ курс бере отын ужаны дэмлаз. Нош Олег Олегович кызьы ке но тодэм со сярысь, монэ отысь басьтыны лыктӥз но шуиз: «Ми тонэ Казаньысь театрын ужаны ум дышетӥське». Соин витетӥ курсэз мон заочно йылпумъяй, соку Ижкарысь Мунё театрын ужасько ни вал.

– Нырысетӥ рольдэс тодӥськоды на, дыр?

– Тодӥсько, «Чудо чудное, диво дивное» нимаське, ӟуч калык выжыкылъя пуктэмын, гуртысь пияшез шудӥсько. Али но та спектакль мынэ. Ваньзылы верасько, та мынам яратоно спектакле шуыса: отын котьмар карыны луэ, шузияськыны, тыпыртыны…

– Дышетсконысь бертэмды бере, кыӵе шуг-секытъёсын пумиськоно луиды?

– Пинал артистъёслэн котьку одӥг кадь сюлэмшугъяськонзы – улон инты ӧвӧл но пичи уждун. Собере улон ваньзэ интыяз пуктэ.

– Театрын ужаны кутскыны капчи-а вал?

– Актёръёслэн сыӵе визьмо веранзы вань: нырысетӥ курсын тон – суперкизили, кыкетӥ курсын – кизили, куинетӥяз – калык артист, ньылетӥ курсын – сӥё-дано артист, витетӥ курсын – нокин. Озьы ик луэ: татчы вылӥ театральноез йылпумъяса лыктӥ, мылкыд лӧптэмын. Нырысетӥ спектакльлы дасяськыкумы ик, огшоры мунё, боды вылын, номыр секытэз ӧвӧл кадь, нош уг пӧрмы мынам, котьмар кар. Артистъёс юало:

– Таӵе мунёосты вал-а? 
– Вал. 
– Малы соку уг пӧрмы?
– Уг тодӥськы…

 Ужась эшъёсылы туж бадӟым тау шуисько, кин кызьы быгатӥз, юрттӥз, али но юртто. Мунёосыз кызьы нуллонъя соос туж трос мыным валэктӥзы. Казаньын одӥг мунёосын ужаны дышемын вал, нош татын мукет. Куке зэмос мастеръёс тонэн ужало, соку опыт лыктэ. Нырысетӥ сезонэз ужаса, мон тросгес тодон-валан басьтӥ, вить ар дышетсконэн ӵошатыса.

– Кыӵе постановкаосын та дыре шудӥськоды?

– Соос туж трос: «Академия смеха» спектакльын Авторез шудӥсько, «Дикие лебеди» постановкаын – Бочка нимо бандитэз, наконец-то, отрицательной персонаж сётӥзы (сомында ар куспын!), угось романтикъёслэн образъёссы туж акыльто. Театре лыктыкум, огвакыт огнам пинал артист вал, рольёс огзы бӧрсьы огзы мынӥзы, выжыкылъёс тросгес возьматӥськом бере, принцъёсыз, романтикъёсыз, герой-любовникъёсыз шудӥ. Али «Ветреная сказка» спектакльын Тӧлэз шудӥсько, «Клочки по закоулочкам» – Фокусникез, «Шут Балакиревын» – кескич Барон Шафировез, «Поэтын» – Дантэсэз.

– Тӥледлы сцена вылын мунёосын шудыны капчигес-а?

– Пиналъёслы спектакльын мунё сьӧры ватӥськыса умойгес ужаны. Куддыръя сыӵе мунё удалтэ, котьку соин гинэ шудысал кадь. Нош бадӟымъёслы спектакльын мунёос ӧжыт уже кутӥсько, «живым планом» каньылгес ужаны.

– Кыӵе проектъёсы эшшо пыриськиды?

– «Солдатъёс ке кошко» спектакле Василий Серафимович Ушаков ӧтиз. Мон соглаш луи, военной тема пьесаын ӝутӥське шуыса, мыным со матын. Эшъёсы тросэз кошкемын ни улонысь, соосты буре вайыса шудӥ. Николай Байтеряковез туж гажасько вал, юнкоръёслэн слётазы пумиськылӥм.

Мукет ласянь ке учконо, мыным шулдыр вал «Ватка» театр этностудиысь егитъёсын ужаны, Мунё театр ужлэсь шутэтски, выль материал тодӥ, та проектлы луыса Князев Максимен тодматски, али туж эшъяськиськом.

Эшшо Леонид Гусевен удмурт кылын диск гожтӥмы – Г. Х. Андерсен, братья Гримм писательёслэсь выжыкылъёссэс. Гожтыкумы валам, огез кышноен картэн сярысь выжыкыл удмурт фольклорысь сюжетлы кельше шуыса.

– Маин ваньмон дыре тунсыкъяськиськоды?

– Берло дыре ваньмытэк пукыны тыршисько. Хобби – со гожъяськонэ, огвакытэ ик каллен-каллен гожтӥсько кӧня ке пьеса, тани театрлы ӟуч кылын нылпиослы сценарий гожтӥсько.

– Ку гожъяськыны кутскиды?

– Школаысен юнкоръёслэн кружоказы ветлӥ, «Можга иворъёсын» нырысь печатласьки, собере «Ӟечбур!» газетэ но «Кенеш» журналэ ыстылӥ веросъёс, сценкаос.

– Пьесаос гожъяськоды бере, кыӵе ке вожвылъяськонэ пыриськылӥды-а?

– 2008–2009-тӥ аръёсы Культурая министерство удмурт постановкалы вожвылъяськон ялӥз, соку «Как Лопшо Педунь рыжим стал» Пётр Захаровлэн пьесаез вормиз, нош кыкетӥ араз мынам «Шаянчи» пьесае нырысетӥ инты басьтӥз, кык кылын со вал.

– Кинэ шудыны льӧль малпанды вань?

– Али Сергей Есенинэз шудэме потэ, моноспектакль гожтӥ. Режиссёрен Лихацкая Галина Александровнаен пукыса, кык адямилы пӧрмытӥм ни. Арлэсь кема со спектакль бордын ужай. Пичи дырысен кельше вал Есенинлэн творчествоез, кельшемезъя огвыллем палъёсмес шедьтыны кутски, быдэсак биографизэ пыр-поч тодыны турттӥ, али сыӵе луонлык вань бере. Собере малпан кылдӥз Есенинлэсь кык берпуметӥ чассэ возьматыны. Рабочий нимыз «Непринятый Есенин».

– Мар сӥзьысалды егит гожъясьёслы?

– Поговорка вань: «Пока поле не вспахано, надо пахать начинать». Егитъёс удмурт кылын мед гожтозы, собере худсовет учкоз, кельшиз ке, малы уз басьтэ?

Драматург но режиссёр вискын котьку ведь конфликт мынэ. Туж шер луэ, куке ӵош, ог-огзэс валаса ужало соос. Кылсярысь, Григорий Горин но Марк Захаров кадь шуг шедьтыны та удысын огзэс-огзы валась адямиосты.

– Творчестволы кытысь вдохновение утчаськоды?

– Туала обработкаен классикаез яратӥсько кылзыны, Моцарт, Шуберт, Шнитке туж кельше. Нош руль сьӧрын ке пукиськод, попсаез кылзоно луэ. Барабанъёс йырын шудо ке, отын но маиз ке вань кадь. Син азям мар ке кылдэ ке, мон изьыны уг быгаты, ӧй ке гожты. Мынам блокнотэ котьку сьӧрам, малпан кылдэ ке, гожтӥсько.

– Гастрольёсын кытчы потаськоды?

– Татарстанэ, Башкирие гастролен ветлӥмы. Фестивальын кыӵе ке спектакль возьматӥськом, вормонъёстэк ум берытскиське. Таӵе потанъёсысь туж трос тунсыкозэ усьтоно, выль адямиосын тодматсконо, мукетъёслэсь ужамзэс учконо-чаклано.

– Спектакльёсады ӵыжы-выжыосты ке ветло, кыӵе дунъет сёто?

– Мон уг яратӥськы, куке тодмоосы ветло спектакльёсам, тужгес но ӵыжы-выжыос ке. Тани котькуд спектакль азьын, учкись пырыны кутскыку, мон аслам лушкем интыысеным учкисько котькудзэ. Озьы куинетӥ звонокозь сылӥсько, асме сценалы дасяса. Сомында ужаса, трос адямиосты адӟиськод, характеръёсты синйылтӥськод. Шуо ук: лучшее оружие – это информация. Тодӥськод ке, пияш яке кышномурт мылкыдтэк лыктэмын шуыса, куддыръя со адями вылэ ужаськод. Нош адями пальпотыса залысь потэ ке, соку ачид шумпотӥськод ини. Тыршисько вань энергетикаме учкисьёслы сётыны.

– Нылпиосын сцена вылысен кызьы огкыл шедьтӥськоды?

– Нылпиосын бадӟым муртъёсын кадь астэ возёно. «Мон бадӟым, тон пичи» кусыпъёсты медаз шӧдэ. Эш кадь луоно. Аслам но нылпиосын сыӵе ик кусыпъёсы. Тани «Ветреная сказка» выжыкылэн нылпи садэ яке школае потаськом ке, пиналъёсты бордэ кыскыны кулэ, соос выжыкыл пушкы мед выёзы но соослы со тунсыко мед потоз. Котькыӵе мылкыдыд тынад мед луоз, учкисьёс медаз шӧдэ сое. Бадӟым-а со роль, пичи-а, мон асме ӵемысь сюлэм тэтчатозь вуттӥсько. Учкисьёс шыпыт ке пуко, со но умой, иське, тунсыко соослы. Ачид бордысь со потэ, пумозяз та моментэз возьыны быгатод-а шуыса. Котькуд спектаклез котьку нырысьсэ кадь шудоно, котьку выль сямен.