Анатолий Перевозчиков
5 Юан

Анатолий Перевозчиков

1339 {num}

Анатолий Аркадьевич Перевозчиков - удмурт кылбурчи, прозаик, журналист, Россиысь писательёслэн огазеяськонзылэн ёзчиез, Удмурт Элькунысь лулчеберет удысысь дано ужась.

1
Кин со тӥ понна писатель?

Мон али со сярысь туж ик уг малпаськиськы ни. Вань-а со, ӧвӧл-а со, мар ке лэсьтэ-а, уг-а? Куке но вал туж бадӟым мылкыды писатель луыны. Соку мынам гуртын пукыса гинэ гожъяськеме потэ вал, йырам малпанъёс пуртыын ву кадь пӧзизы. Мар ке тунсыкозэ но лэсьтыны быгато кадь потӥсько вал. Мон пенсие потӥ но одӥг нунал но ӧй ни ужа, соку ик гуртэ бертӥ. Кузёелэн но, мукетъёсызлэн но лэземзы уг поты вал ке но. «Кин али пенсиен гинэ улэ?» – шуизы. Уксё сьӧры ноку уйиськыса уд вутты, бератаз таӵе луонлык кылдӥз шуыса шумпотӥсько. Табере нокытын но ужатэк гожъяськыны быгато, малпай. Но кӧня ке нунал улыса, тодам лыктӥз Василий Григорьевич Широбоковлэн верамез (со пенсие потыку мон Писательёслэн огазеяськоназы ужасько вал). «О, табере тӥляд гожъяськыны дырды трос луиз, – шуи соку мон солы пенсие потэмез бере. – Гожъяськыса гинэ пукиськоды ни, дыр». – «Э, пие, пие, егит дыръя гожъяськоно, куке кужым вань, – тыбырме вешаса шуиз со. – Али ӧвӧл ни со».

«Зарни шеп» ансамбльлэн но кырӟанэз тодам лыктэ:
«Луэ со, луэ со,
Пинал дыръя луэ со,
Пинал дыръя луэ со,
Пересьмыса уг лу со...»

Вот мынам но сыӵегес ик югдуре луиз кадь, пуш малпанъёс сомында, нош гожъяськыны кутскиськод но жадёно гинэ ини. Мон весь паймисько, кызьы Лев Толстой, сыӵе мӧйы воргорон, «Война и мир» книгазэ киын гожъяса ӵабъямын. Собыдӟа романзэ. Кӧня кужым солы кулэ.

Тани али кемалась ик ӧй висьы, но кузпалэлы Раиса Леонтьевналы шуисько: одӥг чур гинэ гожтӥ но жади. Ручка но кор ӝуткам выллем ик куддыръя луэ. Мынам со жадем сярысь вань кылбуръёсы но...

Писатель сярысь ке, со луыны кулэ азьветлӥсь. Калыкез азьлань валтыны быгатыны кулэ. Усьтыны лирической геройлэсь лулпушсэ, узырлыксэ, малпаськонъёссэ. Та улонэз умойгес карон понна, адямиез чебергес карон понна. Юнме Ф. М. Достоевский ӧз гожты угось: «Красота спасёт мир». Зэм ик-а со озьы?

Гожъяны кутскыкум литературалы но писательёслы бадӟымгес саклык висъяськылӥз. Гожъяськисьёсты кылзӥзы, пумиськонъёс но туж шуныт, ӟырдыт ортчыло вал. Али шумпотоно сыӵе пупумиськонъёс выльысь кылдыло но ортчо шуыса. Соиз ласянь монэ шумпоттэ Пётр Захаровлэн телевидение, радио, газет-журнал пыр вераськемез, вазиськемез. Мар ке но воштӥськоз ик, литературалы сӥзем ар нимыз понна гинэ уз луы кадь потэ. Оло нош кивалтӥсьёс но писательёс шоры чылкак мукет синмын учкыны кутскозы.

2
Мар со тӥ понна литература?

Писатель но литература люконтэм юн герӟаськемын. Писательлэн мур малпанъёсыз – со одно ик литературалэсь пуштроссэ будэтон. Туала вакытэ, пӧртэм выльдӥськонъёсын-а мар-а, литература палэнэ кылиз. Туж кыдёке. Ичиез гинэ быгатэ книгазэ поттыны, нош туж тросэз ӝӧке гожъясько. Одӥг ласянь со умой, куке коньдон тонэ уг кыскы, синдэ уг мальдыты, сюлэм косэмедъя ке гожъяськиськод. Мукет ласянь, коньдон но кулэ луыны: ёрмыса улон, куке книга поттыны уд быгатӥськы – зӥбе адямиез. Солы сётскыны уг яра, йырез кӧня ке вылэгес ӝутытэк уг луы. «Ваньмыз умой луоз ай, вуозы ай сыӵе дыръёс» – ачид аслыд оскон сётӥськод. Ужаны ачид астэ бурдъяськод. Али но умой-умой гожтымтэзэ гожтэме потэ на. Адямиослы но, аслыд но гожтэм арбериед мед ярасал. Соку вераны быгатысал ни, юнме та дуннеын ӧй улы шуыса. Литература – со гожтоно книгае, кудӥз лыдӟисьлэсь сюлэмзэ бугыртысал.

3
Кин тӥляд лыдӟисьты?

Мон утчасько гожтыса вань жанръёсын. Сыӵе курон аслым пуктӥ. Кутски поэзиен, собере прозаын асме утчай. Потэ драматургиын но асме эскереме, озьы ик мукет жанръёсын но. Дневник гожъяллясько. Кылбур гожъяку мылкыд бурдъяськем луыны кулэ, инметӥ лобам выллем. Весь лобаса улэм уг луы. Музэ усиськод ке, вӧсь луиськод ке, соку прозаен утчаськод гожтыса. Уноез гожъяськисьёс утчало ас кужымзэс драматургия удысын. Мынам но потэ. Таиз ласянь мыным ӧз на удалты: одӥг пьесае но сцена вылын возьматэмын ӧй вал на. Огвакыт эпос удысэ выйи — озьы потӥз Донды батыре. Берло калык вералоз ни быгатӥ-а мон, ӧй-а со яке та жанрен гожтыны-адӟытыны. Нош ӧд ке оскалты, ноку но сое уд тоды. Дунъет сётоз ни лыдӟись. Вуоно лыдӟись.

Туэ ӧжытгес лыдӟиське калык, но мон тодӥсько, со берен книга доры берытскоз ай, весь Интернетын гинэ уз пукы. Мон номырлы но ӧй воштысал книгаен кусыпъёсме. Лыдӟиськыкум мон шумпотон басьтӥсько. Мон туж вашкала адями кадь аслым куддыр потӥсько, туала егитъёсын ӵошатыса. Ма аслам но нунокъёсы планшетысь гинэ лыдӟисько на.

Лыдӟисе ачим кадьгес ик луыны кулэ: малпаськись, тунсыкъяськись, ваньзэ тодыны тыршись. Со улонэ, колодчае сямен, лэзиськыны турттӥсь, солэн тодэмез потэ, маиз отын пушказ вань. Юзмыт-а вуэз, юымон-а со...

4
Кыӵе со туала дыр?

Мон вашкала адями. Кызьы мон туала егитъёсты дунъяны быгатӥсько? Гожъямзыя. Адямиослэн верамзыя. Егитъёслэн туэ чиданзы ӧвӧл. Вашкалаос мае гинэ чидамын, пырпотэмын ӧвӧл... Нош туэ тросэз капчи уксё поттон сярысь малпасько. Со умоез дорозь уз вутты. Мар капчиен сётӥське, со капчиен ик ыше. Анай-атайёсмы ваньзэ ас тыршеменызы басьтӥзы, тыршизы. Мыным потэ та сярысь егитъёс вунэто кадь. Гожъяськисьёсты ке басьтӥд, кырӟанъёсты ке басьтӥд — Запад шӧмын пыӵамын соос. Со выль пыртонъёсын вань аслаз ӟечез но асьмелэсьсэ со валлин вунэтоно ӧвӧл. Кыдёкысь кулэ ӧвӧл утчаны, асьмелэн но туж трос ӟечез. Удмурт калык кырӟанъёсты ик басьтоно ке, макем мур пуштросэз отын, кыӵе сюлэмез позырто, нош алиосыз сюлэме сокем уг кылё. Кылъёсыз но сокем мур пуштросъем ӧвӧл, рифмаямын но умойтэм. Асьме удмурт шӧдонмес ыштоно вылымтэ. Сое пересьёс уз ни быгатэ, егитъёслы азинтоно. Туалаез но вашкалаез полысаса мед мынозы.

Конечно, егитъёслэн вань асьсэ ӟеч палъёссы но: дӥсьтон, тунсыкъяськон, трос тодон. Кепыраса уг уло: сцена вылын асьсэдыз возьыны быгатоно, калыкын но. Таиз ласясь соослы — вож сюрес. Удмуртсэ, вашкалазэ гинэ медаз вунэтэ вылэм, мед утёзы. Соку азьвыл поколениос егитъёсын данъяськысалзы.

5
Вить яратоно книгады.

Мон классикаез ялан бугыръясько, выльысь лыдӟисько. Паймисько мон асьме классикъёсмылы: сыӵе вакчи улонзэс улыса, сокем дано книгаос гожъязы. Мон 68 арескам сыӵезэ ӧй на гожты.