Георгий Грязев
5 Юан

Георгий Грязев

1353 {num}

Георгий ГРЯЗЕВ – тодмо гожъяськись, публицист, Удмурт Элькунысь сӥё-дано журналист, Эрик Батуев нимо национальной премилэн лауреатэз. Али книга поттонъя «Удмуртия» издательстволэн валтӥсь редакторез луыса ужа.

1
Кин со тӥ понна писатель?

Писатель – со адями, кудӥз котыр дунне шоры философ синмын учке. Аслэсьтыз мур малпанъёссэ лыдӟись доры вуттыны быгатэ. Гожтэм кылыныз лыдӟисез вырӟытэ, улонзэ бугыртэ, малпаськыны косэ. Зэмос писатель дорозь будыны кулэ. Адями трос литературной кылдытосъёс ке но гожтэ, мон сямен, со писатель ӧвӧл на. Мынам аслам кык книгаосы потӥзы. Кык повестьёс гожтӥ ке но, асме писателен уг шӧдӥськы. Пуш дуннееным но, йыр визьмыным но мон журналист-документалист. Соин мон данъяськисько. Шӧдӥсько, со мынам быръем улон ӧре. Ӵемысьгес толон но туннэ ортчемез сярысь гожъясько. Вунэтэмзэ, ышемзэ, быремзэ выльысь калык пӧлы вуттыны тыршисько. Мон сямен, писатель журналистлэсь одӥг тубатлы вылӥынгес. Соин ик, зэмос писатель луон понна ачид бордын трос ужаны кулэ. 

2
Мар со тӥ понна литература?

Литература – со бадӟым лулчеберет. Со пӧртэм буёло сяськаосын возьвыл кадь, кытын шӧдӥське адямилэн дунне шоры учкемез, пуш дуннеез. Котькуд лыдӟись литературалэсь яратоно удыссэ быръе. Одӥгез детектив, мукетыз фантастика, куинетӥез историен герӟаськем чуръёсты лыдӟыны яратэ. Лыдӟиськись адями литературае вые, соин ӵош пӧртэм малпанъёсы, адӟонъёсы пӧлы вуэ, кудъёссэ автор гожъямъёсыз пыр сётыны тырше. Литература – со асьме вӧзтӥмы ортчись улон…

3
Кин тӥляд лыдӟисьты?

Таӵе юан сётыкузы, малпаськонэ усисько… Мынам туала очеркъёсы, зарисовкаосы пуштроссыя секытэсь. Соос Афганистанын, Уйпал Кавказын бырем пиос сярысь. Геройёсы трос шуг-секытъёс пыр ортчемын. Нош кӧняез лек тылӝуысь яратоно семьяосазы ӧз берытске ни. Та солдатъёсын луэм учыръёс пыр туала вакытэ егит адямилэсь улонын интызэ, пуш дуннезэ но малпанъёссэ возьматыны тыршисько. Улон котькызьы мед куасалоз-позыръялоз но, зэмос адями аслэсьтыз ымнырзэ уг ышты. Соин ик, мынам лыдӟисьёсы – ожысь шуг-секытъёсын пумиськемъёс, кудъёсыз али но куректо, ваньзэ сюлэмазы возё. Соослэн матысь ӵыжы-выжыоссы, кинъёс понна мурт сюлэмшугъяськонъёс, куректонъёс асьсэлэн кадь пото. Гожъяку, аслым но секыт луэ. Уго тон геройен ӵош солэн улон сюресэз вылтӥ выльысь ортчиськод. Адямиослэн бӧрдэм пыр верамъёссы лулпушкез берыкто, йырвизьмез бугырто. Трос юанъёс кылдо…
Вань сыӵе но лыдӟисьёс, кудъёсыз уг валало кадь потэ та вакчи гожтосъёсты. Соку аслэсьтым ачим юасько: малы ваньзэ бугыръясько на, кайгыр аръёсы выльысь берытскисько? Борддорлы гожъясько кадь потӥсько. Валэктонэз нош котьку но йырам: лек ожъёсын асьсэды геройлыко возьматэм улосчиосмес быдэс элькунамы тодыны кулэ. Соос кунмы азьын, асьмеос азьын сётэм кылзэс быдэстӥзы. Тужгес но дунозэ – улонзэс эрико вакытмы понна сётӥзы. Котькуд адямилы сыӵе вамыш лэсьтыны Инмар кужым уг сёты!

4
Кыӵе со туала дыр?

Со туж ӝог лобись ракета кадь. Котьмае дугдытыны луэ – автомашинаез но, поездэз но, космической кораблез но… Туала дырез гинэ нокызьы уд куты. Азьло ваньмыз каллен, каньылак, чакласа гинэ ортче вал. Гуртын улон гань-гань радъяськиз. Озьы ке но калык котькытчы вутске вал. Карын улон пӧзись пуртыын кадь, улӥсьёс ялан кытчы ке но дырто. Берло дыре отын но, татын но ваньмыз одӥг кадьгес луиз: адямиос улонэз ик адӟытэк, сое валатэк ик кытчы ке «лобо», бызё, канжасько, султо но выльысь кошко. Соин ик котыр дуннелэсь бергамзэ шӧдытэк кылё. Берлань учко но, дыр ортчем ни, со мукет. Таӵе улонэн ӵош вамышъяны кулэ. Дырлэсь ортчемзэ ӧд вала ке, соку улон сюреслэн урдэсаз ымдэ усьтыса кылёд.

5
Вить яратоно книгады.

Тужгес яратоно книгаосты яке литературной гожтосъёсты висъяны туж секыт. Пичи дыръя лыдӟем книгаос йыре умойгес кылемын. Соос золгес визьме пыӵамын, малы ке шуоно вань гожтэмъёслы оскиськод, сюлэм пыр поттӥськод. Школаын лыдӟем Семён Самсоновлэн «Кам вадьсын гудыръя» повестез али но син азьын. Берло дыре мукет калык гожъяськисьёслэн литературной кылдытосъёсыныз тунсыкъяськыны кутски: Чингиз Айтматов, Юрий Рытхэу, Юван Шесталов. Мыным матын соослэн асьсэ калыксы сярысь быгатыса но яратыса аспӧртэмлыко гожъямзы. Публицистъёс пӧлысь уката но Василий Песковлэн ужъёсыз кельшо. Ас удысаз со яркыт пиштӥсь кизили. Соин ик вань кинлэсь адӟем карыны, вань кытчы будыны. Дунне вылын чеберезлы ялан паймыса улоно…