Елена Миннигараева
5 Юан

Елена Миннигараева

175 {num}

Елена Миннигараева – удмурт журналист, кылбурчи но прозаик. Удмурт Элькунысь Эрик Батуев нимо премилэн лауреатэз, Финляндиысь М. А. Кастрен обществолэн валтӥсь премиезлэн лауреатэз. Али Елена Васильевна «Удмурт дунне» газетлэн валтӥсь редакторезлэн воштӥсез луыса ужа. Кемалась ӧвӧл тодмо гожъяськись лыдӟисьёсты выль «Сьӧд сюлык» книгаеныз тодматӥз.

Кин со Тӥ понна писатель? 

Котькин йырысьтыз малпанъёссэ ручка кутыса, я компьютер сьӧраз пуксьыса гожтыны  быгатэ. Книга поттыны но сокем секыт ӧвӧл. Но ваньзэс со гожъяськисьёсты писатель шуод шат? Мынам малпамея, зэмос писатель висъяське узыр лулпуш дуннееныз, улонэз шӧдыны быгатэменыз. Куке соку А. Ахматова гожъяз: «Когда б вы знали, из какого сора растут стихи, не ведая стыда…» Зэм но, гожъяськись адямилэн йыраз кыӵе но малпанъёс, мылкыдъёс уг бергало. Но со соосты озьы сузьйыны быгатэ, кылдэ гармония. Выль произведение – выль улон. Со котькыӵе луыны быгатэ: ӝожмыт мылкыдо яке серемес… Писательлэн кылбуръёсыз, веросъёсыз, кузьмадёсъёсыз лыдӟисьлэсь лулзэ бугыртыны, йырзэ малпаськытыны кулэ. Лыдӟид но соку ик вунэтӥд – озьыен со ӧвӧл зэмос литература. Адями геройёсын валче кайгырыны, шумпотыны, малпаськыны кулэ.  Мед луоз со юмор яке детектив, сак лыдӟись гожтэм ужлэсь одно ик мукет пуштроссэ усьтыны быгатоз. Со понна гожъяськисьлэн бадӟым лулкужымез но Инмарен сётэм быгатонлыкез луыны кулэ. Жаль, туала вакытэ сомында жуг-жаг пӧлысь зэмос литератураез калык адӟытэк ик кыле.  

Мар со Тӥ понна литература? 

Аспӧртэм омырен тырмем пыдэстэм дунне. Сое ноку омыръяса уд быдты, сое ялан веръям, омыръям потоз. Пичи дырысен мон туж яратылӥ лыдӟиськыны. Семьяын бадӟымез бере, гуртысь уж ӵемысь мон вылэ усе вал. Виссэ шедьтыса, лушкем ке но книга сьӧры пуксьылӥ. Тодӥсько на, макем бугыръяськиз мылкыды «Солёный пёс», «Гуттаперчивый мальчик» веросъёсты лыдӟыса. Но литература мон азьын тужгес зол усьтӥськиз Можга пеучилищеын дышетскыкум: 
Ф. М. Достоевский, И. С. Тургенев, А. И. Куприн, В. М. Гаршин… Всеволод Гаршинлэн «Четыре дня» веросэз вань. Со ог 140 ар талэсь азьло гожтэмын, зэмос учыр вылэ пыкиськыса, но толон гинэ кадь. Сокем юн возьматэмын адями дунне, кулон но улон. Зэмос литературалэн ӧвӧл дырыз.  Зэмос литература адямилэсь улонзэ узыргес но яркытгес, нош ассэ адямиез адямилыкогес каре котькыӵе вакытэ. Мон яратӥсько малпаськытӥсь, мур пуштросъем книгаосты лыдӟыны. Паймисько соосты гожтэм писательёслы. 

Кин Тӥляд лыдӟисьты? 

Одӥг вакытэ мон аслым гинэ, огшоры гожъялляй. Ӵемысь со пичи кылбуръёс но веросъёс вал. Мылкыд бугырске, чуръёс асьсэос бумага вылэ кисьтӥсько. Соку лыдӟисьёс сярысь чик ӧй малпаськылы. Тросэзлэн гожъяськисьёслэн литературае сюрессы озьы кутске, дыр. Но пумен-пумен, лыдӟисьёс мылкыдзэс верамъя, аслад творчествоед шоры но соослэн синъёсынызы учкыны тыршиськод.  Куддыръя воксё паймымон учыръёс но луыло. Кылсярысь, «Мумы» книгаме егитъёслы шуыса гожтӥ. Озьы ке но, арлыдоос та ужме яратыса но бадӟым тунсыкен лыдӟылӥзы, пумиськонъёсы ӧтчазы. Нош тани  «Сьӧд сюлык» книгаысь «Из» фэнтези аспӧртэм эскерон вал. Мыным туж тунсыко потӥз: мар меда шуоз лыдӟись?  Кинлы кельшоз та гожтэме? Егитъёс фэнтезилэсь кыкетӥ люкетсэ  гожтыны куризы, сое кыӵе ке фэнтези повестёзь вуттоно шуизы. Нош улонэз адӟем, шӧдэм мӧйы лыдӟисьёслы ваньмыз туж валамон но йылпумъямын кадь потэм. Туж пайми: витёнтэм вылысь Сюмси ёросысь 70-зэ ортчем песянай адӟиз веросысь сое, мае, мон малпамъя, адӟыны кулэ вал дышетскем удмурт интеллигент гинэ. Кин кызьы лыдӟе, кин мае адӟе. 

Кыӵе со туала дыр?

Улон ноку огшоры шонер гож кузя уг мыны. Со огыр-бугыр берга, пӧртэм ӧръёстӥ полэстӥське. Та улонын ваньмыз куке вал ни: ваче вуонъёс, ожмаськонъёс, ог-огеныд кусып шедьтыны тыршон, яратон, вордӥськон но дуннеен люкиськон.  Азьло луэм учыръёсты али но пумитаськом. Соослэн вылтуссы гинэ воштӥське. Литератураын ӝутэм темаос но дауръёс ӵоже уг воштӥсько. Асьмеос тунсыко дыре улӥськом. Капчи ӧвӧл, мӧзмыт но ӧвӧл. Одӥгез пумысен гинэ вӧсяськоно: туала адямилэн визьмыз мед тырмысал ожъёстэк, вир кисьтонъёстэк улыны. 

5 яратоно книгады? 

Мон ачим литература пушкын улӥсько, соин секыт потэ сыӵе ужъёсты висъяны. Эшшо ке дышетскемея – филолог. Кыӵе ке книгаез лыдӟыкум, писательлэн гожъяськон амалэзлы, кутэм образъёсызлы, геройёсызлы аспӧртэм анализ лэсьтыны кутскисько. Кытӥяз со люкетэ. Но куддыръя книгаез лыдӟыкуд быдэсак выйиськод солэн дуннеяз. Кыӵе анализ? Мон вунэтӥсько ваньзэ, мон улӥсько со произведениен ӵош, мон споръяськисько авторен яке дурыстэм синмаськисько солы. Тӥни сыӵе книга – мынам  яратоноез луэ.  Одӥгез соос пӧлысь – «Библия». Нырысьсэ мон сое лыдӟи 15 арескам. Ӵемысь потылӥз споръяськеме. Но та книга доры мон нош но нош берытскисько, солэсь пытьыоссэ туж юн шӧдӥсько ӟуч классикаысь. УдГУ-ын дышетскыкум монэ бугыртӥз Джон Мильтонлэн «Потерянный рай» поэмаез. Али но уг валаськы, малы. Но сое мон удмурт кылэ но берыктыны выри, кужыме ӧз тырмы… Ас вакытаз мон туж яратыса лыдӟылӥ Михаил Федотовлэсь, Сергей Матвеевлэсь, Алла Кузнецовалэсь, Людмила Кутяновалэсь, Татьяна Черновалэсь кылбуръёссэс.  Удмурт прозаикъёс пӧлысь малы ке сюлэмам выжыяськизы Роман Валишин но Генрих Перевощиков.