Пётр Захаров
5 Юан

Пётр Захаров

1270 {num}

Пётр Михайлович Захаров – удмурт кылбурчи, журналист, берыктӥсь но драматург. Удмуртиысь писательёслэн огазеяськонзылэн тӧроез, Удмурт ПЕН-клублэн президентэз,«Инвожо» журналлэн валтӥсь редакторез.

1
Кин со тӥ понна писатель?

Мон кутско велосипед бордысен. Велосипед туж огшоры арбери, но туж йӧспӧртэм. Со кык питрано мар ке, вань солэн рамаез (сюрлыез), пуксёнэз, ныпъет нуллонэз, дэрилэсь но вулэсь утись бурдъёсыз, педальёсыз, пичи но бадӟым кизилиосыз, жильыез, подшипникъёсыз, рулез но тормозэз… Велосипед тонэ нуыны быгатэ, ачид педальёссэ ке позыръяськод, пуксьыны ке вылаз быгатӥськод, рулез ке шонер кутӥськод, ӧнераськод ке велосипедэз. Кулэ ке – азьлань кошкиськод, кулэ ке – тормоздэ кутӥськод. Мон сямен писатель но, велосипед кадь ик, тонэ кытчы ке нуэ – кытӥ ке капчигес но ӝоггес, кытӥ ке секытгес но калленгес. Нюкъёстӥ, гопъёстӥ, возьвылъёстӥ, бусыостӥ, асфальт вылтӥ, гуртъёстӥ, городъёстӥ. Куд-ог дыръя сыӵе интыостӥ, кытӥ тон ноку но велосипедтэк уд ветлы. Нош куд-ог дыръя тон ачид но велосипеддэ нуоно луиськод: нӧдэтӥ, нюлэстӥ, сюрестэм интыостӥ. Озьы ик писатель но котьку тонэ аслаз дуннеостӥз уг нуллы, луылэ сыӵе дыр, куке тон ачид но, лыдӟись, писателез мукет культура дуннее пыртӥськод. Вань сыӵе интыос, кытын тынэсьтыд писательдэ уг тодо. Та ӵошатыса веран ке но, татын трос огкадез вань. Писатель лыдӟись понна яке инструмент, яке техника луэ, – дуннез валаны, улондэ капчигес ортчыны, тросгес адӟыны, тросгес интыосы ветлыса вуыны. Угось адямилэн улонэз ӝог лобӟе, пересьёс верамъя, номыре но куаӵ-куаӵ адӟыса вуыны уг луы. Нош писатель туж ӝог нуллэ пӧртэм интыостӥ. Зэмос писатель велосипед кадь гинэ уг луы, со «супертехника», супер роботомобиль выллем – пичи но, бадӟым но луыны быгатэ, пота сыӵе дуннеосы, кытчы тон ноку уд пота, уд пыра. Писательлэн аслаз но сыӵе «супертехникаез» вань, малы ке шуоно со трос писательёсты тодэ. Со Агент 07 кадь, уно «супертехникаосын» ветлэмын, трос лыдӟиськемын, трос адӟемын.

Ма, лыдӟись калык но визьтэм ӧвӧл, со шуак вала, кин со азьын – писатель-а, ӧвӧл-а. Дуннеосыз возьматыны быгатӥсьтэм «велосипедэ» со уг пуксьы. Соин ик писательлэн одӥгез валтӥсь тодметэз – со лыдӟисьлэн лыдыз. Лыдӟисез вань ке, сое писатель шуиськод. Ӧвӧл ке, мукет сямен малпаськиськод…

2
Мар тӥ понна литература?

Литература – мон понна дунне, кудӥз тодмо но тодмотэм луыны быгатэ; улонэз, дуннеез ӟеч возьматӥсь, ӟеч усьтӥсь, ӟеч суредась микроскоп, телескоп, локатор; лакмус кагаз, кыӵе ке прибор, кудӥз вера мар умой, мар умойтэм; сюлэмез капчиятӥсь эмъюм, мылкыдэз бурдъясь шумпотон, паймон; куд-ог дыръя синвуэн ик бӧрдытӥсь катарсис; но котьку ӟечез, зэмосэз, мурез, луллы кельшисез, Инмарез данъясез.

3
Кин тӥляд лыдӟисьты?

Лыдӟисьёсы мынам вань, яратӥсьёсыз но трос, жугисьёсыз, куртчисьёсыз но пӧлазы шедё. Мон малпасько, тросэз соос удмуртъёс, ӟучъёсыз ке но вань пӧлазы. Нош мукет кылъёсын трос ӧвӧл, соос пӧртэм фестивальёсын тодмаськем адямиос но эшъёс, кинъёс монэ мукет кылъёсы берыктӥзы: эстон, венгер, финн, коми, мари, чуваш кылбурчиос. Эшшо Украинаысь кылбурчиос малы ке ярато, кык калыккуспо литературной премия сётӥзы: нырысь – Николай Гогольлэсь, бӧрысь – Георгий Сковородалэсь. Кылбуръёсы берыктэмын немец, француз, англи, швед, иран, афган, поляк, болгар, македон кылъёсы. Вань кыӵе ке учыръёс, соос асьсэ коже кылдо но азинско. Олокытысь пото эшъёс, собере соослэн эшъёссы, кылдо кыӵе ке мыным валантэм калыккуспо проектъёс, озьы нош ик сюриськод мукет кылъёсы. Со ачиз радъяське, ас кожаз паськыта…

4
Кыӵе со туала дыр?

Туала дыр туж ӝог вошъяське. Дырлэн сямыз, ымнырыз, мугорыз – ваньмыз калейдоскопе сюремын кадь. Туннэ со таӵе, ӵуказе мукет ни. Асьмеос валаны кутскиськом дизайн сярысь, малы ке шуоно туала дуннеен Дизайнер кивалтэ. Пуш уг воштӥськы, вошъяське вылӥысез, вузаськисез, гольтресэз. Лулэз воштыны секытгес. Татын, арлыд вуэмъя, ваньмыз интыяз пуксе. Нош котькуд нунал гольтрессэ гинэ данъяло-ушъяло ке, лул но йыромылэ ук. Лулэз пичиысен туннэ сӧро, пӧяло, пожало. Туж жаль потэ адями, уг вутты со та дуннее лыктэмез пумысен малпаськыса. Уг вуы ӟеч ужъёс лэсьтыса, зэмос шумпотон басьтыны. Соин солэн стресс. Со пегӟе аслаз «гуаз», мукетъёсты тушмон каре.

Но вань мукетыз но тулкым, кудӥз сокем ик адӟиськытэк ортче ужамъяськисьёс, быдӟымъяськисьёс, монъяськисьёс вӧзтӥ. Та тулкымлэн пушказ нокин уг туртты начальник яке тодмо кизили луыны. Соос сузяло кырсёмытэм интыосты, юртто адямиослы югыт дуннее ӝутскыны. Соос котькытын вань, кивалтӥсьёс пӧлын но, огшоры ужасьёс пӧлын но… Соос тодо, зэмос яратон отын, кытын нокин косытэк, номыр витьытэк ярато.

5
Вить яратоно книгады.

Яратоно книгаосы: