Римма Николаева
5 Юан

Римма Николаева

224 {num}

Римма Николаева (Перевозчикова) – туала удмурт прозаик, журналист, драматург, сценарист, очеркъёс но выжыкылъёс гожъясь, кылысь кылэ берыктӥсь. «Инмысь шуд» (2012), «Гудырипуз» (2016) книгаослэн авторзы. Удмурт йӧскалык театрысь артистка, Удмурт Элькунысь культура удысысь дано ужась, Удмурт Элькунысь Гожъяськисьёслэн огазеяськонзылэн ёзчиез.

Кин со Тӥ понна писатель?

Мон понна писатель – со азьветлӥсь, котырысьтыз яркытсэ, чеберзэ адӟись, улонысь пиртэш интыоссэ алӥсь, лыдӟисьёслэсь сюлэмъёссэс аратӥсь. Котькыӵе кылын гожъяськись писатель нацилэн лул-сюлмыз луэ, кудӥз ас вордӥськем кылзэ, йылолъёссэ, культуразэ уте.

Мар со Тӥ понна литература?

Литература – со калыклэн узырлыкез. Вашкала дырысен адямиос асьсэлэсь тодон-валанъёссэс папирус, кызьпу туй, из борддоръёс вылэ ӵабъяса кельтылӥллям. Литература – со адямилэн улоназ юрттӥсез, матысь эшез луэ. Адями аслыз кельшись книга лыдӟыса, я тодон-валанзэ будэтэ, я лул пушсэ шунтэ.

Кин Тӥляд лыдӟисьты?

Лыдӟисьёсы мынам пичи экеос. Тодмоосылэн, выжы-кумыосылэн но тодэмзы потэ, кызьы улӥсько, мар сярысь малпасько, кыӵе омырен «шокасько». Ӵош ужась эшъёсылэн гожъяськыны дышетэмзы потэ: «Геройёсыдлэн сямзы лябгес», «Пьесаяд конфликтэз ичигес»… Ваньмызлы тау карисько, ӧй лыдӟысалзы, ӧз тунсыкъяськысалзы ке, аслым ачим номырлы ярантэм исьникут кадь потысал.

Кыӵе со туала дыр?

Туала дыре компьютер ваньзэ вормыны турттэ. Ас понназ Интернет туж усто арбери, но… Бӧлякъёс ог-огзэс вунэто, нылпиос ульчатӥ ур-ляр бызьылыса шудытэк, кӧсытэсь будо, кузпал Интернетысь шедьто, лыдӟыны кулэ книгаос быръё… Нош ӵыж-выль книга мыным луло маке кадь потэ, сое кияд кутӥськод ке, буёл зынызлэсь ик выжыкыл дуннее шедиськод. Асьмеос но роботъёслы ум пӧрмиське-а ни?

Яратоно книгады

Мынам яратоно писательёсы Антон Чехов, Николай Островский, Лев Толстой. Туж кельшо адямиослэсь мур психологизэс валась гожъяськисьёс. Соосын тодматскем бере лач-лач тэк гинэ пукем уг поты, улонын мае ке воштэм, кинлы ке пайдаё луэм потэ. Ӵуказе нуналэз витьытэк, туннэ ик уж борды ӝабыртӥськиськод, мар ке выльзэ гожтӥськод. Кызьы Роберт Энтони вакчияк но валамон вераз: «Малпам сюрес вылад мыныны ӧд ке поты, кулэ интыяд ноку уд вуы».