Ульфат Бадретдинов
5 Юан

Ульфат Бадретдинов

1378 {num}

Ульфат Шайхутдинович Бадретдинов – удмурт прозаик, журналист, Россиысь писательёслэн огазеяськонзылэн ёзчиез, «Кизили» журналлэн валтӥсь редакторез.

1
Кин со тӥ понна писатель?

Гожъяськытэк улыны быгатӥсьтэм адями – со писатель. «Писатель не тот, который пишет, а тот, который не может не писать». Озьы шуиз вал Лев Толстой. «Писателя рождает его детство», – таиз Валентин Распутинлэн кылъёсыз. Та веранъёсын быдэсак соглаш. Тазьы ватсасал на: писатель – калыклэн лул-сюлмыз. Уно адямиослэсь малпанъёссэс, шугъяськонъёссэс, шумпотонъёссэс полэстыса, ас сюлмыз пыр поттыса, гожъяськись калыклы ик вуттэ. Лыдӟисьёс писательлэн чуръёсыз пыр улонмес дунъяло, асьсэ шоры но палэнысен учкыны дышетско.

2
Мар со тӥ понна литература?

Литература – со адямилэн лул-сюлэмызлэн сиёнэз. Кин ке но сотэк улыны быгатэ, вылды. Озьы ке но котькудӥзлэн та сиёнэз «веръямез-оскалтэмез» вань. Литература – мынам улонэлэн одӥг люкетэз. Сое мон ас бордысьтым палэнтыны уг быгатӥськы.

3
Кин тӥляд лыдӟисьты?

Нырысь ик – со мынам анае, сузэръёсы, апае, кырсие но мукет матысь ӵыжы-выжыосы. Озьы ик ӵош дышетскем эшъёсы, тодмоосы. Удмуртъёс сяна, табере лыдӟисьёсы пӧлын вань ӟучъёс но, бигеръёс но, башкиръёс но, комиос но, поръёс но, мордваос но, эстонъёс но…

4
Кыӵе со туала дыр?

Асьмеос улӥськом туала дыре. Мукет вакытъёсты тодӥськом кинъёслэн ке гожъямъёссы пыр гинэ. Соин ик азьвылзэ но туалазэ ӵошатыны вырим ке но, шонер дунъет сётыны быгатом меда? Котькыӵе вакытлэн аслаз куронъёсыз, шуг-секытъёсыз, вормонъёсыз, сюресъёсыз. Котькуд адями та дунне вылын одӥг пол улэ, соин ик улон вакытысьтыз со чеберзэ, шумпоттӥсьсэ, чылкытсэ адӟыны мед быгатоз.

5
Вить яратоно книгады?

Чингиз Айтматов – мынам одӥгез яратоно писателе. Солэсь вань книгаоссэ лыдӟи. Туалаосыз пӧлысь Алексей Иванов кельше. «Сердце Пармы» романэз туж быгатыса гожтэмын. Удмурт писательёс пӧлысь Геннадий Красильников но Роман Валишин мон понна дуно луо. Джек Лондонлэсь гожъямъёссэ куке но яратыса лыдӟылӥ.