Алексей Пикулев
Удмурт Image

Алексей Пикулев

1301 {num}

Алексей Пикулев – туала удмурт рэпер. Вордскемын Пичи Пурга ёросысь Байситово (Пуро) гуртын. Али Удмурт кун университетысь удмурт кылосбуръя факультетын дышетске.

Рэп жанръем крезьгур но «ПШNR»

Нырысь кунгож сьӧрысь артистъёс кельшо вал. Нош 8–9 классын дышетскыкум рэп крезьгурен тунсыкъяськыны кутски. Али но ӟуч рэпез кылзӥсько. Мон малпамъя, ӟуч кылын та жанрен кырӟасьёс туж ӧжытэз ӟечесь луо. Мыным али кельшо Adamant но Миша H1GH.

Гожъяны кутскыкум, «ПШNR» (Пушнер) кушем ним кутӥ вал. Дыр ортчемъя, асме сцена вылын эскерыны кутски, эшъёсыным «Берекет» группа кылдытӥм. Озьы каллен калыклы тодмо луыны кутски. Кылем арын «Куарагур» проектэ пыриськи, отын вормисе потӥ. Мон понна со вормонэ паймымон луиз.

Рэп жанр сярысь оглом верано ке, со мыным кельше аслаз пуш узырлыкеныз, аспӧртэмлыкеныз. Кылъёсын узыр кылбурлэсь, тупась крезьгурен огазеяса, тунсыко кырӟан кылдытыны луэ.

Утчанъёсы

«Куарагур» проектын вормисьлы кырӟанэзлы клип снимать карозы шуизы вал. Но со кырӟанэ мыным малы ке туж ик уг кельшы вал, соин сое воштыны малпай. Крезьгурзэ но «лыдӟон» стильзэ воштӥ, вуж кырӟанысь кылъёсыз гинэ кылизы. «Лыдӟон» манере но небытгес, лякытгес, гань-гань куараен пӧрмиз. Кельшоз-а, уз-а кылзӥсьёслы, уг тодӥськы, но оскисько, дунъясез сюроз.

Матысь дыре ньыль-вить кырӟанъёслэсь пичи сборник поттыны малпасько. Татын ини кылзӥсьёс умой-умой шӧмъяны но дунъяны быгатозы выль стильме но кырӟан лэсьтон манерме. Та ужам пыриськоз на удмурт эстрадаысь тодмо артист, нош кин – али шараяме уг поты, ваньмызлы ас дырыз.

«L.I.A.R.» группа но мукет проектъёс

Одӥгаз ӝытэ пиосын (Алексей Пикулев, Иван Белослудцев, Алексей Софронов, Рияз Зайнутдинов) люкаськыса, «L.I.A.R.» нимо группа кылдытӥмы. Рок жанрен крезьгурез шудӥськомы. Нырысь со мыным матын ӧз поты, но пумен тунсыко йӧтӥз. Валай, котькуд крезьгурлэн аслаз аспӧртэмлыкез но чеберез вань, котькытысь мае ке выльзэ но кулэзэ шедьтыны луэ шуыса.

Нош кемалась ик ӧвӧл Ваня (Белослудцев) келяз мыным туж тунсыко гитараен гожтэм партиязэ. Кылзӥськеме бере ик йырам мукет инструментъёсты но быдэсак аранжировкаез кылыны кутски. Иванэн ӵош пукыса, кык-куинь нунал куспын быдэс инструментал кылдытӥмы. Ми ог-огмес капчиен валаськомы, соин ужмы чаляк но тунсыко мынэ. Крезьгурмес дасяммы бере, ӝыт куспын кылъёссэ но, куаразэ но гожтӥмы. Тазьы вордӥськиз «Улон дыртэ» нимо кырӟанмы.

«MORT»

Кема малпай выль кушем ним (котьку котьмае кема малпасько). Собере дугдӥ «MORT» ним вылэ: со вакчи, туж ик тодмо но ӧвӧл. Кылӥськемезъя мыным яраз, вакчи но чурыт, одӥг слогъем, котькинлы лыдӟыны луымон. «Морт» – со вашкала удмурт кыл, азьвыл солэн валатонэз «адями» вал. Малпасько, табере кушем нимме уг вошъя ни, таиз мыным туж яра. Угось валтӥсь малпан мон понна – «адями» кыльыны.

Азьланезлы малпанъёсы

Нимысьтыз крезьгурлы дышетскеме ӧвӧл бере, азьланяз малпасько, армие ветлэме бӧрсьы, крезьгуръя колледже пырыны. Эшшо но тросгес та удыс сярысь тодэме потэ, угось мон котьку ваньзэ ачим лэсьтыны дышемын. Али малпанъёсам – ӝоггес выль ужъёсме поттыны, медаз вунэтэ. Вотэсын «MORT SOUND» группае мед азинскоз, удмурт но ӟуч калык пӧлын ас интызэ мед шедьтоз. Кырӟанъёсы но ӵемгес мед кылдылозы вал.

Мукет адямиосын ӵош выль проектъёс лэсьтэме потэ.