Алина Антонова
Удмурт Image

Алина Антонова

67 {num}

Алина Антонова – одӥгез туала егит кырӟась. Вордскемын Алнаш ёросысь Кузьымгуртын, бӧрысь семьяеныз Алнаше выжиз. Туннэ нуналлы Алина Ижкарын улэ. УдГУ-ысь Удмурт филологияя, финно-угроведениея но журналистикая институтэз йылпумъяз, али социальной ужан ӧнеръя магистратураын дышетске, ватсаса РАНХиГС-лэн Ижкарысь филиалаз (Российская академия народного хозяйства и государственной службы при Президенте РФ) тодон-валан басьтэ.

Асме утчан

УдГУ-ын дышетсконме йылпумъяме бере, Ижкарысь 97-тӥ номеро школае интыяськи. Удмурт кылъя дышетӥсь луи,  крезьгуръя занятиосты но оскизы. Педагог-организаторын но кӧня ке  ужай, но солэсь туж шаплы куштӥськи, малы ке шуоно  трос нылпиос, ужрадъёс оскемын, ваньзэ учконо, чаклано, кужым сётоно. Со сяна, огшоры урокъёслы но дасяськоно. Мынам куать классэ вал, котькудаз ог 30 дышетскисьёс.  Нырысь  вылтӥяськылӥсьёс луизы, ми удмурт кылэз ум дышетэ шуылӥзы. Но мон соослы яратон пыӵатыны быгатӥ. Со понна ик мылкыды ӝутскылӥз. Озьы ке но, аслам интыям ӧвӧл шуыса валай.  Мукет ужан интые кошки. Мыным удалтӥз. Али Лулчеберетъя но туризмъя министерствоын пресс-секретарь луыса ужасько. Нимысьтыз  кивалтӥсе кельше. Соку ик монэ ки улаз басьтӥз, ужаны дышетӥз. 

Тужгес яратоно уже – крезьгур

Огпол  трамвайын укное учкыса мынӥсько вал. Шӧдтэк шорысь йырам крезьгур берганы кутскиз, со борды кылъёс но ватсаськизы. Ачим валатэк кыли, «Чупалляй» кырӟан вордӥськиз. Сое  нокытчы гожтоно ӧй кариськы, кылъёсыз но крезьгурез ялан йырам бергазы. Соку валай: та ужез калык яратоз, кылзылоз но  кырӟалоз. Ыстӥ «Электроникъёслы». Соослы но туж кельшиз. Кыӵе ке тодмо кырӟасен быдэстыны малпамы. Влад Андреевлы вазиськи но соглаш луиз.  Озьы ик «Ой, яра» кырӟанэз но ӵемысь радиоын куро. Озьыен, кылзӥськисьёслы со кельше.  Мон туж шумпотӥсько, калыклы ярась крезьгур ӧрез шедьтыны быгатӥ шуыса. Кырӟан сюресме туала шӧмо ужъёсты  гожъян бордысен кутски.  Ӵемысь соос  калыклы ӧз яралэ.  Берло гинэ валай, кыӵе кылъёс но крезьгуръёс  адямиослэсь сюлэмъёссэс вырӟытыны быгатозы. Южтолэзе ортчись «Мисс Эктоника–2017» ӵектосэз но ачим радъяй. Юрттыны мылкыд карисьёс но трос луылӥзы. Гужем  «Радист» лагерьын ужалляй. Отысь эшъёсы но та ӵектос борды басьтӥськизы. Котькытын мед ужалом, дышетском – крезьгур котьку монэмын. Соин мон шудо.

Дышетскон бӧрсьы дышетскон 

Тросэз верало: бакалавр – со вылӥ дышетскон ӧвӧл, соин магистратурае пыри. Академиысь «Государственная и муниципальная служба» ӧнеръя тодон-валан басьтӥсько.  Отчы пырыны анае ӵектӥз. Пумит ӧй луы, малы ке шуоно мон солэсь котьку адӟем карисько. Милям улон сюресъёсмы но соин огкадь. Со удмурт кылосбуръя факультетын дышетскиз, школаын ужаз, собере чеберет удысэ выжиз. Мон кадь ик со но ассэ утчаз, пӧртэм удысъёсын эскериз. Малпасько,  мынам улонам та ваньмыз огшоры ӧвӧл. 

Но азьлапалэз сярысь вераны секыт.

Дыры луыку

Улон интыям утялтӥськыны яратӥсько. Вань сюлэмшугъёсы ик ортчо. Озьы ик табань пӧраны яратӥсько, эшъёсме куно карисько. Киужен вырыны но мылкыды вань – керттӥськыны, мар ке вурыны…

Асме мукет паласен усьтон

Монэ «Мисс студенчества Финно-угрии» вожвылъяськонын вормонэ  бурдъяз, кужым но оскон сётӥз. Озьы ик кырӟанъя   «Универвидение» ӵектос дуно потэ. Россиысь кизилиосын пумиськи, соосын вераськыны шуд усиз. Жаляса верано, сыӵе паськыт ортчись ӵектосъёсын валтӥсь интые шоу амалэн дасям номеръёс вылӥ дунъясько. Устолык но быгатэм палэнэ кылё. Кемалась татуировка лэсьтэме потэ вал. Анае пумит луылӥз. Трос пол солы вазиськемысь, оло,  берлозэ соглаш луиз. Латин кылын «Felicitas est intra me» («Шудбур мон пушкын») гожтэмез суреданы косӥ.  Малпасько, та веран кыл мынам улон девизэ. 

Ой, яра, яра, яратӥсько…

Мыным дуэтэн кырӟаны кельше – калык но мон. Нимысьтыз мылкыд лобӟе, куке концертъёсын учкисьёсы кырӟанме тодо но монэным ӵош сое быдэсто. Соку котькуд адямилэсь шунытсэ шӧдӥсько,  быдэс сюлэмме, вань яратонме кузьмасько. Нош сцена вылын вӧзам кырӟась луиз ке, соку кык полэс пыкет но юрттэт луэ. Огъя вераса, кырӟанъёсы ӵемысь секытэн вордӥсько. Влад Андреев но Александр Ашихмин крезьгуръёслы дунъет сёто. Ваньмыз умой пӧрмемын ке, чуръёсты малпаны секыт уг поты. Олокыӵе  валамтэ кылъёсын, мудрон пуштросэн кылбуръёс гожъяно ӧвӧл. Калыклэн йыраз кылись но сюлэмезлы ярась ужъёс кулэ.